لا إله إلا الله..لاحول ولا قوة إلا بالله..بالله العلي العظيم حراية تقلي التسالي ويادوب جيت داخل البيت..كنت في الضرائب السودانية..مشيت أجدد الجواز (جواز السفر عشان المعنيين بالأمر مايفهموني غلط) ..دخلت السفاره وعليكم أمان الله كان لقيت بصات رفاعه واقفه كان قلت دا السوق الشعبي وللا موقف بنطون رفاعه-الحصاحيصا..أول ماتدخل وتقول بسم الله وتصلي علي الحبيب تلقي علي يمينك البقلع مننا زكاة الحكومه(طبعا الزكاة المفروضه) قاعدين ندفعها من ما عرفنا الماهيه وعلي شمالك واحد قاعد يبيع الواطه طبعا ماخاتيها في قفه..دا نظام حديث واطاتهم علي الورق(إذكر زماااااان ناس حكومة الصادق المهدي باعوا لينا واطه وبدل مايسسففونا ليها سفوها هم..يللا حيروحوا من ربنا فين) المهم نواصل..تقدم رجلك اليمين وتدخل تلقي برضو واحد بقلع من الناس قروش وجاره برضه بتاع قروش بس دا بيلمها ويحولها لى أهلنا في السودان ..كتر خيرو دا الوحيد البياخد ويدي أما الباقين عليك أمان الله زي شارع الإسبتاليه الوراني يودي وما يجيب ..وشارع الإسبتاليه الوراني معذور كان الإستباليه ذاتها بتودي وما بتجيب والبدخلها ويمرق منها يسووا ليهو سمايه من جديد..جنبه على طول مكتب تاني الظاهر دا الببيع السكر والشاي والحاجات التانيه قالوا دي إسمها شنو؟؟ماعارف..بس زي كأني سمعت كدا إنها أٌختا لي إيرلندا الحره عشان قالوا إسم ابوهم واحد..وقصادك ..قول ياساتر ..إتنين من ديوك الجن (مع الإعتذرا لحبيبنا ديك الجن) إلا من غير علاعيل..ومع إنهم ديوك جن وماليهم دخل بالقروش لكن برضو لازم توريهم إيصالات القروش الدفعتها زمااان..عاد هم يحولوك للحلاقين..خمسة حلاقين زي بعض البعجبك تحلق عندو..بس والله حلاقتهم مافيها فرق بين حلاق وحلاق..كلهم حلاقتهم بالموس ..يعني تمرق منهم جاهز لضربة شمس..وفي آخر دكان تلقي شيخ السوق..طبعا دا بجوه المساكين ال ليهم كم شهر وللا كم سنه ماحلقوا (وسبيب راسهم) كتير ومتراكم..وطبعا مساكين ماعندهم حق الحلاقه..بعضهم يوصي ليهم بحلاقه علي خفيف وبعضهم يقول ليه أنا مابصدقك إلا تحلف فوق كتاب الله إنك عدمان التعريفه (عز ما بعده عز) ..وبعد ما المسكين يحلف برضو يوصي ليهو بحلاقه على قدر حاله..وبعد ماتكون عدمت الصوفه تتلفت وراك تلقي واحد ببيع الثقافه شئ كتب وشئ دواوين شعر تجي تتفرج بس وتمشي طبعا دا رقيصا مابكون عندك ليهو شعر بعد ما خلوا صلعتك تزلق النمله..المهم في كل الموضوع دا لما جيت إستلم الجواز تعال شوف الإيصال ومفرداته ....مساهمه (دي الضريبه) شفتوا جمال اللغة العربية وسعة صدرها؟؟؟؟..خدمات مغتربين (حرَم مافي زول خدمنا غير ضراعنا دا) ..صندوق خيري..ما عارف المقصود بيهو صندوق لعمل الخير وللا مقصود بيهو عم (خيري جارنا الله يرحمه) المهم خيرو لا شفناهو لا عم خيري الله يرحمه شافو....رسوم تجديد جواز(ودي طبعا لسنتين) عشان جاييكم بعدين في الكلام..زكاة (طبعا دي زكاة الحيكومه) عشان نحن زي ماقلت قبيل قاعدين نزكي والحمد لله...أخــــري..وأخري دي لي هسع ماعرفانها شنو؟؟؟هي أصلا ثابته لغاية ما يلقوا ليها مسمي ويجيبوا أخرى أخرى يختوها في محلها....قلبت الجواز لقيته مجدد سنه واحده قلت سبحان الله يمكن الراجل نسي وعملها سنه بدل سنتين جيته راجع وقلت ليهو..يا أستاذ الجواز جددتوهو لي سنه واحده بس...قال: أيوه عارفينن..سألته: طيب ليه؟؟؟ رد: إنت المفروض تغير الدفتر كله لأنه خلاص كمل عشره سنوات بس ماعندنا دفاتر وعشان كدا (إسثنيناك) وأديناك سنه واحده طبعا إستثنيناك دي أنا فهمتها (إستكردناك..إستغفلناك)لأني مشتري سنتين بسنه ..شايفين بالله الرحمه والحنية على المواطن؟؟؟؟..قلت: طيب الرسوم إنتو اخدتوها مني لسنتين ..لما أجي أجدد السنه التانيه حأدفع رسوم تااااني؟؟؟ قال : طبعا ..قلت: وطيب قروشي الدفعتها هسع دي مصيرها شنو؟؟؟ رد: مصيرها إنتهي خلاص.. ماحاولت أزيدو معاهو لأنى عارف إنى ما حأطلع بنتيجه وأنا مابحب حجوة أم ضبيبينه..سكت..فاذا بنقاش يدور بين أستاذ وحلاق آخر..ياخوي إنت أخدت مني رسوم تجديد سنتين وجددت لى سنه واحده ليه؟؟؟؟رد الحلاق: ما عندنا دفاتر..الأستاذ طيب ياخي أنا ذنبي شنو تحملني قصوركم..اخدت حق الحكومه كمان أديني حقي وخليك عادل..رد الحلاق: طيب هات الجواز ألغي ليك تجديده وأرجع ليك قروشك بس ما تجي راجع تاني وتقول جددوا لي جوازي..سأله الأستاذ: والدفاتر دي خلصانه عندكم من متين...رد الحلاق: شهرين أو تلاته شهور...وزي ماعارفين شلاقة الترابله ما قدرت أمسك نفسي فعلقت ورديت: تلاته شهور؟؟؟؟أصلها جايه من وين؟؟؟والله دي كان راكبه نمله كانت وصلت زمااااان..الحلاق أداني عين عليك أمان الله تولع منها السجاره..مسكت جوازي وبقيت أكوس درب الباب البمرقني من صالة الضرائب..بعد شويه قعدت مع الأستاذ دا في البوفيه طبعا حقنا نحن بوفيه لكن حق السفارات التانية (كافيتيريا) وعلي سندوتش فول وكباية كركدي إتعرفنا علي بعض ولقينا الغبش القاعدين كلهم في البوفيه شاكين لي أب إيدا قويه..وجدته على درجة من الوعي غير عادية خاصة بمشاكل التعليم ومايفترى من حديث عن الشهادة العربية..طلبت منه المشاركة بالكتابه عن التعليم ومشاكله في منتدي النيل فقبل في أريحية ووعدني بأن بدأ إعتبارا من إصدارة شهر سبتمبر..عندها فقط تنفست الصعداء,,قلت بصوت مسموع...الحمد لله دا حق السنه الكان داير يروح شمار في مرقه....بالمناسبة كان داير تخوف ليك مغترب جيب ليهو سيرة السفارة..عليك أمان الله اللقمه تقع من إيدو...السفاره تقول بعاتي ..ماعارف الناس بتخاف منها ليه..وبالمناسبه قبل أم العيال المعاي هسع دي أنا كنت خاطب واحده تقول لي بروك شيلدز إنتي شنو؟؟؟ قبل مواعيد الزواج بتلاته أيام فسخت الخطوبه وقمت صوف..عشان أبوها إتنقل من وزاره لسفاره..قلت كمان يبقي علينا نكد هنا وهناك؟؟.. هسع الكلام الحصل في الضرائب دا يفسروه كيف؟؟؟؟؟أكيد دا تمنجـــــه حضاري
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
nile1
فيس بوك
تويتر
انستقرام
يوتيوب
بنتيريست