يا كبر تحياتي، قول بسم الله، البوست ما بعاتي هههه، لكن بي سبعة أرواح... البوست دا ما ممكن نتفكا منو ومن مزازيكو ومن مفاكراتو (الجذرية في رأيي) بي أخوك وأخوي.. قبل فترة أخونا عوض أبوجديري (زميل منبر) أتانا في الفيسبوك بفيديو اصلي بلادو فيه مزازيك عجيبة جدا في طقس تقليدي جدا ولكن بآلات موسيقية فيها ملامح كالتي رأيناها وأشرنا إليها في موسيقا الماليين، ولكنها ايضا بملامح وتنغيم شديد القرب إلى حاجاتنا لدرجة الحميمية.. لم أجد ذلك الفيديو في اليوتيوب ولا يزال رهين الفيسيوك ويصعب علي نقله هنا الآن (سأحاول)، ولكن بالبحث والتقصي في النت فقد قاربناه إلى مصدر في يوغندا يراوح بين شعبي الباقندا والأشولي وتقاليد موسيقاهما، الأشولي أقرب.. في أثناء ذلك البحث كانت كلامات الهنا حاضرة وبالتالي فقد ضمنت أن عوضا ممن سيقرأ هذا الوست، لكن ابوجديري فأصلا هو من شيعتنا..
أما الآن، فهي كتابة تلقائية وحسنة النوايا كتبها صديقنا عبد الله الشقليني كتعليق مادح لعمر احساس، هي التي أثارت التالي مما أظنه يتعلق هذا بالبوست.
Quote: ٤) لقيت كلام حبيبنا الباشمهندس الشقليني الفوق، والمقتبس تحت هنا دا، قام ذكّرني بي كلام أولاد قلبا.. بعمل لي ارتكاريا اقليمية..
كتب شقليني:
Quote: الفنان عمر إحساس
استطاع الفنان عمر إحساس ، أن يدخل في لفافة الثقافات للشعوب السودانية ، فنظم أغنيات بالرزم واللحون التي توافق وسط السودان ، مما سطع نجمه في الثقافات السودانيين . وتلك إمكانية متقدمة في فهم كيفية تطور النجم المطرب ( عمر إحساس ) ، وتلك محمدة في نقل الغناء إلى ساحات ثقافية متنوعة . تماماً كما عدّل المطرب الفنان " أبو عبيدة حسن " في إيقاعات الشايقية وقد استبدلها بإقاعات موجودة وسط السودان.
====== فكان تعليقي: يا باشمهندس والله إنا نحبك ونحب غنا وموسيقى هنا أم درمان حبا جما وزيكم واحد ويمكن زيادة.. وعارف كلامك دا وارد من باب الثناء على ما طوره وقدمه عمر احساس وأبوعبيدة وآخرون من موسيقا وغنا الأطراف وتقريبها من ذائقة الوسط.. كلام سمح وكل حاجة لكن، لكن كلمتينك ديل (توافق) و(يستبدلها)، خلوني أحس وكأنك بتتكلم من موقع قوميسار المركز الفني الذي يشرح للآخرين مطلوبات النجاح والمرور عبر (هنا أم درمان) وملحقاتها.. وطبعا انت عندنا كبير وحبنا ليك كتير وكلاماتك ما بتمر بدون تأثير وقد وجب أن نكشف الغطاء عن البير.. وعشان كدا الواحد حقو يقول الصراحة، وبي كل صراحة.. بي صراحة حكاية إنو غنا وفنون الضهاري يجب عليها، أو إلا تتوافق، مع ذائقة (الوسط) المركزية عشان تمر إلى الذائقة العمومية؛ الحكاية دي عملت لينا شوية تحسس كدي وارتكاريا وبارانويا كمان.. حقو تراعونا شوية ياخي والله.. نحنا ناس الربوع (الما) ناس الوسط، وعلى اختلافاتنا، محتاجين للغنا بتاعنا دا، غنااانا.. انتو يا ناس الوسط استمتعموا بي غناكم ونحنا مستمتعين معاكم، لكن أدونا فرصة عشان نسمع غنانا بي طريقتنا وخلونا نسمتع بيهو برانا في الأول، وبعدين كان عجبكم فخير وبركة وكان ما عجبكم فتراهو نحنا كلنا اخوان وطالما أخوانكم مبسوطين فانتو حتنبسطوا برضو..
يمين بالله قتلتنا وقتلت فنوننا هذه المركزية ودفنتنا بالحياة .. لم تعد هناك أي فرصة حقيقية لأن تتطور بقية موسيقانا بطريقة علمية وأن تتبادل الإثراء عبر تنوعها الثر فعلا، إلا أن تتسلل مسارقة بين أغنيات (الوسط) وبقبول وتأشيرات من متنفذي الوسط الفني.. كدا ما كويس والله.. بعد شوية أنا خايف إيقاع الوسط يبقا هو ايقاع (الزنق) ويصبح على الباقين أن يقاربوه ويرقصوهو برضو!! لا يمكن أن ترتهن كل موسقتنا لـ (تخت) الفرقة (الرسمية) ولو كسر رقبة وقد لأضان المستمع بي ألات نفخ وأورغنات ما أنزل أبولو الطرب السوداني بها من سلطان وزاتو ما أظن صانعيها فكروا في السودان لما صنعوها.. ياخي بالجد ما ممكن نتجاهل أكثر من (مليون*) طريقة للغناء في كردفان براها، ودي حالتا ٨٠٠ ألف منها بالعربي.. بالله ما مفروض يكون في كلية موسيقا في غبيش؟ هسّع لو ما عمر احساس دا ما كنا مفتكرين إنو السلم السباعي دا مستورد وما من عندينا إلا جابوهو ناس خليل فرح (أعبدة) واسمعيل عبد المعين (التاكا) معاهم من مصر ثم قالولنا خنقته خماسية التم تم خنقا (طبيعيا!)؟ طلع يا هو داك عايش في دارفور!! ما ممكن ياخي موسيقا البجا الوحيدة البعرفوها السودانيين هي لسّع موسيقا أغنية (يا بنية فندان دبنة بي شمالو) الدب الياكل اذاعة أم درمان وتلفزيونها وكلية الموسيقا وأساتذتها!! يبدو انها مرت إلى الذائقة العامة عبر ما قدمت من الرشاوي اللغوية ولا تزال تقدم لهم في الرشاوى الفكاهية.. أو كفولكلور!! بي صراحة وبالله، ناس غنا وموسيقى (الربوع) ديل أظنهم قدموا ما يكفي من هدايا ورشاوي ومن صبر ومن غيرو.. خلاص كفاية.. مامفروض يكون في هوامش موسيقية تاني، الاذاعات الاف ام والفل اوبشن والمذيعات السمحات على قفا من يشيل.. محمد النصري براهو يساوي ٥٠٠ من ناس أغاني وأغاني، تاني ما عايزين زول يستبدل ايقاعات أي قوم لتناسب مزاج وإيقاعات أي قوم تانيين مولودين وقاعدين في داونتاونات الخرطوم القديمة .. الما عاجبو يقلب الموجة طوالي..
ومن هنا نحي عمر احساس طالما حافظ على أصل أغنيته وإيقاعها ورقصتها وطالما طورها وبا ريت بعيدا عن تخت الاذاعة والكلية.. كما ونصفق لبطولات عبد القادر سالم ولعاصم الطيب وتاني منو؟ حافظ عبدالرحمن والباقين ما بعرفهم، لا أحد.. لا موسيقا لا كدنداية لا كول لا سلات لا ربابة لا لا لا.. ياخي محتاجين الفرصة لكي يمكن لأي موسيقى وغنا موجود لأن تتطور لأهلها أولا وثم فليعرفها الأخرون لو رغبوا، لكن عن اصالة وكما هي، وليست كمنحة تستوجب الرشوة أو الشكر.. والأهم، لأن أهلها موجودين وعايشين، فليست بعدها فولكلور، أوعا من الفلكرة.. يا (أولاد قلبا) المرة الجاية حنطلع مظاهرات من (جابريات) الهوامش الموسيقية والغنائية، وبدل (دايرين بوسطة ومدرسة وسطى والشفخانة وسوق منضبطة) حنهتف (دايرين كليات موسيقا محطتين إذاعة وتلفزيون وحديقة).. ما معقول يا ناس هنا أم درمان ياخي، هناك آخرون!!
هذا، مع أكيد محبتي وتقديري..
* مليون دي مبالغة حسنة النية.. فوجاج ناس الأقاليم.. :)
فاطنة سيدي غالي: جماليات النشاز..!فاطنة سيدي غالي: جماليات النشاز..!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة