|
Re: الفات زمان (Re: درديري كباشي)
|
سواقة الكبدة واحد من المغتربين زي حالاتنا نزل نهائي وبحقوق نهاية الخدمة اشترى حافلة هائس جديدة كرت خلصها في الجمارك وقال أهو تبقى له نقاطة لغاية ما يلاقي وظيفة. لكن مشكلته لا يعرف يسوق وطول عمره في الغربة كان ساكن في سكن الشركة ويتنقل مع السواقين. المهم مع بعض أقاربه رخص الحافلة وجابوا له سواق محترف. يتفق معه على العداد اليومي ومال له وما عليه. ثاني يوم الصباح السواق جاه في البيت استلم الحافلة وأصر عليه أن يركب معه أول يوم في المقعد القدامي ليراقب الموقف بنفسه. (الراجل محترف) ركب صاحبنا معه ومشى السواق بالحافلة وهي ماشاء الله لازالت المقاعد بأكياسها , بعد أول فردتين بين السوق وآخر محطة عرج السواق على شواية في الطريق دخاخينها تقول يا ليل ..نزل ودعى صاحبنا طلب شية وطلب كدة وطيبات أخرى وعدس لزوم القاموس والسلطات وببسي . وبدأوا الفطور وقدام نظر صاحبنا استخرج حق الفردتين دفع حق الفطور . وصاحبنا يعاين مسكته (أم هلا هلا ) لكن ما علق .. الحق يقال السائق بعدها كان حريصا جدا على الحافلة يتفادى الحفر والمطبات ببراعة ويهدئ السرعة. ولا يقف بالحافلة مائلة في حافة الظلط انما ينزل بها حتى تستوي على الأرض. صاحبنا بعد ما كان ناوي يعترض على حكاية الشية والفطور الكارب وانه الحكاية لا تحتمل. الا أن سواقة الحرص جعلته يخرص مخافة أن يخسر هذا السائق القدير. عد اليوم وأعاد السائق الحافلة للبيت مع صاحبها. كذلك ثاني يوم في الصباح أيضا أصر عليه يخرج معه. وبعد أول فردتين وقف به للفطور لكن هذه المرة في محل فول وطلب فول بالزيت فقط دون أي محسنات. وفطر معه صاحبنا مع قليل من الارتياح وقال ربما فطور الكبدة فقط ليوم التدشين (من زمان عاجباني كلمة تدشين دي وما لاقي ليها مناسبة).. لكن بعد الفول شاهد أسوأ طريقة ممكن أن يسوق بها سائق سيارة .. هجوم على الحفر والمطبات وهو شابكه ( يا زول يازول كسرتها حرام عليك قروشنا حصاد الغربة ) والسائق ولا شغال به مواصلا في هجومه . بعد أن زادت جرسته ركن الحافلة على جنب وقال له شوف هنا يا عمنا أمس براك بنفسك شفت الفطور كان كيف والسواقة كانت كيف. حقة أمسك ديك اسمها سواقة الكبدة وحقة اليوم دي اسمها سواقة الفول .والأوله شرط آخره نور .. من هسع نتفق عايز سواقة الكبدة ولا سواقة الفول؟ . عشان ما يجو الموسوسين يقولوا ليك شفنا الجوكي بتاعك يأكل في كبدة وشفناه يأكل شية من هسع أنت حدد موقفك وانا معاك . صاحبنا فكر وحسبها سريعا صحيح أن سواقة الكبدة يمكن (تلحس) ربع العداد لكن على الأقل ستحافظ على الحافلة. أما سواقة الفول ما توفره يمكن تستهلكه في الاسبيرات والصيانة ويمكن تدمر الحافلة كمان قبل ما تغطي ثمنها . شوف هنا يا ولدنا نحن اخترنا سواقة الكبدة. بس لكن أنت اعمل حسابك على صحتك ممكن يجيك قاوت وكدا.🤔🤔🤔🤔😂😂
|
|
|
|
|
|
|
العنوان |
الكاتب |
Date |
الفات زمان | درديري كباشي | 03-25-18, 09:04 AM |
Re: الفات زمان | درديري كباشي | 03-25-18, 02:42 PM |
Re: الفات زمان | باسط المكي | 03-25-18, 02:59 PM |
Re: الفات زمان | درديري كباشي | 03-25-18, 03:18 PM |
Re: الفات زمان | درديري كباشي | 03-25-18, 03:20 PM |
Re: الفات زمان | درديري كباشي | 03-25-18, 04:37 PM |
Re: الفات زمان | درديري كباشي | 03-26-18, 09:25 AM |
Re: الفات زمان | درديري كباشي | 03-27-18, 06:02 AM |
Re: الفات زمان | درديري كباشي | 03-27-18, 10:21 AM |
Re: الفات زمان | درديري كباشي | 03-29-18, 08:48 AM |
|
|
|