|
|
|
 Re: فكي منزو (Re: درديري كباشي)
|
2
بعدها اتجه الفكي الى طشت من البلاستيك .. به ماء جره أمامه .. ورش عليه بدرة بيضاء أشبه بالملح ..
وبدأ يتمتم بكلام غريب .. ولغة غير مفهومة . وكل مرة يعلي صوته بنهرة .. تزيد الرعب عند المرأتين ..
وبعد شوية رفع رأسه وسأل عواطف .
الراجل اسمه منو يا بتنا ؟ .
- اسمه عمر سيد أحمد .
- وأمه اسمها منو ؟
- اسمها رقية بت فضل الله ..
ثم عاد الى الطشت من جديد . رش عليه الملح وبدأ يتمتم .. ويصدر في الأصوات المرعبة .
فجأة كدا وقف من التمتمة وبدأ يركز على الطشت بعيون جاحظة وتركيز عالي ..
وبعدها هز رأسه بحسرة كدا .
- خير خير في شنو يا شيخنا ؟.ردت عواطف برعب .
- الراجل دا كهربتو عالية جدا جدا .
سعاد ردت مقاطعة : يا يمة الكهربا الما لقيناها في بيوتنا ..
- عواطف ضاحكة ( يا سعاد عليك الله خليك جادة ) .
سعاد : كان جادة ما بعرفو .
وعادت عواطف للفكي : أها يا شيخ يعني شنو كهربتو عالية ؟.
- يعني أي مرة تعجبوا !!!!! بس ما يشوف له توب أو يسمع صوت مرة طوالي يهيج وقلبو يضرب بشدة .
- وووب علي ما دا المجنني ذاتو يا شيخنا .
الفكي : حتى الموظفات معاه في الشغل ما مريحهن ..
- والمشكلة من شنو؟ .... الرجال ما كلهم كدا .
الفكي : أكيد في واحده معاه في الشغل عايزاه يدبل بيها .. عشان كدا عملت ليو عمل رفعت الكهربا بتاعتو عشان طبعا يقدر يكفي بيتين مرة واحدة ..
سعاد : كدي يا يابا .... جنريتر هو ؟؟..
عواطف دموعها جرت من الضحك : يا سعاد عليك الله اسكتي .أها يا شيخنا والكهربا دي ينزلوها كيفن ؟؟ .
الفكي : ما عشان نطلع الكهربا الزايدة دي لازم أول نفك ( العمل ) بتاع البت دي .كدا الكهربا تنزل بعدين نعمل ليه عمل تأمين ضد الغير واحدة تاني تقدر تقربوا مافي ..
- أها يا شيخ والعمل دا تفكوا كيف ؟ ..
- أنا أول أديك حاجات (تلخبتيها) مع الأكل والموية وورقة تدخليها ليه في كيس المخدة بتاعتو ينوم فيها كدا يفك العمل وتنزل الكهربا.. وبعد أسبوع تجيبي لي جوز كوارع نعمل به التأمين ضد الغير..
- أها الكوارع منجضة بشوربتها ولا نيه .
- منجضة كيف ؟ كوارع نية بجلدها كمان ؟
- أجي دي يجيبوها من وين كمان .
- من السلخانة طبعا ..
يتبع
| |
 
|
|
|
|
|
|
|
|
Re: فكي منزو (Re: درديري كباشي)
|
3
سعاد متدخلة بعد حكاية الكوارع : والكوارع دايرها ضان ولا عجالي يا شيخنا .
الفكي : ضان كفاية ..انتو مش قلتو عايزين ضد الغير ؟ .
عواطف : والفرق شنو بين ضد الغير والشامل ؟.
الفكي : يا بتنا ضد الغير دا يعني البنات الما عندهم معاه قرابة يعني زميلات الشغل وصاحباتك بنات المدارس والجامعات والبنات الفي الحفلات .. والمواصلات المهم أي بت ممكن تلاقيه في الطريق وما عندهم بيه قرابة .
سعاد : كفاية أصلا هن ديل البيعملن المشاكل ..
عواطف : لا لا لا كفاية شنو يا سعاد . أنت ما شفتيه بيعمل كيف مع بنات خالتو الفي أبو ظبي ديلك لمن يجن الاجازة .. جنس كبكبة ورجفيبة . وهن زاتن يجن شايلات له الهدايا البناطلين والقمصان والارياح .. ويهظرن ويتدلعن ويدلعن فيه وانا النار تلقاها مولعة فيني من يجن لغاية ما يرجعن .. لا لا لا أنا عايزاه شامل كان كدا ..
سعاد : عاد يا أختي معاه حق ديك بنات سمحات ودلوعات والله اظن حاج منزو دا زاتو ما بيقدر عليهن .
الفكي متجاهلا سخرية سعاد : بس يا بتنا الشامل بكلفك كثير .
عواطف : يعني أغلى من ضد الغير .
الفكي : طبعا يكلفك ( ضعف) المبلغ ..
عواطف : لكن يا فكي صحي بتقدر عليهن ؟. والله بصراحة ديلك لمن يجن الاجازة الرجال البنعرفهم كلهم يرجفوا ويتكبكبو حتى الشيوخ ابين دقون .
الفكي : معاك حق يا بتنا أنت ما تعرفي عمك فكي حاج منزو يقدر يعمل شنو ؟
سعاد ساخرة مرة أخرى : والكوارع يا فكي عايزهن القداميات ولا والورانيات .
عواطف متغاظة منها : أنت يا سعاد بتعقدي في الموضوع مالك ؟؟؟؟ خلاص قال كوارع يعني كوارع .
الفكي : لا لا ما تستهوني يا بتنا سؤالها فعلا مهم .أنا أفضل تجيبوا أربعة .. أتنين ورى واتنين قدام .
عواطف : الله يجازيك يا سعاد ..
سعاد تختج بالضحك المكتوم .
الفكي موضحا : ما عشان التأمين يكون شامل (وفل أوبشن )..
عواطف : ووووب علينا دخل لينا في الاتوماتك كمان .وأنا أعرفن كيفن قداميات ولا ورانيات ما الكرعين لمن يقطعوهن كلهن بيتشابهن .
الفكي : لازم تروحي السلخانة بدري وتوصي الجزارين تقولي لهم عايزة كوارع اتنين ورانيات واتنين قداميات .
عواطف : أنا البوديني السلخانة شنو كمان الصباح بدري .
سعاد تحاول تصلح ( طمبجتها للموضوع ) : ما تخافي أنا برسل خالد ولدي من الصباح يركب ركشته ويمشي السلخانة يجيب ليك الكوارع .
- كان قال عايزنها لشنو ؟
- ما بيقول .. أنت خالد عارفاه كتوم وصبور الحاجة البتطلبيها منه يسويها بدون ما يسأل .
عواطف موجهة طلبا جديد للفكي : يا شيخنا ما في طريقة تشفروا ..
الفكي : اسفروا ؟؟ عايزاه يروح السعودية يعني .؟؟
عواطف :: لا لا لا مش تسفرو .. تشفرو تشفرو .
الفكي : اشفرو كيف يعني ما فهمت ؟؟
عواطف : يعني تعمل له كلمة سر زي الموبايل اشغله انا وقت ما عايزة وأطفيه . وكان سافر مني مامورية ولا أي بلد تاني يعاين بيعينو ساكت ويجيني راجع سالم غانم .
الفكي سرح طويلا مع هذا الطلب الغريب والجديد عليه يبدو أن الفكرة راقت له أو جازت له كما يقول الخلايجة .
سعاد تنظر له باندهاش منتظره رد فعله .
الفكي : ممكن يا بتنا .... لكن دي عايزة مبلغ كبير كمان .
( مثل أصحاب محلات صيانة الأجهزة إذا غلبته الشغلانة يطلب مبلغا كبيرا إذا صاحب الجهاز رفض السعر أخذ جهازه وكفى خيره شره . أما إذا وافق إذا المبلغ يستحق المجازفة وبعدين يحلها الحلال ) .
سعاد : هوي يا عواطف ما تجازفي أفرض بعدين نسيتي كلمة السر .. والفكي سافر حتة توديه وين تاني راجلك دا ؟؟
عواطف : صحي كلامها يا شيخنا بس خلينا في الكوارع دي . شامل كامل .
يتبع
| |
|
|
|
|
|
|
|
|
|
Re: فكي منزو (Re: Awad Omer)
|
Quote: متابعيين باهتمام !!
امكن حاج منزو دة ...كمان ..يكون عندو عرق محبة اصلي ....
السوق بقي كله تقليد. |
تسلم يا عوض هههههههههههههه
نشوف قدام أكيد عنده
| |
|
|
|
|
|
|
|
|
|
Re: فكي منزو (Re: درديري كباشي)
|
فكي منزو
5
تحركت الحافلة الصغيرة ( الأمجاد ) تشق أزقة وحواري السكن العشوائي .. بيوت من الصفيح والقصب والخيش وبعضها من الجالوص .. بدأ الظلام يتسلل .. والشمس تؤذن بالمغيب .
عم صمت قصير بين راكبات الحافلة وكل واحدة منهن انشغلت بالنظر عبر النافذة والتأمل في هذه البيئة الجديدة عليهن .
المطاعم الشعبية أشعلت مصابيحها .
باعة اللحوم والمشويات من أقاشي وخلافه . بدأوا يشعلون المناقد ويرصون أسياخ اللحوم عليها .
بائعات القدودو وبائعات الشاي .. يفرشن البروش لسهرات المساء .
أطفال صغار غبش يتجارون ويلعبون بكرة شراب .. يتصيدون قليل النور الذي يضيئ المكان .أمام الدكاكين والأكشاك ..
كل مرة يفزع سكون الحافلة شلة من الكلاب تنبح وتطاردها .
يبدو أن الكلاب مستهينة بحجم الأمجاد أو مستغربة رائحة ركابها ..
ومن بين طيات الظلام يقف شاب وفتاة تقترب رؤوسهما في همس وغزل ..
يقطع هذا الصمت سؤال عابر طرأ لعواطف .
- أنت يا سعاد الحيوانات المربيهن الفكي دي يعمل بيهن شنو ؟
سعاد : بعرفو يمكن عايزين دوا للناس .
عواطف : طيب نحن معذبنا بالسلخانة والكوارع ما يدينا من صيدليته الجاهزة دي ..
سعاد : أجي يا سعاد؟ هسع كان ضبح ليك الجرو حق الكلبة وقال ليك اطبخيه للراجل بتعمليها ؟؟ .
عواطف : بري !!!!!!. الحمد لله أخير لينا كوارعنا دي .
الحافلة الصغيرة لا زالت تتسلل عبر الحواري والشوارع الترابية والحفر والمطبات مع تسارع الظلام .. ونباح الكلاب .. هو فعلا جوا مرعبا بالنسبة لشخص لم يعتاده أو أول مرة يزور تلك المناطق ..
عواطف :أنت يا سعاد الوراك الفكي دا منو ؟
سعاد : ستنا جاراتنا ديك عرفتيها ؟ الساكنة بلفة سعدية بتاعة الفسيخ ..
عواطف : آي آي عرفتها .. المرة دي جنها فقرا .. وحتى ونستها كلها تشكر فيهم كل مرة عاملة ليها دعاية لواحد بلاقيها في بيوت البكيات طوالي .
سعاد: بس ياها زاتها ..
عواطف : معقولة هي قعد تجي لغاية المحلات دي ؟؟.
سعاد : المحلات دي شنو!!!! عندها فقرا في الجبال ساكنين في كهوف مع الشياطين قعد تمشي ليهم .
عواطف : أعوذ بالله .. الله يكفينا شرها المراة دي .
سعاد : غايتو البيقع معاها وقعتو سودا .. تنجموا نجيم .
عواطف :أنت صحي يا سعاد عايزة تجيه لجماعتك ؟؟ .
سعاد : بري !!!!!! أنت عارفة أم حسن ديك أكعب من ستنا .. أكان قبلت علي عاد أمشي وين تاني .. أخير لينا كدا بس قبلانة بقسمتي .
عواطف : طيب مالك قلتي للفكي بجيك ليهم .
سعاد : ساكت قلت أفرحه شوية شايفاه زعل من ضحكي قلت ما يقوم يعمل فيني مصيبة .
- الحمل لله أخيرا وصلنا شارع الظلط
تدخل الحافلة أطراف المدينة الحضرية وتتوغل داخل المدينة .
حتى تدرك حيهن وتقف أولا أمام باب عواطف .. التي تتفاجأ بزوجها يجلس على كرسي أمام البيت .
- الليلة يا سعاد شايفة عمر قاعد قدام الباب أقول ليه شنو ؟؟
- قولي ليه كنا في بيت البكا .
- كان قال لي البكا حق منو .
- - قولي ليه واحد من نسابة ناس سعاد انت ما بتعرفو ..
وفعلا تقف الحافلة وتنزل عواطف .
- مساء الخير ..
- أهلا مساء النور ..
- وين قاعدة لغاية هسع يا مرة من بعد الغدا ماشفناك تاني ..
- ليه خير في شنو ؟؟؟.
- في ضيوف منظرنك جوة .
- ضيوف ناس منو كمان ؟؟ .
- صفاء وصاحباتها وأخواتها الصغار .
- ووب علي ... وبدأت تكورك في ظهر الحافلة التي تحركت .. يا سعاد ما تنسي الكوارع ... الكوارع يا سعاد ..
- الكوارع لشنو كمان عندكن قعدة ..
- هي لكن قعدة نصاح عاد ..
يتبع
| |
|
|
|
|
|
|
|
|
|
Re: فكي منزو (Re: ادريس خليفة علم الهدي)
|
*)
ابو الدر ..
يعلم الله مشتافين ..
اهو جبنا البمبر وقعدنا ما ناقصانا الا الكوراع ..
----------------------------------
كيفك يا علم الهدى الشوق بحر والله
مشيت السودان قضيت شهر وزيادة وجيت صاد بمخزون من لغات ومواقف جديدة
بس أنتظروا الكوارع والأقاشي وبيت السمك ذاتو
| |
|
|
|
|
|
|
|
|
|
Re: فكي منزو (Re: درديري كباشي)
|
6
أول ما دخلت عواطف بيتها وجدت فعلا زوجها كلامه حقيقة .. البيت يعج ويضج بالحسان .. وقالت في نفسها ( الفكي دا يكون شغلو معكوس ولا شنو؟ ..) تصدت لها عدوتها اللدودة صفاء بالسلام .
بعد ان تلقتها بالحضن وقبلات على الخدود : أزيك يا عواطف مشتاقين سلامتك شنو مالك كفارة ليك . أبو السيد قالي تعبانة ,
وعواطف في نفسها ( شوفوا ود اللذين دا ما صدق جاني شوية صداع طوالي مشى قاليها عواطف تعبانة .. وهي ما صدقت خمت صاحباتها وجاية تشمت .. دا بعدكم أنا عايشة وقاعدة ليكم كدا في نفسكم .. )
- الله يسلمك يا صفاء ما عيا كدا يقولوا عليه بس شوية صداع والتهاب حلق .. ساكت الراجل دا عاوز يخلعك .أطلقت ضحكة صغيرة .... الحمد لله قمت زي الحصان ماشايافاني من بيت بكا لبيت بكا .
- خير مات ليكم منو البركة فيكم ..
- واحد من نسابة صاحبتي سعاد ما أظن بتعرفيهم .
- طيب أعرفك على بنات خالتي ديل ندى ونادين وديل أخواتي الصغار تيسير ونجلاء وعلا ..
- ماشاء الله أزيكن .. عاد لكن الجمال عندكم وراثة الظاهر ..
- (أهي هي هي ) ضحكت صفاء ضحكة بدلال زادتها اشتعالا .. وقالت شكرا دا من ذوقك الحالة الشلة دي مسمنها قروب الشينات في العايلة ..
- أجي ؟ ماشاء الله ومال السمحات عاملات كيف ؟؟؟
لم تنتبه عواطف الى عمر وهو واقف في طرف الحوش يراقب في هذا المشهد ويكاد يفضح نفسه ضحكا وهو يعرف ما يغلي داخل زوجته الآن .. يبدو أنه تعمد كل هذا الفلم فدعى زميلته صفاء مع ضيوفها عمدا بحجة ان زوجته مريضة .. ووقف يتفرج على ربكتها .
- اتفضلوا اتفضلوا البيت زي بيتكم والله .. يلا نعمل ليكم عصير ..
- لا لا لا شكرا شكرا يا عواطف والله بتك رجاء ما قصرت .
- خلاص بسوي الشاي طيب .
- مافي داعي والله أقعدي خلينا نتونس ساي .
- لا لا لا لازم شاي المغرب بلبن
( يبو أنها في ضيق تريد ان تدخل المطبخ لتخلو بنفسها )
وفعلا تركتهن مع زوجها الذي أقترب ومع بنتها يبدو أن الأولاد الذكور كالمعتاد في خارج البيت .
وفي المطبخ تناولت تلفونها الجوال واتصلت بسرعة .
يرن الجرس ولا رد وهي بغيظ وبصوت أشبه بفحيح الأفاعي ( يا سعاد أنت وين يا سعاد ما تردي الله يغيظك ياخ )
بعد قليل يأتي رد .
- سعاد .؟؟ مالك ما بتردي فورتي دمي .
- في شنو ؟؟ قبل شوية ما كنا مع بعض !!!!!!!!!.
- الظاهر الفكي بتاعك دا ضارب وشغله معكوس .
- ليه في شنو ؟
- تصوري أجي البيت وألقى صفاء منتظراني في البيت ومعاها خمسة نجفات تقولي مذيعات ولا نجمات سينما ما عارفة ,, قالت ثلاثة أخواتها واتنين بنات خالاتها .بعد ما قلت لها ماشاء الله جميلات .كمان قالت شنو الشلة دي في العايلة مسمننا قروب الشينات!!!!!! .. حا تشلني البت دي .
سعاد لم تستطيع كتم ضحكها عبر الأثير وقالت لها أهدي أهدي ..وما قالت المناسبة شنو الجابتهن ؟؟.
- قالت عمر قاليها عواطف تعبانة وهي ما صدقت لبست هدوم العيد هي وأخواتها وجن جاريات .. هسع أنا أعمل شنو ؟؟.
سعاد : كبي ليهم الحاجات الجبتيها من الفكي في العصير .
عواطف : لكن الفكي قال الحاجات دي لعمر ما ليها هي .
سعاد : ما يمكن تشتغل في النهاية مش هو شغل تطفيش ؟
عواطف : لا لا لا ياسعاد قال دا حق الكهربا ..
سعاد : طيب ما تنزلي ليها كهربتا هي خلي عمر .
عواطف : ماانا خايفة البنزل كهربة الراجل يرفع كهربة المرا الرجال والنسوان مش معكوسين .؟؟
سعاد : والله كلامك صحي .. ووووب عليك لو كهربتا زادت هي أصلا ما ناقصة . ياها التجيب شنطتها وتجي تسكن معاكم عديل . ..أها حا تعملي شنو .
عواطف : ما عندك رقم تلفون الفكي ؟؟
سعاد : عايزا بيه شنو كمان تلفون الفكي ؟
عواطف : عايزة استشيرو ..
سعاد : عمري ما سمعت باستشارة فكي في التلفون ..عرفنا استشارة المحامين واستشارة الأطباء والفتوى كمان جاتنا استشارة الفقرا ؟؟
عواطف : أها طيب أنا أعمل شنو هسع .
نداء من الخارج بصوت الزوج .
يا عواطف أنت وين الناس ديل قالوا ماشين
عواطف : يمشوا وين كمان .الشاي الشاي ياناس الشاي طلع .
يتبع
| |
|
|
|
|
|
|
|
|
|
Re: فكي منزو (Re: درديري كباشي)
|
فكي منزو
7
عواطف وجدت موقفها كان سخيفا فعلا وجرت لتلحق الضيوف الذين قرروا المغادرة .
- بتبالغوا يا جماعة أنا آسفة والله مشيت أسوي الشاي ما قعدت معاكم .
صفاء : عايزين نتحرك قبل الظلام ما يشد علينا .. وكمان لو الكهربا قطعت يبقن علينا مصيبتين .
عواطف : ووب علي أنا من الكهرباء .
صفاء تضحك : لي ؟ مشكلتك شنو مع الكهرباء ؟.
عواطف : تقولي شنو بتقطع في وقت هسع اليومين ديل الامتحانات ومذاكرة الأولاد .
صفاء : خلينا نمشي أحسن يا عواطف نجيكم وقت تاني .
عواطف : ما عشانك أنت عشان الضيوف ديل أول مرة يجونا .. ومستدركة لتصليح جلطتها . أنت ما ست بيت لكن هن ضيفات حلوات أول مرة يجننا .
عمر مستغلا الموقف : صحي يا صفاء انت ست بيت .
عواطف في نفسها ( شوفوا الأبله دا كمان ما صدق ..)
عاد الضيوف الى جلستهم وعادت هي الى المطبخ لتكمل صناعة شاي المغرب وهي متحركة نادت زوجها عمر تعال عايزاك .
ظناها ستوبخه على تأكيد حكاية ست بيت للصفاء لكنها . طلبته لسبب غير ,
- عمر نحن ما عندنا حاجة نقدمها مع الشاي محتاجين بسكويت من الدكان والأولاد مافيشين .
- رسلي بتك ..
- ما برسل بتي في الظلام دا يقوموا يخطفوها لي كمان ..أمشي أنت جيب ليك صندوقين بسكويت .. لضيوفك ديل ..( ركزت على حكاية ضيوفك ديل ) حتى تبين له أن الأمر لا يعنيها حتى لو شربوا الشاي بدون بسكويت .
وفعلا يتحرك زوجها على مضض كأنه لا يريد أن يغادر المسرح .
أما هي بعدما جهزت الشاي عادت لتجلس مع الضيوف .
بعد أن عاد عمر من الدكان أشرت له ليذهب بالبسكويت ناحية المطبخ ..
وكلفت بنتها : يلا يا رجاء أمشي كبي الشاي من الكفتيرا في البراد الصيني وجيبيه .. وبدأت هي تصف الترابيز أمام الضيفات .
عاد عمر وجلس على كرسيه . يوزع في الابتسامات ولا يصدق أن احداهن تطلق نكتة سازجة والا ينفجر في ضحك مصطنع بصوت عالي ينزل على قلبها مثل السكاكين .. ويرمقها بطرف عينه ليرى رد فعلها .
وهي تقول في سرها أضحك يا طيرة أماني ما بنجمك الليلة .. كهربتك العاجباك دي تاتي تكوسها ما تلقاها .
أحضرت البت صينية الشاي وبدأت تصب للضيفات وتوزع عليهن صحانة البسكويت .
وشرع الجميع في شرب الشاي .
فجأة عادت البنت ناحية المطبخ مستعجلة كأنها نست شيء .
ونادت أمها من هناك .
- يا أمي تعالي دقيقة .
ذهبت ناحية بنتها في المطبخ .
- يا بت مالك ؟.
- الشي الأخضر الفي الكيس دا الجبتيه معاك .
- أها مالك وماله .
- أنا ما قايلاه نعناع ..
- أها ولقيتيه شنو ؟.
- المشكلة ما في لقيتو شنو ؟.. كبيت منه في الشاي طوالي قلت عشان يديه نكهة شوية .. طلع ما عنده ريحة خالص ..
- وووب علي ووب علي نعلو حق الكهربا ؟
- كهربة شنو يا أمي .
- يا بت أنت ما بتشمي يشمك الوجع النعناع ما عنده ريحة ؟ الليلة وووب عليك يا عواطف .
- في شنو يا أمي .
يبدو أنه صوتها خرج إذ لحق بها زوجها فورا ..
- في شنو يا مرة ؟ صوتك وصل لبرة .
- مافي حاجة الضيوف شربو الشاي ؟
- شربوه كله حتى عجبهم كنت عاوز أقول ليك تعالي زيديهن .
- يزيدك شنو أقول ليك .
- ليه في شنو ؟ أمك دي مالها يا رجاء ؟.
- والله ما عارفاها بس أنا لقيت .. قبل ما تتم جملتها تقرصها أمها في يدها .
- يلا أمشي شوف الضيوف ديل عيب خليتهم براهم .
- تعود لأمها يا أمي هو الشي دا شنو ؟؟ .
- دي وصفة حقت شعر أنا جايباها لشعري دا ..وأنت شلاقتك دي أصلك ما بتخليها ؟؟ أنا أقول ليك كبي الشاي للضيوف تكبيه زي ما هو مالك ومال نكهتو .
وتخرج عواطف مع بنتها ناحية الضيوف .
صفاء : ما شاء الله لكن شايك يا عواطف ظريف البنات ديل قالوا عمرنا ما شربنا شاي زيو .
عواطف مرتبكة لازالت تنظر الى الضيفات بريب خايفة أن مفعول هذا الشئ يكون له نتائج سلبية .لو بدأت فيهن أي أعراض تسمم أو توجعت ستكون كارثة .. نست تعليمات الفكي والكهرباء وعمر وهذه الأمور بقت في نتائج هذا الشئ الذي تناوله هؤلاء الضيفات . تسأل الله الا يكون له أعراض تسمم . لكنها قالت ربما أثر في طعم الشاي فعلا وأكسبه هذا الطعم السحري الذي عجبهن هو أكيد سحري طالما هو من يد هذا الدجال الملعون منزو .. عندما أستمر الوضع عشرة دقائق دون تأثير عادت الى رشدها . عفوا الى جنها .. وبدأت تراقب تغييرات الكهرباء من جديد .
يتبع
| |
|
|
|
|
|
|
|
|
|
Re: فكي منزو (Re: درديري كباشي)
|
فكي منزو
8
بعد ما خلص الضيوف الشاي وقفوا إستعدادا للمغادرة. وتحركوا ناحية الباب ومن خلفهم عواطف تزفهم بعبارات الوداع المحفوظة طبعا من طرف اللسان فقط .
- والله شرفتونا وآنستونا .أنشاء الله ما آخر زيارة ... والبنات الحلوات ديل زينن بيتنا .
- تسلمي يا خالة دا بس من ذوقك . ترد واحدة من البنات ..
- ( يخلخل ضروسك ) دي طبعا سرا .. والله جد حلوات لكن ما شاء الله ما يقولوا سحرتكن كمان .
صفاء : معقولة يا خالتي عواطف أنت عينك باردة .
- ( شوفي العجوزة دي كمان تقول لي يا خالتي ) كان عيني باردة ما بعرفو ..
وفي باب الشارع يصادف الولدين قادمين من التمرين .
عمر : كويس جيتو في الوقت المناسب أمشوا شارع الظلط جيبوا تكسي وتعالوا .
طارق : يا أبوي نجيب تكسي ولا أمجاد ؟؟
عمر : ألمهم أقرب عربية وخلاص مش عشان قلت تكسي لازم تكسي .
صفاء :أنت يا أبو السيد عربيتك وينها ؟
عمر : هي دا أسمها عربية والله تقعد في الورشة أكثر مما تقعد معاي .
تنطلق ضحكة من البنات الضيفات .
بعد قليل يصل التاكسي .
ويتم تبادل عبارات الوداع بمختلف أنواعها ودرجة دلال مستخدمها من ( جاو ..أها باي .. آنستونا .. سي يو ).
صفاء : يلا يا أبو السيد .نشوفك بكرة في المكتب
عمر : تصور روعة المشهد .
تعقبها ضحكات : دمو خفيف عسل لكن زميلكم دا .
عواطف في سرها : يا يمة كهربة السواد .. الله يجازيك يا فكي منزو البنات قربن يضون ....
أبو السيد يلتفت ناحية زوجته ويجد عينيها تحولتا الى جهاز ليزر كاد ينطلق منهما الضوء من شدة الغضب . وهو يعلم ما أشعله في داخلها ومتوقع عملية الجرد والمحاسبة ليلا وبدأ يعد في دفاعاته ومبرراته من الآن .. بينما هي آخر من دخل البيت وقفلت الباب بعنف تعبيرا عن الغضب .
رجاء :يا أمي أنا أمشي اكب شاي لأبوي قبيل ما شرب مع الضيوف .
تمسكها من كتفها بعنف . وهي تضغط أسنانها بغيظ شاي أبوك دا خليه عليه أنا دا ( تضرب صدرها بكفها عدة مرات .. تحس فيها روح أنتقام ريا وسكينة ) .أنت أمشي لمي الملايات الجديدة دي قبل ما يطلعوا فيها أخوانك المكندكين بالتراب ديل يوسخوها ..
ودخلت وهي تردد في العبارات التي أشعلت فيها النار بصوت مسموع لزوجها .
( أشوفك بكرة في المكتب .. تصور روعة المشهد ) عامل فيها أبو اللمين كمان !!!..
عمر يضع يده في فمه ليكتم ضحكه .
دخلت المطبخ .
وبدأت في إعداد الشاي .
وفتحت أكياس الفكي أنزو .
غرفت منها وصبت على شاي زوجها .
تتفاجأ بدخول الولدين خلفها .ياأمي نحن كمان ما شربنا الشاي .
- أمشي يا ولد برة أنا أجيب ليكم الشاي هناك .أمشوا استحموا أول .. شوف وسخانين كيف !!!! .. بدأت تهاجمهم بنهرات متتالية .
خرجا منها وتركاها لتدبيرها .
كذلك صوت زوجها من خلفها فاجأها لكنها كانت قد خلصت من تركيبتها .
- عواطف أنا أديني رغيفة مع الشاي جعان شديد .
يبدو ان دخوله عليها كان لجس النبض ليعرف الى أي مدى هي كانت غاضبة منه .
لكن هي فجأته باستكانتها إذ ردت بكلمة واحدة : حاضر .
ليس كل المعتاد . أنما هو اعتاد أن تنهال عليه مثل سلاح الدوشكا ..يكون عندها شريط من القذائف المتراكمة تطلقه مرة واحدة .
لكن ترد بعبارة حاضر!!!! .. أن الأمر لا يطمئن .
يا ترى هل ستطلب الطلاق .
بدأ يعاتب نفسه .. بصراحة هو زودها شوية في هذه الليلة .
خرج الى الحوش تمدد في السرير . مسك الجريدة دفن فيها وجهه كالمعتاد عندما يكون عامل عملة . ومتوقع رد الفعل .. يخبئ وجهه في الجريدة يدعي الإنهماك وهو لا يقرأ اي سطر فيها.
بعد شوية تخرج معها صينية عليها كباية شاي ضخمة ليست المعتادة ومعها نصف رغيفة ووضعتها امامه .. قائلة تفضل .. نظر ناحية الكباية الكبيرة والتي عادة كانت تقدمها له عندما تكون راضية عنه .
( لا لا لا الحكاية دي ما تطمن .. يا ترى ماذا يدور في عقل هذه المرأة ) قالها في نفسه بدأ يرد لها بابتسامة بلهاء لا يدري لها سببا .
ثم عادت للمطبخ
اتصلت بصديقتها سعاد .
- ألو الليلة يا سعاد ما شفتي الفلم الحصل لي .
- خير حصل شنو ..
- مع الضيفات ..
- اها مالن ؟..
- مشيت قعدت معاهن وقلت لرجاء بتي أمشي كبي ليهم الشاي بعد أبوك يجيب البسكويت من الدكان ..على شلاقتها لقت الكيس حق الفكي الفيه بدرة الخضراء ديك قايلاها نعناع وشيلي وكبي في الشاي ..
- وووب عليك وووب عليك .. أها حصل شنو بعد داك .
- أسكتي ساي قاعدة على أعصابي نسيت الفكي والكهربا والحاجات دي بقيت خايفاهن يتسممن .
- أها الحصل شنو بعد داك .
- بلا أشوف ليك الشاي عجبن عجب !!!!! الظاهر السحر اشتغل وقالن الا يزيدوهن وانا طنشتهن عملت فيها ما فاهمة .
فترة طويلة سعاد تضحك في التلفون ما قادرة تعبر .
- غايتو الله يجازيك يا عواطف دراماتك ما بتخلص أصلا.. أها الكهربا كيف ما اشتغلت فيهن ؟؟..
- غايتو لمن جينا نودعهن ما شفتي جنس رشاقة .. واحدة فيهن قالت لعمر أنت عسل بس ..
وتواصل سعاد في الضحك .
- كان كدا نظريتك طلعت صحيحة الشي دا يكون معكوس في النسوان ..أها وصفاء كيف .
- صفاء قالت له أشوفك بكرة في المكتب .. وعمر قال ليها .تصور روعة المشهد .
- وهو شرب معاهن ؟.
- لا لا لا لسع ما شرب يا داب وديت له شايه .. لكن ظبته ظبته الليلة يضلم عديل كدا .
-أظنه كان شرب كان أداها كف .
وتختم سعاد بضحكتها المجلجلة وتقول لها خلاص بعدين وريني الحاصل .
يتبع
| |
|
|
|
|
|
|
|
|
|
Re: فكي منزو (Re: درديري كباشي)
|
الحبيب الاديب درديري كباشي الامين ياخي اولا عودا حميدا مستطاب ...
واصل يا حيبيب نحن منتظرين نشوف آخرتا شنو عشان لو منزو ده طلع نجيض نقدم لاجازة وطوالي على كسلا وضواحيها من المطار على طوووووووول ..
تحياتي : ياسر العيلفون .....
| |
|
|
|
|
|
|
|
|
|
Re: فكي منزو (Re: ياسر السر)
|
Quote: الحبيب الاديب درديري كباشي الامين ياخي اولا عودا حميدا مستطاب ...
واصل يا حيبيب نحن منتظرين نشوف آخرتا شنو عشان لو منزو ده طلع نجيض نقدم لاجازة وطوالي على كسلا وضواحيها من المطار على طوووووووول ..
تحياتي : ياسر العيلفون ..... |
ياسر الفنان أخبارك ياخ الله يبارك فيك
هوي الفكي دا ما من كسلا
من العيلفون
هههههههههههههههههه
| |
|
|
|
|
|
|
|
|
|
Re: فكي منزو (Re: درديري كباشي)
|
فكي منزو
9
وفي صباح اليوم التالي
ضجة البيت المعهودة
أستعدادا للمدارس
عواطف تعد السندوتشات للأولاد .
وطلبات الأولاد اليومية .
أبوي قالوا لينا جيبوا قروش المسرح .أبوي نحن عندنا رحلة .
أبو السيد لبس بنطلونه وقميصه وتجمعوا كلهم في المطبخ لشرب شاي الصباح .
عواطف : عمر أديك رغيفة مع الشاي ؟
- هز رأسه رافضا . مع تكشيرة في الوجه كأنه يحس بحالة الغثيان ( بطنه طامة )
عواطف : أنت مالك الليلة ..؟
- والله ما عارف شاعر بدوخة كدا وما عندي نفس لأي شئ ..
فزعت عواطف وبدأت تبلع في ريقها وتنظر له بعين جاحظة .
- في حاجة واجعاك ؟
- يعني هو ما وجع وجع .. لكن جسمي منمل كدا .. كأني مخدر .
- وووب علي .....
- لا ما تخافي علي لكن انشاء الله أقدر أمشي الشغل عادي .
وعادت لضجة العيال .. يا أمي سندوتشي وين ؟ يا أمي كتابي بتاع التاريخ ما لاقيه .
- ما من إهمالك !!! جايي تفتشوا الصباح ؟. لو كنت بتذاكر كان عرفت محله .
- يا أمي هو ضاع عشان أنا كنت بذاكر فيه وما عرفت ختيته وين .
- دي مذاكرة شنو ؟ إذا كان الكتاب نفسه ما متذكر ختيته وين حا تتذكر القريته منه كيف ؟؟. أمشي فتشو في الصالة .
- تكون بتك دي فرشت وحشرتو في مكان .
- هوي أنا ما شفت كتابك ما تسلبط فيني ساي ..
- يا ولد أمشي فتش كتابك في الصالون أمس مش كنت تذاكر هنا ..أخخخ يا بطني .
- عمر مالك سجمي!!! .. نوديك المستشفى .
- لا لا بس لواية بسيطة كدا عابرة وراحت .
- يلا يا أولاد أتحركوا أغشيكم مدارسكم .
- حا تغشيهم بشنو هو انت عندك عربية ؟
- آه صاح العربية خسرانة في الورشة ..معناها أتمشى لغاية الظلط وأركب من هناك . يلا مع السلامة ..
وخرج الوفد ابو السيد وأولاده ناحية عمله ومدارسهم وتركوها وحدها مهمومة وقلقة تعاتب في نفسها .
الليلة ووب علي الظاهر أنا تقلت الشي دا الله يجازيك يا سعاد والله يجازيك يا فكي منزو ... لا لا لا كله مني أنا كان أتخمد وارضى بالواقع ..لكن معقولة يا عواطف عينك لراجلك يتخفف منك ويتراشق مع البنات .. تنتظريه لغاية ما يطير منك ؟؟.. ما أنت كان ممكن تتغيري في نفسك .أتغير أعمل شنو يعني ؟؟ .. لبس وحنة والحاجات دي كلها بعملها . لكن هو عينه زايغة ..ووووب علي يا ود الناس لو حصلت ليك حاجة ..
كدي أضرب تلفون على سعاد الشقية دي أكيد عندها الحل .
وتتصل بصديقتها سعاد :
- الو سعاد ؟ يا سعاد الحقيني ..
- خير في شنو ؟
- عمر أصبح منتهي .
- ليه حصل عليه شنو ؟
- كان شفتي حالته الصباح بالبلا .زي ما قلتي مندقر ومسككين زي غنماية الفكي ديك ..
- كيف ؟
- مهضلم كدا وتعبان تشوفيه تقولي هسع يقع في الواطاة دي .
- ليه انت كبيتي ليه شنو ؟
- ما كبيت له الشي القالوا الفكي بتاعك دا !!!!!
- أجي يا السلبطة !!!! أنا جريتك من أضانك ما أنت العلقتي فيني لغاية ما سألنا منه .
- كدي هسع خلينا من اللوم أنا أعمل شنو ؟
- أول قولي لي الحصل عليه شنو .. بالليل اتعشى عادي ؟ونام عادي ؟
- بالليل شرب شاي اللبن الفيه الشي داك مع رغيفة وأنا زي ما قلت ليك عبيت له كباية الشوب الكبيرة ديك وفضيت فيها نص الكيس حق الكهربا ء داك ...
- اجي كان كدا فيوزاته كلها ضربن ... تعقبها بضحكة .
- انت في شنو وأنا في شنو بس عايزة تضحكي .
- اها طيب استفرغ ولا شكا من بطنه ؟.
- غايتو هو ما استفرغ لكن قال بطنه قعد تنقذه كدا مرة مرة .. وشكله كان شفتيه كدا مسكين ومندقر رأسه لمن حنني .
- تتجازي يا عواطف ود الناس عايزة تضيعيه على أمه ؟؟..
- أضيعه علي نفسي أنا زاتي .. هسع كان مات الشفع ديل أربيهم كيف ؟ والله إلا كان أبيع الكسرة في السوق شهادة ساي ما عندي اشتغل بيها .
- هو كان مات أنت حاتكوني عادية كدا؟؟ .. أنت ناسية الحكاية فيها جريمة قتل ؟
- وووب علي يا سعاد أنت عايزة تجنيني .
- أنت ما بالغتي الفكي قال ليك معلقة صغيرة كل يوم مع الشاي لمدة اسبوع لغاية ما نجيب له الكوارع بعد حكاية الكهربا دي تنتهي تقومي تفضي له نص الكيس في الشاي ؟
- ما كنت زعلانة منه شديد ومتغاظة لكن .
- أصلا بلاوي الناس كلها تجي من الزعل معظم جرايم القتل دي بسبب الزعل .
- الرسول فيكي ما تجيبي سيرة القتل دي تاني على لسانك ؟
- نسوي شنو عاد الله يكضب الشينة .
يتبع
| |
|
|
|
|
|
|
|
|
|
Re: فكي منزو (Re: درديري كباشي)
|
هووووي يا درديري نحن ناسنا ديلاك ناس خلاوى ونار قران ساااااااي .... ما ناس رتينزات وكده ,,,,
انت ما سمعت بي ( نارو توقد للفجر ) ,
واصل يا حبيب ... وغايتو يا كسلا جاييك زووول ....ههههههه
تحياتي : ياسر العيلفون ....
| |
|
|
|
|
|
|
|
|
|
Re: فكي منزو (Re: ياسر السر)
|
فكي منزو
10
بعد تلفون سعاد صارت عواطف أكثر قلقا
أصبحت تدخل من غرفة وتخرج منها لتدخل أخرى.
والوساوس كل مرة تزيد وتكبر لها المصيبة ..
تسمع صوت إسعاف في الشارع أو صوت شرطة النجدة تجري ناحية باب الشارع وتنتبه الى أنها لازالت بالفستان الداخلي .
تجري لتلبس ثوبها تجد الصوت ابتعد من بيتها.
تعود لتعاتب نفسها
الليلة وووب يا عواطف مصيبة شنو العملتيها.
أخيرا وجدت أنه لا مناص من الاتصال على سعاد مرة ثانية.
رغم سخريتها اللازعة وكلامها الجارح لكن لا بديل في الوقت الراهن إلا هي.
الو سعاد
اها خير يا عواطف حصل شي جديد.
.مافي شي حصل لكن انا ما مرتاحة شوفي لي حل .
..اتصلتي عليه..
... منو الفكي؟
..فكي شنو يفك حنكك. . راجلك السممتيه دا.
.... والله يا سعاد تاني تقولي لي الجملة دي اقاطعك للأبد .. سممتو شنو كمان.
...ما الفكي قال ليك معلقة واحدة.
.... الله يحرقك ويحرق الفكي بتاعك دا زاتو ... اصلا كان جينا للحق ولا عشر معلقة ما مفروض اكبها لراجلي في الأكل أو الشراب بالدس لانه دا هو الغدر والخيانة ذاتها زول امنك صحته وصحة أولاده تجيبي المصائب وتكبيها له في الأكل والشراب ...حتى لو عرس فيني عديل كدا.
... انت عايزة تحاسبيني على غلطتك. ؟؟؟.
... انا ما حاسبتك انت انا بحاسب في نفسي عشان سمعت كلامك وباريتك.
شعرت سعاد فعلا أن لها اليد الطولى في هذا الموضوع قررت تغيره بسرعة.
..طيب خلينا من اللوم والعتاب خلينا نشوف حل للموضوع قبل مايتطور. انت اتصلتي عليه؟؟؟
.. لا ابدا.....
.... معقولة الراجل يطلع منك تعبان ما تتصلي تسألي منه ..يقول عليك شنو عايزاني اموت.
.... أعوذ بالله انت بس جنك موت وكتل. .نا انا خايفة يشك لمن كل مرة أسأله يقول المرة دي اكيد عاملة لي عملة ...
..... دا وسواس في رأسك انت يا عواطف شي طبيعي راجل مرق تعبان من البيت مرته تكون شفقانة عليه انشاء الله تتصل كل خمسة دقائق ما في زول يشك فيها...
... جد شفقانة والله شفقانة يا سعاد وكان مات انا حا اموت بعده طوالي.
.... تتأثر سعاد إذ لمست فيها صدق مشاعرها هذه المرة تقول لها طيب اتصلي اسألي لغاية ما أفكر لي في حل..
وفعلا تتصل عواطف
وبصوت راجف.
عمر اها انت كيف شديد يا حبيبي. ..
عمر ضاحكا والله حبيبي دي من شهر العسل ما سمعتها تاني انا خليني انت شديدة؟؟؟؟؟؟ ..
من بين دموعها تبدأ تضحك وتحمد في ربها رغم رده القاسي.
يتبع
| |
|
|
|
|
|
|
|
|
|
Re: فكي منزو (Re: درديري كباشي)
|
فكي منزو
11
بعد ما إطمأنت عواطف على زوجها اتصلت بصديقتها سعاد لتطمنها هي الأخرى وتعرف منها إذا كان وصلت الى حل لهذه المعضلة التي أرقتها .
- ألو سعاد ؟
- أيوة معاك اها الحصل شنو ؟ .
- الحمد لله قال هو كويس وحتى لمن قلت له يا حبيبي ضحك وقال لي من شهر العسل ما سمعتها منك تاني .
- صحي ياعواطف ما قلتيها ليه من شهر العسل ؟؟..
- يعني أنت يا سعاد قعد تقوليها ليه .ما قلنا نحن السودانيات كدا بنخجل من الكلمة دي ونشوفها عيب .
- هوي أنا راجلي مغترب قايلاه زي حقك كل يوم في وشي صباح ومساء .
- يعني قعد تقولي له يا حبيبي ؟؟
- واكثر من كدا كل ما نتلاقى في التلفون هو زاتو تلفونه مرة في الأسبوع ..يمكن بعض مرات يتأخر شهر كامل يقول لي لسع ما صرفنا .حتى الكلام دا كمان نتحرم منه ؟؟..
- لا لا كان كدا معاك حق . طيب هسع نعمل شنو عشان نلحق الموضوع دا قبل ما يتطور زي ما قلتي .
- لازم نرجع للفكي مانزو .
- تاني !!!!!!!!!!؟؟؟؟؟؟؟؟
- مش هو عمل المصيبة دي أكيد عنده ليها حل .
- طيب نمشي له كيف ومتين ؟ .
- نمشي هسع دي أركب أمجاد وأجيك . الرجال في الشغل والأولاد في المدارس .
- لو اتأخرنا وجوا لقوا البيت مقفول .؟.
- يأخرنا شنو لسع الوقت صباح الساعة تمانية ما جات . لغاية الساعة اتناشر نكون رجعنا ..
- طيب لو عمر تعب وجا راجع فجأة .
- انت بتعقدي في الموضوع مالك مش كلمتيه وقال كويس ؟؟ .
- كمان السحر عنده ضمان؟ ما يمكن يقلب عليه يتعب تاني .
- خلاص أنا أديك فكرة كويسة اتصلي عليه تاني وقولي له أنا وسعاد ماشين نزور صاحبتنا ولدت .
- طيب لو قال لي صاحبتكم منو ؟؟ هو بيعرف كل صاحباتنا.
- قولي ليه فتحية مش فتحية أصلا ولدت .
- طيب لو اتصل على فتحية ولقانا ما عندها ؟؟.
- أنت يا عواطف عايزة تجنيني ولا شنو ؟؟. عايزة تمشي ولا ما عايزة تمشي ؟؟.
- خلاص خلاص أركبي وتعالي أنا بتصل عليه ..
وبعد ساعة كان الصديقتان تمطيان ظهر الأمجاد ( الحافلة الصغيرة ) التي تعود بهما التى تلك الفيافي من جديد في وضح النهار .
بالنهار بيت الفكي كان مزدحما بالنساء .
نفس الشلل في ظل الراكوبة أمام الكوخ .
كل واحدة تنتظر دورها مثل ما ينتظر المرضى في العيادات الخاصة .
بدأ الأمر متطورا قليلا ..
هذه المرة يجلس شاب على طاولة ومعه كراسة يدون عليها الأسماء حسب الأقدمية . ويستلم الدفعة المقدمة للكشف الأولي ..
الزحمة شديدة أمامه هذا غير الجالسين على العناقريب .
عواطف تشعر بالقلق .
- وتهمس لسعاد الليلة يا سعاد تقولي لي ما نتأخر .. نحن لو انتظرنا دورنا يمكن للعشا ما نرجع البيت .
-سعاد تطمئنها : أصبري بحلها .
تتجلى بخبرتها في متابعة الدجالين في هذه الخطوة .
تتقدم للشاب وتهمس في أذنه على أنها عندها حالة طارئة .. ولا تنسى أن تحشر له في جيبه ورقة من فئة الخمسين جنيه ..
كذلك يرد لها الشاب همسا في أذنها كانه أسر لها بسر.. تومئ له برأسها موافقة .
ثم تعود للعواطف التي تنظر لهذه الدراما بدهشة ..
وبعد تعود لها تسألها بلهفة : حصل شنو مالك مع جنا الفكي دا؟
سعاد : أصبري أنت مش عايزة موضوعك مستعجل . بس أستعدي بعد يمرق الناس من عنده اناحا أعمل حركة تمثيلية أوعى تتخلعي وتقعدي تتعاوري لي وتعملي حركاتك ديك .. دا كله أنا بعمل فيه عشانك أنت .
عواطف : هوي يا سعاد عاوزة تعملي شنو ؟
سعاد : قلت ليك أصبري ..
وفعلا اول ما خرج نساء من قطية الفكي صرخت سعاد في الأول بطريقة هستيرية ثم بدأت تتشنج وترتجف كأن بها صرع .
عواطف رغم التحذير المسبق تفاجأت وظنت أن سعاد بها مصيبة فعلا .
- أوب علي يا سعاد مالك ؟
يتحرك الشاب مكملا التمثيلية يأخذ سعاد من كتفها يجرى بها ناحية قطية الفكي . ويحذر في الناس . يا جماعة أبعدوا حالة مستعجلة .. وعواطف تجرجر رجليها خلفهما غير مصدقة أن هذا تمثيل .
أول ما تدخلان قطية الفكي ينزل الشاب الستارة من خلفهما وتعود سعاد الى طبيعتها كأنها ليس بها شئ .
أما عواطف نست موضوعها وبدأت تنظر ناحية سعاد بشك وخوف .
سعاد : تعايني لي كدا مالك ؟؟ ما قلت ليك دا كله عشانك .
الفكي : خير مالكم أنتو أمس مش كنتوا معاي وقلت ليكم تجو بعد أسبوع تجيبوا الكوارع ..
سعاد : أيوا يا شيخنا بس أختي دي غلطت غلطة كبيرة مع زوجها ..
- ليه عملت شنو .؟؟.
- كبت له نص الشي الأخضر في الشاي وسقته له . كانت زعلانة منه شافت الكهربا عالية مع ضيفات جوهم زيارة .
الفكي جحظ عينيه في الأول ووضع يديه في رأسه بصورة مرعبة وبدأ يتحوقل ويستغفر ويتعوذ ويتشعوذ ويصدر في أصوات غريبة
فذع الصديقتان وبدأ عليهما الرعب .
هو بحركة تمثيلية جر حوض الماء وبدأ يتمتم فيه . وبدأ كأنه يتحدث مع شخص مجهور .
- لا يا شمهرور أعفيها يا شمهرور مسكينة هي .. كلمه يا بهدور راجل تعبان ما يموت يا بهدور .
سكت وبدأ ينظر ناحية الماء .
سعاد وعواطف كادتا أن تموتا من الخوف
بعد شوية نظر ناحية الماء وبدأ يهز في رأسه ويقول البياد البياد البياد ختى بياد ختي بياد يا بتنا .
عواطف : البياد دا شنو يا سعاد ؟.
سعاد :يكون قاصد البياض .
عواطف : طييب البياض ذاتو شنو ؟
سعاد : البياض يعني قروش .
عواطف :أنا ما شايلة معاي قروش .
الفكي :أي حاجة يا بتنا دهب ولا أي حاجة الراجل حايموت .
عواطف : وما لابسة دهب غير خاتمي دا .
سعاد : ما تختيه يا عواطف .
عواطف : دا الخاتم الجابو لي أبوي في عرسي .
سعاد تخلع عنها الخاتم بعنف : أنت عويرة؟؟ قال ليك الراجل حا يموت تقعدي تقول لي أبوي وما أبوي .
فعلا تنزع عنها الخاتم وترميه في الطشت عند الفكي ..
الفكي يصدر آهة ارتياح : الحمد لله لحقنا الموضوع سريع الجماعة ما كانوا راضين . خلاص يا بتنا المشكلة اتحلت .. أمشوا واصلوا الوصفة زي ما قلتها ليك ما تزيدي ولا تنقصي .. يلا تعالوا في نفس المواعيد القلتها ليكم عشان نعمل ليكم التأمين حق الكوارع .
خرجتا من قطية الفكي وعواطف لازالت ترتجف من هذا اليوم المرعب وتلعن في سرها في سعاد التي ورطتها في كل هذه البلاوي .
تركبان السيارة للعودة وفعلا الساعة لم تبلغ العاشرة صباحا .
بعد صمت طويل تفتح الحوار سعاد من جديد .
- أها تاني زي ما قال ليك الفكي ملعقة صغيرة في كباية الشاي ما تمشي تكمديها .
عواطف : تاني لا تقولي لي ملعقة صغيرة ولا كبيرة ولا بعمل اي شئ وأنت والدجال بتاعك دا تغوروا في ستين داهية .. كفاية خاتم أبوي الضاع . هسع عمر كان سألني منه أقول شنو ؟؟؟.
سعاد :أجي أقعدي اتعاوري كدا لغاية ما يجيبوا ليك صفاء عروس في البيت .
عواطف :خليه انشاء الله يعرسن أربعة أصلا ما ساءلاه
سعاد : بطريقتك انا غايتو العلي عملته.
ويعم الصمت من جديد .
قبل ما تصل السيارة لبيت عواطف ترفع رأسها من جديد .
- صحي يا سعاد ممكن يعرس صفاء ويجيبها لي في البيت كمان .
سعاد : بطريقتك بعد كدا .
يتبع
| |
|
|
|
|
|
|
|
|
|
Re: فكي منزو (Re: درديري كباشي)
|
درديري ولدنا
سلام
تعرف حاج منزو دا
كان دفعتنا في خلوة
المصباح عليه رحمة الله
ماعارف متين بقي
فكي منزو ..؟؟
يسلم يراعك
متابعين عن قرب
في واحد تاني
برضو كان دفعتنا
اسمه دودوا
اصبح اسمه الفكي
دودوا بيعالج الكسور
| |
|
|
|
|
|
|
|
|
|
Re: فكي منزو (Re: على جويلى)
|
Quote: درديري ولدنا
سلام
تعرف حاج منزو دا
كان دفعتنا في خلوة
المصباح عليه رحمة الله
ماعارف متين بقي
فكي منزو ..؟؟
يسلم يراعك
متابعين عن قرب
في واحد تاني
برضو كان دفعتنا
اسمه دودوا
اصبح اسمه الفكي
دودوا بيعالج الكسور |
هههههههههههههههههه
هلا يا جنابو زمن طويل ما شفناك في المنبر
والله أنا اسم منزو دا لاصق في رأسي من زمان وما عارف جاييني من وين
لكن زميلكم بقى فكي دي برضو ما عارفها والله
بس ود دودو مشهوزر جدا في كسلا في علاج الكسور
| |
|
|
|
|
|
|
|
|
|
Re: فكي منزو (Re: درديري كباشي)
|
هههههههههههههههههههههههههههههه
اها يا درديري الجماعة طلعو من كسلا زااااااتها ... وكمان شهد شاهد من اهلكم ههههههههههه .. ودفعتهم في خلوة المصباح كمان ... برضو تقول لي الفكي من العيلفون ؟؟؟
واصل يا حبيب وصباحك خير ...
تحياتي : ياسر العيلفون .....
| |
|
|
|
|
|
|
|
|
|
Re: فكي منزو (Re: ياسر السر)
|
فكي منزو
12
عادت عواطف الى بيتها من مشوار الفكي وهي تمني النفس أن يكون الموضوع قد خلص فعلا أول خطوة اتصلت بزوجها لتطمئن .
- أها كيف يا عمر صحتك تمام ؟؟.
- الحمد لله احسن بكثير صفاء جابت ليمون بنعناع ريحني شديد .
تاني صفاء ؟؟ البنت دي عايزة تجنني أوففف .. هذا ما دار في زهنها وليس في التلفون .. المهم أنت الآن كويس ؟ ما عندك حاجة ؟ .
- لا لا لا تمام ماية المائة وأنت رجعتوا متين من صاحبتكم ؟.
- قبل شوية .
- وهي كيف صحتها ؟؟
- كويسة ما عندها عوجة خلاص بعد اطمأنيت علي مع السلامة عندي حلة في النار .
مكالمتها طمأنتها ناحية عمر لكنها عادت لتشعل نار الغيرة من جديد . يبدو أن صفاء هذه متمادية في الموضوع بالجد .. ماذا تفعل وهي قد قفلت هذا الباب مع سعاد .. ملهمتها ومستشارتها في هذ الناحية .
عواطف وسعاد صديقتان منذ مرحلة الدراسة .. وحتى بعد الزواج من المرحلة الثانوية كل واحدة اكتفت بالبقاء في البيت مكتفيتا بهذا القدر من التعليم .
أزواجهما أيضا أصدقاء قبل أن يغترب حسن زوج سعاد ويظل عمر متمسكا بوظيفته في البلاد ..
عواطف وسعاد شخصيتان متناقضتان تماما ربما هذا هو سر الجاذبية لبعضهما البعض .بأعتبار أن الأشياء المختلفة تتجاذب .. كما تنطبق عليهما المقولة لكل أنسان حظ من أسمه . عواطف صارمة وجادة لكنها عاطفية جدا ربما أخذت العاطفة الزائدة من اسمها .. والصرامة مع زيادة العاطفة تنتج حالة أشبه بالسزاجة .. ولكنها ليست لدرجة العبط .. فهي تستطيع ان توقف نفسها في أي وقت إذا كشفت خطأها .. نقطة ضعفها هي تلعقها بزوجها وغيرتها عليه الزائدة .. بعد ما حسمت طريق الدجالين هذا في آخر كلام لها مع سعاد .. عادت صفاء بتصرفاتها المريبة لتشعلها من جديد .. سرحت في كيفية ترضية سعاد .. وهل ستعود لهذا الطريق ؟ .أم تترك زوجها لصفاء حتى تستولى عليه تماما . ( راجل معرس بمرته واولاده شاغلة نفسها بيه لشنو ؟؟ بت ال ...... استغفر الله العظيم ما عايزين نغلط فيها وفي أهلها كمان ) عادت الى كمشتها تحركها على الطنجرة من جديد بعد أن اكملت سرحتها وهي تستغفر وتتعوذ .
كما أن سعاد شخصية هزلية تحب الفرفشة والضحك والسخرية .. كما أنها متهورة ممكن تتصرف تصرفات غير متوقعة لتصل الى هدفها دون حساب لأي نتائج .. وليس أدل على ذلك من تمثيلها للجنون في البيت الفكي حتى تدخل قبل الآخرين .. وقد نجحت في ذلك . .لكنها كانت خطوة متهورة فعلا وكان ممكن أن تمر في غير ما تشتهي .. مثلا لو انبرى لها النسوة المنتظرات بعد كشفوا تمثيلها ووقعن فيها ضرب .. في هذا الجو العشوائي وغير القانوني والرسمي كل شئ وارد الحدوث .
وكذلك قناعتها وايمانها بأن للفكي القدرة في حل المشكلة التي هن بصددها جعلها تنتزع خاتم عواطف غصبا عن رغبتها لتهبه للفكي .. لأنها صدقت فعلا أن عمر الآن في خطر نتيجة لخطأ زوجته .. ايمان قاطع ..
في حين أن ممكن أن تكون هذه المادة هي أعشاب مجففة ومسحونة .. وممكن تكون من الخضارات غير المعهودة في السودان والتي لا يعرفون رائحتها من نوع بقدونس وكسبرة خضراء وزعتر وغيرها .. والدجالون لأنهم حريصون على ايهام الناس لا يستخدمون مواد معروفة لديهم .فهو أكيد لا يستخدم الشمار والشبت والنعناع والجرجير والحرجل والمحريب وغيرها من أعشاب السودان المعروفة .. حتى لو كانت مجففة لأنها ستكشفهم ..
وكذلك واضح أن خطوة العودة والاستغاثة هذه , الفكي كان يتوقعها وأعد لها العدة لمزيد من النهب . فهو يعلم أن معظم النساء لا يلتزمن بالجرعات حتى في الأدوية الطبية .. ويعلم أن الغضب وشدة الغيرة ممكن يجعلها تتهور وتسكب كل المسحوق مرة واحدة .. وفي الغالب ليس في الغالب بل هو أكيد هي ليست مادة خطرة .. وهو لن يتهور في أن يقدم للنساء مواد سامة تدينه قبل الآخرين .. دون شك هي زعتر أو كسبره أو غيرها من مجاهيل السودان .
وعادة الذهاب للدجالين يبدأ بمبلغ بسيط وعلاج رخيص وسهل .. ولكنه في سلسلة تجر بعضها بعضا كل واحدة تقود الى الأخرى .
لا زالت عواطف مترددة هل تعود وتتصل بسعاد
على الأقل لتراضيها
فهي تهورت معها حينما قالت ( تغوري في ستين داهية أنت والدجال بتاعك دا ؟)
عاد الوسواس ليقول لها لا بد ان ترضيها ولا تخسريها بسبب سيرة هذا الفكي ..
ترفع التلفون ثم تتردد لتعيده مرة أخرى .
وهل لو اتصلت ستحكي لها عن تصرف صفاء الأخير .
كانت تعيش في أمان ورضا قبل أن تظهر لها تلك الصفاء في حياتها فتعكر لها صفوها .
أخيرا ترفع التلفون وتتصل
يأتيها الرد جافا وماسخا من سعاد لم تستطيع ان تداري غضبها .
- نعم ؟
- سعاد مالك أنت ؟ زعلانة مني ولا شنو ؟
- ما غرت منك في ستين داهية زي ماطلبتي تاني راجعة لي لشنو .
- سعاد ما تزعلي مني ياخ ما تشوفي أنا خاتم أبوي دا زعلني كيف .. ذكرى منه من قبيل قعد أبكي والله .
- خاتم أبوك راح في علاج راجلك ما مفروض يزعلك ضياعه .
- لو كنت صرفته عشان عملية جراحية أو أي علاج معروفة والله ما كنت أزعل بالعكس كنت أفرح وأحس أنه ضحيت من أجله ... لكن يروح لدجال ؟؟
- الدجال هو العالجه ليك بعد ما سممتيه ..
- تاني رجعتي تقول لي سممتيه ؟؟ بعدين وريني هو عالجه كيف من السم ؟عمر في شغله والدجال في آخر الدنيا في السكن العشوائي هو شغال بالستالايت ؟؟
- أقعدي أتريقي كدا لغاية ما يعملوا فيك مصيبة تكوسي اليعالجك ما تلقيه الا عندهم .
- أنا ما خايفة منهم وما بتجينا حاجة الله ما كاتبة لينا لو يقدروا يعلموا لي حاجة خليهم يعملوها .. وما عايزة أخسرك بسبب الموضوع دا ..
عم صمت لفترة ولازالت التلفونات مرفوعة في الآذان . سعاد لم ترد ولم تعقب .. يبدو أن الكلام الأخير مس داخلها أشياء كثيرة
عواطف : مالك سكتي يا سعاد ؟؟
سعاد : يعني أنت كان ممكن تخسريني بسبب الموضوع دا ؟
عواطف :انا جاريتك فيه لأني كنت يائسة وشاعرة عمر كل مرة ماشي يبتعد مني ..لكن بعد ما دخلت التجربة ندمت وحسيت كان ممكن اسممه واضيعه للأبد .
سعاد : يستحيل الفكي يدي زول حاجة ممكن تسمموا ..
عواطف :ما أنا الحاجات دي كلها عرفتها اليوم .لكن ممكن يوهمك أنه هي مادة سامة فعلا وهو انقذك منها .. وكمان من على البعد بدون ما يشوف المريض أو حتى يكون قريب منه . معناها أصلا ما كان في سم في الموضوع .
- تقصدي شنو ؟.
- اقصد نحن اتغشينا والخاتم حقي راح في داهية . وعمر أصلا ما كان متسمم ز هي مادة تعمل تأثير جانبي بسيط .. .زي القات حق اليمانية داك وبعدها الزول يرجع عادي .. وما بعيد تكون قات فعلا .
سعاد : عواطف خليني أنا مصدعة شديد وما قادرة أودي واجيب معاك في الموضوع بكلمك بعدين .
يتبع
| |
|
|
|
|
|
|
|
|
|
Re: فكي منزو (Re: درديري كباشي)
|
سلام استاذ درديري
متابعبن بشغف ..
فقط أريد أن أضيف أن هذا هو الواقع المرير
الذي يعيشه المجتمع عامة ومجتمع النساء خاصة،
وبالمناسبة الزبائن ليسوا من النساء فقط بل هناك الرجال
ايضاً.
اذاً ما الذي يدفع الناس إلى ذلك ؟
| |
|
|
|
|
|
|
|
|
Re: فكي منزو (Re: Fatima Alhaj)
|
تشكري يا فاطمة وكل عام وانتم بخير
صدقتي تفشي الظاهرة بمختلف الأعمار رجال ونساء وعن مشاهدة قريبة الشهر الماضي
أنشاء الله سأعود لباقي الحكي
| |
|
|
|
|
|
|
|
|
|
Re: فكي منزو (Re: درديري كباشي)
|
14
دخل عمر بيته مسلما على أسرته المجمعة في الصالة في انتظاره لتناول وجبة الغداء ..
ألقى عليهم التحية ودخل غرفة النوم ليغير ملابسه ..
- كيف صحتك؟
-الحمد لله بعد ليمون صفاء تاني ما شعرت بشي ..
تاففت وقالت في نفسها يصر على ذكر صفاء في كل الظروف وكاجابة على أي سؤال ... هل هو متيم بها فعلا أم فقط يريد اغاظتها ..
-هو ابوي ماله يا امي .؟؟؟.
.-ما عنده شي بس الصباح شكى من بطنه ..
- هو شرب من الشي الكبيناه في الشاي داك؟
- يا بت اسكتي ما قلت لك ما تجيبي سيرة الزفت داك ..
- يا أمي هو شنو الكبيتوه في الشاي ..
- الليلة ووووب أها اللفاحين ديل كمان استلموا الموضوع ..
بعد قليل يعود لابسا جلباب المقيل ويتمدد على السرير ممسكا الجريدة كعادته ..
- يلا يا ام رجاء ختي الغداء انا بعد ليمون صفاء تاني ما دخلت حاجة في بطني ..
- الله يقلع صفاء ويقلع اللمانا فيها .. قالتها بصوت شبه هامس لكنه مسموع وتحديدا لعمر الذي بدأ يتبسم بخبث مخبئا وجهه خلف الجريدة ..
دخلت المطبخ وعادت بعد قليل تحمل صينية الغداء. .
تحلقوا حول السفرة كالمعتاد . ودارت الأسئلة المألوفة للأولاد عن الدراسة وحكاوي المطالب المدرسية قبل أن يرفع رأسه مغيرا مود الحديث ..
- على فكرة نحن بكرة الجمعة معزومين رحلة ..
- العازمنا منو كمان ....
؟؟؟
- ناس صفاء عاملين رحلة لأولاد خالتهم وعازمننا كلنا ..
صمتت فترة طويلة مقطبة جبينها دون رد .. عندما طال صمتها ..عاد لها بالسؤال ..
-اها شنو ما شين ولا ما ماشين ؟
بدأ الصغار يلحون عليها لتوافق ..
أما هي أجرت حسابات كثيرة في رأسها .. ماذا يريد هذا الرجل .. هو يعرف أنه مجرد ذكر صفاء يفور دمها ويريد منها الآن أن توافق على قضاء يوم كامل في حضورهما معا .. كيف ترد ... قاطع تفكيرها ..
- اها شنو ما شين ولا ما ماشين ؟..
بدون تردد وبنفس تقطيبتها ردت ..
- امشي انت وسوق أولادك انا ما ماشة. .
- كيف الكلام دا ؟
- كدا بس ما عندي رغبة ..
- دا ما يوم ترفيهي لينا كلنا وفرصة جاتنا هدية ..
- ما بالضرورة ترفيهك انت يكون هو ترفيه لي أنا ..
- كيف يعني نحن ما واحد ؟
- يا داب جايي تفكر في نحن واحد وما واحد ؟
- ليه في شنو انت مالك متغيره كدا اليوم ....؟سعاد قالت لك شنو ؟
- سعاد دخلها شنو في حياتي الخاصة وهي العرفها شنو عندك رحلة ؟ وانت شايف انا ما اعرف اتخذ قرار من دونها هي ؟ ..
- أعوذ بالله .. يا ولية براحة علي مالك رجمتيني كدا ...؟
- باختصار كدا انا قررت الجمعة اروح اقيل مع امي طولت منها انت سوق أولادك وروح رحلتك ورفه زي ما تريد ..
يضحك محاولا تخفيف دمه .. يعني ما خايفة يخطفوني منك ..
-خليه يخطفوك كان يلقوا فيك فايدة ..
-إلا إلا الا انت اليوم ما طبيعية ..يا رجاء شيلي صينية الغداء دي وانتو يا أولاد أمشوا غرفتكم حلوا واجباتكم. .
أراد أن يصرف العيال حتى يخلو بها ويعرف سر هذا الهجوم المبالغ فيه والذي لم يعمل له أي حساب حتى عجز عن الدفاع ... اعتاد على لغة المكاواة منه والزعل البرئ ممزوجا مع الغيرة منها الذي دان يستمتع به يحسبه بفخر وعز.. لكنها اليوم شخص مختلف حسسته كأنها رمت طوبته من زمن ..
بعد ما صرف العيال حب يلين الجو بعبارات رقيقة ....
- في شنو يا حبيبتي ؟
- خلي عندك أدب ..
رفع صوته قائلا يا مرة انتي جنيتي .. انت زوجتي ...
- كلمة لمن تقولها بعد خمستاشر سنة وفي ظروف زي دي تبقى قلة أدب ....
- ليه شنو الظروف الحالية الخلتها قلة أدب ...
- الظروف هي عندما تكون متعتك وترفيهك مع ناس تانين انا ما طايقة سيرتهم خليك تفرض علي اقيل معهم يوم كامل في جنينة ترفيهية ...
جحظت عيناه وبدأ ينظر إليها فترة طويلة باندهاش .. وبعد قليل بدأ ينادي بنته ..
- يا رجاء جيبي لي تلفوني من الغرفة ...
وهي تنظر إليه اتصل بالتلفون وسمعته يقول .. يا صفاء نحن آسفين بكرة ما حا نقدر نجي عندنا ارتباط مع خالتنا أم عواطف دي ماشين نقيل معها ..
بدأت الابتسامة تتسلل إلى وجهها منذ زمن طويل لم تتذوق نشوة الانتصار ...
لكن هل هو انتصار دائم أم مؤقت و سيعود لجنه مرة أخرى
لا يهم
ساعتها يحلها الحلال ..
يتبع
| |
|
|
|
|
|
|
|
|
|
Re: فكي منزو (Re: درديري كباشي)
|
15
قضت عواطف باقي اليوم كأفضل ما يكون ..
في العصر بينما دخل عمر يأخذ قيلولته.
انبرت هي لنظافة البيت
كنست الحوش
ورشته
واستخرجت ملايات العيد وفرشتها ..
بنتها تحمست معها وبدأت تساعدها دون أن تسأل عن المناسبة .
أما الأولاد تملكهم الفضول .
كل مرة يأتي أحدهم ويسأل ..
- يا أمي الليلة في شنو ؟
- يا أمي منو جايينا ....
وهي ترد بابتسامة لم تستطع إخفاء سعادتها ..
ما في زول جاي يا اولاد فرحانين لروحنا دي ما نفرح ..
ومرة أخرى ترد بهزار ...
-في عريس جاي لاختكم ..
ترد رجاء بدهشة صحي يا أمي ؟
-يا بت انت هبلة ؟ لو في عريس ما نكلمك ...امشي ولعي بخور معسل وهاتيه ..
يا أولاد ما تمشوا تلعبوا كورتكم مالكم قاعدين لهسع ..
ما صدق الصغار هذا التصريح حتى جروا ناحية الباب خارجين بعد أن حبسهم والدهم في الواجبات المدرسية .
أما هي أرادت أن تخلص من أسئلتهم الفضولية المزعجة ..
-اخوانك ديل متعبين يا بتي. .اريت لو بقوا هاديين زيك كدا ما عارفة طالعين لمنو.
- صحي يا أمي بالجد في شنو ؟
- حتى انت كمان ؟
- اوعى تكوني عايزة تطرديني الشارع ..
-تبري من الطرد انشاء الله ..حضنتها وقبلتها في رأسها وقالت مافي حاجة بس في موضوع كان عامل لي إزعاج والحمد لله ربنا خارجني منو وإنشاء الله للأبد .
والبيت في قمة بهائه دخلت هي غيرت أفضل ما عندها وجلست على كرسي مطرف كأنها ضيفة تتبسم وتترنم بأغنية من أغاني الغرام القديمة .
يتبع
| |
|
|
|
|
|
|
|
|
|
Re: فكي منزو (Re: درديري كباشي)
|
16
شاهدت رجاء أمها في أبهى حلتها وزينتها قامت بتقليدها كالعادة .. غيرت لبست فستان جديد وسرحت شعرها ووضعت قليلا من المكياج .
حتى أمها أعجبت بجمالها ودعت لها ( ما شاء الله . الله يحفظك يا زينة البنات ) ..
قبيل المغرب سمع طرقا على الباب ..
- دا منو الجايينا زي الساعة دي .
- يا أمي عليك الله أنت مخبية علي حاجة ؟
- والله يا بتي زي ما قلت ليك أنا بس مزاجي رايق كدا وشاعرة بسعادة وعايزاكم تتعادوا كلكم تكونوا سعداء .. شفتي أنت لبستي كدا وظهرتي جمالك وأنا ما سألتك عملتي كدا لشنو لاني عارف روحي عاديتك . كدي هسع أفتحي الباب .
ذهبت رجاء لتفتح اباب ..
ولتتفاجأ بــ .......... صفاء ومعها أخواتها وبنات خالاتها نفس الشلة السابقة .وخلفهم شاب وسيم متأنق يتبسم بهبل في وجه رجاء .
أول ما تشاهد صفاء وأمها في كامل زينتهما وكذلك البيت تتلفت على مرافقيها .
- ما قلت ليكم حا يوافقوا ... وتشرع في الزغاريد .. اثناء ما هم داخلين ناحية المنزل ..
رجاء بغضب شديد تنظر ناحية أمها ..
وتتجه ناحية الغرفة بدون تعليق ..
عواطف أخرصتها الدهشة غلبها التعبير .
عمر سمع ضجة الزغاريد خرج من غرفة النوم يدلك في عينيه ..
شاهد صفاء في فرحها وزغاريدها نظر ناحية زوجته وجد عينيها تتقدان شررا .
وتكاد تجن .. ولازالت صفاء في عبطها .. تدخل في ضيوفها .
وأقدم ليكم العريس مازن أخوي مهندس في أمريكا ..
شكرا ليك يا أبو السيد عارفاك ما بتخزلني .
أبو سيد أصبح مشغولا بزوجته التي بدأت عينيها تبيض ورأسها يدور . وفعلا سقطت على الأرض مغشيا عليها .
وبدا يصيح :: يا عواطف يا عواطف ..
صفاء : هي أم العروس مالها معقولة الفرحة تعمل كدا يا ناس ؟؟؟؟.
عمر أول مرة ناهرا صفاء : أنت اتلهي الله يخرب بيتك ..
سكتت صفاء وهي تحس بالخزلان وجحظت عيناها .. وهي تنظر ناحية أقاربها
باقي الحضور بمن فيهم العريس المزعوم أصبحوا يتلفتون بهبل واندهاش .
رجاء سمعت الضجة وعينيها محمرات بالبكاء شاهدت أمها ساقطة على الأرض صرخت وجاءت تجري .
- يا جماعة لازم نلحقها المستشفى سريع ..عقب مازن ..
بعد قليل كانوا جميعا في المستشفى يتحلقون حول غرفة الانعاش ..
سمحوا لعمر فقط الدخول على زوجته .. ظلت رجاء في الخارج تبكي بصمت الدموع تنهمر من عينيها وهي متكئة على الجدار.
اما صفاء فأهلها متلمين حولها يطالبونها بتفسير الحاصل ..
وهي نفسها لا تدري كيف صارت الأمور هكذا .. ظهر أمامها منظر فسرته حسب فهمها هي .. بيت مفرش ومبخر .. بنت وأمها في كامل زينتها اذا هما في أنتظارهم .
في داخل غرفة الأنعاش بدأت عواطف تفتح عينيها من جديد وتتلفت باستغراب .
يتبع
| |
|
|
|
|
|
|
|
|
|
Re: فكي منزو (Re: درديري كباشي)
|
فكي منزو
17
في طرف الغرفة وقف أبو السيد يتحاور مع الدكتور مستفسرا عن حالتها .
- هي المدام مالها يا دكتور ؟.
- المدام يا أستاذ اتعرضت لصدمة عصبية عنيفة وضغطها فات التلتماية .. والحمد لله ربنا حفظها بالغيبوبة دي .. تعرف الجسم فيه حماية ربانية تخلي الانسان يغمى عليه مثل الفيوز في الاجهزة الكهربائية .. بمجرد ما يواجه صدمة عنيفة لا يستطيع المخ استيعابها وحتى لا يتلف المخ فيدخل الانسان في غيبوبة والا كان ممكن تتشل شلل رباعي كمان ...
- لا حول ولا قوة الا بالله .. طيب شنو الجاب الصدمة دي؟ .
الطبيب : أنا مفروض أسألك السؤال دا ؟ أنت عملت ليها شنو ؟ طلقتها ؟؟
- أعوذب بالله فأل الله ولا فالك . كيف ممكن أعمل لزوجتي حاجة زي كدا ؟
- الطبيب ضاحكا باستهتار : ومال الجايب الشلل والمرض للزوجات منو غير الازواج الجهلة المستهترين مستغلين ضعف هذا الكائن الرقيق المسكين دا وغير مراعين لمشاعرها وأعصابها .. مخلنها في حالة ضغط دائم ..
بدأ عمر ينظر للدكتور باندهاش وهو عمره ما قاس الأمور من هذه الناحية وحسسه الطبيب كأنه يقرأ حياته معها في عينيه مع يقينه التام انه الطبيب لا يعرفه ولا يعرفها . ولا حتى يعرف صفاء أم المصائب هذه كلها ..
الطبيب مقاطعا عمر في سرحته : سكت مالك ؟؟. على كل حال أنا كمان ما عندي رغبة أعرف تفاصيل حياتكم .. لكن أعمل حسابك المرة دي جات سليمة .. وارحم المرأة المسكينة دي ..كان ممكن تتشل .
تمتم عمر متعوذا والتفت ناحية زوجته وجدها فتحت عينيها وتتلفت باستغراب المكان .. خاف ان تكون سمعت حواره مع الطبيب ..
عمر موجها سؤال آخر للطبيب . هسع حالتها كيف مستقرة ؟
- الحمد لله حالتها تمام حا نخرجها من الانعاش ونحولها للغرف العادية عشان تكون تحت المراقبة لمدة يومين تلاتة .. بس أرجوك عليك الله لو بتخاف عليها أبعدها عن المشاكل قدر الامكان . أنا قلت لك جات سليمة المرة دي .. وما أضمن المرة الجاية إذا كنا نقدر ننقذها ولا لا ؟
أمن عمر على كلام الطبيب قبل أن يخرج وسمعها .. تنادي بصوت ضعيف .بتي رجاء وين ؟؟. أنا عايزة بتي رجاء .. وين ؟
قال لها حاضر وخرج .. نادى رجاء من الخارج ولازالت شلة صفاء مجتمعين يتهامسون . وصاها بألا تبكي قدامها أو تحاول تأثر فيها .
دخلت رجاء على أمها ..
أول خطوة مسكت الأم يدها ووضعتها في صدرها بعدما أحاطتها بديها الاتنين . وبصوت ضعيف قالت لها :أقسم بالله يا رجاء يا بتي أنا ما عندي أي علاقة أو فكرة عن الشي الحصل ليك دا . معقولة انتي بتي الوحيدة أعرس ليك بالطريقة دي بدون ما آخذ رأيك في عريسك أو حتى تشوفيه وتتبادلي معه التعارف ؟؟؟..
رجاء لم تستطع ان تمنع دموعها المتساقطة وقالت لأمها مصدقاك والله بدون ما تحكي أنا عرفت الحكاية ما منك أنت ونظرت ناحية والدها .
الذي أقترب : وقال أنا كمان أوعى تكونوا فهمتوا أنا خطبت لرجاء بدون معرفتها .. والله أنا أحكي ليكم الحكاية وبعدين أحكموا ..
رمقته زوجته بنظرة نارية .. لم تنطق لكن نظرتها قالت كل شئ ..
هو تذكر وصية الطبيب فآثر الصمت لكنه كاد يغلي من الغيظ . يا داب بدأت الصورة تتجمع في ذهنه مثل لعبة الباذل ..أي تجميع الصور الممزقة ..
اكتفى بعض شفته معبرا عن غيظه وهز رأسه يسارا ويمينا .
البنت كانت أكثر وعيا طلبت من والدها أن يحكي ما حدث عندهم بالمكتب وربما هذا سيذهب الغل من أمها ويساهم في شفائها إذا اكتشفت أن والدها أيضا بريء من هذه التهمة .بصورة ما و يمكن تحيزا لوالدها الذي شعرت ببراءته هو أيضا ..
قالت : يا أبوي كدي أنت احكي الحصل شنو عندكم في المكتب ..
قال : كنا متجمعين وقت الفطور كلنا موظفين زملاء.. بدون مقدمة قالت صفاء نحن معجبين جدا ببتك رجاء جميلة ومهذبة وخدومة وتحب الضيوف . وعايزين نخطبها لأخوي مازن مهندس جايي من أمريكا ..أنا بحسن نية وبدون تركيز قلت لها جدا هو نحن حا نلاقي زيكم وين .. كلام مجاملة عادي يقوله أي أب لبنت لو أبدى أي ناس إعجابا ببنته .معقولة يا رجاء بنتي الوحيدة ازوجها بالطريقة المتخلفة دي .. ناس أعجبوا بيها طوالي أقول لهم تعالوا شيلوها ليه هي عربية ولا قطعة أرض ؟.
خلصنا من مرحلة الفطور بعد شوية جاتنا بحكاية الرحلة مع أهلها. الظاهر هي اتصلت عليهم باعتبار أنها حتكون لمة اسرية تتقابلوا فيها هناك ويتم التعارف ويمكن يكون في قبل بيناتكم واستحسان . يعني كانت عايزة تمشي في الموضوع ..
أنا بعد ما سمعت اعتذار أمك عن الرحلة وكلمتها عن إعتذارنا كلنا .الظاهر هي إبتكرت الزيارة دي لأهلها كبديل للرحلة التي فشلت واعتبرت كلامي السابق موافقة مبدئية ..ما كنت فاكرها أخذت الكلام جد وحتى الخطوة العملتها هذه أحرجت أخوها وأهلها .أنا والله لو عارفها متهورة للدرجة دي كنت حسمتها وقلت لها بنتي يا داب في ثانية ثانوي ومشوارها بعيد احسن أخوها يبحثوا له عن عروسة جاهزة ..
الظاهر هي بعد ما شافت التغيير في البيت وفي هيئتك أنت وأمك أعتبرته هذا احتفال بيهم وبدأت تزغرد وتتهابل المجنونة كانت عاوزة تجننا كلنا ..
بدأ وجه عواطف يعكس راحتها بعد ما سمعت تبرير عمر والذي بدأ منطقيا ومقبولا .. وخاصة بعد ما وصف صفاء بالجنون . برد قلبها .
لكنها لم تعقب اكتفت بالابتسامة .
بعد قليل حضر الممرضات وحولوها بسرير نقال الى الغرفة العادية ..
وتابع عمر وبنته الممرضات وهن يدفعن السرير النقال في ردهات المستشفى ..
ومن خلفهم صفاء واسرتها وهم يتمتمون بالحمد والشكر على السلامة .
في رؤوسهم اسئلة كثيرة لا يدرون على من يطرحونها في هذا الظرف .
ما الذي جرى ولماذا ؟؟
يتبع
| |
|
|
|
|
|
|
|
|
|
Re: فكي منزو (Re: درديري كباشي)
|
سلام درديري
ياخي والله قصصك ممتعه ، لي فتره متابعها
لكن المره دي وقفت في حته حرجه ياخي وشلهدتنا شديد
معليش يعني اول مداخله لي في سودانيز في بستيك ده
والواحد خشى فيك شمال طوالي
| |
|
|
|
|
|
|
| |
Awad Omer
ادريس خليفة علم الهدي
ياسر السر
على جويلى
Fatima Alhaj
Nader Abu Kadouk
Rami Abdelkareem
فيس بوك
تويتر
انستقرام
يوتيوب
بنتيريست