وأنا منطقى القريب والساهل الشغال بيه بسيط للغاية و هو
تركى ما اعلم من نفسى و يعلم من يسمعنى اننى له مطيق
بكون احسن لى من التكلف من الشى البخاف منه و البخوف الناس منى
بالله ده مش شى كويس ؟
بريحك من حاجات كثيرة و بجنبك مشقات و مغبات بالكوم والردوم
اهم شى فى نظرى فى ايام الزول الإسمها حياته، هو الصدق الصدق فى معناه المطلق و اللانهائى
زمان برضو كان ما اخاف الكضب اكثم بن صيفى فى مناسبة مهمة قال
خير الأزمنة اخصبها، و افضل الخطباء اصدقها، الصدق منجاة و الكذب مهواة، والعجز مفتاح الفقر
ما اظن بكون قاصد فقر المال والقريشات، بكون قاصد قلة العرفة و ضيق النافوخ وقال برضو
حسن الظن ورطة و سوء الظن عصمة
و احسن شى قاله فى الكلام ده كله
يكفيك من الزاد ما بلغك المحل، والاحسن منو كمان
عدم الكضب
و خلينا نخلى كفاية الزاد البوصلك لغاية الفاينال تيرمنال دى ، نخليه مدخل نتفاكر بيه فى حال ناس البلد المختلفة افئدتهم ديل
السودانى بالمناسبة كان و ربما لسه فى شويه باقى مننا متصالح لأقصى حد مع ذاته و مع بيته، البيئة هنا مقصود بيها كل شى حوالينا كان عباد ولا جماد
والشى المفرح وفى نفس الوقت مؤلم، هو حقيقة يكون الزول عاش زمنين مختلفين، كل زمن بى حاله و مآله، عسان كده النضمى فى حتة تصالح السودانى مع نفسه دى بتكون اهون و ايسر شويه عشان وجود المقارنة
لأنه المعايشة اصدق انباءا من السمع طبعا او الرؤى و التحليل و التخيل لأنه حضور المقارنة بين محسوسين اشد اقناعا من توهم غائبين مهما بلغت المسافة الممكن يصلها العقل
ما علينا
عموما يمكن عشان نحن شفنا هسه كله و جزء من زمان، ما زمان كتير، ممكن نقدر نعرف حجم التصالح و التآلف بين الزول و ما حوله، و بنقدر نعرف و نقدر و حتى كمان نلقى العذر للشى الحاصل حاليا
ولو اشتغلنا واعتمدنا على مقولة الكترة الغلبت الشجاعة غالبا ما يجى ناطى لبنا بيت عبد المعطى حجازى العجيب داك بتاع
هذا الزحام ولا أحد
وده بالمناسبة قصيدة كاملة، مش بالمعنى المدحى او المبالغة
يعنى قصيدة كاملة من بيت واحد
عشان كده ما بالضرورة دائما تكون الكترة بتغلب الشجاعة
ولو سعى القليل لبذل ما جل، و تجبير ما اعتل ولو فى الحدود الدنيا
لصلح القليل و فتح نفس الباقى الكتير، وتجى فى بالك حكاية مستصغر الشرر ديك ومشوار المليون خطوه الببدا بى واحده وهكذا
الواجب كان نستصحب كلام زولى المستهجن عشان نعرف هل السودانى متصالح ولا مصالح
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة