عارف يا عبد القادر ، ناس امسودان مرات عندهم شفرات قاسية وصعبة ، بتفكها اشارات بسيطة للغاية ، لدرجة تحير العالم كلو (هل تصدق يا عبد القادر ، العالم ، ما قادر ، حتى الآن ، يفهم عقلية ناس امسودان ، وبكل جبروتهم وادواتهم (ناس العالم وكده) محتارين في هذه الشخصية المتميزة على مستوى الكرة الأرضية..!!)
صورة البروفايل بتاعك يا عبد القادر ، براها بالدنيا ياخي ، فالنور الجيلاني ايقونة عظيمة ، حتى الآن شعوب البنادر والنخبة السودانية ما قادرة تتأمل معاني النور الجيلاني : شكلا..سلوكا..الإضافة المفارقة في المشهد الثقافي والغنائي والشعري في امسودان....!!
هل تصدق يا عبد القادر ، كلما احن لتأمل خريطة امسودان قبل انفصال الجنوب ، اضعها كاملة امامي والخلفية تجربة النور الجيلاني كاملة ، لا اتوقف فقط في اغنيات من شاكلة (فيفيان) ، و (ميري) ، و(جوبا)..وفي كل لحظة تأمل اسأل نفسي: يا ربي الحاجات الشايفها النور الجيلاني في امسودان ح نقدر نشوفها بنفس قدرة الرجل؟..
مرحب بيك..ولن اوصيك كثيرا: فقط كن ذاتك..وتوقع الإختلاف مع ناس كتار..وصدقني اختلاف سيكون بسيط للغاية (دايما افهمو سوداني سوداني)..وكل المطلوب دافع عن حاجاتك ورؤيتك..وما تشتغل بي زول او زولة ..سواء اتفق معاك (عشان يخلق منك جندرمة وباشبوزك في صف معين) أو اختلف معك وحاول يشيطنك ويختك في صف معين عشان يسويك تختة تنشين ما جايب حقو..!
في أي وجود ليك في المنبر ده يا عبد القادر..خت في بالك حاجتين: صورة البروفايل بتاعك ، وحضور استاذنا ارنست (سوداني عجوز)..بس اوع تزود المحلبية وتبقى مسيحي..!!
فقط اتذكر انو في رمضان ، ناس عمنا ارنست بيمرقوا صينة الفطور لمدة تلاتين يوم مشاركة لجيرانهم في الحلة/ الحي..فهل بتقدر تمرق صينة فطور في ايام اعياد الكريسماس احتفالا مع ناس ارنست؟..
لو بتقدر تسوي الحركة دي أو معترف بيها وتضعها في اعتبارك..ممكن يا قريبي نكورك معاك في ضرورة اسقاط نظام الجبهة الإسلامية من قعر القاعدة..اما اذا ما بتقدر..فشنو ليك حق حرية التعبير غير الناضجة..ودي برضك ليها تمنها..!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست