|
Re: المنبر السوداني الحر يحتفي بفاطمة الإنسا� (Re: Haydar Badawi Sadig)
|
كتب الأخ الجمهوري عيسى ايراهيم تمساح سبعة مقاطع في دفتر الحزن النبيل عيسى إبراهيم *
* فاطنة "بت" أحمد "ود" إبراهيم أول برلمانية سودانية "في يوبيلها الذهبي" "أم أحمد" * الاهداء: إلى "أم أحمد".. ثم إلى أحمد عثمان جكنون الصابر المصابر هانت يا "أبو الشفيع".. * جاءت الأستاذة في تلك الأيام من العام 2003 طوعاً من مغتربها وهي تحمل في عينيها الحزن الدفين استقبلها حشد من رفيقاتها في درب اتحاد نساء السودان وعلى رأسهن الأستاذة الصحفية آمال عباس..سدت حلقي عبرة مكتومة..وكتبت:
("1" البشارة)
هديك فاطنة بتضوي كما الشعاع النور بتطلعي زي بحر مسجور وتقلعي كالقضا المسطور وتظهري زي كتاب منشور وتهزمي كل زول مغرور ومن حزنك صدورنا تفور هديك فاطنة هديك أم الشفيع النور نغيمات طالعه من طنبور بتكشفي سرنا المستور بتنزعي من عقولنا الزور هديك فاطنة
("2" الرؤيا)
يوم طليتي زي ضلانا اسم الله ويوم جيتينا قام كل الحزن ولَّى ونحن معاكي نسوى كتير ونحن بلاكي كوم ذلة إنت مناضلة إنت مجادلة أي والله تفرهدي في قلب مسكين وياكي محاية الطيبين صدر دافي لطفل حزين حضن هلَّا صبرنا كتير وشلنا الويل وراجنِّك دوا العلَّة وداخرنك كما الغلَّة هديك فاطنة
("3" العودة)
بتنبتي من قلب ذاتنا تضمدي لي جراحاتنا ترفِّعي في سراباتنا ترقِّعي لي زراعاتنا عشا أماتنا وتسرحي بي غنيماتنا هديك فاطنة
("4" الحزن النبيل)
من حزنك فقع ألمي ومن دمعك مليت قلمي وبكتب ليكي من شجني وفي حضنك لقيت وطني ومن حزنك نبت حزني ياكي تخايا ياكي رخايا ياكي أمِّي ياكي رؤايا ياكي دوايا ياك دمِّي هديك فاطنة
("5" المهدي)
يا أم أحمد دُقِّي المحلب فوق توب أحمد أحمد حاضر في المحاضر جاهُو كلب حلب الناقة من غير ساتر شال من عينو النوم الفاتر صحصح كل الألم الغائر واشعل نار الشعب الثائر أصبح شاهر سيفو الباتر والكل ساهر والحق ظاهر يا أم أحمد ريحة المحلب طردت كل الوسخ الداعر أبشري كتير خير أب أحمد ضرعُو كبير ولبنو كتير وسعنو بنسمع ليهو خرير هديك البير الإبل الطير رتعت من بدري وبدت السير هداك حفير من خيرو الناس شربت والطير هديك فاطنة
(6 "الدُعاش")
جانا السلام جانا بي خيرو عمَّانا وانكسرت الاقفال الكان محاوطانا عبادي برقو بشيل والقبلي خيرو كتير أبشر كتير بالحيل حُريَّة قاصدانا
("7" سجدة النضال)
"حباب الاشتراكية حبابك ميه في الميه" مساكينك بهادوكي جعانينك يباركوكي عرايَّا متكلين جوكي نساوينك ترابيلك رواعينك وعُمَّالك مظاليم جوك يقالدوكي هديك فاطنة..
* "عيسى إبراهيم: الجمعة التاسع عشر من ديسمبر 2003 اليوبيل الذهبي لإعلان الاستقلال من داخل البرلمان ..سوبا غرب"
|
|
|
|
|
|
|
|
|