|
|
 # عفواً#
|
أنا قلبي شان ينساك دايرلو تاني زمن
عفوا ًحبيب قلبي , ما إنت لي وطــن
أنا قلبي ذنبو شنو عودتو إنت عليـك
علمتو يبكي ينوح يوم ما يشوف عينيك
وكتين ملكتو خلاص فرّيتها ليه جنحيك
خاطبتو باستبداد قُت ليهو أخطى الليك
هو الصابر المسكين راجي الليالي تروح
لا كل لا مل لا عاتب المعشـــــــوق
كل القِدِر قالو : يا ناس كتلني الشـوق
ما الضُقتو في دنياي ما ضاقو قط مخلوق
أنا يا خلايق آه ضقت العذاب أصنـاف
شفت الليالي سُقُد تشهد ( تبارك) و) ق~)
جربت صبر أيوب كانت نهايتو كفــاف
و الصابني ياالمريود بالعين محال ينشـاف
لو داير تعرف البيّ أرجوك مرة تعــال
أقعد و عاين و بس ما تسأل أيّ ســـؤال
أنا يا حليلي أنا أصبح يميني شِمـــــال
جواي عشرة أشياء خلت حياتي محــــال
حظي التعيس الشوم الغيره و العــــزال
ليل الضياع و الخوف و الحيرة و الإهمــال
إنك تملي معاي و بيناتنا كم أميـــــال
إحساسي إني بسيط و أحلامي واقفة جبـال
صبرا ً صبرتو عليك ذكرني سيدنا بلال
حتى ان سكتّ أنا تتكلم الأطــــلال
و آخر المطاف بالليل سافرت باستعجال
لا طلت بلح الشام لا ضُقت راحة البـال
برضك تقول لي اصبر اتحمل المكتوب
اتعوض الله خلاص أنساني يالمحبــوب
خليتني زي عصفور هبت عليهو هبوب
فنّتلو عُشّو شِمال شالت صِغارو جنـوب
جعفر السقيد
الاغنيه دي بصوت الفنان جعفر السقيد وكلمات حاتم حسن الدابي و الحانه
|
|
 
|
|
|
|
|
| |
فيس بوك
تويتر
انستقرام
يوتيوب
بنتيريست