صباحك يا ريدنا خير ونهارك ضو ليلك مجرتق بالنجوم وعليك المحبة والسلام ريحتك صندل الفرح الكبير عطَّر ترانيم الكلام محلق وماشى مالى الجو حالق وماشى شايل الحب الكتير حفيان يقالد فى الدروب فرحان يطايب فى الشدر نشوان يقسم فى الوئام وعليك المحبة والسلام
صباحك يا ريدنا خير الله عليك يا حب سكن جوه المسام يا نيل نبيل يا قيف مكحل بالخدار يا ليل جميل يا قمرا بتوصى الحمام قول للشمس تفتح شبابيك الوئام تغشى البيوت قبل الزحام وعليك المحبة والسلام
صباحك يا ريدنا خير ونهارك نور كل التفاصيل الأنيقة و كل مواقيت الحبور وكل فجه تبقى حديقة والأغانى تبقى سور كل كلمة تكون حقيقة والحروف موكب زهور كاتبه حبك بالتمام وعليك المحبة و السلام
صباحك يا ريدنا خير يا نشوة فى روح النشيد يا حجوه فى مغرب فرحنا يا نمه فى مسدار مشينا الجاى ليك حتما اكيد يا حلمة سمحه قاعده فى عز المنام يا حب شديد عليك المودة والسلام
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة