ول ابا دكتور سيف..حبابك يا صديقي علي بالحلال يا سيف..دكتور دي ختيتها ليك ساكت في شان الرجرجة والدهماء وبغاث الطير..وبيني بينك احب المخاطبة الحميمة..بتاعة يا اخوي ويا ول ابا والذي منو..! التحية لأخونا عبد الله ادريس..ولو داير نقاش ..ممكن نتفاهم معاهو ، على الأقل من باب النقد الإجتماعي بتاع ناس (الزنق)..! وبعد..
نعم يا سيف جبتها من الآخر يا حبوب..الحتة الفايتة على الناس البتنقاش مثل هذه التجربة..هي فكرة تجربة ناس زنجبار (زنزبار على قولونا..!!)..ومزيكا الطرب..!! مزيكا الطرب.. As musical genre سايدة في تنزانيا وكينيا (خصوصا ممبسا والساحل ، وملعون ابو الساحل يااااااااااااااااخ)..
في النموذج ده يا سيف ، عاين دخول بيا كدودا (فاطمة بنت بركة)..!!
نفس حركات ايمن الربع ..!!
مزيكا (الطرب) يا سيف ، هي المزيكا الوحيدة في افريقيا..اتدخلت فيها الدولة في وسم صاحبنا سلطان زنزبار ، سيدي سيد..بن شنو كده ماعارف ، بن سعيد..القام فرضها على الناس وقام بتسفير بعض رعاياهو لغاية مصر المؤمنة..عشان تدرس مزيكا ، ثم جات راجعة..!! الجيل التاني ، في زنزبار ، كان بيقوم على تجربة (نادي اخوان الصفا)..!! أي والله يا سيف ، اخوان الصفا الواحدين ديل..!!
قامت مزيكا الطرب على اكتاف ناس جليلة ، ولكن نذكر منهم..ستي الجميلة.. ستي بنت سعد ، ودي الزولة القامت فرضت على الجماهير في زنزبار ، والعالم من بعد ، ان الغنا يتحول من الأداء باللغة العربية الى الأداء باللغة السواحلية (فاهمة حاجة يا نعمات..؟)..وكانت حاملة الراية من بعدها الليجند فطومة بنت بركة..!! فطومة بنت بركة يا سيف ، رحمها الله اتوفت سنة 2013..ولغاية اخر لحظة ماسكة سيجارة وبتضرب في نقارة زي الترتيب..!!
بس خت في بالك يا صديقي ، لمن الناس تنظر لمزيكا (الطرب) بتقول ليك انو اصولها بترجع لمنابع كتيرة ، منها المزيكا التقليدية في منطقة البحيرات العظمى في افريقيا ، يعنى هناك شبهة الماساي ودينكا بور..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة