كلامك صاح يا صديقي ، نفس المزيكا والإستايل ، سمعتها في الدلنج ، على مرمي حجر من الحتة المرقت منها اسرار بابكر ويوسف عبد الجبار ، ويوسف القديل..!!..وحضرت ليهم حفلات حية..
الشباب ديل (ناس الزنق) يا صديقي ، عندهم قدرة على التحايل على السستم بصورة عجيبة ومدهشة..!!
في سنة 2012 يا منى عمسيب..حضرت ليهم نموذج حفلة..والمغنية كانت بنية..ود اختي (ود اخت المدام) الساقني الحفلة..قام يزحف ويزحف لغاية وقف قدام البنية..ويشيل ويوسوس ليها في اضانها..اتخيلتها ح تقوم وتعير بالجاكة اياها بتاعة: حبيبنا من كندا ..!!..ولكنها خذلتني..قالت خطبة عصماء في شان ناس امسودان زمان..وتوشك قامت غنت: محبوبي لاقاني..!!ياخي من العظمة العلي قربت امشي اصحي حسن عطية من قبرو..!!
عارف يا عبد الله..لمن ظهرت غنية (راجل المرا ، حلو حلا)..جطنا ونقينا ودقينا راسنا في الحيط وبكينا ونحن نرثي الذوق السوداني الذي انحدر للطيش..بعد شوية مرقت حكومة عمر البشير بجاكة منع الغنية دي..!!..ليه؟ لأنو الناس ديل (ناس الزنق) كانوا متقدمين للغاية..لدرجة انو الحكومة كشفت نومتهم ونقدهم الإجتماعي والسياسي الذكي للغاية..!! اها ، من ما يوم الحيكومة وقفت غنية (راجل المرأ) انا بقيت اسمع كلام الشباب ديل بدقة وصبر وتأمل..ولقيتهم ولاد لذينا ياااااااااااااااخ..!!
دعما لنظرية قريبي سيف النصر ، البتقول انو الريتم (الإيقاع) بتاع الشباب ديل اصلو جاي من مزيكا التمرد في زنزبار ..مزيكا الطرب..!
المزيكا تعبانة يا عبد الله ..لأنها مزيكا شوارع وجناين(زي ما شهدت بت ابا منى عمسيب)..لكن عليك الله يا عبدالله ..اعصر علي روحك واسمعها للنهاية..!!
من ناحية نص..الغنية اسمها (بطل حنك واستهتار ، البيلعب بي بيخش النار..!!) بدايتها: قلبي صعب تخشو ، ومافي زول بيغشو ، اقول ليك الحقيقة يا كتمة ، صعب تغشو بطل حنك واستهتار ، البيلعب بي بخش النار..!! ما دي الخوة الجديدة..!! في الشعبي الخوة الجديدة..!!
اوع تصدق يا عبد الله انو النقة متعلقة بالسوق الشعبي في الخرطوم او امدرمان..اوالدلنج او شلعوها الخوالدة..!!
اغرب صدفة يا عبد الله ، الغنية دي اتنشرت في اليوتوب في 13 ديسمبر 2012..وتقريبا في 13 ديسمبر 2011 كان اغتيال خليل ابراهيم..!!!!!!!
هل بتقدر تقراها ، كنص مسموع ومقروء ، في سياق اختلافات ناس الجبهة الإسلامية بتاعين :مؤتمر وطني ومؤتمر شعبي؟..
والأهم..ليه نحن بنشيل بندقية ، وكلمة قصيرة بتختصر كل التعب ده؟..
نعم يا عبد الله..هم ناس بتفتش للإعتراف بيها في مجال المين استريم كلشر ، وصدقني زي ما حصل مع التم تم زمان ، بعد سنين ح نحاول نعترف بالثقافة الفرعية دي...!!!!!!!!!!!!!!! من باب .. Alternative History زي بتاع ناس دان برووان (الرمز المفقود ، وشفرة دافنشي ، والذي منو).. هل ممكن نقول: عمر البشير كان بيقول لشيخو حسن الترابي: بطل حنك واستهتار ، البيلعب بي بخش النار..!! غايتو نحن حبينا واتحبينا في دنيا امسودان ، لكن نوهائي خطاب (البيلعب بي بيخش النار) ما خطر ببالنا..!!
ياخي نحن ، كنا ، ناس ، لو احبك العمر كلو برضو شاعر ما كفاني..!!
لكن الشعبي ، الخوة الجديدة ، دي جديدة علينا..!!
وبرضك شغل زنق..!!
بطل حنك..في الشعبي الحنك ، حلاتو الحنك..!! عصافير الحنك..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة