عركي آخر المغنين المحترمين

Quote: عاصفة إنتقادات تلاحق الفنان أبو عركي لإحيائه حفل بالإتحاد الأوروبي، والسبب (…) ! بواسطة باج نيوز تم التحديث منذ 12 ديسمبر 2017 10:19 ص الخرطوم: باج نيوز أثار إحياء الفنان أبو عركي البخيت، حفل ساهر في إحتفالية بعثة الإتحاد الأوروبي في السودان باليوم العالمي لحقوق الانسان، ردود افعال واسعة وسط رواد مواقع التواصل الاجتماعي. ووجه العشرات حملة انتقادات لأبو عركي، لإحيائه حفل بالبعثة الأوروبية، مقابل رفضه إحياء حفلات جماهيرية بالسودان، بحجة التضامن مع المواطن الذي يعاني من الوضع الاقتصادي السيئ، مستدلاً بأن معجون الطماطم “علبة الصلصة أصبحت بعشرون جنيهاً” حسب رواد مواقع التواصل الاجتماعي. يشار إلى أن أبو عركي متوقف عن إحياء الحفلات الجماهيرية بالسودان منذ سنوات، وكان عدد من معجبيه أطلقوا حملات بمواقع التواصل الاجتماعي لإقناعه بإقامة حفلات. وسخر الصحفي، خالد أحمد، من خطوة أبو عركي. وكتب على صفحته بموقع فيسبوك “يرفض الغناء لجماهير شعبنا بسبب الوضع المعيشي ولأن علبة الصلصة بقت غالية وقال كيف يغني والبلد مليئة بالجراح”. وأضاف خالد ساخراً “لكن معليش فإنه يظن أن أرض الإتحاد الأوربي خارج السودان”. غير أن الناشط الحقوقي والإعلامي، عمر عشاري، إنتقد سخرية البعض من أبو عركي. وإستبعد أن يكون البخيت يغني من أجل المال، وأضاف “عركي دا لا بتاع إتحاد إوروبي ولا بتاع قروش ولا زول مهادنات ولا بتاع موازنات”، وقال إن أغانيه ملك الناس. ويعتقد عشاري على صفحته بفيسبوك، إن عركي لايستحق هذه السخرية “والزرزرة في اطار مايراه بعض الناس تناقضاً بين غنائه بالامس في الاتحاد الاوربي وتحفظاته على الغناء الجماهيري”، وأضاف “شخص مثل عركي عندما ينتقد يجب أن يكون النقد بطريقة رصينة لسبب له علاقة بالرصانة والتهذيب الذي قابل بها الشعب السوداني طيلة حياته ولالتزامه بمشروع فني محترم وقيم وكان له تاثير ايجابي على حياتنا كشعب”. بالمقابل سخر المدون راشد عبد الوهاب، من إحياء أبو عركي الحفل، ووضع على صفحته بفيسبوك دعوة الحفل وعلق عليها “ديل أهلي الغبش”، في إشارة إلى الاتحاد الاوروبي. وأضاف عبد الوهاب “هناك مقترح لأن الناس تعمل حملة تحنس الاتحاد الاوروبي يعمل لينا حفلة بابو عركي في نادي الضباط”، وتابع ” يبدو انو الليلة السهرة حتكون مع أبو عركي برعاية صلصة الاتحاد الاوروبي”. وسرعان ما علق عليه صديقه بالصفحة بكري شبشه “عشان ننطرب عليك الله يا الاتحاد الاوروبي”، غير أن خالد أحمد، رد بسخرية قائلاً: “وحنجيب معانا كراتين صلصة”. لكن الكاتب الصحفي محمد فرح وهبي، إنتقد الحملة الموجهة ضد الفنان أبو عركي. ويرى وهبي في صفحته على فيسبوك، أن ذات الأشخاص الذين يدينون البخيت لأنه تغنى في دار الاتحاد الاوربي، هم من تسببوا في إيقافه بالهتاف “الما من شعبنا ما منك”، وأضاف “لم يسأل أي منهم: كيف تمضي حياة المغني الكبير، كيف بإمكان الفنان أن يحيا خارج صوته، خارج هويته، أن يستعير هوية أخرى يقاوم بها ويعيش؟” وتابع “هل سأل أحدكم هذه الأسئلة؟ لا أعتقد”. وقال مخاطباً الساخرين من الفنان “أرجوكم لا تفعلوا فعلكم هذا مع عركي، سيشنقكم بصوته، ثم أن التاريخ لن يرحمكم”.

Quote: تعرض نجم الكوميديا عوض شكسبير لهجوم عنيف من معجبي الفنان الأستاذ أبو عركي البخيت، بعد نشره حلقة فكاهية يسخر فيها من تهافت الفنان أبو عركي للمال، رغم أن أبو عركي أعلن أنه ليس لديه مزاج للغناء ثم أحيا حفل لصالح الإتحاد الأوربي في السودان. وكتب الأستاذ ناصر الليندي (محزن جدا ومؤسف حقا أن يفرد (عوض شكسبير) اسكتش يقدح فيه في مواقف الفنان (ابوعركي البخيت) ويصف عركي بالمتهافت الذى وظف فنه لاقتناء المال والمؤسف أن (عوض شكسبير) غير مواكب وبعيد عن واقعه ولايدري أن عركي حتى ٢٠١٥ كان يغني لي جمهوره في حفلات عامة بالمسرح القومي وحديقة القرشي وقيمة التذكرة (٥٠) جنيها ولكن هل سأل (عوض شكسبير) لماذا توقف (عركي عن الغناء) وهل يتذكر عوض أن أخر حفل معلن عنه لعركي بحديقه القرشي رفض التصديق له قبل ساعتين من بدء الحفل وهل يعي عوض أن جهاز الامن طلب من عركي اذا كان يريد أن يغني أن بوضح له الأغنيات التى سيغنيها). وأضاف ناصر بعد ذلك كله إلا يعي (عوض شكسبير ) أن عركي تغنى لطلاب جامعة الجزيزة وكذلك غنى في جامعة الاحفاد وغنى للاحتفال بحقوق المراة وكذلك غنى قبل اقل من شهرين في مناسبة زواج لصديقه يوسف الحبوب فهل كانت القيمة المالية باليورو ؟ في كل هذه الحفلات لم يتعاطى عركى واحد يورو. وكتب الليندي (والمدهش حقا أن ينال عركي كل هذا القدح لأنه تغنى للاتحاد الاوربي باحتفاله باليوم العالمي لحقوق الانسان هل كنت تريد من عركي أن يتغنى في حفل الاتحاد الوطني للطلاب أو لاحتفال المؤتمر الوطني دعوا عركي وشأنه فجمهوره يعرف لماذا توقف عركي عن الغناء وواصل يا (عوض شكسبير) في اعتذاراتك لي شيخ الامين و غض بصرك عن مايحدث من السلطة تجاه الفن واحتفى بالسقوط).

Quote: الطيب عبد،الماجد يكتب >> عذرا ( عركي ) …!! وعفوا ( شكسبير ) إنه ( عركي ) ليه كدا ياعوض …!! عارفك بتحب الدراما والقصص والحاجات دي …بس لكن كمان ( أبوعركي ) ….!!! ؟؟؟؟ عركي الواااحد دا …!!!!!؟؟ …. مالقيت غيرو … ياخ دا أبوعركي … ( أبو عركي البخيت ….) كدا بس من غير إضافة لقب …!! هو البضيف ….وبخيت علينا طبعا إنتا عارف يعني شنو أبوعركي …!! صاح …!!! يعني تحفة حوا ….!! وروح ادم ….. سألتك بالله ما سهر معانا الليل كلو وكملنا ….!! في ظلال عينيكي النعسانة …!!! دا ما عركي ياخ القاعد معانا وواحشنا …( اها دي لايقدرعليها إلا الكبار ..ياعوض ) …!! وواحش الناس دي كلها ….!! و(واحشني ) …!!! ياخ دا مش ( عركي ) الفتح لينا قلبو ضلفتين وكلمنا عنها وقال عن حبيبتي بقووولكم ….!! حتي كمان وصف لينا الحتة وين ….وقال ضَل صفايرا ملتقانا …..!!! شوف الزول دا بحبنا كيف …!! وبحكي لينا في شنو …!! ….دا ماياهو عركي ذاتو ياخ سيد الناس والإحساس القال ليها (إحساس بحسو غير عادي…!!! ونحوك إنتي تحديدا ….) سمعتو قال لينا شنو ..!؟؟ قال إنو بتغطي بينا من البرد بتدفي بينا من الصقيع …!! دا هسا مش مفروض بس نختو كدا ونعاين ليهو …!!! معقولة يا ( عوض ) بس تعمل عملية زي دي ….!! مالك …!! إمكن ما بتقصد ….!! بس كمان دا ( عركي ) ….عركي ياخ عركي الختانا في السما دا …. ! وغنا لينا … وليك بغني ياشعبي وفيك بقول مافي غيرك لا إسم لارسم …!! (كدا بس من الاخر …!! ) عليك الله مش أقل حاجة تمثال كدا جنب ( الطابية ) للزول دا ….!! معقولة لكن ياعوض ….حيرتني …!!! دا أبو عركي ياخ….!! سيد الكلام والغنا و سيد كلو شي …!! دا الفي عينيهو دنيا غريبة ….. دنيا ملآنة محنة وطيبة …. لا لا لا ياعوض ماكدا أصلو ماكدا ….زعلتني شديد حتي لو بتهظر ….!!! في زول بهظر مع ( الهزار ) ….!! إنتا ماعارف إنو عركي دا ( الهزار في الروض غنا ) ….!! أصلو ما كلموك …!! ؟؟ ولا حدثوك …. ماقالو ليك إنو ( عركي ) دا قاعد فينا وجوانا وبينا ودايما بغيب ويجي يقول لينا ( ياقلب أنا كنتا قايلك تبتا من تعب السفر ….) ( بس لا هو بقدر …!! ولا نحنا بنخلي ….!!) ليه ياعوض ياخ ….! دا ما ( عركي ) القال ليها اضحكي تضحك الدنيا وتفيض ضحكك شرح قلب السما…. لون سحاب كل الفضا …شوف الكلام دا كيف ..!! زول كل سلاحو ( ضحكة ) ….!!! تتخيل …!! ضحكة بس ..!! …..( هل من مبارز ) ..!!؟؟ إنتا ما براااك عارفو ( عركي ) دا مرهف قدر شنو ….!!! ما تشاغلو ياخ ….!! بتشاغلو لي شنو …!!؟؟؟ منو ذاتو البقبل ليك فيهو ياعوض ……!! زي (عركي ) دا غنا ولا ماغنا …..!! خلاص ( عبر ) ….!!! و ( بصم ) …!! وبالعشرة…..!!! والبصمة مابتزول ….!! تجي طوالي كدا نازل في حقل ( الأنغام ) دا ….!!! إنتا جادي ….!!!؟؟ (النغم ) دا ( بعزفك ) …..!! والله جد … ماقريت اللافتة الكبييرة دي … ( توجد ) حقول ( أنغام ) ….!! وكاشف ( الأنغام ) (إحساس ) …!!! حتي لو ماسمعتا ..!! ماكلموك الناس ….!!!؟؟ ليه ماسألتهم …!!؟؟؟ هو قال ( بخاف ) اسأل عليك الناس ….!! عارف لييي …!!؟؟؟ قال خايف ..سر الريدا بينا يذيع….!! أمانتن في ذمتك ..!!دا هسا دا زول بتهبش ياعوض …!! ………. معليش ياعركي ياخ ….!! والله معليش …!! سميها أي حاجة ….!! سوء تقدير …!! حسن نية ….!! وقعة …!! سقطة …!!! طيش …!! أي حاجه..!! بس عليك الله ماتزعل …!! ممكن ..!! ؟؟ نحنا بنحبك ياخ … يانورنا ونور الكون كلو ياغنوة لي فرح الأطفال ….!!! ويانوووور النوار يانوره….. ويافرح الأفراح يابلورة وبوعدك ياذاتنا يا أقرب قريب .. إنو تاني ما حتتكرر ….!! الا باكر لما ترجع انا بحكي ليك عن الحصل …!! …. وعد مني …!! لطفا ( شكسبير ) حق (الشفعة ) يمنحنا حق التدخل … وعركي كبير ….!! وحق السودان كلو …!! في حضرته تداعي الخليل … وكل البنات ( أمونة ) ياخرطوم …. ومساء الخير يا ( الأمير ) …!!