|
Re: خبر عاجل :استقالة زيدان من ريال مدريد عق� (Re: Mustafa Mahmoud)
|
*الموضوع موضوع ثقافة وبس.....* زيدان شال ابطال اوروبا تلاتة مرات على التوالى مع فريق ريال مدريد كاول مدرب يحقق هذا الانجاز والاعجاز... زيدان قدم استقالتو من تدريب الريال وقال الفريق محتاج لتجديد عشان يواصل الانتصارات وحصد الألقاب فى السنوات المقبلة... قال هو محتاج لراحة شوية لانو التلاتة سنوات دى ارهقتو وهو محتاج يرتاح شوية عشان يقدر يفكر بطريقة جديدة ومختلفة... رئيس النادى قبل عذرو... لعيبة الريال قبلوا عذرو... الرئيس الفرنسى قبل عذرو واشاد بتلك الخطوة الشجاعة والجريئة فى نفس الوقت... الصحافة العالمية قبلت عذرو... العالم الاول قبل عذرو... ثقافة العالم الاول انو الحياة محتاجة لتجديد لكى تستمر... الحياة محتاجة لطريق جديد وفهم جديد وروح جديدة عشان الامور تمشى بشكل صحيح... بس يا زيدان عليك الله اخدنا على قدر عقولنا وثقافتنا... انت يا زيدان لازم تحترمنا وتحترم ثقافتنا... نحن ما عندنا زول بستقيل.. نحن ثقافة الاستقالة دى ما بنعرفها وما اتربينا عليها... نحن تلاتين سنة فشل متواصل موت وفقر ونزوح وحروب وفساد ما شفنا لينا رئيس ولا وزير ولا والى ولا معتمد استقال... يا زيدان يا خوى نحن عندنا جماعة تلاتين سنة فشل وقالوا ما بسلموا الحكم دا الا لعيسى... والله يا زيدان ناسنا ديل لو حققوا ربع الحقتتو أنت دا كان حيقولوا لينا نحن عيسى ذاتو ما حنسلمها ليهو... كان حيقولوا لينا... نحن حنسلمها لله مباشرة.. .يا زيدان يا خوى نحن ما قادرين نستوعب حكاية انك خليت الريال بعدما حققت دورى ابطال اوروبا تلاتة مرات على التوالى والسبب ثقافة الاستقالات دى ما اتربينا عليها... يا زيدان يا خوى كاتب هده السطور عمرو مقسم بين رئيسين فقط... واحد شال سطاشر سنة والآخر عندو تلاتين سنة ولسا الساقية مدورة... عليك الله يا زيدان ما لينا حق نندهش لاستقالتك؟... يا زيدان يا خوى أكبر حزبين معارضين من قمنا ما غيرن رؤسائهن... مش كدا وبس ياخى ديل لمن شعروا خلاص انو هم عجزوا قسموا اولادهم بين الحكومة والمعارضة لزوم التوريث برا وجوا... يا زيدان يا خوى السلطة خليها نحن محلات الصلاة ما دايرين نتنازل عنها... نحن قبال يومين فى زعيم كبير جدا اتشاكل مع واحد من الشباب عشان الشاب قعد ليهو فى محلو البصلى فوقو ... أنت عارف يا زيدان الشيخ التسعينى دا اعتاد يصلى خلف الإمام مباشرة لزوم الكاميرا والاهتزاز والجبجبة تقوى وإيمان وخشوع .... المصيبة ما فى موقف الرقاص... المصيبة فى الشيخ القشرة صاحب الصوت الجميل والبرادو والاجر المليونى... القارئ الاول فى السودان حاول يقنع الشاب عشان يخلى المكان للشيخ الرقاص بدل ما يقنع الشيخ انو الجوامع لله مش للحجز والجبجبة... يا زيدان يا خوى نحن عندنا ازمة وقود ليها تلاتة شهور ما شفنا لينا مسؤول قدم استقالتو... ويا ريت بعد دا خلونا فى حالنا... يا زيدان انت عارف بعد التلاتين سنة من الفشل المتواصل دا برضو واقعبن فينا نبذ... ديل قالوا نحن شذاذ آفاق... ديل قالوا هم علمونا اكل البيتزا والهوت دوق... ديل قالوا لمن جوا لقونا عريانين... الذ حاجة فى واحد قال لى زيدان دا ما معروف دينو شنو ذاتو... قمت قلت ليهو... ياخوى دين زيدان دا يكفى نحن شفناهو فى المستطيل الاخضر تكتيك وابداع وامتاع واقوان وبطولات... قلت ليهو يكفى دين زيدان دا شفناهو فى المستطيل الاخضر ادب واحترام وعفة لسان... قلت ليهو دين زيدان شفناهو استقالة فى زمن الانجاز والاعجاز والبطولات... بصراحة سئمنا الدين القشرة صلاة بالحجز وعقد بالحجز فى مسجد السيدة سنهورى ومجمع النور الاسلامى... سئمنا دين القشرة دقون وشالات وجلاليب وعطور وعلامة صلاة... سئمنا دين القشرة حج سياحى ودين سياحى وصلاة سياحية وتراويح سياحية وتهجد سياحى واعتكاف سياحى... سئمنا دين الكنكشة وزارات وولايات وشلليات وهنايات والسنوسى .. . . . منقول
|
|
|
|
|
|
|
|
|