والله دي قصة حزينة جداً .. يا أحمد ياسين .. وعشان شنو ده كله ؟ .. عشان ساعة !!! .. لا حول ولا قوة الا بالله .. ـــــــــــــــــــــــــــــــــــــــــــــــــــــــــــــــــ
مأمون أبدع في الغناء .. وقدم الأغنية في صورة جميلة ..
شفت لي برنامج اسمو دروب محبة استضاف الشاب الاسمو مامون، مقدم البرنامج قداد ويفقع المرارة قال كلام خارم بارم وسأل اسئلة وجاوب عليها بنفسو، انا أتأكدت انو الشاب ده بداياتو السيئة بيد الشلة إياها.
.
06-01-2017, 02:46 PM
Ahmed Yassin
Ahmed Yassin
تاريخ التسجيل: 01-31-2013
مجموع المشاركات: 5507
جمال ودالقوز .. الحبيب كل سنة وانت طيب وبالف خير انت وجميع احبابك
Quote: والله دي قصة حزينة جداً .. يا أحمد ياسين .. وعشان شنو ده كله ؟ .. عشان ساعة !!! .. لا حول ولا قوة الا بالله
شىء محزن .. وعارف يا جمال .. العم مكاوي وهو طريح المستشفى اتت (حسناء الحلفايا) لزيارته ولكنها ولرهافة قلبها ما قدرت تدخل عليهو ووقفت برة الغرفة ودي برضو كان ليها اثر في نفسه المرهفة
يبدو جلياً و من خلال تعابير و جه الاستاذ السر القدور اثناء اداء شكرالله انه قد تورط في ضمه للمجموعة هذا العام بالرغم من كلمات الإطراء المتجمدة التي يحف بها هذا الماسورة بعد كل اداء
06-05-2017, 08:03 AM
Moawia Mohammed
Moawia Mohammed
تاريخ التسجيل: 10-24-2006
مجموع المشاركات: 3777
جلطة كبيرة من السر قدور في الحلقة التاسعة قال نستمع لأغنية أوعديني لأستاذ الأجيال السر دوليب و هي من كلمات الدكتور الزين عباس عمارة و هو شاعر أغنية من زمان لعيد العزيز داؤود لذا و جب التنويه لانو الزول شكلو بقطع من راسو ساكت
06-05-2017, 10:14 PM
عزيز
عزيز
تاريخ التسجيل: 04-12-2002
مجموع المشاركات: 3290
سلام عزيزي ود خطاب – والاحباب .. التبسم والضحك واظهار الفرح شيء جميل عند الانسان في وقت ومناسبات الافراح بشتى صورها، وعكس ذلك تماما في الاتراح والحالات المحزنة، عندها الشخص تنقلب حاله الى حال تتغير ملامح وجهه حد زرفان الدمع الهطال او البكاء الصامت المجمد للحواس. لكن ما نراه عند بعض الفنانين/ت الشباب وخاصة في هذا البرنامج اغاني واغاني 2017م، يثير الدهشة والاستغراب، تجد بعضهم يتبسم ملئ شدقيه واساريره تنضح بشرا وترحاب وكمان يبشر وهو يؤدي اغنية تطن كلماتها باللوعة ، الحرمان , الفراق والحزن الشديد. ، مثالا: - اغنية ست الريد - للمبدع مامون. ماذا يعني هذا؟ بالتاكيد هذا الفنان/ة لم يستوعب ولم يعش احساس ومشاعر شاعر الاغنية، ولم ينقل هذا الاحساس النبيل للمتلقي من خلال التلفزة، والمقصود ليس الحزن في حد ذاته بل ما ينتج عنه من تطهير للنفس البشرية، والارتقاء بها لقمة التعاطف الانساني. هذا الاحساس ينبغي ان ينقله الفنان/ة للمتلقين، ليؤكد هدفية مسعاه في دروب الفن الغنائي صاحب الرسالة الاسمى. في ظني هذه الحالات تستوجب انتباه الموجهين الفنيين في بروفات البرامج، وحتى المقدمين للبرامج. فهل نحن مستوعبين ذلك.
حمد
06-06-2017, 12:15 PM
عبير خيرى
عبير خيرى
تاريخ التسجيل: 02-12-2004
مجموع المشاركات: 2440
عن الإذاعة وبضيافة الأستاذ علم الدين حامد بدأت الحلقة الثالثة من اغاني واغاني مع أغنية (من دار الإذاعة) علي محمود التنقاري وعائشة الفلاتية بأداء هدى عربي وفي منطقتها (هدى عائشة الفلاّتية، وهدى منى الخير) اداء جميل.
سمير الروح قلبي سميره كلمات وألحان عبد الرحمن الريح وأداء الفنان صلاح بن البادية (مكانة صلاح بن البادية أكبر بكثير من تعليق أبدعت إبداعاً شديداً).
رمز الجمال لمحمد عوض الكريم القرشي وعثمان الشفيع اداء مأمون سوار الذهب، نعم انت اجمل صوت على الإطلاق في كل البرامج الغنائية التي تبث في قنوات السودان رمضان هذا العام ولكن، يا مأمون زي ما قال الليندي صوتك أبدأ ما محتاج التجول الما مستحب والمفاجيء بين الجواب والقرار والبخصم من الأداء وخصوصاً في الاغنية دي، ثانياً عدم حفظ الكلمات بيخصم كثير من الأداء عند محبي الغناء القديم تحديداً والبتهمهم تفاصيل التفاصيل، أرجو الانتباه للنقطة دي في مسيرتك.
يا قمر دورين للفنان عبد الكريم الكابلي وأداء حسين الصادق دخول فارق واداء باهت يخصم من رصيد حسين الصادق (ملاحظة تغيير في صوت حسين الصادق من العام الماضي للآن غلظة وحشرجة واضحة). خرجت الفرقة. عن الزمن لاكثر من مرتين.
إنتي وأنا من أغنيات الفنان الراحل هاشم ميرغني وأداء مهاب عثمان، طبيعة صوت مهاب يمكنه من أداء أغنيات هاشم ميرغني المناحية واحساسه في الأغنية دي كان جميل، والأجمل اداء المجموعة الموسيقية لصعوبة ألحان هاشم ميرغني الغير منتظمة.
عود لينا يا ليل الفرح كلمات دكتور عبد الله سلمان الحان الفنان الطيب عبد الله اداء شكر الله عز الدين وشكر الله غناها عدة مرات ، الاداء سليم وجميل فقط مخارج الحروف عند شكرا الله غير واضحة الفرقة الموسيقية في هذه الاغنية ابدعت ، الكمنجات لها النصيب الأكبر من الجمال، ليل الفرح كانت ختام الحلقة الثالثة.
06-06-2017, 07:42 PM
حمد عبد الغفار عمر
حمد عبد الغفار عمر
تاريخ التسجيل: 06-06-2008
مجموع المشاركات: 7662
سلام يا جماعة نحن في البرنامج دا أمام وضع غنائي مختل يصعب تقييمو ما ممكن الواحد يقيم فنان في يوم يقول عليهو كويس ويومين يقول عليهو ما كويس ويجي في اليوم الرابع يقول كويس كيف نطلق كلمة فنان في وضع زي دا مثلا حسين الصادق اليوم غنى كويس (وكويس جدا) الايام الفاتت كان سيء مكارم بشير اليوم حسيت إنها راحت عديل في أغنية سيد خليفة لحن الأغنية غاب عنها والتسليم بينها وبين الأوركسترا منتهي. شكر الله من سيء لأسوأ وشكرالله دا يا أما متهور يا أما جريء بغير حساب ، معقول يختار أجمل وأصعب أغنيات لوردي وزيدان ويقول عاوز يغنيها صحي اتغيرت انت وبالي مشغول يا حبيبي زيدان نفسو قال بتهيب الأغنيتين ديل يجي شكر الله يتشبح فيهن ويعولقن بالصورة دي ؟ هدى عربي ال (كيرف) حقها ماشي في خط افقي مرتفع هي هي منذ ظهورها الأول مافي تدني في أدائها أبدا ملاذ غازي تخطت خط الرهبة وظهرت في آخر حلقتين بشكل جيد أظهرت أداء مقنع يدل على أنها في طريق التطور (خصوصا وهي من الدارسين للموسيقى) وصراحة الصراحة ولدنا مامون في آخر حلقة رقم (4) ما كان في مستواهو وألاداء بتاعو كان ممل جدا
06-06-2017, 11:35 PM
عزيز
عزيز
تاريخ التسجيل: 04-12-2002
مجموع المشاركات: 3290
سعيد جدا بمتابعة اخي الفنان حمد وتحليله وملاحظاته القيمة..
وأختها الغالية التي تمنح هذا البوست سنويا من عبيرها.. نسأل الله ان يمن على والدتها بالصحة والعافية وتمام الشفاء.. دعواتكم لها اخوتي ببركات فضائل هذا الشهر الكريم
06-07-2017, 02:01 AM
محمد الامين محمد
محمد الامين محمد
تاريخ التسجيل: 03-07-2005
مجموع المشاركات: 10014
في حلقة اليوم رقم11 عمك السر خلط الحابل بالنابل في اسماء الشعراءشكرالله فعلا ورطة كبير جدا اختار اصعب اغاني زايدان واطولها مكارم غير موفقة في اداء اغنية تم تكرارها في هذا البرنامجعلي العموم اختيار اغاني طويلة مع قصر زمن البرنامج مشكلة كبيرةمأمون لم يعطي فرصة يبدو ان السر قدور لم يتوقع ان مأمون سيدخل قلوب الجمهور بهذه الطريقة
جميل ان يتجه البرنامج لاغنيات كبيرة على شاكلة بقيت ظالم لزيدان وما نسيتك للخالدى. مثل هذه الاغنيات هى التى جعلت اسيادها كبار وباقيين فينا ابد الدهرلانهم نجحو فيها بعد ان عصرو فيها روحهم ورحيقهم عبر السنين. فلا تكفى بروفة بروفتين ويلا غنو يا شباب.
مثل هذه الاغنيات يغنيها اسيادها ليس باصواتهم ولكن باحساسهم العالى جدا والمرهف فبتصل وبدق الهدف بقوة نووية.
كذلك على المطرب ان لا ينسى انو ايضا جزء من مهمته التمثيل. اذكر احد المطربات تريد تغنى اغنية عم عبدالرحيم وهى فنانة واضح عليها الثراء ورغد العيش فكان كلامى معاها انو الناس لن لن يصدقو روايتها وهى بهذا الشكل الجميل والمنعم. فعليها ان تمثل وتغير هيئتها لو داير القبول والنجاح فلقد صدقوها عند سيدها مصطفى سيد احمد بشكلو المتعب الذى اتعبتو الحياة وانهكته فصادف الاحساس الاحساس فاصبحت احد اغنيات الزمان.
من الصعوبة عزو والاحباب ان تغنى لزيدان وهو ملك الاحساس والشعور الذى بلغ القمة رجل كان يعيش مأساة كبيرة نعرفها جميعا انعكس كل ذلك على صوته الفاره الحزين وتاوهاته العميقة وشجن شديد لمن تبكى. ان كان ولا بد فلازم ترسم لادائك خارطة طريق لتخرج بالاغنية بر الامان.
06-07-2017, 08:21 AM
إبراهيم عبد الحليم
إبراهيم عبد الحليم
تاريخ التسجيل: 10-31-2008
مجموع المشاركات: 3563
الفنان الشاب الكاسح مأمون اسرع فنان في السودان يدخل قلوب الأمة . ثورة مأمون ها جت و ما جت وعمت البحر و البحر بسرعة الصاروخ . بالتوفيق يازول يا فاهم يا جد ع .
06-07-2017, 08:38 AM
محمد الامين محمد
محمد الامين محمد
تاريخ التسجيل: 03-07-2005
مجموع المشاركات: 10014
الحلقة الرابعة مع الفنان حسين شندي وبدأت بأغنية (يا جميل يا راقي إحساسك) كلمات صلاح حاج سعيد وألحان صلاح إدريس اداء عاصم ومبارك البنّا، أداء صراخي لدرجة انه القناة نقصت الصوت رأفة بنا. اما مبارك البنّا ظهور لا مبرر له.
من كلمات الشاعر مختار دفع الله وألحان حسين شندي أداء مكارم بشير ، أداء كارثي بي العربي كدة (بشتنت عدايلها) خربت الغنية الأصلاً مفترض يغنيها صوت ذكوري مع عدم حفظ الكلمات واظن انه السلم عالي عليها لدرجة انها اتخنقت ودخل عاصم ومبارك استلموا منها للحظة.
الليلة باكية مالك يا العيون كلمات وألحان سعد الله ضرار وأداء مهاب عثمان ومحاولة من مهاب لاضافة جانب الشيالين في الغناء الشعبي في طريقة الأداء فجاء باهت بدون احساس.
الليلة مالو ما جا كلمات وألحان عوض جبريل أداء هدى عربي وفي رأيي كان أجمل اداء للحلقة.
قضينا ليلة ساهرة العتيقية بصوت حسين شندي كانت ختام الحلقة الرابعة.
06-08-2017, 09:13 AM
عبير خيرى
عبير خيرى
تاريخ التسجيل: 02-12-2004
مجموع المشاركات: 2440
الحلقة الخامسة عن الغناء الخفيف بدأت بجزء من الاغنية الحماسية سمحة الهيبة فوق مختار واداء مكارم بشير.
ست الريد من كلمات وألحان الرائع مكّاوي الشيخ الأمين، وعن مكّاوي أحكي بما لا يناسب قامته مهما استلفت من اللغة، مكّاوي الصبور على البلاء والوباء طريح فراشه لسبعة وأربعين عاماً بسبب طمع من ليس له ضمير في ساعة لمعت في يد شاعرنا وهو الأنيق الخلوق المؤمن بقضائه تعالى، البشوش الباسم رغم آلامه، الحافظ للحقيبة بكل ضروبها المرجع الثر وقبلة الموثقين والباحثين، الكريم المستقبل لزائره في أي وقت وأي زمان لا يشكو أهل داره من زواره الكثر له ولهم كامل الحب والتحايا. تغنّى بست الريد مأمون سوار الذهب بأداء جميل وطروب رغم عدم إحساسه بما تغنى تجاوز أداءه عدم حفظ الكلمات عندي ومستني الأغنية وبكيت كما بكى العازفين ودمعت اعين الفنان صلاح بن البادية ومسحت كل هنات الاداء فيها وسمعتها لأكثر من ١٠ مرات ، وفعلاً هااااايل يا مأمون هذه المرة صادقة. (ليست للاغنية علاقة بالايقاع الخفيف)
يا عيني تعاينن كلمات وألحان الزين محمد الزين (ليست للأغنية علاقة بالجاغريو كما قال السر قدور وهي ليست من أغنيات الحقيبة كما ينسبها البعض) وكتبت في فراق المتمّة بشندي وذكر فيها اسم زوجته ستينا) الغنية اداء هدى عربي والايقاع الخفيف يناسب هدى عربي فادتها كما يجب.
يا مسافرين وين كلمات الشاعر حسين عثمان منصور الحان وغناء الفنان محمد حسنين اداء حسين الصادق .
صدفة غريبة من كلمات محمد يوسف موسى ألحان صلاح بن البادية وأفراح عصام بأداء باهت ومحاولة تقليد صلاح بن البادية في الاداء نقصت من الاداء.
من كلمات وألحان عبد الحميد يوسف تغنت ملاذ غازي شتلوك وين يا العنب ترددت في بداية الاغنية ثم ثبات واداء سليم.
يا حبابيب كلمات وألحان وأداء صلاح بن البادية كانت ختام الحلقة الخامسة.
06-09-2017, 07:23 AM
عبير خيرى
عبير خيرى
تاريخ التسجيل: 02-12-2004
مجموع المشاركات: 2440
اغنيات الدكتور علي شبيكة هو عنوان الحلقة السادسة وبدأت باغنية يا زهرة الليلك كلمات علي شبيكة وألحان سيد خليفة بصوت شكر الله عز الدين، الشكر هنا جزيلاً للمجموعة الموسيقية حقيقة أبدعت وهي الكانت هايلة في رأيي.
أحلى غرام وأجمل هوى ألحان سيد خليفة اداء مكارم بشير التسميعي خالي من الاحساس وصعوبة اداءاها للمناطق العالية.
بدر سامي علاه الحان السني الضوي اداء أفراح عصام .
حيرت قلبي معاك الحان السني الضوي اداء ايلاف علد العزيز ، الاغنية غير مناسبة لصوت ايلاف وحقيقة لا اعلم كيف توزع الأغنيات على المشاركين ، اداء باهت وممل.
طول مفارق حيّه ألحان السنّي الضوّي ، كتب علي شبيكة الأغنية في هجرة صديقه الدكتور مبارك حسن الخليفة لدبي عام ١٩٧٣ بعد قرار أسرته بإبعاده عن المعتقلات وقتها لانتمائه للحزب الشيوعي السوداني، الأغنية أدتها هدى عربي أداء جميل وكانت ختام الحلقة السادسة.
06-09-2017, 11:03 AM
عزيز
عزيز
تاريخ التسجيل: 04-12-2002
مجموع المشاركات: 3290
عبير الورود لك التحية يا خيه واصلي فهذا ما ننتظره بهذا المفترع
الحلقة الثانية عشر كانت تكريماً للفنان عاصم البنا !!
كان يمكن أن تكون حلقة كمثيلاتها عندما يستضاف أي من الفنانين وأن يكون التكريم خفيفاً ولطيفاً لفنان شارك في جل المواسم وفي تقديري تكريم مستحق لمساهمته في هذا البرنامج.. ولكنها كانت حلقة (أوفر) وبها من الدراما ما لا يليق .. صاحبها الهرج والمرج والبشير وجلب الجالسين مع الجمهور والجلوس في الأرض ثم الوقوف والحشد الذي ضاع معه ملامح المشاركين وضاعت ملامح الحلقة!!
توقعت أن يغنوا في الختام لن ننسى أياماً مضت مرحاً!!!!
عاصم فنان يختلف عليه من يختلف ويتفق عليه من يتفق ولكن مثل تلك الحلقة التي جانبها التوفيق تكون خصماً عليه ولهذا كل المواقع والوسائط لم تحمد تلك الحلقة.. ونخشى أن تكون حلقتي طه وحسين بذات الهرج والمرج.. أعلم بأنه يقرأ معنا هنا أو سيبلغ بما يكتب فأتمنى أن يكون هذا التناصح له محبه أخوية والله من وراء القصد..
ولكم الود
06-10-2017, 01:52 AM
محمد الامين محمد
محمد الامين محمد
تاريخ التسجيل: 03-07-2005
مجموع المشاركات: 10014
حسين الصادق لسانو معوج فى فصيح اللغة امس بهدل أسراب الحسان بهدلة دايره أسألكم فى الاغنية فى بيت غناهو (وانا قد صرت كهلا من جمال وجه المذاب ) الكلام ده صاح ولا الصاح (وانا قد صرت كهلا من جوى الوجد المذاب)
06-11-2017, 08:51 AM
Ahmed Yassin
Ahmed Yassin
تاريخ التسجيل: 01-31-2013
مجموع المشاركات: 5507
الاخ معاوية هي فعلا كلمات الشاعر الامدرماني الكبير (احمد ابراهيم الطاش) وناس بتخلط بينها وبين (ظلموني الحبايب) (اسما ولحنا) كلمات السر قدور للراحل العاقب محمد حسن احمد ابراهيم الطاش غنى ليهو ابوداؤد اغنية (عازة) حسن عطية يا ماري عند الاصيل .. حبيبي ناوي الرحيل ياعظيم ... احمد المصطفى بركات
.نحن لا نقبل في غناء الخالدي هذه الفوضى، فوضى في الموسيقى والأداء معا!؟ استمعنا ونحن صغارا لعبد المنعم الخالدي وتربينا على الإستماع لإسلوبه وصوته، رحم الله الموسيقار الكبير سليمان أبوداؤود.
مرحبا للكرام وبامدر ياحبيبة كانت حلقة طه سليمان طه جاء مرتبا في هندامه ووسامته وكان هادئا كما لم اعهده من قبل ...اختيارات كثيرة ومنوعه صوت طه العذب كما اشعر به كان واضحا كلما تشارك مع احدهم ويعيدهم لمربع الابداع هدى وملاذ وايلاف شاركوا كما المفترض ...وتوارى الزملاء باسباب يعرفونها هم ...ولكن اي كانت تلك الاسباب كان من منطلق الزمالة والندية في الوسط يشاركون هذه الحلقة تحديدا وفي ظني الكثير لغيابهم ...!!! تركوا لنا علامات استفهام ؟؟؟؟؟ ونحتفظ بالتخمينات بعيدا عن محبتي او رفضي لطه الا انني اعترف ان جيوشا جرارة من معجبي ومعجبات طه حيروني ذات امسيات ممادفعني لمتابعة الفتى ....الان انا اسيرة هذا الصوت الذي يمتعني عذوبة وطربا
وما اود ايصاله لطه عليه الاجتهاد والاختيار للكلمات التي ترتقي بالفن وان يبتعد عن الهابط ......لا ادري لماذا كان هناك (بندول ) هل اراد ان يدعمه طه ام هناك سبب خفي جعله يصطحبه معه في هذه الحلقة التي خصصت له ؟
شكرا للاستاذ السر قدور الذي يواصل في دعم الفنانين الشباب وكما هي اهداف البرنامج التوثيقي للكبار فهو يصطحم معه دعم الجيل الشباب وهذا لايتعارض ...فجيل اليوم هم الغد والماضي ... شكرا الاب قدور ...
Quote: اعترف ان جيوشا جرارة من معجبي ومعجبات طه حيروني ذات امسيات
الاخت نعمات تحياتي
ربما الجيوش الجرارة هذه هي من اوحت له ان يتحفنا كمان ببرنامج سمج اسمه استوديو 5!! يفعل في البرنامج ما يشاء، يقدم ويطرح الأسئلة ويقول النكات ويضحك، ويغني .. لم يتبقى له إلا ان يبول في الأستديو؟! اعذريني لكن، الحبرتجية ديل مسترزقين بفداحة ما تقدمونه لهم من دعم سخي، وتراهم يضحكون ويقهقهون على سذاجتكم عندما يعودوا إلا بيوتهم بالدنانير! طه سليمان مين عشان تنصب له حلقة؟!! قالت ايه طه سليمان كان هادئ جدا!! يعني السيد طه سليمان ده لازم يجلد المشاهدين ويركلهم بالشلاليت! بلا طه بلا عثمان بلا لمة!
Quote: رجل كان يعيش مأساة كبيرة نعرفها جميعا انعكس كل ذلك على صوته الفاره الحزين
أخونا إبراهيم ياتو مأساة كبيرة يا رجل، زيدان إبراهيم كان فنان حقيقي لم تصنعه المأساة التي درعتها له في رقبته! ياخي أرحموا الميتين وارحموا الأحياء! المأساة هي الحياة البائسة التي نعيشها نحن في زمن سيطر فيه الطفيليون على كل شيء، يبيعونكم الغناء الرخيص، بأصوات مغنين تافهين، يتكسبون من هذا العواء.
.
06-12-2017, 09:47 AM
عبير خيرى
عبير خيرى
تاريخ التسجيل: 02-12-2004
مجموع المشاركات: 2440
دور آلة العود في تطور فن الغناء والموسيقى في السودان عنوان الحلقة السابعة وبدأت بعازة في هواك وآداء كورالي جميل.
حبيب عمري كلمات طه حمدتو والحان حسن عطية اداء مهاب عثمان ، واضح انه ما حصلت بروفة للاغنية لأنه كثير من جماليات اللحن أسقطت وأداء مهاب جامد وبدون احساس.
أوراق الخريف كلمات عبد المنعم عبد الحي وألحان عثمان حسين اداء مكارم بشير اداء باهت وصرخات في غير مكانها.
عاطفة وحنان أغنية الفنان محمد ميرغني كلمات أحمد عبد القادر ابو شورة وألحان حسن بابكر أداء ملاذ غازي ظهرت ملاذ مرتاحة اكثر غنّت بتمكن بدون خوف اداء جميل.
هل أنت معي (همسات من ضمير الغيب) من كلمات الشاعر المصري محمد علي أحمد وألحان برعي محمد دفع الله وغناء عبد العزيز محمد داؤود ، أداء عاصم البنّا الأغنية ما ناسبة أبداً لصوت عاصم وصراخه.
هل انت معي كانت ختام الحلقة السابعة.
06-12-2017, 10:34 AM
عبير خيرى
عبير خيرى
تاريخ التسجيل: 02-12-2004
مجموع المشاركات: 2440
ادائيات الغناء السوداني كان عنوان الحلقة الثامنة وبدأت بأغنية عروس الروض كلمات الشاعر اللبناني إلياس أحمد فرحات من شعراء المهجر كتبت القصيدة عام ١٩٢٥ في البرازيل وقام بتلحينها عدة ملحنين من عدة دول منها العراق والسعودية واليمن والسودان، قام بتلحينها في السودان إبراهيم عبد الجليل وسجلها فضل المولى زنقار، ومن آداء عاصم البنّا المزعج جداً والمزعج أكثر المجموعة النشاذ خلفه.
رفاعة (قوم نادي عنان واتباعها) كلمات وألحان خليل فرح أداء هدى عربي والاغنية في قالب هدى عربي الخفيف ادتها بطريقة جميلة.
يا مداعب الغصن الرطيب كلمات سيد عبد العزيز وألحان كرومة اداء مأمون سوار الذهب ممتع وطروب وجميل فقط عدم حفظ الكلمات.
بأغنية النعام آدم اختتم الفنان صلاح بن البادية الحلقة الثامنة من أغاني واغاني.
06-12-2017, 01:48 PM
عزيز
عزيز
تاريخ التسجيل: 04-12-2002
مجموع المشاركات: 3290
الأحباب محمد الأمين أستاذ محمد سيد أحمد معاوية محمد أميرة حسين أحمد يسن نعومة الجميلة وعبير الورود
غبت أنا فكان حضوركم ضافي وافي كافي .. لكم الحب
حلقتي تكريم كل من حسين وطه كانت من أميز الحلقات وفعلا لهؤلاء الجيل خصائصهم . معظم الأغاني التي حظيت بالمشاركة هي أعمال مميزة وكانت مشاركة المغنيين لها أكثر من جيدة وهذا لأنها تلامس عصرهم ومشاعرهم.. وأتمنى حقاً أن ينظر البعض للمتلئ من الكوب .. فمن يعتقد بأن الغناء الجيد والجميل إنتهى عند حقبة محددة فاليتحسس إحساسه الذي أصابه الكبر.
ساعود للحلقتين كل على حدة.. لكم الود
06-13-2017, 04:36 PM
عبير خيرى
عبير خيرى
تاريخ التسجيل: 02-12-2004
مجموع المشاركات: 2440
أغنيات في عمر السنوات عنوان الحلقة التي بدأت بأغنية يا الناعس المكحول كلمات مصطفى الحاج بطران اداء مأمون سوار الذهب الممتع والطروب حتى دخول عاصم بمقطع من يا قائد الأسطول لسيد عبد العزيز
آه يا حبيب من كلمات يوسف عبد الباري وألحان عبد الحميد يوسف شاركت معه الاداء عائشة الفلاتية، أداء مشترك بيت مهاب عثمان وهدى عربي مهاب صوت جميل واداء يحتاج لتوظيف، استلامه من هدى عربي عند (آه) نشاز مزعج ، هدى عربي استلام جميل من مهاب وصعوبة في النفس في نهاية الكوبليه لحد الاختناق.
يا حنوني لعائشة الفلاتية وأداء إيلاف عبد العزيز بعض الاغنيات لا تحتاج للحركات التي ظهرت في اداء ايلاف يا حنوني من هذه الاغنيات اغنية دمها خفيف كايقاعها.
عتاب الشاعر قرشي محمد حسن ولحن حسن عطية أداء حسين الصادق ملاحظة بداية بطء ايقاع الاغنية فحسن عطية غناها بايقاع اسرع ، وواضح جداً تدهور صوت حسين مع حشرجات مزعجة أثناء الاداء.
يا مسافر لصلاح محمد عيسى وأداء أفراح عصام السيء كانت ختام الحلقة.
ملاحظة في مايك الدرامز عالي جداً واوسكار للباص جيتار .
06-14-2017, 01:05 PM
إبراهيم عبد الحليم
إبراهيم عبد الحليم
تاريخ التسجيل: 10-31-2008
مجموع المشاركات: 3563
معروف عن زيدان قصة حب ومحاولة ارتباط فشلت وهو ما يفسر صوته الحزين المفعم شجن.. فى اهاته العميقة وارتباطه بالليل..يا ليل البعد يا مضيع...الخ وقد يكون هو نفسه ضخم الشغلانة لمزيد ابداع وكما قلت لك المغنى ايضا جزء منه ممثل لزيادة الحبكة...... وهذا ليس شئ كعب.
06-14-2017, 01:12 PM
إبراهيم عبد الحليم
إبراهيم عبد الحليم
تاريخ التسجيل: 10-31-2008
مجموع المشاركات: 3563
طه سليمان مين عشان تنصب له حلقة؟!! قالت ايه طه سليمان كان هادئ جدا!! يعني السيد طه سليمان ده لازم يجلد المشاهدين ويركلهم بالشلاليت! بلا طه بلا عثمان بلا لمة!
دعو الاشجار تنمو
انا شخصيا استمتعت بحلقات طه وحسين الصادق وعاصم..ولقيت فيها شئ مختلف قدمو البرنامج هذا العام لاول مرة. الزمن اختلف فهناك انبت مختلفة Input وبالتالى اوت بت مختلفة Output
كتب ابراهيم عبد الحليم: ولو لا اختلاف الاذواق لبارت الاصوات
ياخي الثلاثة طه والصادق وعاصم (انت عاصم ده بغني ليهو كم سنة لاحولااااااااه) جماعة الثلاثة عندهم مشاكل في الصوت وأخطاء في الأداء وضعف في مخارج الكلام وسلامة نطق الحروف، زيدان إبراهيم الذي درعت له مأساة في رغبته، لا يعرف الناس ان، وربما لم ينتبهوا لسلامة ووضوح مخارج الكلام في لسانه، والمقدرات الهائلة في تجويد النطق والتعبير عن المفردة بالأداء الصوتي الجبار والمتمكن، بجانب تمتعه الراسخ بنعمة الذكاء الصوتي،
شوف جماعتك الثلاثة ديل محض مهرجين مسترزقين، هم أعضاء بارزين في "الشلة اياها" المستنفعة من هيصة الحياة العامة في السودان، هم مغنواتية وليسوا بفنانين، ولا يستحون من ذلك امورهم ماشة باسطة، وهم في نفس الوقت غنايين المؤتمر الوطني نادي الكيزان،
سجم خشم التجديد لو راجين العاطلين ديل، الناس ديل حدهم يلقطوا القروش، ويركبوا عربات، مع الإستفادة من علاقات الشلة إياها.
.
06-15-2017, 01:25 AM
عزيز
عزيز
تاريخ التسجيل: 04-12-2002
مجموع المشاركات: 3290
ان كنت لا تحضر البرنامج فأعتقد بأن نقدك لا يرتكز على مشاهدة! واذا كنت تشاهد البرنامج اتمنى ان تنظر للجزء الممتلئ من الكوب لأنه ليس كله فارغا. تقبل تقديري
06-19-2017, 10:44 PM
mohmmed said ahmed
mohmmed said ahmed
تاريخ التسجيل: 10-25-2002
مجموع المشاركات: 8860
حلقة لاغنيات من كلمات عمر البنا وحلقة لاغنيات من الحان عمر البنا وحلقة لغناء عاصم البنا ومشاركة لفنان قريب عاصم البنا وعاصم البنا له نصيب الاسد لاداء اغنيات فى معظم الحلقات
06-20-2017, 06:02 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
السلامو عليكم اسواء زول هو هذا المهاب عثمان بعده طوالي عاصم البنا و من ثم الاستاذ صلاح بن البادية لعدم تفاعله الجيد مع البرنامج و حالة الصهدبة و التوهان الهو فيها دي. البت إيلاف دي انا محتار اصنفه كيف!!! ؟ في صوته في حاجة ما قادر أفهمه ابدا المهم فيها شي مختلف من أصوات البنات اي عندها مشاكل لكن دي ما بيخليني اقطع رأى كامل. شكر الله دا اصلا مفترض يكون سمسار بي حلقومو الكبير دا.
06-20-2017, 06:06 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
مهاب ده السنة الفاتت فلقونا بى ، صوت تعبان تعبان وكمان بلا خجله الليلة غنا تذكار عزيز المحزن والمزعج شكر السر قدور لاى واحد لحدى ما فقدنا الثقة فى اى راى يصدر منو
06-21-2017, 00:18 AM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
اها حاجتين محيرني الاولى قصة العرق في ثقافة اسمها مزيل العرق مافهمت ناسنو واللا شنو الفهم معقول يياخ ؟ والحاجة الثانية :صمت القدير صلاح ابن البادية والشرود الكامل اثناء استضافة احدهم حتى يوم عمر الشاعر والموصلي يادار مادخلك شر لا مشاركة في الحدي عن الغناء ولا ترحيب بالضيوف ولا ملاحظات للمعاهو غايتو حيرني وزعلني استغفر الله الهم اني صائمة فاعفو عني واغفر لي ولاخوتي من هنا .... محبتي
06-21-2017, 04:52 PM
سناء عبد السيد
سناء عبد السيد
تاريخ التسجيل: 03-29-2008
مجموع المشاركات: 2093
اهلنا و حبايبنا .. كل سنة و انتوا طيبين و الكم يوم الفضلن في رمضان ينباركن عليكم عزيز و نعمات و سفيان و الباقين ازيكم .. شوفتكم هيجت علينا الشجون و اتزكرتا ايامنا الجميلة في البورد و اغاني و اغاني و ما ادراك ما غاني و اغاني للاسف ما حضرتا فيه حلقات كتيرة .. بس الملاحظ في اصوات جميلة زي الاسمه مامون صوت متميز و قوي و طبعا ملك الضرب في الحلقات بالنسبة لي غايتو - -حسين الصادق .. الود ده غناي.. اما البنات عندي فيهم راي طبعا نواصل بعد الافطار
06-22-2017, 00:12 AM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
ازيكم شخصيا عندي راي في الاصوات النسائية البتغني للفنانين.. يعني بتخيل لي الاصوات السائية دي عندها اغاني معينة مفترض تغنيها.. مكارم بشير لمن تعمل دويتو مع فنان بتحاول تسرق الغنا كله .. يعني حنى في المقطع المفترض يغنيه الفنان هي لازم تجي ناطة اما هدى عربي السكسكة في الغنا ما ليها داعي .. يعنى ما تدينا احساس انك بتغني في بيت سماية .. بعدين الاستايل شوية مفروض يكون احسن من كده.. في واحدة كده ما بعرفا بت صغيرة كده غنت اغنية مع البياح .. الاغنية دي حتى الاصوات الرجالية فشلت في اداءها.. ما بقدر ليها الا سيدا .. بعدين اول مرة اشوف لي صوت نساءي بغني بطريقة مجمود عبد العزيز !!!! في اثناء ما البت دي بتطنبج في اغنية مع البياح في واحدة تانية محجبة قاعدة تبكي.. الببكيك شنو يا بت .. الببكيك شنو ؟؟؟؟ انا حركات البتات البعملوا فيها ريادات دي بتغيطني.. يعني ما بكيتي لمن عاصم البنا غني انشودة الجن احياء لزكرى نادر خضر و بتبكي في مع البياح نظام البت بكاية وكده ؟؟؟؟ ا و يا مكارم شنو شابكانا عاصم سمح .. احتفظي برايك لنفسك على الاقل مافي التلفزيون .. يعني بس يجيك احساس انك في قاعد في قيدومة.
مكارم كل مرة بتغنى بى صوت مختلف المرة دى خلت الكواريك ، يا جماعة المشكلة فى عمكم وهما فى روحا يا صداحة ويا شنو ويا منو الليلة ابوى يا يابا سو ليها مايسترو بالمناسبة الخفة ما كويسه للفنانين كان سيدات او سادة
06-23-2017, 06:45 AM
mohmmed said ahmed
mohmmed said ahmed
تاريخ التسجيل: 10-25-2002
مجموع المشاركات: 8860
اعتقد ان التوثيق للاغنية يعنى المحافظة عليها عبر اعادة تجديدها لتبقى حاضرة فى تاريخ الغناء معلومات قدور الخاطئة عن شعراء الاغنيات والملحنيين ومناسبة الاعنية كثيرة جدا ويتم التنبيه لها من الليندى وعبير خيرى واخرون قدور يعتمد على الذاكرة والذائقة وذاكراته حتما تتاثر بالعمر لرجل تجاوز الثمانيين على اقل تقدير ذائقة قدور تشكلت من تواجده المستمر فى الحيشان التلاتة وفى صداقاته وعلاقاته مع اهل الفن والطرب فى القعدات والسهرات ومجالس الطرب حساسية قدور الغنائية لم تتجاوز اغانى الحقيبة وحقبة الخمسينات والستينات لذلك فمعظم اغانى البرنامج من تلك الفترات قدور ليست له معرفة بحساسية غناء مرحلة ما بعد معهد الموسيقى ودخول الالات الحديثة من جيتار وباص وكلارنيت فلوت لا يتحدث عن اسهامات فرق الغناء الجماعى امثال عقد الجلاد وساورا لم يتلمس تجربة اداء مصطفى سيد احمد والهادى حامد ولونية الاداء المختلف عند محمود عبد العزيز البرنامج يقدم دون اى جهد فى الاعداد كما كان يفعل الطيب محمد الطيب فى برنامجه صور شعبية وهو يوثق لتاريخ الممارسات الفنية والتراثية بجهد وبحث كبير قدور يعتمد على احداث شفاهية عاى هامش الاغنيات ويقدمها من مصدر واحد ولا يجتهد للاستعانة برويات شفهية من مصادر مختلفة ولا يعتمد على اى مرجع مكتوب فعلى سبيل المثال كتاب معاوية يسين عن تاريخ الغناء السودانى و لايستعين باهل الاختصاص والخبرة فى الموسيقى السودانية فيوسف الموسيقى كتب تحليل موسيقى جيد لاغنيات عثمان حسين اذكر محاضرات على تطور التلحين السودانى قدمها لنا الراحل الموسيقى ناجى اقدسى بها كم من المعلومات المدهشة جديرة بالتوثيق ومثل ناجى كثر لو اراد ان يستعين بهم زميلنا فى البورد الليندى لديه معرفة عميقة بالاغنيات فلماذا لا يستفاد منه فى الاعداد
06-23-2017, 08:34 AM
Amira Hussien
Amira Hussien
تاريخ التسجيل: 11-26-2016
مجموع المشاركات: 1724
قدور امس قال ان احمد رضا فريد كتب اغنية واحدة لأحمد المصطفى وايضاً عبد الماجد ابو حسبو الصاح انو ابوبكر فريد هو كاتب اغنية احمد المصطفى وليس رضا فريد عشان كده قدور لازم يكتب نقاط فى ورقة الاعتماد على الذاكرة ما كفاية ، باختصار الكلام كلو ما ياهو ولا توثيق للأغنية السودانية ولا الفن السودانى ،
06-23-2017, 01:20 PM
Amira Hussien
Amira Hussien
تاريخ التسجيل: 11-26-2016
مجموع المشاركات: 1724
يستفيدوا من منو ديل عصابة بجيبوا ناسهم واحدة مغنية ليها معجبين اشتركت سنة واحدة وأبعدت لانها بتخطف من عاصم وفرفور ومنو الأضواء باداء جميل ومميز فرفور كان كعادته يشوش عليها . الدليل انو البرنامج ده ما فيهو اي صدق ستة او سبعة سنين تجاهل فيهم هذا القدور او معد البرنامج ومنتجه زمان الشفيع عبد العزيز الاستاذ الكابلى وأغانيها ولما طه سليمان طلب يغنى لى كابلى روعة الليل وزمان الناس وافقوا لكن يبدو لى على مضض لانو ما قالو كلمتين. على بعض عنو وقدور لما ذكر أغنية زاهية قال كلمات وألحان الكابلى لكن عبد العزيز داؤد أضاف ياز ز ز زاهية يعنى كرر حرف الزال رغم انو دى ما اضافة لكن دى الطريقة ذاتا الاداها الكابلى لى عبد العزيز بيها هسه بعد الخلاف والانقسام بدت تظهر الأسرار
06-23-2017, 02:21 PM
عزيز
عزيز
تاريخ التسجيل: 04-12-2002
مجموع المشاركات: 3290
حبيبنا محمد سيد أحمد مشتاقين ياخ للأسف أخونا الليندي زول نصيحة و ما بيعرف التدليس و قصص المجاملات دي عشان كده يستحيل يستعينو بيهو لا هو لا اختنا عبير خيري.
06-24-2017, 00:39 AM
سناء عبد السيد
سناء عبد السيد
تاريخ التسجيل: 03-29-2008
مجموع المشاركات: 2093
سلام عزيز شكرا على الاهتمام اقترح حصر الاخطاء التى وردت فى البوست فى اسماء الشعراء والملحنيين التى وقع فيها قدور وتقديمها الى ادارة البرنامج الملاحظات والنقد الذى قدم هنا فيه افادة كبيرة ويوجد عدد كبير من اصحاب الذائقة والمعرفة الاحرى الاستفادة من ارائهم العزيز سفيان مشتاقين اخبارك الليندى موسوعة لو ما استفادوا منو بيخسرو
فى حلقة امس حسين الصادق وهو يؤدى اغنية بحر المودة بدلا عن ...لون الخضار خانس رقد....قال لون الخضار خالص لبن وبدلا عن ...الشوق اوارو بيشتعل ....قال الشوق اوانو بيشتعل لو ناس الاعداد كتبو فى قوقل بحر المودة يايمة رسلى لى عفوك الاغنية موجودة
06-25-2017, 04:28 AM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
تسلم يا محمد سيد أحمد... اي فعلاً حسين الصادق أمس ساطه سواطه جد.... ذكرتني عندي صاحبي فنان و مغني ممتاز قال لي :- انا عمري دا كلو بغني أغنية عثمان حسين و بقول فيها :- انا عارفو يا السمحه (ام كفل) اصلا ما كنا فاكره يا السمحه انقفل.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة