|
Re: بت السودنة (Re: ياسر بيناوي)
|
بت السودنة ( 4 )
وفي نهاية الليلة السعيدة وانا خلاص بودع فيهم ماما قالت لي اعتبر البيت بيتك وتشرف في اي وقت وياريت تاني تجي تزاكر مع فيفي . المهم مع السلامة مع السلامة وخرجت من عندهم مشبع بهم ( كما قال استاذنا بشري الفاضل ) حتي رايت ( اللبخ ) طربان ويتراقص زي البيسمع في عثمان حسين ( خلاني لاموني عابوا عليا هواك ) وركبت العجلة وحسيت بيها جارية بدون احرك البدال . وفي صباح اليوم التالي مشيت موعد اللقاء الصباحي وطبعا بقي مافي حوجة لتبادل الكتب الجواها الجوابات والحركات بتاعة المراهقين دي ههههه . نحن بقينا نخش البيوت من ابوابها كدة . المهم لاقيتا وبعد التحايا والاشواق والعوارات بتاعة المحبين ديك قلت ليها : اها الليلة نمشي شجرتنا وللا نمشي البلدية ؟ قالت لي : البلدية احسن شان بعدها ماشة ناس خالتي في الفكي مدني . في اللحظة دي صاحبتها سلوي ( الثقيلة ) . طبعا هي ما ثقيلة ولاحاجة بالعكس زولة ظريفة جدا لكن انا ما بدورها لانها بتجي في اوقات عجيبة وتخرب لينا ونستنا . غايتو ساقتا ومشت وانا مشيت علي مدرستي . بعد الطابور خشينا الفصل لكن استاذ الرياضيات ما جاء . قام مبارك صاحبي قال لي يا ياسر والله انت ليك كم يوم ما طبيعي والفصل دا كلو بقي يعلق عليك في ناس قالوا بتشرب بنقو وفي ناس قالوا بقيت تسكر يازول مالك الحاصل شنو ؟ قلت ايوة ان سكران وسكران فل ( نطط عيونو ) كيف يعني ؟ قلت ليهو سكران بيها يا مبارك سكران بيها هي . وحكيت ليهو القصة من بدايتها لحدي اللحظة . ودي كانت الدقسة . ولي قدام ح تعرفوها دقسة ليه . المهم انتهي اليوم الدراسي .ورجعت البيت غيرت واتشيكت وبقيت مارق مشيت لقيتها واقفة منتظراني قدام باب البيت سقتها وبقينا ماشين وفي شوراع السودنة البديعة مرة تلاقينا وردة تمد راسها بي فوق السلك وترمقنا بنظرة اعجاب ومحبة ومرة شجرة نخيل تداعبنا باطراف الجريد ومرة تبتسم لينا شجرة حنة .لحدي ما وصلنا حديق البلدية . وبرضو عندنا فيها موقع ثابت وظريف . جالسين وحولنا كل اصناف البهجة والاطفال منتشين وعصافير البلدية تزغزغ وتمت الناقصة لمن جاتنا بنية عسوووولة عمر 3 سنة قعدت في نصنا وبقينا نتونس معاها وجبنا ليها غزل البنات ( يعني حلاوة قطن قال سموها كدي ) . بعد شوية نلقي الناس يتاجروا . في شنو ؟ عبد الكريم جاء ( عبد الكريم دا كان ضابط نظام عام مكره الناس في عطبرة ) . طبعا كنا عايزين نقوم جارين لكن البنية نوديها وين ؟ . قام ابوها جاء في نفس اللحظة الوصلنا فيها عبد الكريم وبصوته الكريه ( تعالوا هنا يا صعاليك ) هنا ابو البنية اتدخل : يازول احترم نفسك #################### انت . ومشي عليهو ( اتضح انو ضابط في المدفعية ) . غايتو ما عرفت الدار بيناتم شنو لكن عبد الكريم دور عربيتو وفات وابو البنية جانا راجع مبتسم وقال : طالما انا موجود ما تشيلو هم . انتو ماشين علي وين ؟ فيفيان : ماشين السودنة الضابط : خلاس انا ماشي القيادة اركبوا نوصلكم وركبنا لمن وصلنا بيت ناس فيفي وهو وزوجتو وبنيتم فاتو . اهااااااا اتاريهو مبارك مشي حكي لكل طلاب المدرسة لي درجة اني بقيت اجي ماشي واسمع ليك الشباب ( فيفيان يا اخواني جنوبية حبت ليل الخرطوم . فيفيان يا اخواني قبطية حبت زولك الملخوم ) المهم اغنية الاستاذ النور الجيلاني راجت رواج غير عادي في المدرسة لمن الاساتذة انتبهوا . . . . نواصل . . . . بالله دي حكومة دي ؟
|
|
|
|
|
|
|
العنوان |
الكاتب |
Date |
بت السودنة | ياسر بيناوي | 08-08-18, 05:44 PM |
بت السودنة | ياسر بيناوي | 08-08-18, 05:50 PM |
بت السودنة | ياسر بيناوي | 08-08-18, 05:55 PM |
Re: بت السودنة | Abdullah Idrees | 08-08-18, 07:20 PM |
Re: بت السودنة | ابو جهينة | 08-08-18, 07:38 PM |
Re: بت السودنة | ABUHUSSEIN | 08-08-18, 10:44 PM |
Re: بت السودنة | ياسر بيناوي | 08-08-18, 11:38 PM |
Re: بت السودنة | ياسر بيناوي | 08-08-18, 11:32 PM |
Re: بت السودنة | ياسر بيناوي | 08-08-18, 11:33 PM |
Re: بت السودنة | ياسر بيناوي | 08-08-18, 11:29 PM |
Re: بت السودنة | Basamat Alsheikh | 08-09-18, 00:26 AM |
Re: بت السودنة | ياسر بيناوي | 08-09-18, 11:13 AM |
Re: بت السودنة | ولياب | 08-09-18, 12:02 PM |
Re: بت السودنة | ياسر بيناوي | 08-09-18, 01:10 PM |
Re: بت السودنة | ياسر بيناوي | 08-09-18, 01:12 PM |
|
|
|