|
|
 الجزء الثالث (Re: ismeil abbas)
|
رحلتي مع الموت في ادغال دارفور
الجزء الثالث
ٲسرار وخفايا واحداث مفرحه ومحزنة
:معاذ حمدالنيل
اسبوع تمام والكل تمام
مرفوع دوام كل التمام
القوة جاهزة بدون كلام
من البحير والي الامام
اسبوع بداية واسمي غاية
حامين بلادنا من اللئام
حارسين وطنا من الغواية
وللبحب بنقول سلام
سلام تاني من مدينة السلام والتقابة والخلاوي والقرٲن
نيالا البحير
ناس الطيبة والمحنة....
الخير مبسوط...
والحب محشود ....
والدين موجود.....
المساجد مليانة....
والوجوه مبتسمة ورضيانة....
الشفع بلعبوا في الشوارع فرحانين... والبنوت يمين وشمال مبتهجين ....
سوق البحير ....؟!
وما ادراك ماسوق البحير؟!
لو مابالغت اقول شبه شديد من اسواق امدرمان الكبري....
قسم كااامل للعطور....
والادهي جنبات الشاي والشيشة في السوق ماعارف يكون قفولهن ياربي ولا فاتحات لي يوم الليلة.....
سبعه ايام في نيالا كـــانت ترتيبات لتوزيع الكتايب علي المحاور التلاتة شرق وغرب وشمال دارفور.....
وفي الفترة دي كنا مابين سوق نيالا والاحياء القريبة من السوق ...ومع انو الاسبوع بسيط لكن اخـــدنا فكرة عن مدينة نيالا وطيبة ناسا ....
وداعا صديقي العزيز محمدعبدالله عينة.... من هنا بقوليك سلام......
محمدعبدالله عينة ...دفعتي وصاحبي شديد.... بس هو كان في كتيبة وانا في كتيبة تانية..... وفرقتنا نيالا بس حانتلاقا تاني ان شاءالله ....زي ما حانشوف في بقية الحكاية.....
الان محمدعبدالله عينة ابتعد عن المجال العسكري... وانخرط في الحياة المدنية.... وعمل ليهو بيت واسرة ماشاء الله وربنا يحفظم باذن الله....
اتفرقت الكتايب وكان نصيبنا في التوزيع جنوب دارفور وتحــديدا منطقة جبل مـــرة......
وكان شفت مـــرة جـــبل مـــرة....
يعاودك حــنين طول السنين...
حقيقة ....وصدق الشاعر.... ولو ربنا قدر وشاء حاتكون حــبال الوصال مــمدودة بينا وبين الجـــبل العملاق جبل مــــرة....
حيث الاســرار العجيبة ...والطيبة والمحنة....
لفيت قدر مالفيت ...مالقيت زي الخــير اللقيتو في الجـــبل.....
تقولي شنو...؟ وتقولي منو....؟
الشي البنعرفو انك لمن تطلب شية او كبدة في كافتريا او مطعم بدوك معاهو قاموس فول او عدس.....
بس لاول مــرة في الجبل تتغير المعادلة ...
وتطلب فول او عـدس لانك مفلس وعينك طالعة وماعندك حق الشية..... يدوك الفول ويجرحو ليك بي شية ظاااابطة لمن تتحير....
الناس دي طيبة شديد ياعم ....انت بس اضرب وغسل يدك واحمد ربك....
الناس دي لو ما الحرب والبشتنة الحصلت دي اظنو يكونوا مضرب المثل في الكــرم زي حاتم الطائي عـند العرب....
لكن الله يجازي الكان السبب....
انا غاايتو ماعارف الكان السبب.... بس ربنا عارفوا وشايفو.... ماتجيبو لينا كتاحه ساكت انا ماجبت سيرة زول معين...ههههههه
وقبل مانمشي مع بعض للجبل ...نرجع نلملم ذكريات اسبوعنا المشتتة علي اطراف البحير...
همسات البنوت وانحنا قاطعين الشارع.... واحدة تقول لي صاحبتا ... ديل بوليس الخرطوم شكلهم واااضح وناس.... راقين....التانية تضحك وتقوليها ..اااي ديل جو قبل كم يوم كدا ..اني كنت في السوق وشفت عرباتم....التانية ترد ليها باستياء...خايتو يشربو المي ما يرووا....
اجمل حاجة وانا بتامل نيالا.... الطبيعة الجميلة حتي في ونسة البنات مافي اصطناع وابتذال .....لا في المكياج وتغيير الالوان ....ولافي الكلام وتعطيش الجيم...
غايتو يابنات الخرطوم !!!!
دايما بتجيبو البدع.... هههه
طبعا بنات الخرطوم ديل عندهم لغة كــدا بعرفوها براهم ...مثلا حرف الجيم دا عندهم معطش.... والسين القلبوها ثاء وبطلعو لسانم دي هسي مضايقة ولو لقت طريقة كانت اشتكتم في محكمة اللغة العربية....
لكن الله يكون في عون اللغة العربية
غطاها التراب مع فقد الدكتور طه حسين
وازداد الطين بله مع فقد البروف عبدالله الطيب
اما الوشوش دي فحدث ولا حــرج!!!!
زي ما قال شيخي يوسف محمد علي الشايب.....
الوش من هــولندا والرجلين من امبده...الوش ميرندا والرجلين كوكاكولا......ههههه
غايتو ياشيخي يوسف دمك خفيف وحكمك عجيبة ربنا يمتعنا بي عمرك ويبارك في علمك....
اما البحير الخضراء....خضرة بناتا تاج علي الرؤس وزينة في النفوس....
الله يستر لانو العلمانية دي بدت تنتشر حتي في قرانا الحلوة... وبوادينا... وربنا يحفظ طبيعة بلدي واجمل جمال في بنات بلدي بدون مساحيق....
نرجــع خلاص عشان نغادر البحير للجبيل....
ورح نمشي الخطاوي الاتكتبت علينا...
ومن كتبت عليه خطا مشاها...
يااااااه
الاافتة دي عندي معاها ذكرا....
ذكري اول اتصال في تاريخ حياتي واول تلفون....
دا عاد بتنسي..؟! مااابتنسي.....
اليافطة مكتوب فيها محلات منو كــدا للاتصالات العالمية والولائية والمحلية
اها الزمن داك لسه التلفونات ما انتشرت يادااااب في الحله كلهااااا تلقا تلفون تلفونين....
زمن الموتريلا... والنوكيا تلاتين عشرة كانو بقدلوا ...وماسكين الساحه علي حسابم....
ياخ الواحــد لمن يكون شايل تلفون تلاتين عشرة لمن يعمليهو علاقة ويطلعوا بره الجيب نظام تحشيش وكـــدا....
ولمن التلفون يضرب والنغمة تشتغل لمن الواحـــد يتبسم بي زهــو كدا.....
اها انا صراحة اشتقت لي امي شديد.....
وطولت ماسمعت صوتا....مشيت محل الاتصالات وطلبت منو اعمل اتصال....قالي جــــدا
طلعت جــزلاني... كنت كاتب الرقم
فــرت رقم واحـــد....
رقم عبدالدايم في حلتنا... راجـل مولانا وصلااااي ....كان عندو طاحونة واسرة صغيرة ....ربنا يحفظو ويحفظ اولادو ....بس حاليا طولت منو وماعارف اخباروا...
عبدالدايم اول زول دخل تلفون في حلتنا...لكن اتعزب جنس عزاب... الله يكتب ليهو الاجـــر...
المسافر بشيل رقمو...!!!
والوين وين بكتب رقمو..!!!
ويوميا اتصالات.... انا داير ناس البيت.. ممكن تودي ليهم التلفون...
وهو والله لابكل لابمل .....طوااالي يقوليك جــدا .....اديني ربع ساعة بس...بعد ربع ساعة اتصل علي....اها يقطع اعمالوا.... او يرسل واحدة من بنياتو لي اسرة المتصل....يعني خدمة لوجه الله نحسبه كذلك ان شاء الله وربنا يكتب ليهو الاجر.....
اها دقيت لي عمي عبد الدايم ....وبعد ربع ساعة تاني اتصلت واتكلمت مع امي....ياخ جنس شوق تقول عندي عشرة سنة منها.....اتونسنا امكن قريب تلاطاشر دقيقة وبعداك قفلت الخط....
لمن جيت للحساب سيد المحل قالي حسابك خمسطاشر جنيه...!!!
ياااااه خمسطاشر جنيه عديل كـــدا؟!!!!!
اتخيل الكلام دا سنة الفين وتلاتة
يعني دا مبلغ ضخم جـــدا....
والله اتجرست لكن اعمل شنو...
طلعت جــزلاني.... ونكت الوراي والقدامي.... وماخليت جيب ماهبشتو...
يا الله يا الله تميت ليهو المبلغ
تااااني.. توبة
الزول يتصل دقيقتين بس ومايزيدا....
ومشيت وانا بهز في راسي....!!!
ماتقولو قاعد ارقص ...اصلا مافي امبثريهات.... ولا تلفون بي سماعات ...او حتي بدون سماعات ....انا بس واجعاني القروش الكتيرة الدفعتها لي سيد الاتصالات دا....لكن ماخسارة مادام اطمنت علي امي واتونست معاها....
الليلة نهاية الاسبوع
وداعا مدينة نيالا الجميلة.... فقد حان وقت الرحيل.... ورغم قلة الايام التي قضيناهامعك.... الا انها ستبقي خالدة في القلب علي تطاول الدهر ومـر العصور...
اتوزعت الكتايب التلاتة شمال وغرب وشرق....
وكلو كتيبة اتوجهت للمحور المحدد ليها....
القوة كانت خليط من جميع الشرطة السودانية العامة والمتخصصة....جمارك علي جوازات علي دفاع مدني علي سجون علي مرور علي شعبية علي عامة ....يعني مااافي اختصاص في الشرطة الا وكان مشارك معانا في النفرة دي...
نفرة عـزة دارفور الثانية....
وفي الطريق لي جبل مــرة الواحد كان في الزيت واي بتاوق زي الرايحة ليهو حاجة....
نفسي ما افوت دقيقة بدون ما املا عيني من المناظر والوهاد والهضاب في الشارع بين نيالا وجـــبل مــــرة....
ياخ بالجـــد سودانا دا كبير بالحيل.....
واسع وسعة جد.....
انحنا مشينا مشينا.... والزيت واي دا ماااشي بي نمرة كــلو...
مساحات شاااسعة
حالتو قال دي ولاية واحــدة يعني من جنوب دارفور مااااطلعنا لسه...!!!
البحيرني الناس دي بتتشاكل في شنوا...البلد الكبيرة دي والله تشيلنا وتشيل قارات العالم التلاتة معانا .....المشكلة مااافي الاض ...المشكلة في القلوب...لو القلوب دي اتصافت الامور كلها بتظبط....وصلت لي قناعة جواي وانا في طريق جبل مرة.... انو مشكلتنا في السودان ماااامشكلة ارض......لانو الارض عندنا همله ساااااكت......وحتي العقول المدبرة الممكن تستفيد من الارض دي مااااااعارف الحاصل عليها شنووووو.....!!!!
غااايتو انا ماعايز استرسل ....وزي مابقول واحــد صاحبي اسكت احسن لانو الوجع رااااااقد.....
قربنا خلاص من جبل مــرة......
مـــرينا بي كــبري لاحظت عليهو ظاهرة عجيبة...!!!!
كمية مــن الحمير في الكبري دا ميتة.... علي مساحات واسعة......
كلو شوية بنلقي حمارين تلاتة....
سالت اهل الاختصاص ليه الحمير دي هنا ميتة بالشكل دا....؟!!!
الحاصل شنو...؟!!
اها جاني الرد انو المكان دا اسمو كـــبري النحل...
والنحل اصلا بجي هنا في فترات معينة بي كميات مهولة وياهو ذاتو سبب موت الحمير....
وممكن يقتل الانسان عديل لو ماعمل حساب نفسوا....طبعا جاتني رهبة طوالي.... بالذات اني سمعت كتير عن النحل وعمايلو وقلت في نفسي ربنا يستر....
وطبعا كبري النحل دا عندي معاهو قصص حااانشوفا في الاجـــزاء الجاية ان شاءالله....
وصلنا جبل مـــرة
وياسبحان الله! !
الحـلة دي طلعت عن بكرة ابيها ....
نفس الطلوع دا ودعــونا بيهو وانحنا راجعين ...
بس الفرق انو الاستقبال كـــان صامت.....
لكن الوداع كان فيهو دموع وحزن والم...
اها نقيف في الجبل ...ناخــد راحة شوية ونواصل رحلتنا في الجـــزء الرابع من مدينة الضباب...
والسحاب.... والثلوج الحالمة ....
جــبل مـــرة ...
ونكتشف مع بعض اسرار وخفايا جديدة.....
جــديدة وخطيرة....
خطيرة جــدا
جـــدا....
الي اللقاء في الجـــزء الرابع ان شاءالله من رحلتي مع الموت في ادغال دارفور
|
|
 
|
|
|
|
|
| العنوان |
الكاتب |
Date |
| رحلتي مع الموت في أدغال دارفور الم وأمل (قصة مشوقة واقعية سوف تستمع بكل لحظاتها) | حاتم موسى عبدالعزيز | 03-29-16, 10:11 AM |
| الجزء الأول | حاتم موسى عبدالعزيز | 03-29-16, 10:18 AM |
| Re: الجزء الأول | قصي محمد عبدالله | 03-29-16, 10:26 AM |
| Re:رحلتي مع الموت في أدغال دافور | محمد حمزة الحسين | 03-29-16, 04:39 PM |
| Re: Re:رحلتي مع الموت في أدغال دافور | قصي محمد عبدالله | 03-29-16, 05:12 PM |
| الجزء الثاني | حاتم موسى عبدالعزيز | 03-30-16, 06:48 AM |
| Re: الجزء الثاني | Abdalla Hussein | 03-30-16, 07:11 AM |
| Re: الجزء الثاني | ismeil abbas | 03-30-16, 09:01 AM |
| الجزء الثالث | حاتم موسى عبدالعزيز | 03-31-16, 07:37 AM |
| الجزء الرابع | حاتم موسى عبدالعزيز | 04-01-16, 09:46 AM |
| Re: الجزء الرابع | امجد الجميعابى | 04-01-16, 02:19 PM |
| الجزء الخامس | حاتم موسى عبدالعزيز | 04-02-16, 12:55 PM |
| الجزء السادس | حاتم موسى عبدالعزيز | 04-03-16, 09:31 AM |
| الجزء السابع | حاتم موسى عبدالعزيز | 04-04-16, 12:45 PM |
| Re: الجزء السابع | الأمين عبد الرحمن عيسى | 04-04-16, 07:19 PM |
| الجزء الثامن | حاتم موسى عبدالعزيز | 04-05-16, 09:30 AM |
| الجزء التاسع | حاتم موسى عبدالعزيز | 04-06-16, 10:35 AM |
| Re: الجزء التاسع | مهند سوركتي | 04-06-16, 03:48 PM |
| الجزء العاشر | حاتم موسى عبدالعزيز | 04-07-16, 07:57 AM |
| Re: الجزء العاشر | مجدى محمد مصطفى | 04-08-16, 07:56 PM |
| الجزء الحادي عشر | حاتم موسى عبدالعزيز | 04-09-16, 07:41 AM |
| الجزء الثاني عشر | حاتم موسى عبدالعزيز | 04-10-16, 11:59 AM |
| Re: الجزء الثاني عشر | محمد فضل الله المكى | 04-10-16, 04:19 PM |
| Re: الجزء الثاني عشر | محمد هاشم ابوزيد | 04-11-16, 01:00 AM |
| Re: الجزء الثاني عشر | حاتم موسى عبدالعزيز | 04-11-16, 08:15 AM |
| Re: الجزء الثاني عشر | Saifaldin Fadlala | 04-11-16, 09:53 AM |
| Re: الجزء الثاني عشر | عبد الحميد فخر الدين | 04-11-16, 10:17 AM |
|
| |
حاتم موسى عبدالعزيز
فيس بوك
تويتر
انستقرام
يوتيوب
بنتيريست