اليوم كنت بتكلم مع احدي شقيقاتي فى التلفون و هى تعمل معلمة بالمدارس الثانوية منذ سنوات طويلة. اها فى معرض الونسة و السؤال عن الاخبار و الامور و آثار الزيادات الاخيرة فى السلع الاساسية و خفض قيمة الجنيه سالتها عن مرتبها. قالت في حدود الف و ميتين (اي مليون ميتين بالقديم). قلت ليها دا ايه فى اليوم ولا فى الشهر . طبعا دا المرتب الشهري و هو يعادل بالضبط 75 دولار حسب سعر الدولار فى التحويل البنكي الذى يحدده بنك السودان.
Post: #2 Title: Re: مرتب المعلم فى الدولة الرسالية الاسلامية Author: abubakr salih Date: 11-09-2016, 09:38 PM Parent: #1
معلمة بخبرة سنوات عديدة تحصل على راتب قدره 2.5 دولار، فى اليوم.
Post: #3 Title: Re: مرتب المعلم فى الدولة الرسالية الاسلامية Author: Frankly Date: 11-09-2016, 09:44 PM Parent: #2
يا بكور
البدلات والعلاوات والحوافز والمنح كم في الشهر؟
Post: #4 Title: Re: مرتب المعلم فى الدولة الرسالية الاسلامية Author: abubakr salih Date: 11-09-2016, 09:53 PM Parent: #3
Quote: البدلات والعلاوات والحوافز والمنح كم في الشهر؟
هههه فيك الخير يا كمال، المليون و ميتين دا ياهو كل البتستلموا. هى قعدت تقول المرتب الاساسي كم و البدلات كم و شنو. اظنو المرتب الاساسي فى حدود خمسمية او ستمية و تاني فى بدلات و في استقطاعات. قلت ليها انتي فى النهاية بتستلمي كم من الصراف؟ قالت لي الف و ميتين. فتأمل يا اخي الكريم.
Post: #5 Title: Re: مرتب المعلم فى الدولة الرسالية الاسلامية Author: منتصر عبد الباسط Date: 11-09-2016, 10:44 PM Parent: #4
التعليم والمعلم هما أساس النهضة ....والكيزان لا يسعون لنهضة
Post: #6 Title: Re: مرتب المعلم فى الدولة الرسالية الاسلامية Author: منتصر عبد الباسط Date: 11-09-2016, 10:53 PM Parent: #5
خصصت حكومة ماليزيا 25% من ميزانية الدولة للتعليم يعني ربع ميزانية الدولة فكم كانت تخصص ميزانية حكومة الكيزان للتعليم .. .لم تصل 3% وهي بالفعل 2,8%
Post: #7 Title: Re: مرتب المعلم فى الدولة الرسالية الاسلامية Author: منتصر عبد الباسط Date: 11-09-2016, 11:11 PM Parent: #6
نحن لسع تعليمنا تعليم حجاوي وهذه هي اليابان في مجال التعليم ولا نهضة بشرية ولا اقتصادية إلا بتطوير نظم التعليم خاصة المراحل المبكرة (رياض الأطفال وابتدائي)
Post: #8 Title: Re: مرتب المعلم فى الدولة الرسالية الاسلامية Author: Frankly Date: 11-10-2016, 07:16 AM Parent: #4
والله يا بكري أقول شنو دا مبلغ ما يكفي مواصلات والله المستعان وافتكر حال الأطباء وجميع الموظفين ما افضل من كدا لولا فضل الله ثم التكافل الإجتماعي لهلك خلق كثير
بالجد ديل الواطـين على الجمر بحق وحقيققة ربنا يفرج الغمة بلا خراب وبدون تأزيم أو فوضى تزيد معاناتهم معاناة
Post: #9 Title: Re: مرتب المعلم فى الدولة الرسالية الاسلامية Author: Hatim Alhwary Date: 11-10-2016, 07:30 AM Parent: #8
وبمناسبة الرواتب في الدولة الرساليةن سال فرانكلي عن راتب "العسس" المدوعل جيد العلف في ذات الدولة الرسالية....تحياتي يا ابوبكر
Post: #10 Title: Re: مرتب المعلم فى الدولة الرسالية الاسلامية Author: حيدر حسن ميرغني Date: 11-10-2016, 07:31 AM Parent: #8
معلمة بخبرة سنوات عديدة تحصل على راتب قدره 2.5 دولار، فى اليوم. بينما أصغر كوز فاقد تربوي يمتطي أحدث طراز سيارات ويسكن في مبنى من دورين وعنده حساب مصرفي بالدولار واليورو + معرس مرتين .. وممكن يدخلك السجن ويفصلك من عملك ويفركش ليك خطوبتك كمان
Post: #11 Title: Re: مرتب المعلم فى الدولة الرسالية الاسلامية Author: منتصر صلاح Date: 11-10-2016, 07:42 AM Parent: #8
كل الفئات و ( الشرائح ) - المصطلح دة كيزاني بحت - بتعاني بس المدرسين وضعهم صعب وبعانو جد .. وممشين حالهم مجاسفات ..ديون وسلفيات .. اخر الشهر ( الملاليم ) الـ بياخدوها تمشي لـلتلاجة الماخدنها بالدين او البوتوجاز او الانبوبة زاتا او الشاشة البلازما ولا سيد الدكان .. وضع المعلمين ماساوي ماساوي يا بكور .. التحية والتجلي ليهم .
سلام ليك ولضيوفك
Post: #12 Title: Re: مرتب المعلم فى الدولة الرسالية الاسلامية Author: علي عبدالوهاب عثمان Date: 11-10-2016, 08:09 AM Parent: #11
حبيبنا بكور .. مودتي .. زمان كنا في التعليم وفي بداية السبعينات هناك في دنقلا ( ضواحي الدنيا ) كنا في إسكيل ( جيه ) أول راتب 30 جنيه .. 10 جنيهات كافية للسكر والشاي والصابون والزيت .. إلخ مصاريفي الخاصة 5 جنيهات ... السياحة وفطور المدرسين مع الكبدة والفول .. الضبيحة العتوت (60 - 75 ) قرش .. ميز المدرسين ( الموية المقطرة 20 قرش) سهرة الخميس وصفقة ورقيص
والد الله يرحمه كان عنده شنطة نرمي فيها باقي الفلوس .. بعد فترة جمعنا ما في الشنطة .. المدخرات 350 جنيه الوالد الله يرحمه ذهب الحج مباشرة .. ورجع معاه هدايا كمان ..
أتذكر أحد المعلمين من الزملاء كتب في كشف الميز (25) قرش أشياء أخرى .. الناظر قال ليه ( تعال وضح اشياء أخرى دي شنو ) يعني 25 قرش ( الطرادة ) مبلغ معتبر يستحق المساءلة ..
آه .. يا .. زمن .. إغتراب وكفيل .. وغربة ومطارات .. شكراً حبيبنا ابوبكر .. رجعتنا نصف قرن للزمن الجميل ..
. طبعا دا المرتب الشهري و هو يعادل بالضبط 75 دولار حسب سعر الدولار فى التحويل البنكي الذى يحدده بنك السودان.
