Quote: للعلم حتى في امريكا واوربا تحارب الهجرة الغير قانونية والغير منظمة اليها ومالها من اثار اقتصادية على الدولة المستقبلة ولها قوانين وفي امريكا لها شرطة مختصة ومنها زيادة الانفاق الحكومي على دعم السلع والخدمات التي يستمتعون بها مع المواطن السوداني
اليشوف كلمة (خدمات) يفتكر السودان دا منافس لفنلندا المافيها زول بيجوع أو بينوم في الشارع دا غير إنو أرقامك غير دقيقة، بالمرة، ياخي في طلبة جامعات ما بياكلوا 4 رغيفات في اليوم! وياريت ستة رغيفاتك ديل يلقاهن مواطن دارفور أو الشرق أو ساكن جبال النوبة والنيل الأزرق ياخ!
و(للعلم) يا "مواطن الجزيرة" في أمريكا 11 مليون مهاجر غير شرعي، بعلم السلطات يا (مواطن الجزيرة)، شفت كيف! وهم ما ظهروا بالعدد دا في السنة الفاتت، لا، ديل بالملايين من التسعينات حسب التقرير الرسمي دا
والحكومة الأمريكية ما بتنفق عليهم، بل بالعكس بتغض الطرف عنهم لأنهم على عكس ما تتصور أنت أنهم خصم على الموازنة هم في الحقيقة إضافة مجانية للاقتصاد، فلا الدولة تتكفل بضمان اجتماعي ولا علاج ولا تأمين وظيفي لواحد فيهم، وفوق ذلك هم عمالة رخيصة لكل من يطلبها، دي الحقائق المفروض يتم تضمنها في الموضوع لتوخي الدقة.
يلا طبق نفس المعايير دي على الناس اللاجئين وطالبي المساعدات في السودان، والوافدين من كل الجهات وبالمناسبة يا (مواطن الجزيرة) العزيز، أنت أغفلت إنو معظم الضيوف من دول الجوار تقوم بإعانتهم المنظمات سواء مباشرة أو عن طريق تقديم المساعدات للدولة ومنها إليهم.
دول أوروبا تستفيد من الأزمات الدولية باختيار فئات محددة لإدخالها عبر برامج التوطين كما حدث في حالة سوريا والعراق والغرض إضافة للتنوع ودفع اقتصاد الدولة، أوروبا تمنحك الجواز في فترات تتراوح بين سنتين إلى خمسة في أقصاها.
Quote: يجب تقنين وجود الاجانب العاملين بالسودان ب إقامات قانونية بمقابل ما لايقل عن500 دولار كما معمول بها في دول الخليج اللاجئون من الحروب اماكنهم معسكرات حدودية تدعمها الامم المتحده ان سياسة غض الطرف عن الوجود الاجنبي بالسودان يدفع ثمتها المواطن السوداني بالداخل والخارج والحكومة ايضا التوقيع مواطن من الجزيرة
عقلية التصحر والريع والجباية الأنهت السودان كدولة! بدل يعمل وينتج وينافس الأجنبي بيفضل الاتجار في الإقامات والتأشيرات!
بعدين (سياسة غض الطرف) دي ما ياها الدفع تمنها (مواطن) الهامش منذ الاستقلال، ياهم ديلك عايشين بأسوأ من ظروف اللاجئين وداخل حدود السودان أنت قايل رغايفك الستة ديل حد أدنى مشترك هم بحلموا بيهوا حتى؟
وتعال النديك معلومة مشروع الجزيرة لما أسسوهوا الإنجليز جلبوا ليهو الأجانب الفلاحين (كعمال غيط) من صعيد مصر، ومعاهو مشروع الزيداب بينما تم توطين أهل البلد السودانيين في الكنابي منذ تأسيس المشروع وللآن، فالأخ (مواطن الجزيرة) دا عليهو يقرأ التاريخ.
ولو ما متفرغ للقراية عليهو يسأل نفسه ليه بيلقى في الجزيرة أسامي زي (حجازي، منوفلي، سرحان، عشماوي، حمادة، قناوي، مصيلحي، حسنين، عوضين، هريدي، عبد المعطي، أدهم، زكي، إلخ) ديل طاجيك ولا بلشفيك؟
وهم يعيشون بذات نمط المعيشة المميز بوجود الجاموس والبهايم في نفس المساحة مع البشر.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة