الشبكة، بكسر الشين، اظنها اول ما جات وظهرت استنادا على ليلى اللولانية ليلى هيل المكلوم الحزين والمهزوم الأمين المدعو قيس بن الملوح
الحاردلو قال
الحي والبموت رزقو ونصيبو بصيبو وانا صابني الجدي المنجدع في خصيبو كشف اب سته وفي سدرو وقدل عاصيبو يا الشلتيهو قلبي وداعتك اتوصيبو
بعد ما خلاص قنع تب من قلبه واتعوض الله فيه
وادونيس
حاضنا سنبلة الوقت حاضنا سنبلة الوقت ورأسي برج نار ما الدّمُ الضّاربُ في الرّمل وما هذا الأفول ؟ قُلْ لَنا يا لَهَبَ الحاضِر ماذا سنقول ؟ مِزَقُ التّاريخِ في حُنجرتي وعلى وجهي أماراتُ الضّحيّهْ ما أَمَرَّ اللّغةَ الآنَ وما أضيقَ بابَ الأبجديّه
يا راجل قول حاجة غير كده
الزول براهو يخت روحو فى خانة اليك، او موضع الضحية ويجى يبكى ويصيح وينوح لى الشوفتن بتريح
بتريح ولا بتتعب ؟
امرق النصيحة
دقيقة طيب
جعفر المطموس، واسمه التانى عند المعجبين جعفر الطمبارى الطمبارى، والطمبارى لقب لا هو رضيان بيهو ولا ناكرو
جعفر اشتهر بترديد الغناء السمح واختار النوناى بيهو بدل ترتيل آى الذكر الحكيم
يحكى اقرانه وندايدو انه ايام ما كانو شفع فى الخلوة، جعفر كان القارئ المفضل عند شيخ بدر وكيف انه القراية السمحة والصوت الشجى بالبحة الملحوظة الفيهو كان "كاتاليست" ممتاز للحفظ النسبة ليهم
لكين جعفر المطموس، على حس وصف شيخ البدر، بقى زول دنيا ساى واختار الدوباى والنوناى
في واحدَ الشُهور بلا الفَوق العِليو شَرَّافَه خلقــاً حُـرْدْ ومُـرْدْ ومَهَـدلاتْ أَكتَافَـــــــه مِـن قومةَ الجَهل لي كِلــمةْ غُناي عَرَّافــَه الحَمديــه في قَـلب السِمـع والشَــافــــــه
يا زول على كيفو
لكن على الرغم من كل الانطماسة المزعومة وعشق جعفر المنصور، وده لقبه التانى الخلعه عليه استاذ عكاشة ناظر المدرسة، ربطا بأبى جعفر المنصور العباسى راجل بغداد، جعفر نهاره كله مشغل الراديو وهو متكئ فى عنقريبه الهبابى نص النهار فى ضل راكوبة دكانه، ودى ساعة الرجل بتخف فى الحله، يسمع فى الغنا المارق من خشم اذاعة هنا امدرمان
لكن برنامجة المفضل كان دراسات فى القرآن البجى الساعة سبعة الا ربع بالليل وكأنه بيجتر الحنين لى ايام الخلوة
شلته من الأصحاب، محجوب وبابكر وعبد الرحمن، وبغتاتة مضمرة قاعد يقولو للناس
هه اتنو قايلنه يعنى بسمع فى عبد الله الطيب ده عاجبه صوت صديق احمد حمدون ساى ومرات مرات بقلد قرايته وطريقته خصوصا لامن الجماعة يزنقوهو ويقولو ليهو يصلى بيهم المغرب والعشا
وكان بشترط عليهم، مع صرة الوش المعلنة، انهم يقومو ويتكاملو بيوتهم بعد الصلاة طوالى وما داير زول منهم يقعد يصاقرو
ودى برضها بقت مصدر غتاتة جديدة تانى اكعب من الأولانية
اتو قايلنو بطردنا ليه ما عشان كل مره يشيل ليهو جوغمه جوغمتين من سجم الرماد التاكلو ورا شوال الفحم داك
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
فيس بوك
تويتر
انستقرام
يوتيوب
بنتيريست