في مظاهرات الخرطوم بعد قبضونا ونحنا في البوكس في مجموعه مننا دخلو بي شارع ريسي والعساكر وراهم جو سايقين كم نفر ركبوهم معانا وبضربو فينا بي خراطيش سود واحد من الشباب الجو ديل ببكي بي حرقه من ركبنا البوكس لحدي نزلونا القسم الشاب دا ببكي وانا مغيوظ منو دخلونا واقفين صف ولسه الزول دا ببكي بي حرقه انا زعلت منو وكنت واقف جنبو قلت يازول ماترجل شويه خلي البكا دا برضو مارد علي العسكري سمعني شكلو جا ادني خرطوش ود الكلب لمن شميت الدم من نخرتي وبدون مااسلو من اسامينا شالو التلفونات مننا كلنا لمن جو افتشو الزول الببكي دا مالقو عندو تلفون قام الضابط قالي انتا وقت راجل وبتطلع المظاهرات بتبكي مالك طوالي انفجر بي الكلام قال لي الضابط انا ماكنت في المظاهرات انا كنت واقف في صف الصراف الالي عشان داير اصرف الناس شافو العساكر جرو من الصراف انا ماجريت جو قبضوني انا جاي من المستشفي بفتش في صراف عشان اصرف قروش لانو امي اتوفت اليوم في المستشفي وانا لسه ماكلمت ناس البيت واخر حاجه معاي تلفوني بعتو عشان اشتري ادويه وانا ساكن بره الخرطوم داير قروش امشي اكلم اهلي عشان نستر امي ياخ زعلت من نفسي زعل طوالي شلت معه الفاتحه وسبحان الله القسم كلو بقي اشيل معه الفاتحه الضابط سالو انتا ساكن وين قاليهم حته كدا بعد القطينه مامتزكر اسمها المهم الضابط طلع ود ناس قالي تعال اقعد هنا قالي خلاص اديني تلفون اتصل بي عمي اكلمو عشان اجي الخرطوم المستشفي وكلم ناس البيت ماعرفت غايتو نحنا السودانين ديل من طينه تانيه بي سبب الزول دا الضابط قال ادوهم حاجتم وتاني مانشوفكم في مظاهرات يلا وعينو ملانه دموع لكن ماداير اورينا انو اتصدم زينا وقال لي الزول دا يلا نوصلك المستشفي بعداك انا دقيت سدري وطلعت كل المعاي ختيته في التربيزه قلت لي والله دي كل المعاي وربنا اصبرك بعداك القسم كلو بدا اخت قروش في التربيزه عساكر علي الناس الكانت مقبوضه وطلغنا من القسم باالله دا شعب تحكومو عصابه زي دي #
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
فيس بوك
تويتر
انستقرام
يوتيوب
بنتيريست