عارف..حبابك.. والتحية لول ابا ايمن نواي.. يا ايمن: دندنق ياقــُص.. عافية بلا ياااااااااااخ.. شكرا يا ايمن ، وانت جبتها من الآخر: من هي عبير المجمر؟.. وكنت اوقن تماما بان بت ابا نور تاور ح ترد وتكيل المكيال مكاييل ذاتو.. بس عيبي على نور انها لسه شغالة بالمثالية (بتاعة بنات الناس) وفات عليها انو امسودان بلغت شأوا من السفاهة يحير الما بتحير ذاتو..!! وهنا سأقول بعض الأشياء ، واعرف ان اول من يغضب هو نور تاور (المثالية التي تقاتل اهل امسودان بالعقل والمنطق) ، ويا ايمن ، ول ابكر الطويل (ابوبكر عباس) اصلا الحاجات رايحة ليهو وبيحاول يتحقق منها بطريقتو الخاصة.. وح نتفاهم معاهو على هذا الأساس.. اول بالتبادي يا ول ابا ابكر الطويل.. المارش ده عارفو جاي من وين واصولو شنو بالضبط؟..
انا اقول ليك.. دي زفة العرضة بتاعة جدنا المك في سابق الآوان والزمان..وهو مك كادقلي.. يعني جد نور تاور القدامك دي يا ابكر الطويل..!! نعم يا ابكر الطويل ، نور تاور شقيقة مولانا عفاف تاور.. واكتر من كده شقيقة ظابط سوداني كل من عاصروه اجمعوا على انو واحد من اذكى والطف ضباط الشرطة في امسودان..عارف الضابط ده اسمو منو؟.. اسمو الفريق جلال تاور ، الكان رئيس لجنة حقوق الإنسان في البرلمان السوداني (ايام حكومة الوحدة الوطنية بتاعة اتفاق نيفاشا)، ومناصب تانية كتيرة خلاص..هل ده يكفي؟.. نور تاور شقيقة استاذ الفيزياء في امسودان ، دكتور صديق تاور (قاعد يكتب مقالات كتيرة في الصحف السودانية).. هل تصدق يا ابكر الطويل ان دكتور صديق تاور شغال مع ناس البعث العربي الإشتراكي في امسودان؟!!! اما حكاية نور تاور كنداكة ..عييييييييييييييييييك..دي قصة طويلة خلاص.. في التسعينات يا ابكر الطويل ، لمن حناكيش المعارضة السودانية كانت بتكورك عن عصرة بيوت الأشباح في الخرطوم ، نور تاور القدامكم دي كانت بتنقب وبتحقق عن بيوت اشباح تانية ، والشعب السوداني ما عارف عنها التكتح ، وهي بيوت الأشباح بتاعة الحركة الشعبية ، أي والله يا ابكر بيوت اشباح وفي عصر جون قرنق ، نور كانت بتنقب وتبحث وتكتب للعالم.. بس مشكلتنا اننا شعب نساي ساكت وما عندو ذاكرة..وبتسافر لغاية نيروبي ، وشغالة في منظمة نوب التي شاركت في تأسيسها..!! ضابط الحركة الشعبية عوض الكريم ، واحد من ست انفار اسسوا الحركة الشعبية ، أو ما يسمى بالجيش الشعبي قطاع جبال النوبة ، واتصفى بدم بارد من قبل الحركة الشعبية ..الضابط ده قريب نور تاور وهي اول من حكي عنه وعن ما اصاب بعض من ضباط الحركة الشعبية الذين تمت تصفيتهم بدم بارد ، كلام نور تاور هو ما دفع استاذنا المرحوم يوسف كوه ان يعترف بماحدث ولكن بصورة مورابة.. فيا ترى هل تعرف عبير أو أي كان اسمها مثل هذا التأريخ..!! في انتخابات امسودان ، سنة 2010 ، نور تاور كانت رئيسة الحزب الليبرالي ، وفرضوا عليها (حسب علمي) انها تخوض الإنتخابات كمستقلة.. ومشت نور وخاضت الإنتخابات في مسقط رأسها في مدينة كادقلي.. عارفين الكان نازل قصادها (كخصم لدود) منو؟..كانت هي مولانا بت ابا عفاف تاور..ياخي خليك من امسودان ، في كل تاريخ الإنتخابات في البشرية حصل زولة بتخوض انتخابات ضد شقيقتها؟..العارف يقول لينا..!! ايام تلك الإنتخابات ياصديقي ، كانت مولانا عفاف تاور بتحوم احياء كادقلي في عربية مكندشة ، وكانت نور تاور بتحوم احياء كادقلي ماشية على اقدامها ، ورفضت كذا مرة عرض انها تستقل عربية عفاف المكندشة أو غيرها من عربات مكندشة.. في شنو يا تري؟..عشان تثبت انو الشعب السوداني مهما ضاقت بيهو السبل ، ممكن ينجب ناس انقياء امثال نور تاور..!! صحيح خسرت نور تاور تلك الإنتخابات ، ولكن التاريخ الحق يشهد بامرين: الأولاني : انو نور تاور نالت اصوات كتيرة ، تفوق اصوات بعض النساء والرجال ممن يتحكر في البرلمان السوداني الآن ، والتاني: انو نور تاور ، وليس عفاف تاور ، تعرضت لمضايقات وصلت حد التهديد بالتصفية الجسدية ، ايام كان قطاع الشمال عامل فيها حكومة وحدة وطنية مع المؤتمر الوطني..!! طبعا ناس كتيرة ما بتعرف عن الأستاذة زينب بلندية .. ولا شقيقها ابراهيم بلندية (كان رئيس برلمان جنوب كردفان)..زينب ، وصلت امريكا ، وعاملة فيها حركة شعبية ، وكانت الد اعدائها نفرين: شقيقها ابراهيم بلندية وقريبتها نور تاور..شفتوا الشقاء ده كيف؟.. نور تاور بتخوض حروب علي جبهات عديدة.. من نطاق اسرتها لغاية المشهد العام في جنوب كردفان وامسودان بجملتها..!! عارف يا ابكر الطويل ، عندنا في مدينة الدلنج ، مدرسة الأميرية بنات (طبعا هسع صارت حاجة تانية خالص ) مسورة باشجار الياسمين (والله صحي يا ابكر)..ولمن تجي بداية الخريف (يعني شهر ستة/ يونيو/حزيران) بتقوم اشجار الياسمين دي بتفرهد وتنشر عبق جميل خلاص ، وتظهر زهراتها البيضاء الناصعة المخلوطة بالصفار..ونور تاور كانت طالبة في المدرسة دي.. ولغاية الليلة بغالط نفسي في اصرار ، انو اسأل : يا ترى يا تو شديرة ياسمين زرعتها نور تاور في مدرسة الإميرية بنات (كان اسمها الوسطى بنات ايام نور تاور..)..؟؟ التحية لأستاذتنا نور تاور ، وليتها تعفي لينا الوضوح والمشاترة هنا.. و يا ايمن: يسارالحناكيش بتاع ناس (يا زميل) ، (يا رفيق) ، يا (كمريد) ، ده يسار رمينا طوبتو ، وسوف نكون ونعرف كيف أن نكون أو كيف ان نحاسب..!! ويا ابكر الطويل: (انحنا) بتاعة ايمن علي نواي انا فيها ومعاي بريمة محمد ادم ونور تاور ودكتور صديق تاور ، واتنين مليون من جنوب كردفان..والله صحي..!! شتيمة البنات يا ابكر الطويل في اعراف جنوب كردفان مكلفة شديد يا عمك..!! خليك من نور تاور ، هسع تعال دق سدرك ونشتم عفاف تاور ، ولمن يقعدوا اهلنا هناك في الخلاء ، تحت الشدر الكبار ، ح يفرضوا علينا دفع غرامة ، قول مية بقرة.. انت شيل الخمسين (ومعاك اصحابك ان شاء الله تعدموا تعريفة عشاء العيال..!!) وانا وصديقنا واستاذنا الأنثروبولجيست السوداني دكتور حامد البشير بنشيل الخمسين التانية..!! عرفت ليه نور تاور ما بتقدر تشتم عفاف؟.. الموضوع اعراف وقيم يا ابكر الطويل ، كن طرنا أو ركينا ، برضك قاعدة هناك وبتفرض علينا حاجاتها..!! شفت محنة نور تاور قدر شنو؟..ياخي ماركس في ذات نفسو: لو شاف الحاصل..يقول لينا الروووووووووووووووووووووووب..!! امسودان صعبة يا ابكر الطويل ، بالجد صعبة ياعمك..!!
لا انا ولا نور تاور ولا بريمة.. ما بنقدر نشتم عفاف تاور..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة