ياتو مشانق؟ وياتو أغاني؟
الى : أستاذ الأجيال .. وردي، في مهرجان الإحتفاء به
من السر عثمان الطيب
ياتو مشانق..
ما زلزلت معانا وقارا ؟؟
يا تو أغاني،
ما شدّيت ، في عشق الوطن ، أوتارا ؟؟
يا فارسنا القابض جمر الموقف حمرة عين وصمود وجسارة
**
منّك مطر الغنوة.. المبدأ.. الفكرة
النيلين البلّن ريق الصحرا
دفقن لون الحياة والخضرة
طلعت نخلة ونبتت زهرة
حيْ ووبات البارح صنّتْ
قحّن.. وضحّن.. وغنن للآمال ، زغرودات بكرة
كل ما الليل غافلنا لِبسنا .. ضوّيناك شمعة وتُقّابة
لما انْطوْطوْ فينا دبـيبـو
لدغ القلب أحماهو وجيبو
دبّت فينا الروح بالنغمة المن تالاك نسمة وهبـّابة
شدّت حيلنا النّهض إتنفّض
ضد الحال الوقف اتعارض
الداخلانا.. المننا مارقي.. تمّرناك ليهن رُقّابـة
سدّينابك باب عوجاتنا
فتّحنابك دور بهجاتنا
داوينابك غم وعكاتنا
علّينابك حس ضحكاتنا
طعّمنا بك مُرْ كُرباتنا
قسّمناك معروض شرباتنا
ساعة الناس فرزت كيمانا.. نحن البيك يكبر قيسابنا
وكان الناس لِسناتا أمانة
إنت ونحن الكلمة الدوغري
أول ناس زرعت تيرابا
لما تعود للبلد الهولك... لي خرطومك وام درمانك
غصبا عن سيطان جلاّدك ... ورغما عن حيطان سجّانك
وترجع زي ما العيد بيسافر ويرجع
وتمرق زي شمس الله اللازم تطلع
وتنبع زي ما النيل ابتدأ في المنبع
كل البلد الهولك يصحو
يصبح صبحو.. وينصح جرحو
ينصح جرحو .. ويصبح صبحو
والأحباب – عينك يا تاجر- بالأحضان تقلد أحبابا
(عدل بواسطة maman on 01-13-2003, 07:27 PM)
maman
فيس بوك
تويتر
انستقرام
يوتيوب
بنتيريست