اصلا هم شوية يا حبيب وبيعرفوا كيف يخلقوا الفرق ، ممكن تجازف هويتهم وفقا لمفهوم صديقنا ياسر عرمان و منظراتية قطاع الشمال ممن نحتوا مفهوم (الجنوب الجديد) ، وترتيب حضورهم (الشوية ديل) في المنبر (اقدمية وكده): منوت ، قيقراوي ، قريمان..!!!..ثم جني..وهيثم غالي (بالمشاهرة والخدمة والإلزامية)..!!
بالطبع يا صاحب ، ستحتفي كثيرا بجاكة ياسر عرمان قطاع الشمال (الجنوب الجديد) لكن ، مثلك مثل غيرك ، بتعبر ماشي في اهل الجنوب الجديد:من هم ؟..كيف يبدون؟ بماذا يحلمون؟ مماذا يخافون..؟ وشايفين شنو مستقبل امسودان الفضل..!!..وكل ذلك في اطار الموزاييك المجوبك الإسمو جمهورية امسودان ، او جمهورية امسودان الديموقراطية بحسب اساطير اب عاج (رضي الله عنه..!!)..
حصل ، يا سفيان ، سألت روحك عن معني قيقراوي؟..من اين اتى هذا الإسم وماذا يعني والفكرة شنو من استخدامو من قبل زميل ليك في هذا المنبر عرف كيف يخلق المفارقة وقليل من التقط عمق رسالته (قيقرواي: ناحت عبارة /المافي شنو..!!)..
و(المافي شنو) الثقافات السودانية بتجازفها بمعني : لو النفوس اتطايبت العنقريب بيشيل مية ..او (الفقرا اتقاسموا النبقة) مع انو بعض الخبثاء يذهب انو التقاسم ذاك كان (شد حلة/ماعون صناعة الملاح او المرق)..اوعك تقول لي ما بتعرف (شد الحلة) يا قُــص؟؟..!!
المفارقة يا سفيان ، حتى بوست حبيبنا الجميل اشول اشوانق ، الذي جلبت رابطه هنا كحجة قامعة وصاروخ حاسم ، خريطتو غايبة عن الكثيرين والكثيرات هنا..بمعني ادق ليه ناس التماس (شريط الحدود بين امسودان وجنوب امسودان) ليهم حظ كبير فيهو ؟..تداخل جوزيف زكريا (ممثلنا من ابيي) ، تداخل بريمة ، تداخل الطيب قريمان ، تداخل عبد الرحمن طبيق ، تداخل من ناس التماس من دارفور..وكانوا اكثر الناس جدية في خلق طرح مفارق (معرفة الثقافات السودانية ، ومعرفة انسان امسودان باخيه من امسودان..!!).. فكيف كان حضور الحناكيش؟..ارجع للبوست وشوف الحاصل..!!
الــــ (هذا) الذي تسأله من هو..
هو افضل منك ومني يا قريبي..لأنو ببساطة ابن الأرض الذي يعرف تفاصيل شقوقها وخصوبتها ، وانسانها ، وثقافاته واحزانه وافراحه ومخاوفه وطموحاته..!!
بيت الأشباح دينق الأخوان لم يسجل حضور في ذلك البوست الحقيقة/المكابدة/اليقين..ولكنه يبتز الناس بانو ناس المنبر يعرفونه..يعني حتى لو كانوا شتات منبت ثقافيا وحضاريا ومبثوث في عــــــــرصـــــات الخليج وخرطوم الوهم اياه..!! لماذا خاف دينق اخوان من الدخول في بوست اشول اشوانق ، وهنا جاي عامل فيها ضبان ضكر؟..ببساطة لأنو ما بيعرف امسودان ، ويظن ان الحوامة في شوارع الخرطوم وعواصم العروب..يكفى لأن يكون سوداني..!!!!!!!!! بالمناسبة (قريمان) تعني المشتاق ، مش مشتاق بتاع العشق والهيام ، وانما المشتاق للموت والشهادة في سبيل القيم التي يؤمن بها..!! اما الجزيرة مصران..فنترك ذلك للحناكيش التي احتفت بأشوانق (من باب عزومة المراكبية)..ليجازفوا لينا معناها:كفكرة/كمكان/ كٍانسان..الخ..!
وبرضو الشكر لصديقنا صلاح احمد ابراهيم (اخو فاطنة)..الذي صابته ذات وجعة مأساة عنبر جودة..!!!
وشكرا لود الرضي صاحب (من الأسكلا)..فالحناكيش لغاية الليلة لافين صينية عشان يحددوا وين موقع الأسكلا في الخرطوم ، فمابالك بالجبلين..والرنك...وشنو كده ما عارف..!
ومثلما نحتت انتلجنسيا الغفلة مفهوم (الجنوب الجديد) عملت نايمة عن مفهوم (الشمال الجديد ، في دويلة جنوب امسودان)..وعندنا هم اهالي التماس (من حفرة النحاس لغاية اصوصا ولا شنو كده ما عارف) شريط غني بالأحلام والمأسي والنسيان..و (ياهــذا)..!!!
الشابة امل عبد الملك ، ممثلة اعالي النيل في الدورة المدرسية في سنة 2008 بمدينة دنقلا ، غنت بلغة الحناكيش (غنية عثمان حسين)..عمر البشير (رئيس جمهورية امسودان ) ما لقى كلمة يرددها مع الفنانة الشابة غير:لما حار بي الدليل..!!
وكان محقا..فامسودان الدايشة ، كلها بي صمة خشمها حار بيها الدليل..والغريبة لسع محتارة ليه حار بيها الدليل..!!
ما تبقى من اغنيات الشلك والنوير وسليم والصبحة والجمع..هذه اشجان لا يحتملها اهلنا هنا..لأنهم سينشغلون كثيرا بنبض الطبول والريتم الحار ويتدرشون عن استنباط المعاني الباهرة التي نضيعها مليون مرة في الثانية ثم نعلن دهشتنا بلا خجلة:لما حار بي الدليل..!!
وكذا يا صديقي ، نظل امة ممكن يمرق عليها السلطان ذات خطبة عصماء ويقول ليها: لو عثرت نملة في حلة دينق ابو حليمة ، لسئلت لماذا لم اسوي لها الطريق..!
اما اذا اختفى جبل نواحي كسلا مع شركة صينية ، نحن يا مؤمن يا مصدق نقعد نتغالط كيف يعني جبل يختفي ، ونكسل ان نسأل روحنا: هو اصلا الجبال الموجودة هناك كم وشكلها شنو..!!!!!!!!
اخير نردد مع كبيرهم:لما حار بي الدليل..!
ونعمل رايحين طوالي ونشكي امرنا للدهر دهشة: حار بي الدليل..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة