بت ابا دكتورة نعمات..حبابك يا صديقة.. ابوداوؤد شخصيا؟.. تقول الرواية يا نعمات ..انو اذاعة البي بي سي..استضافت الموسيقار وديع الصافي..والمذيع سألوا عن صوت بيحب يسمعوا..فقال ليهم فنان سوداني اسمو عبد العزيز محمد دواؤود..!!..غايتو حسب كلام الشافهم ناس البي بي سي دخلوا في اضافرهم عشان يلقوا تسجيل لإبوداؤود عليه السلام..!!!!! كتر خيرك يا صديقة..ومعلومة (الزنق) البيوت الوسطهن فضاية..دي اول مرة اسمع بيها..وهي اضافة حقيقية في فكرة التوثيق والتأصيل للأشياء..ودي فكرة التثاقف الحر الإيجابي..كتر خيرك.. عبرك بعض الهدايا..ونهديها لصديقنا عضو المنبر ول ابا المعز ابو نورة..لأنو كان حاضر البديهة والذكريات وبيصحح المعلومات..التحية ليهو..
حوار ، يا نعمات ، مع الأستاذ صلاح بروان..وهو والد ايمن الربع..!!
واتمنى ان يجد صديقنا شيخ حاتم ابراهيم ..فرقة يسمع حكاوي صلاح براون..الكان بيغني لجيمس بروان وري تشارلس وغيرهم..!!
المذيعة يا حاتم ابراهيم استشهدت بفكرة التوثيق لفرقة جاز كادقلي..اها رأيك شنو..صاحبك الحكواتي اللباطي..اول من وضع الفكرة على المشهد..وقاعد يثرثر بيها طوالي لمن المذيعين والمذيعات بيستشهدوا بيها..ناهيك عن فنان جبنا ليهو فيديو شعبي في المنبر وده وهديناها لحبيبنا تمبس وغيره من صديقات واصدقاء..عشان نكتشف ان القنوات انتبهت ليهو ومشت مرقتو ولمعتو وسجلت ليهو غناهو العايرة بيهو الناس سنين وسنين..!!!!!!!!
المهم..
في الحوار ، صلاح بروان..اتكلم عن الفنان وليم اندريا..وذكر معلومة جديدة للناس المهتمة بتجربة هذا الفنان الشاب ..انو كان فنان شامل (مزيكا ، باسكت بول ، تشكيل ورسم)..حتة التشكيل دي معلومة جديدة..وللأمانة والتاريخ..وليم اندريا اتكتل خطأءا ذات انقلاب سوداني..وهو حركة الثاني من يوليو1976 ، المعروفة بحركة محمد نور سعد..!!..وقد مرت ذكراها الواحد واربعين قبل خمس ايام من بداية هذا البوست..!!!!!!
في الحوار ، صلاح بروان جاب سيرة الأستاذ بدر الدين عوض(اضواء بحري)..والد الفنانة دكتورة منال بدر الدين..وكانت عندها تسجيلات مع عقد الجلاد..ثم فرقة خاصة تغريبا اسمها (الدعاش) ، وهي اول فنانة خرطومية تغني اغنيتنا (نحن ناس الخلا) الشهيرة (الجنزير التقيل)..ومرقتها في مصاف متقدم للغاية..!!
صلاح بروان قال شهادة طيبة عن ابنه ايمن الربع ..انو بيؤلف مزيكا وبيصمم رقصات وذكر على سبيل المثال تجربة البوم للفنان طه سليمان..!!
فوق لده كلو..وفي الحوار ده ، صلاح بروان قال مافي حاجة اسمها مزيكا جاز في امسودان ، والحاصل انو شغل حديث (حداثة)..!! ناهيك عن الفن السوداني البيتقدم في السويد وبلجيكا..ولسع ما قادر يمرق للعالم بحقيقتو الأصلية..!!!
هنا نموذج من اشغال الأستاذ صلاح بروان (شغل قديم)..عشان نربط الحاجات ببعضها البعض..ما يسمى بــ(الجاز) كان تمرد على السائد..والآن ما يسمى بــ(الزنق) برضك تمرد على السائد..!!
اخونا الذي نشر المادة في اليوتوب..كاتب انو الفنان كمال كيلا..ونقلتها من قبل على هذا الأساس ..ولكن صديقنا ول ابا المعز ابو نورا وضح انو ده صلاح بروان..ومن وقتها عرفنا كيف نميز بين الحاجات وما نعير ساكت..!!
الغنية فيها شغل اجتماعي كبير وجميل..ولأنو صلاح بروان من ناس امدرمان..فكان بيستصحب فكرة (عرس الكورة) ايام المهدية..هي الفكرة العاروا بيها ناس الجبهة الإسلامية في بدايات الإنقاذ..عبر ظاهرة (العرس الجماعي)..!!!!!!!!!!!!
اها ناس (الزنق) اتكلموا عن ياتو ظواهر اجتماعية..وقاموا بتمجيد بعضها على البعض الأخر..فهذا ما يحتاج البحث والتنقيب..!!!!!
السيوسيولجيا ..غائبة في المشهد السوداني ، يعني دراسة الظواهر ومحاولة تكييفها ومعرفة اسباب حدوثها..دي ممارسة غائبة في المشهد السوداني ..ودي الحتة المحتاجة انتباهة..!!
وحتى الآن واقفنا في خانة التطرف بتاعة ابيض واسود..هلال ومريخ..يعني يا حلال (ونواصل فيها) ..ياحرام (ونقطع دابرها)..مافي خيار في النص..خيار قوانين الحراك الإجتماعي والأزمات الإجتماعية والسياسية والإقتصادية البنمر بيها كسودانيين..!!..واثر كل ذلك في المزاج العام..!!
ونعتذر عن الخروج على النص لو حصل..!!
واتمنى يا ول ابا سيف انها تكون اضاءة تساعدك غي البحث عن تأصيل الظاهرة ، خصوصا تجربة ايمن الربع..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة