|
إسفيريا .. إنت منو وأنا منو!!
|
حقيقة تابعت (آمنة قيت) من طقطق للسلام عليكم .. وكان عندي إحساس (أنا ومجموعة كبيرة يمكن من أعضاء البورد) بوجود إن وأخواتها في الموضوع، وبالتالي توقعت أي تبعات من الموضوع، وبرضو أتوقع تبعات أخرى .. يعني المسلسل احتمال يعيدو الحلقة الأخيرة زي التلفزيون كدا!!
المهم.. دهشتي جاءت من بعض الردود، وعن كيفية تعاملهم مع البورد والأعضاء فيه، أو مع الإنترنت عموما، وأحزنني فعلا أن جزء مقدر منه يعتبر أن نهاية علاقته بالبورد والأعضاء فيه إيقونة (ساين أوت)!! وجزء مقدر منهم أيضا يعتبر علاقته بالأعضاء مجرد (كلكات) .. يعني مافي اعتبار لـ (ساين أوت) زاتا!! طبيعتي لا تفصل بين أصدقاء الإسفير وأصدقاء الواقع، فمن صادقته إسفيريا أطمح تماما بأن تتحول صداقتنا إلى الواقع، وحصدت نتيجة ذلك أن تحولت صداقتي بمجموعة كبيرة من البورداب إلى أرض الواقع، وأعتز بصداقتهم جدا، وكما أسلفت أتمنى وأصبو ما أستطيع إلى تحويل جميع صداقاتي الإسفيرية إلى حقيقية.
المهم.. بلا خرمجة وكلام كتير .. أنا بحب الناس الصادقة في كل حياتها!!
يا ناس..
البورد دا ما باقي إلا بكري يجي يقول أنا فيصل نوبي!! في شنو لكن
غايتو جنس غايتو!!
|
|
|
|
|
|
|
|
Re: إسفيريا .. إنت منو وأنا منو!! (Re: طلحة عبدالله)
|
ليك حق تحزن! فسودانيزأونلاين التي نقضي فيها ساعات طويله..تمثل لنا حياه حقيقيه.. اصدقاء ومعارف وتجارب وترفيه.. وسؤالك يجبرنا ان نقف مواجهه مع اسئله عديده.. منها.. هل وجودي يشبه وجودك؟؟ لماذا نعجز ان نصدق ن غيرنا ممكن أن يكون كذاب اشر؟؟
ممعليش ياود الصايم.. أنا غايته مني.. والعارفاه انت محمد وعارفه كتيرين حقيقيين.. لكن.. كيف مع الباقيين؟؟
| |
|
|
|
|
|
|
Re: إسفيريا .. إنت منو وأنا منو!! (Re: حسين يوسف احمد)
|
اب شنب
بما اني صاحبة احدى المقولات اعلاه فحابة اوضح ليك وجهة نظر معينة يا عبد الماجد.. بتهيأ لي الناس تكون نظرتا شمولية اكتر لما نجي نتحدث عن الموضوع بشكل عام.. بمعنى انو المنبر دا باعتبارو وطن مصغر.. حلتك.. مدينتك.. الى اخره.. هل بيستطيع اي انسان في العالم ان يرتبط بعلاقات تواصل او صداقة او حتى مجرد معرفة بجميع من يقطنون بجواره؟؟ قطعا لا... يبقى البخلي الفكرة هنا تكون مستنكرة شنو؟؟؟ ما دا برضو وطن بيضم اكتر من الف عضو.. حتقدر تصادقهم او تفترض حسن النية فيهم كلهم؟؟؟ اذا رشا جات وقالت يا اخوانا انا دينا وامنة جات وقالت يا اخوانا انا ما من الامتداد واحتمال تكون ما امنة زاتو.. البيضمن ليك التسعمية تمنية وتسعين الباقين منو؟؟؟؟؟
يبقى بشكل عام وسليم يفترض انو علاقتنا بالمنتديات لا تتعدى هذه الطقطقة والكليكات, لكن موش بفهم انو اجي اسب والعن واشتم او اقول كلام خارم بارم لا يسمن ولا يغني من جوع واجي في النهاية اقول ليكم ماف زول عندو حاجة عندي اصلا دا عالم اسفيري!!!!!! لا ابدا.. بنفس القدر المفترض تكون بيو شكل العلاقة بين سكان الحي الواحد مفروض تكون بين الاعضاء.. في بعضهم بتحس بيو قريب من قلبك وكتاباتو بتوافق هواك.. ودا ممكن يتحول بمرور الزمن الى صديق وممكن الى اكثر من ذلك وتكون علاقات ناجحة جدا تعتز وتفتخر بيها.. وفي البتمر عليهم مرور الكرام وما بتقدر تقرا ليهم وديل اكيد عندهم ناسهم البيوافقوهم برضو.. والفئة الاخيرة دي حتمثل السواد الاعظم من اعضاء البورد بالنسبة لكل عضو لانو الانسان بطبعو ما بقدر يتشربك في علاقات كتيرة ولا في زمن بيسمح للواحد فينا زاتو.. يعني اكتر بوردابي اجتماعي هنا ومقددا ما حيكون بعرف اكتر من تلتمية نفر والسبعمية الباقين نكرات بالنسبة ليو.. يبقى بعد كدا الناس فقط تراعي اصول العلاقات الانسانية العامة البتحكم كل مجموعة تحتم عليها ان تستظل تحت سماء واحدة.. وصباح الخير يا جاري انت في حالك وانا في حالي...
والا شنو؟؟؟
| |
|
|
|
|
|
|
Re: إسفيريا .. إنت منو وأنا منو!! (Re: Rasha Hatim)
|
ســــــــمــــــــكـــــــ
والله يا سليكة
إنتي إلا تعملي ملحق
أها .. أنا وحد من الناس ما قادر أفهم منطقك دا
أولا أنا لا أتكلم عن عامة الأعضاء .. في ناس في البورد دا لا بيعرفو محمد عبد الماجد ولا محمد عبد الماجد بيعرفهم!! لكن برضو في ناس أنا بتكلم معاهم يوميا بي كيبوردي دا وزي ما قلتي حسيت فعلا إنهم قريب مني ونحن ماشين في اتجاه واحد أو متقارب .. وفعلا العلاقات دي أنا بحب أخليها تمشي لي قدام
لكن إنتي .. إسفير بس .. لستك!!
| |
|
|
|
|
|
|
Re: إسفيريا .. إنت منو وأنا منو!! (Re: mohmed khalail)
|
Quote: شاغر بخيبة املك..مثل كثيرين..وانه امر جد لمؤسف.. |
العريس اللابد بي الصور!!
يا أبو خليل البور دا نحن بنقعد فيه وقت نقطعو من شغلنا ومن بيتنا وأولادنا يعني بالنسبة لي وناس كتيرين جزء من أساسيات اليوم!!
فعلى الأقل الناس البنجي نقعد معاهم ديل يعتبرونا أكتر من مجرد (كليك .. ساين آوت)!!
ولا ما كدا!!
غايتو جنس كليكات غايتو!!
| |
|
|
|
|
|
|
Re: إسفيريا .. إنت منو وأنا منو!! (Re: عبد المنعم سليمان)
|
Quote: طبيعتي لا تفصل بين أصدقاء الإسفير وأصدقاء الواقع، فمن صادقته إسفيريا أطمح تماما بأن تتحول صداقتنا إلى الواقع، وحصدت نتيجة ذلك أن تحولت صداقتي بمجموعة كبيرة من البورداب إلى أرض الواقع، وأعتز بصداقتهم جدا، وكما أسلفت أتمنى وأصبو ما أستطيع إلى تحويل جميع صداقاتي الإسفيرية إلى حقيقية.
المهم.. بلا خرمجة وكلام كتير .. أنا بحب الناس الصادقة في كل حياتها!! |
شرحو يا ود الصائم والله انا زيك كده تمام وخد عندك تلفوني 0564155973
وبصراحة انا بحب كل الناس واتمني ان التقي كل أعضاء سودانيزاونلاين وليس بالضرورة تكون علاقتي قوية ببعض الأعضاء المهم يكون هناك تواصل وبعدين كل عضو هنا إضافة حقيقية لانو بصراحة في معلومات ما بتلقاها إلا في سودانيزاونلاين وفي قصص جميلة جداً وبعدين ياخي خد المعلومة المفيدة واترك الغير مفيد . شكراً جميلاً اخي الشفيف محمد الصائم والله من وراء القصد
فرملة :-
طبعاً في ناس محبتهم زائدة عن الباقيين : وده شئ طبيعي
| |
|
|
|
|
|
|
Re: إسفيريا .. إنت منو وأنا منو!! (Re: عبد المنعم سليمان)
|
العزيز عبد المنعم
Quote: والله تكوس كدا لما يوم تلما ليك في زول تصادقوا اسفيريا يكون زي ناس طلحة |
يا عزيزي زي طلحة دا ملح الحياة .. لازم تشوف اللون الأحمر عشان تريح عيونك بالأزرق!!
ولا ما كدا!!
لكن ما قلت .. إنت ناس إسفير ولا جد جد
| |
|
|
|
|
|
|
Re: إسفيريا .. إنت منو وأنا منو!! (Re: haroon diyab)
|
Quote: كده كفاية ولا ازيد |
دياب يا لزيز
.. واحشنا ياخ
قول عليك الله طلع العندك ياخ!!
أها هسي يا عمك أنا لو جيت قلت ليك أديني في عربيتك ديك لفه وكدا حتقول لي لا ياخ .. إنت عندي مجرّد إسفير ..!!
غايتو جنس غايتو!!
| |
|
|
|
|
|
|
Re: إسفيريا .. إنت منو وأنا منو!! (Re: azhary awad elkareem)
|
Quote: وبالجد يا حسين إنت كاتب مميز في الجانب الأحمر وبستمتع تماما بتحليلك وتوثيقك للأمور |
أححححمم ... تشكر يا معجب .. وربنا يقدرنا على المحافظة على هذه الثقة .. بس كلم ناس ود البشرى ديل اللي يتغزلوا في هلالهم زي ما عايزين بعيد عن المريخ ..
Quote: وبكجنك لمن تسك ليك حاجه زي اليومداك |
وعشان عين أكرمنا ألف عين .. وسكتنا حتى لا تشـعر بالخسـارة !! فنخسرك نحن .. سكتنا عن كل شئ لأجلك وآخرون والله ..
وأتمنى ألا يجرجرونا ناسكم ثانية .. للجرجير !!!!!
ــــــــــــــــ
إنت منـو !!؟؟
| |
|
|
|
|
|
|
Re: إسفيريا .. إنت منو وأنا منو!! (Re: Shamael Elnoor)
|
Quote: اينما تجد طلحة تجد الصايم اينما تجد الصايم تجد طلحة |
شمايل
تصدقي .. الحالة دي صحوبية إسفير بس!!
يعني الزول ده لو حولناهو للرسمي مشكلتنا مشكلة!!
القلوب شواهد يا شمايل!!
لكن ما حددتي يا شمايل إسفير .. ولا ساين أوت .. ولا جد جد!!
| |
|
|
|
|
|
|
Re: إسفيريا .. إنت منو وأنا منو!! (Re: محمد عبد الماجد الصايم)
|
الصايم
والله انا ارى انه الشبكة العنكبوتية دي مساحة مفتوحة لاى شخص فهناك من يستفد منها وهناك من يعتبرها تحصيل حاصل وهؤلاء اغبياء الى حد كبير وعادة يوظفونها للترفيه وهم الغالبية طبعا خصوصا في مواقع التعارف الالكترونية تشاهد العجب ،، تعرف انا بحب استفيد واحول الاسفير لواقع مفيد بس طبعا لازم الطرف الآخر يكون عندو نفس الفهم والتصور
فهمتني ولا لسسسسسسسسسسسسه
| |
|
|
|
|
|
|
Re: إسفيريا .. إنت منو وأنا منو!! (Re: azhary awad elkareem)
|
الأخ / محمد عبد الماجد الصايم سلام واحترام ،،،
كلامك جميل ومهم جداً وياريت لو الناس تكون صادقة في ما تكتب وبرضو نكون ملتزمين في كتاباتنا ونحترم بعض في ردودنا لان ما يكتب هنا يطلع عليه كثير من الناس وياريت لو نبعد من الاشياء الشخصية او الاسرية ودي اهم حاجة لان اسرنا ليس لها علاقة فيما نكتب لذلك يجب علينا الابتعاد عن كل ما هو خاص . تحياتي لك أخى محمد ولكل الإخوة الاعزاء
أبو كريم
| |
|
|
|
|
|
|
Re: إسفيريا .. إنت منو وأنا منو!! (Re: الفاتح خليل الفكي)
|
Quote: كلامك جميل ومهم جداً وياريت لو الناس تكون صادقة في ما تكتب |
أبو كريم
فعلا أنا أبحث عن الصدق!!
الاحترام والالتزام موجود بين أغلب الأعضاء في المنبر .. إلا من رحم ربي!!
شكرا لـ كلكاتك الجميلة .. بس ما تعمل لي ساين آوت!!
| |
|
|
|
|
|
|
Re: إسفيريا .. إنت منو وأنا منو!! (Re: محمد عبد الماجد الصايم)
|
تعرف يا ود الصايم أنا العلاقات الإسفيرية دي بحترمها جدا والانترنت ده هو شنو يعني ما وسيلة اتصال زيو وزي التلفون والجوابات ... وأنا بصراحة عندي علاقات إسفيرية جيدة ومستمرة لكن طبعا الواحد بكون حذر في تكوين هكذا علاقات !
لكن تعرف الدردقة بتاعت الجدية دي ما خايلة فيك !!!
أخرج ..أخرج إلى مكة
أمير
| |
|
|
|
|
|
|
Re: إسفيريا .. إنت منو وأنا منو!! (Re: عادل سهل)
|
Quote: منذ إنضمامي القريب للمنبر شهدت حالتين من حالات إخفاء الشخصية الحقيقية |
شيخ العرب يا حبوب
فاتت عليك واحدة أمس جات توش (يا بكري غير لي اسمي)!! بكري شاتا ليك على الطاير!!
بالمناسبة أنا لم أجرّم أشخاص بعينهم فقط أحببت أن أبيّن وجهة نظري في الموضوع
(ما جعل الله لرجل من قلبين في جوفه) صدق الله العظيم
بالنسبة للسته يا حبوب إضافتك تمت من بدري!!
ما بقيت تتبتن معانا
نتشرف بيك يا زول .. وحبـــ 1000 ـابك!!
| |
|
|
|
|
|
|
Re: إسفيريا .. إنت منو وأنا منو!! (Re: عادل سهل)
|
شكراً على هذا الكلام المعبر
أنا بعتقد إنو الإنسان لازم يحترم نفسو أولاً، بعداك ما بقبل يعمل أي حاجة غلط بسهولة، وحتى إذا غلط بدون سوء نية فإن ضميرو الصاحي بيأنبو وبيرجع تاني يتصالح مع نفسوا ومع الغير. لازم الواحد ما يستسهل الأمور خاصة البتتعلق بحقوق الآخرين..
فيجب أن نعامل الآخرين كما نحب أن يعاملونا.
ولا فرق عندي بين كينونتي الواقعية والإسفيرية فما يقوله لساني لا يخالف ما تخطه أناملي على الورق أو الكيبورد وكله يعبر عني وعن أفكاري ويحمل بصمتي الشخصية في النهاية.
نحن في عصر العولمة وثورة المعلومات والتجريد وأصبح أهم ما يشغل الناس في هذا العصر هو الخصوصية والشفافية ومصداقية البيانات وأمن وأمان المعلومات لأنه بدون ذلك لن يستطيع العالم أن يحافظ على كينونته المتجددة وحتى القوانين والتشريعات تسعى نحو تأمين هذا الشكل الجديد للعالم.
أنت الآن يمكنك أن تحول أو تستلم الأموال وأنت جالس في مقعدك ويمكنك أن تسدد فواتيرك دون أن تغادر مقعدك وتطلب وتشتري السلع والخدمات عبر الأنترنت وأي تزييف في هذا الإطار يجعلك عرضة للقانون، فإذا كنت تخاف القانون فمن باب أولى أن تحرص على سلامة ضميرك وحسن نواياك لأن هذا بالإجمال هو الصورة التي تقدمها للناس حول نفسك.. وهي مكون كلمة انت.
فإذا لم تكن صادق اسفيرياً فيجب أن تعيد تقييم نفسك.
كل ها لا يتناقض مع حريتك في حدود الإفصاح... لكن بأي حال من الأحوال ليس في مصداقية ما تفصح عنه.
وتسلموا.
| |
|
|
|
|
|
|
Re: إسفيريا .. إنت منو وأنا منو!! (Re: محمد عبد الماجد الصايم)
|
ود الصائم يا حبيب الناس دي قالوا الكلام دا زعل ساكت ، وكلام الزعل مرفوض ، سودانيزأونلاين دا كلو كدة ، أول ما يزهجوا منك يعملوها ليك كلها كلكات وأبنصات ولمن يتكيفوا ليك يجوك جوا البيت والتحلك منهم ما تعرفا إلا تمشي لبلة هم لو كانوا عاوزنها كلكات ساكت ، كانوا حكوها مع البت دي قدر دا ؟؟؟ ومشوا وصوروا وعرفوا البيت تحت التشييد ؟؟؟ كمان دكين لمن نزل إجازة (وجه حزين)
تخريمة : واحد قال ود الصائم عامل فيها حريف /بالبوست دا عاوز يمشي المقلب الشربوهو أول مرة وإتملصو منو في نص الطريق وخلو دكين وود الموج براهم
ود البشرى قال عامل (كابشر) لأي حاجة وحا ينزل الحاجات قريباً نحن هنا في جدة ما في حاجة أسمها أسفيرياً وواقعياً الناس دي بتتقابل زي الترتيب ولمن نمشي الخرطوم أو أي حتة بنقابل الناس عادي جداً جداً لكن مرات بتخت للزول مكان كبير في قلبك ولمن تقابلو يطلع زول أي كلام والعكس صحيح عشان كدة خلي الناس أسفيرياً يحدي فترة التجربة تنتهي وبعد داك تقرر أسفيرياً أو كليكياً ً كليكياً دي قربت تبقى إكلينيكياً
| |
|
|
|
|
|
|
Re: إسفيريا .. إنت منو وأنا منو!! (Re: Sidig Rahama Elnour)
|
صديق ود النور
العلاقات المجهجة دي ما حقتنا ياخ
نحن ناس دغري وعدييييييييييل
الصداقة صداقة .. ولا كمان بقت خشم بيوت
وما ممكن الواحد يكون حسب نفسيات الجماعة مرة تكون كلكات ومرة تفتش في بله!! هو عليك الله بله زاتو فاضي لينا
بي المناسبة
Quote: تخريمة : واحد قال ود الصائم عامل فيها حريف /بالبوست دا عاوز يمشي المقلب الشربوهو أول مرة وإتملصو منو في نص الطريق وخلو دكين وود الموج براهم |
اسمعني .. زولك دا كان متابع ياتو بوست ياخي!! كان بتاع الوصيف .. غلطان كان بتاع الحوش .. غلطان كان بتاع الاعتذار .. برضو غلطان
كان على نانسي .. ياهو زاااتو .. اتدردقنا فيهو لمن سفينا الرمله
لكن دردقة حرفا يا معلم بعد ما وضحت الرؤية وكدا
أوع تبقى بتاع كلكات وساين آوت!!
| |
|
|
|
|
|
|
Re: إسفيريا .. إنت منو وأنا منو!! (Re: محمد عبد الماجد الصايم)
|
Quote: منذ إنضمامي القريب للمنبر شهدت حالتين من حالات إخفاء الشخصية الحقيقية
الأولى للأخت رشا حاتم ( دينا فيصل ) وقد أشبعنا الموضوع بحثاً وتحليلاً ، قدحاً ومدحاً |
الاخ عادل سهل والله انت جديد وعارف دا كلو ؟؟؟ ماشاء الله عليك والله أنا أقدم منك وبخش يويم والله ماعارف أي حاجة من قصتك الفوق دي ، وصدقني وقصة امنة دي وقعت في طريقي بالصدفة ساكت وكلو من مبارات دكين العجين !!! يعني رشا حاتم ودينا فيصل حاجة واحدة وكمان (قتلوتها بحث) ؟؟؟ قادر الله في المنبر دا
أنني امزح يا عادل معك وبحاول أن أداري غيابي والقى عذر لغيابي عن مثل هذه الاحداث المهمة رغم الحضور الشبه اليومي بتتخيل كلام زي دا ؟؟؟ لكن الواحد كويس انو مشتري دماغو من حاجات كتيرة
| |
|
|
|
|
|
|
Re: إسفيريا .. إنت منو وأنا منو!! (Re: محمد عبد الماجد الصايم)
|
محمد الصايم عن نفسى اعتز وفرحه شديد بعلاقات قويه بينى وبين بعض العضويه فى المنبر وماندمانه على الاطلاق عليها بالعكس اتمنى انو العلاقات بين الاعضاء تتواصل خارج البورد اشعر ان لى اسرتين اسرة صغيرة واسرة كبيرة والله احس بانهم جزء منى احزن حد البكاء لمن اشوف الصفحة مسودة وقلبى بيكون مقبوض شديد حتى ولو ماكنت بعرف من سودت له الصفحه معرفه شخصيا لكنى بحسن انو فى فقد حصل واننا نقصنا احبكم جمعيا كانى اعرفكم العمر كله الا من كره نفسه فلا محبه له عندى واكن للجميع الود والتقدير . اتمنى ان نتجاوز محنه امنه ونعتبرو نوع من الهظار الثقيل جانبها فيه التوفيق ونسامح وننسى تسلم يارب ...
| |
|
|
|
|
|
|
Re: إسفيريا .. إنت منو وأنا منو!! (Re: ماجدة عوض خوجلى)
|
Quote: اتمنى ان نتجاوز محنه امنه ونعتبرو نوع من الهظار الثقيل جانبها فيه التوفيق ونسامح |
العروس من أسنون
القصة والله ما قصة أمنة قصة الآراء الغريبة سواء في (دينا قيت) أو (آمنة قيت) رغم الاختلاف بين الـ (قيتين)
القصة في الناس العاوزه تنساك بمجرد Sing out يعني الصايم دا في الشاشة بس برا .. ببح!! معقولة لكن!!
زي ما بعاملك .. بستحق تعاملني ياخ!!
| |
|
|
|
|
|
|
Re: إسفيريا .. إنت منو وأنا منو!! (Re: محمد عبد الماجد الصايم)
|
شفت يا اب شنب عشان عبارتك دي انا بختلف معاك في جزء من طرحك Quote: بنقعد فيه وقت نقطعو من شغلنا ومن بيتنا وأولادنا يعني بالنسبة لي وناس كتيرين جزء من أساسيات اليوم!! |
الحياة ماهي الإنترنت و لا الأنترنت هي سودانيز أون لاين البحصل جو البورد و المشاعر المتبادلة كان سلبية ولا إيجابية مفروض حدها يكون البورد و الــساين آوت ( الشايفها ما عاجباك دي) يعني هنا ممكن اشاكل او اتساخف مع شخص في نقاش او غيره تفتكر لو قابلته في الواقع مفروض اشاكله برضو وكدا انا ما بتكلم عن علاقات و معرفة تمت في البورد لكنها صارت حقيقة و على ارض الواقع ودي صلتها بالبورد فقط انها نشأت هناك و إستمراريتها و قوتها ما عندو علاقة بالبورد بل دا خيار اصحابها و سعيهم لذلك من ناحية تانية كمان ما مفروض الناس تنقل تفاصيل حياتها الشخصية للبورد و تفصل بين مايطرح هنا و بين التعاطي الحقيقي على الأرض مع التاكيد على ما ذكرته عن وجوب المصداقية في أي شي يبقى إحترام خيارات الآخرين
وكدا
| |
|
|
|
|
|
|
Re: إسفيريا .. إنت منو وأنا منو!! (Re: محمد البشرى الخضر)
|
Quote: ( الشايفها ما عاجباك دي) |
إنت منو ؟؟ ود البشرى ولا أنا ؟؟ تمام خليك كدا وأديهو في شعرو الطويل دا .. وكان كتر أعمل ليهو ساين برة ..
Quote: يعني هنا ممكن اشاكل او اتساخف مع شخص في نقاش او غيره تفتكر لو قابلته في الواقع مفروض اشاكله برضو وكدا |
شفت يا ود البشرى ( طبعا لو كنت ود البشرى جد ) شان الملاقاة دي الواحد بحاول يمسك أعصابو وقلمو عن اتجريح الشخصي .. لأني لاقيت ناس هنا وشفت روعتهم لمن يلاقوك .. أنصحك لوجه الله ما تحاول تسئ لزول في شخصو ..
الدنيا ضيقة والله ..
بس ما قلت لينا إنت منو ؟؟ أنا ولا إنت ؟؟
| |
|
|
|
|
|
|
Re: إسفيريا .. إنت منو وأنا منو!! (Re: حسين يوسف احمد)
|
النصيحة مقبولة يا حسين - كان لي و لا لآخرين المهم يعني من كلامك لو اتشاكلنا - بدون تجريح شخصي - في بوست ما نقوم نتمها برة - بدون تجريح شخصي برضو - لو اتلاقينا انا قصدي ياحسين البحصل هنا يظل هنا المواقف و الإنطباعات البناخدها عن الشخصيات المختلفة و مشاعرنا - السلبية و الإيجابية و المحايدة - البتتكون هنا نتركها هنا برضو
شايفكم فرحانين بألفريدو ما قلتو ما نافع غايتو جنس غايتو
| |
|
|
|
|
|
|
Re: إسفيريا .. إنت منو وأنا منو!! (Re: محمد البشرى الخضر)
|
ود البشرى .. شكرا لتقبلك النصيحة ( ونا غير أهل لها )
أقول ليك حاجة بعد كدا :
شفت ناس جمال الصادق وعمار وود العمدة وهنادي فضل وبقية شباب جامعة الجزيرة الموجودين هنا ديل .. كنا لغاية الساعة خمسة ساء بنحتو قرض في الأركان .. بعد داك نجي نعمل الشيرنق وضرب الفتة سوا .. وآخر اليوم بعد الليت نخش السنما مع بعض .. وننوم مع بعض ونجكس مع بعض ( شفت بعض دا محظوظ كيف ) يعني يا عزيزي الحمد لله عندنا القدرة والتربية لفصل العام عن الخاص .. نختلف ما مشكلة المشكلة في عدم احترامنا لبعض .. ولو تم الاختلاف بدون جريح شخصي أراهنك أن الحياة ستكون جميلة والخلاف سيكون مفيد ..
ــــــــــــ
الفرح بالتصنيف لأنه يجعلكم تفيقون من الأحلام بالتفوق على الزعيم ليس إلا .. أنا شخصيا اصلو ما راكب لي في رأسي .. تصنيف يجيب شلسي الأول !!؟؟
| |
|
|
|
|
|
|
Re: إسفيريا .. إنت منو وأنا منو!! (Re: محمد البشرى الخضر)
|
Quote: مع التاكيد على ما ذكرته عن وجوب المصداقية في أي شي يبقى إحترام خيارات الآخرين |
والله يا عمك
كلامك عاجبني وما قادر أبلعو شفت الكلام دا كيف
Quote: يعني هنا ممكن اشاكل او اتساخف مع شخص في نقاش او غيره تفتكر لو قابلته في الواقع مفروض اشاكله برضو وكدا |
يا سيدي الفاضل << حلوة دي يا عمك
أنا ما بتكلم عن المشاعر أو الانفعالات مع المواضيع أو الأشياء يعني لو اتشاكلت لي مع زول في المنبر دا .. هل تفتكر الموضوع دا حيطع معاي بره البورد أو يأثر مثلا على مزاجيتي أو كدا؟؟
أنا بتكلم عن العلاقات بين الأفراد في البنبر دا أنا بتكلم عن محمد البشرى ومحمد الصايم هل علاقتي بيك أو علاقتك بي تنتهي في الـ (ساين) زفت دي؟؟
أبدا والله لو كدا .. حياك الله!!<< ما تضايق .. كلام جرايد ساي
عليك الله أفهمني ياخ!! ما تخليني أفتش ليك فهامات!!
| |
|
|
|
|
|
|
Re: إسفيريا .. إنت منو وأنا منو!! (Re: عبدالله كع)
|
ود كع
بي مناسبة الدرب الاخدر دا
البركة فيكم ياخ!! جاتم في الامتداد سامحتكم!! وبلغ التعازي لي ناس بوستيكم فردا فردا باللاي شايف ود البشرى جاكم بالدرب!!
نحن ناس أبرق معزيا وكدا
بس ما تجيبيو لينا حاجات زي دي تاني!!
| |
|
|
|
|
|
|
Re: إسفيريا .. إنت منو وأنا منو!! (Re: محمد عبد الماجد الصايم)
|
Quote: البحصل جو البورد و المشاعر المتبادلة كان سلبية ولا إيجابية مفروض حدها يكون البورد و الــساين آوت ( الشايفها ما عاجباك دي) يعني هنا ممكن اشاكل او اتساخف مع شخص في نقاش او غيره تفتكر لو قابلته في الواقع مفروض اشاكله برضو وكدا انا ما بتكلم عن علاقات و معرفة تمت في البورد لكنها صارت حقيقة و على ارض الواقع ودي صلتها بالبورد فقط انها نشأت هناك و إستمراريتها و قوتها ما عندو علاقة بالبورد بل دا خيار اصحابها و سعيهم لذلك
|
(ود البشرى) والله كلامك ده مرات أشوفه (ضِد) مرات (مع) ...الفهمتوا من كلامك بتتكلم عن الإتفاقات / الإختلافات داخل المنبر وعدم تمددها إلى خارجه ... إن كان كدا ده كلام طيب ... فمن الممكن أن أكون مٌتفق مع شخص ما بالمنبر .... ثُم .... حين أقابله قد لا أرتاح للنقاش معه ... والعكس بعكسه ... أما الموضوع المطروح هو إلى أي مدى الشخوص الإسفيرية هي شِخوص حقيقية ... بالمنابر قد تجد شخص بإسم ما ... ثُم تقابله فتكتشف إنه شخص آخر .... {أساسي} مثالاُ ... قابلته هنا ... اتداخلنا معاً ... ثُم ... لاحقاً إكتشفت أنه (ود حلتنا) ...تربينا معاً ... البيت مجاوز البيت !!!!...لا ضير ... وراجع ...
| |
|
|
|
|
|
|
Re: إسفيريا .. إنت منو وأنا منو!! (Re: محمد عبد الماجد الصايم)
|
والله يا اخوانا الموضوع جاط لي شكلو كدي يا احمد موسى يا عمك وريني بالضبط المطروح شنو و الناس دايرة تصل لشنو
و يا ابشنب دي مداخلتي في بوست احمد موسىQuote: بالنسبة لي البورد نفسه طقطقة تنتهي بتسجيل الخروج و لكن علاقاتي و تفاعلي مع الأشخاص و الأحداث اللتي عرفتها عن طريق هذه الطقطقة امر آخر تماما |
كاملة و بدون رتوش اديني رايك فيها يا عمك
من ما بقيت تخت الوش الأخضر الما بدور و كلو لطاشات دا ما عاجبني بالمناسبة
| |
|
|
|
|
|
|
Re: إسفيريا .. إنت منو وأنا منو!! (Re: محمد البشرى الخضر)
|
Quote: Quote: بالنسبة لي البورد نفسه طقطقة تنتهي بتسجيل الخروج و لكن علاقاتي و تفاعلي مع الأشخاص و الأحداث اللتي عرفتهاعن طريق هذه الطقطقة امر آخر تماما |
يا عمك في الحتة دي كدا
نحن كلامنا في الناس البتقول ليك إنت بالنسبة لي (كِلِك) وراس مالك (ساين آوت) وبس!!
تمام أبوي!!
ودا عشانك
| |
|
|
|
|
|
|
Re: إسفيريا .. إنت منو وأنا منو!! (Re: محمد عبد الماجد الصايم)
|
Quote: نحن كلامنا في الناس البتقول ليك إنت بالنسبة لي (كِلِك) وراس مالك (ساين آوت) وبس!! |
يا اب شنب ياخي دي خياراتهم و هم حرين فيها ما تفرض على زول يتعامل بالطريقة الإنت بتفضلها وكمان ما تقبل من زول يفرض عليك طريقته برضو بعدين ياخ الما عايز معاك افتح ليه اما بلغك قول الشاعر :
الزول إن اباك من غير سبب لا تسكو أمسح إسمو من خارطة ضميرك حكو جامل البجاملك و البسكك سكو وحب البحبك و البدكك دكو الناس زي الهدوم... شى راقي و شي زي جناح ام جكو وشي ساتر . وشي احسن منو تمش أم فكو
شفت كيف ابوي
| |
|
|
|
|
|
|
Re: إسفيريا .. إنت منو وأنا منو!! (Re: محمد عبد الماجد الصايم)
|
محمد غايتو ,,
أسمح لى أختصر الاسم كده ,, وحيكون رنان وجاذب ,, جاذب دى تحتها خط ,,
يأخى والله فى ناس فى المنبر ده بقوا لينا أهم من وليداتنا من كتر الحميميه البقت بيناتنا . أى واحد أول مايفتح المنبر العام تلقاهو فى الاول بفتش على ناس معينه يقرأ ليها , وبعد داك يمر على باقى المواضيع ,, معقول ده نسميهو علاقه اسفيريه , دى علاقه وجدانيه يامحمد غايتو جنس غايتو .
بالله زودنا ياسم الجد الرابع ,,, تحيه وجدانيه ,,,
| |
|
|
|
|
|
|
Re: إسفيريا .. إنت منو وأنا منو!! (Re: كمال سالم)
|
أستاذنا كمال سالم << بالمناسبة مبروك الاسم الجديد!!
تحيتك الوجدانية دي بنردها ليك بأحسن منها تحية قلبية خااااالصة لوجه الله تعالى .. وكدا
طيب .. ما تفهم معاي ناس الجرجرة دي ياخ!!
تقول ليهو كلكات يقول ليك فصل الدين عن الدولة!!
نتكلم عن أشخاص يتكلم عن أحساسيس ومشاعر!!
تحياتي محمد غايتو!!
| |
|
|
|
|
|
|
Re: إسفيريا .. إنت منو وأنا منو!! (Re: محمد عبد الماجد الصايم)
|
سلامات للصائم وكل المعقبين
ما عندي تعليق محدد على موضوع الsign out، لأني -حتى هذه اللحظة- لم أكون صداقة عبر المنبر، ربما بحكم تواجدي في مدن يقل وربما يندر أو ينعدم بها عدد من يكتبون في المنبر.
دايما بتكون الحكاية إني ألاقي زول ساكن في مدينتي، ويطلع إنو بيكتب معانا هنا. لكن سبب استمرار العلاقة بيكون لأسباب ليس من بينها (الاشتراك في مسألة الكتابة في المنبر).
ممكن الحاجة دي تتغير لو كنت في السودان، أو واحدة من دول الخليج، بحكم إنو التلاقي أكثر سهولة، يعني أنا لو داير أمشي اجتماع بورداب أمريكا، لو في مسمى زي ده، وكان الاجتماع ده في نيويورك مثلا، الموضوع ده بالنسبة لي زي ألف دولار كده "تذاكر وإقامة ومنصرفات"، وطبعا "الناس ظروف".
لكن، عندي تعليق على كلام محمد البشرى:
Quote: المواقف و الإنطباعات البناخدها عن الشخصيات المختلفة و مشاعرنا - السلبية و الإيجابية و المحايدة - البتتكون هنا نتركها هنا برضو |
وأسأله:
هل يعني هذا أن ما نكتبه هنا لا يعبر عنا؟ وهل يعني أننا نكتب بوجه، ونلاقي من نلاقيهم بآخر؟
لا أعرف إلا القليلين جدا ممن يكتبون هنا، لكنهم -كلهم- تشبههم كتاباتهم *، أذكر من بين هؤلاء حسن زمراوي، Khalid Osman Jafar، عمر الفاروق، sudnawi، بكري أبوبكر -شخصيا-، xspice13، وقلة قليلة من الأصدقاء ممن تندر كتاباتهم "أو تكاد تنعدم".
بالنسبة لي: الاختلاف في الرأي ما مشكلة أبدا **، ولا يمنع التعاطي مع الآخر "زي ما بقولو المثقفاتية"، لكن بعض الممارسات هنا تجعل هذا التعاطي في عداد المستبعد "على الأقل"، وهي على أية حال لا تمنع الملاقاة الباسمة، وكل الواجبات التي تفرضها هذه الملاقاة، كما تعلمنا في السودان. _________________________________
* طبعا الكتابة هنا تفاعلية، وأنا مقتنع بأن "الانفعال" قد يجعل البعض يكتبون ما لا يعبر عن طبيعتهم، لكن أنا قاصد النظرة الشاملة لما يكتبه أحدنا، وأستثني الممارسات السيئة.
** استثناء: بعض الآراء المتطرفة - من وجهة نظري- تتساوي مع ما أشرت له من ممارسات.
| |
|
|
|
|
|
|
Re: إسفيريا .. إنت منو وأنا منو!! (Re: محمد عبد الماجد الصايم)
|
بمناسبة أساسي ده أنا مرة شفت ليه صورة في المنبر ده وهو بقهقه قلت الراجل ده ببلبع وبتاع خطوط طويلة وبتاع إشارات مرور في جدة !!! أفهم لي دي يا الصايم وبنرجع للبوست بتاعنا تاني لأنو شايف ود البشرى بنظرّ في الأوف سايد!!
ما عندك لي ضفدعة زي بتاعت معتصم صالح بتاع الماجستير داك بدل محمد أب كرش ده
تحياتي لكم جميعا
أمير
| |
|
|
|
|
|
|
Re: إسفيريا .. إنت منو وأنا منو!! (Re: محمد البشرى الخضر)
|
Quote: طيب ما قلنا ورونا الموضوع شنو عشان ما ننظر ساي ما هببتو لينا |
يا عمك
الله يرضى عليك ركّز معاي شويه
إنت دا إسفيريا واقعيا
زول واحد ولا زولين!!
بالعربي إنت جوه البورد دا زول وبرا زول تاني!! يعني عندك شخصية وااااحدة ولا اتنيييين
لا إله إلا الله يا ربي لزمنا الصبر!!
(ما لاقي أي وش أفهمك بيهو)
| |
|
|
|
|
|
|
Re: إسفيريا .. إنت منو وأنا منو!! (Re: انعام حيمورة)
|
Quote: اسفيريا انت صديق كفاحي ..!!
وانا ذاتا انعام حيمورة !! |
الشاويش عطية .. نعوم أرسين لوبين!!
بختك والله وبختنا نحن برضو!! الواحد بيقدر يتكلم معاك وهو مطمئن إنو مافي شاكوش إسفيري يجيك في نص باصويردك
آآآآي ياخ!! الحقيقة حلوة!! عيش على طبيعتك!!
| |
|
|
|
|
|
|
Re: إسفيريا .. إنت منو وأنا منو!! (Re: على محمد على بشير)
|
Quote: كدى واحده واحده فهمنا شنو الحصل فى موضوع امنه |
علي ود بشير!!
القصة ما قصة آمنة ولا غيرها
القصة في اختلاف الآراء المصاحب للموضوع ككل
كل يومين يجي زول يقول أنا ما أنا!! ولا يقول أنا كضبت في حياتي!! ولا يا بكري غيّر لي اسمي!!
ويعجبك الناس الواضحين ديل يقول ليك إنت عندي مجرد كلكات بعمل ليك ساين آوت وتطلع من حياتي!!
أها .. رايك شنو
_______________ حالتك مُشرِف
| |
|
|
|
|
|
|
|