|
الجزء الخامس (Re: امجد الجميعابى)
|
رحلتي مع الموت في ادغال دارفور الم وامل
الجـــزء الخامس :معاذ حمدالنيل
شمس الصباح شرقت علي اصوات العصافير والبلابل المغردة في اجواء نيرتتي الوريفة.... ومن علي البعد يلوح جبل مرة العملاق في صورة زاهية كانو يعانق السحاب في سماء دارفور التقابة والقرٲن... بداية النشاط كالعادة في المعكسر بالتمام الصباحي السريع علي الفصايل في الدفاعات ....وعلي الاجهزة والاسلحة والمعدات ... والليلة يوم الخميس يوم اداري شامل وكامل.... لنضافة المعسكر ونضافة الاسلحة والزخاير..... في خلال ساعتين او اقل كان المعسكر دا في انضف مايكون....اخدنا فترة راحة نهارية..... والعصرية مهمتنا تنضيف الاسلحة كلها... نشاط عجيب.... اي زول حاني راسو علي سلاحو.... الرشاش .....والدوشكات... واسلحة المعاونة ....وحتي الاسلحة الصغيرة ناس الكلاشات وغيرا.... وفي قمة انهماك الناس في النضافة..... انفجار هائل وكبير زلزل المركز داير مايدور..... الانفجار من الجهة الجنوبية للمعسكر.... وصوت الصدي يجيب الرايح.... استر يارب..... اي زول استلم مكانوا ....واستعدينا لصد هجوم مفاجأ .... ورسلنا افراد يجونا بالخبر من الجهة الجنوبية ....وكان الخبر مصيبة..... اكبر مصيبة..... وقبل ما اتكلم عن المصيبة ....عايز اقول... الجهل انواع .....واشد نوع.... الجهل المركب... والجهل المركب دا احسن منو الجهل العادي..... لكن جاهل وعامل فيها عالم دي تبقا المصيبة ذاااتا.....
اخونا عبد الرحمن شاب في مقتبل العمر من اولاد كردفان .....مرابط في الشعبية.... واتكفل بانو يكون ضمن حاملي سلاح الار بي جي.... وشكلو مااابعرف للسلاح دا كويس ....وفي النضافة كان عايز ينزع دانة الاربي جي بس حصل خطأ صغير خلا الدانة تنفجر بالقرب من المعكسر... لتصنع دويا هز الارض والقلوب في ان واحــد....
وياريت لو الموضوع انتهي هنا.... لكن الغريب في الامــر ان الاخ عبدالرحمن كانت مـــؤخرة الار بي جي في مواجهته تماما ....الامر الذي جعله يتاثر باللهب مباشرة في وجهه وساعديه واجزاء من جسمه...وفي نفس اللحظة فقد سقط ارضا وهو ينزف وقد اصيب بحروق بالغة ان لم تقتله قدتصيبه بعاهة مستديمة... الحمدلله جات خففة..... عبدالرحمن نقل الي نيالا للعلاج ومنه الي الخرطوم .....وقد نجي من الموت باعجوبة ....ولكن الاثار التي خلفها اللهب ستظل باقية علي ذلك الوجه الصبوح.......له التحية اين ماكان...... دي كانت حادثة بارزة جــدا في معسكر نيرتتي ودرس بليغ للجميع انو يركز في عملو ويتقن مهامو....
كل يوم في نيرتتي كانت حكاية وقصة..... واتعودنا علي الحله والحله ذااااتا اتعودت علينا....بلد رخيه وخيرا وفير...لدرجة اننا ماكنا بنتناول وجباتنا في المعسكر الانادرا...وعايشين علي الافران...
ما افران العيش!!..... دي افران للحم المشوي....هههههه اي شلة بنشتري لينا كم كيلو بتاع لحم وعلي الشواية.. اللحمة رخيصة.... والشية الكيلو بمبلغ بسيط جدا ....عليهو سلطة وشطة بالعتي تاكل لمن عرقك دا يجري زي موية المطرة.... ياخ انحنا ديل جينا من دارفور سمان وتريانين من الشبع وقالو الشبع بعمل بعبعه..... والشي البحيرني في القرية دي انو غالبية الحي مافيهو رجال تتحير الرجال فاتو وين...؟؟!!!! بيوت كبيرة وعريضة كلها نسوان..... دا في حـد ذاتو بطرح مليون سؤال.... وبما انو البيوت كلها نسوان فاكيد المرٲة لازم تعمل عشان تاكل جنياتا باي اسلوب وباي صورة...عشان كدا بتلقا السوق مليااااااان نسوان عاملات في شتي المهن اليديوية وغيرا...... الكسرة والمطاعم والمقاهي والدكاكين حتي البناء..... عمرك يوم شفت ليك معلم مرٲة وطلبتو مرٲة....انا شخصيا ماشفت الا في دارفور
البت شايلة المونا في كتفا ومااااشة تقدل وتدوبي سااااكت ولا هاميها...... امانة لكن مااااااابت نجيضة... هههههه عليك الله تعالي شوفي مياصة اولاد الخرطوم..... الواحد مجلجل شعروا وناصل بنطلونوا ولابس فنيلة اديني حقنة وماشي يتكسر وياكل اللبانة.... ياخ بنات دارفور تحلف تقول كملوا الرجالة ذااااتو.....
الا في واحــدات سلكن الدرب الكعب.... وديل في كل مجتمع موجودات.. البسوا الخمارات وبمارسو ال################ة وغيرا.... ..
وبعيدا عن الحله نرجع للمعسكر من تاني..... امسية هادئة زيها زي باقي الامسيات بعد الونسات اي زول استلم موقعوا والخدمات استلمت محلاتا.....
في كل اتجــاه كان في 3ديدبانات ...اي ديدبان بشتغل ساعه ويصحي زول تاني يستلم محلو...... والمعسكر فيهو اربعه اتجاهات يعني اتطانشر ديدبان ..... يعني تامين عالي جدا....والزمن ذاااتو ماكتير يعني ساعه دا زمن بسيط جدا
وبعد منتصف الليل.... في ديدبان طاشي شبكة شوية كــدا.... شاف ليهو كيس اسود شايلو الهـــوا.... واتعلق ليهو بي عــود شوك علي بعد امتار من الموقع... والديدبان افتكـــرو ليك دا العـــدو.......هههههه المهم
اخـــد مسااافه بتامل فيهو ....واتاكــد في نفسو انو ياهو ذاااتو دا العدو ....وعامل فيها شجرة وماعايز يتحـــرك نظام تمويه وكــدا ....وطواااالي صاحبنا ماكضب.....رش ليك الكيس بكمية بتاعة طلقات منفردة زي العجب....
الناس طبعا ناايمة كلها مـاعدا الخــدمات المتوزعين علي اطراف المعكسر في الدفاعات بالتناوب....
وديل مفتحين عيونم قدر الريال ام عشره.. هههه
وفجأة يسمعو ليك صوت الزخـــيره بتشق عباب الليل البهيم....
ويعجبك الصدي في نيرتتي وجبل مــره لدرجــة انك تحتار الصوت دا جاي من وين تحــديدا.....
والناس دي هضربت هضربة شديدة واولم الخـــدمات واي زول مفتكر النار دي باتجاهو وواحــدين ملخومين عايزين يحددوا محل النيران تحديدا....
واشتعل المعسكر باصوات الزخيرة من كل الاتجاهات......
اي ديدبان فك كم طلقة نظام تفتيش في اللحظة دي كل المعكسر كان في الدفاعات حتي ناس الدوشكات استلموا مواقعم والعربات جاهزة وعـزف زي العزف......
الزخــيرة دي بكل انواعا انضربت في ظرف عشرة دقايق كاااملة
وفجأة وقف الضرب بتعليمات من القائد لسبب وجيه جـــدا....
انو مافي رد..... ولا حتي خساير... او اي اثار بتد علي وجــود هجوم...
وفعلا بعد توقيف الذخيرة اتضحت الرؤيا تماااما ....وضرب النار تـم بفعل خطأ في الرؤية من الديدبان......
الديدبان دا طوااالي دخلو مكتب الصباح بدري..،
دخـــلو مكتب للناس الملكية بمعني عايزين يعاقبوهو علي الخطأ الارتكبو .....اها بس ربك نجاهو بانو التصرف صدر عن حسن نية في وضع يدعــو للاشتباه بالاخص انو الكيس كبير واسود والتمويه بالشجر شي معروف في الحــرب منذ قديم الزمان.....بس شوية ادارة داخلية قرصة اضان.... عشان الناس الباقية تشد حيلا وتشغل الحاسة السادسة .... هنا في العمليات غلطة صغيرة ممكن تمنا يكون كبير..... وكبير جـدا....
وكـانت الحادثة دي موضوع جبل مــرة كلها ....وشمار حاااااار للشباب والبنوت والنسوان..... واي زول طبعا بحلل ويعيد زي ماعايز ......
ومرت الايام والاسابيع.... وكل اسبوع بمربحمل معاهو احداث جديدة وفريدة ومتنوعه.... والحدث لمن يكون مامورية تمشيط للجبل.... دا بكــون حــدث فوق العادة.... لخطورة المامورية اتحــددت سريتين وزيتوايات ودوشكتين وعدد من الاربجيهات والرشاشات.... دي كانت مامورية بتحمل طعمين اما النصـر او الخسارة..... والخسارة هنا عندها معني واحد الموت في وهاد الجبل.... جبل مـرة.... والحياة مرة.... يانعيشا بي عزة يانموت بالمرة...
والي اللقاء في الجـــزء السادس عشان نشوف المامورية لقمة جبل مـــرة احداث واسرار وخفايا
الي اللقاء
|
|
|
|
|
|
|
العنوان |
الكاتب |
Date |
رحلتي مع الموت في أدغال دارفور الم وأمل (قصة مشوقة واقعية سوف تستمع بكل لحظاتها) | حاتم موسى عبدالعزيز | 03-29-16, 10:11 AM |
الجزء الأول | حاتم موسى عبدالعزيز | 03-29-16, 10:18 AM |
Re: الجزء الأول | قصي محمد عبدالله | 03-29-16, 10:26 AM |
Re:رحلتي مع الموت في أدغال دافور | محمد حمزة الحسين | 03-29-16, 04:39 PM |
Re: Re:رحلتي مع الموت في أدغال دافور | قصي محمد عبدالله | 03-29-16, 05:12 PM |
الجزء الثاني | حاتم موسى عبدالعزيز | 03-30-16, 06:48 AM |
Re: الجزء الثاني | Abdalla Hussein | 03-30-16, 07:11 AM |
Re: الجزء الثاني | ismeil abbas | 03-30-16, 09:01 AM |
الجزء الثالث | حاتم موسى عبدالعزيز | 03-31-16, 07:37 AM |
الجزء الرابع | حاتم موسى عبدالعزيز | 04-01-16, 09:46 AM |
Re: الجزء الرابع | امجد الجميعابى | 04-01-16, 02:19 PM |
الجزء الخامس | حاتم موسى عبدالعزيز | 04-02-16, 12:55 PM |
الجزء السادس | حاتم موسى عبدالعزيز | 04-03-16, 09:31 AM |
الجزء السابع | حاتم موسى عبدالعزيز | 04-04-16, 12:45 PM |
Re: الجزء السابع | الأمين عبد الرحمن عيسى | 04-04-16, 07:19 PM |
الجزء الثامن | حاتم موسى عبدالعزيز | 04-05-16, 09:30 AM |
الجزء التاسع | حاتم موسى عبدالعزيز | 04-06-16, 10:35 AM |
Re: الجزء التاسع | مهند سوركتي | 04-06-16, 03:48 PM |
الجزء العاشر | حاتم موسى عبدالعزيز | 04-07-16, 07:57 AM |
Re: الجزء العاشر | مجدى محمد مصطفى | 04-08-16, 07:56 PM |
الجزء الحادي عشر | حاتم موسى عبدالعزيز | 04-09-16, 07:41 AM |
الجزء الثاني عشر | حاتم موسى عبدالعزيز | 04-10-16, 11:59 AM |
Re: الجزء الثاني عشر | محمد فضل الله المكى | 04-10-16, 04:19 PM |
Re: الجزء الثاني عشر | محمد هاشم ابوزيد | 04-11-16, 01:00 AM |
Re: الجزء الثاني عشر | حاتم موسى عبدالعزيز | 04-11-16, 08:15 AM |
Re: الجزء الثاني عشر | Saifaldin Fadlala | 04-11-16, 09:53 AM |
Re: الجزء الثاني عشر | عبد الحميد فخر الدين | 04-11-16, 10:17 AM |
|
|
|