طلب استشارة من اعضاء البورد بالسعودية وخاصة ناس جدة.....

01:30 PM Feb, 09 2016

سودانيز اون لاين
Hafiz Bakhit-Philadelphia/U.S.A
مكتبتى
رابط مختصر

السلام عليكم جميعا ..........
التحايا لاعضاء البورد الكرام ...........
اطلب استشارة من اعضاء البورد بالسعودية وخاصة ناس جدة
انا بصدد دراسة مقترح بافتتاح مطعم سوداني علي مستوي عالي بخدمات ممتاز وقسم خاص للعوائل وكافية ملحق ...
سؤالي ...ما نسبة نجاح هذا المشروع في مدينة كجدة يقطنها عدد كبير جدا من السودانين؟
اطلب رائكم وخبراتكم ان توفرت ...خاصة بعد نجاح تجربة ايبوني في دبي..

فى تصورى الخاص أن كان المطعم للأكلات السودانية فقط فلا ينفع ألا مطعم تقليدى مثل بقية المطاعم السودانية المنتشرة فى المملكة ،،
أما أذا أردت أن يكون مطعم 5 نجوم أو 4 نجوم عليك بالأكلات العالمية أو على الأقل الأقليمية مثل : الإستيكات والمشويات بأنواعها
والأكلات البحرية .

هذا رأى وقد أكون مخطئا ،، وتوكل على الله حسب تصورك وخطتك التى رسمتها فما النجاح إلا من عند الله ومن بعد جهدك الشخصى

المستوي المعيشي للسودانين "عموما"في السعودية واطي جدا ..اي انهم يفضلون المطاعم الرخيصة والسكن الرخيص وكل شئ رخيص ...لان هدفهم الاساسي التوفير ..البوبار في السودان فقط
نجاح مطعم ابوني لايعني نجاح نفس التجربة في السعودية ..

العزيز ماهر تحياتي ومشكور علي الرائ السديد..........

الاخ محمد ابراهيم
تشكرات علي توضيح الصورة ..
هل يمكن ان يشمل الاكل السوداني والمشويات وباسعار معقولة ومستوي نظافة ممتاز...........

Quote: نجاح مطعم ابوني لايعني نجاح نفس التجربة في السعودية ..

أخ / حافظ بخيت---- تحياتي.

أوافقك الرأي --- الفكرة تنجح بإمتياز...

أهم شئ الإهتمام بمستوى النظافة العالي ...

والخدمات الممتازة ...

والأسعار المعقولة.....

وممكن تضيف للمطعم خدمة تجهيز الولائم السودانية للمناسبات.....

أصلو ما تتردد --- إتوكل على الله....

الكثير من السودانيين يحجموا عن المطاعم السودانية للأسباب أعلاها...

الكثيريين يريدوا إستضافة أصدقاؤهم من غير السودانيين على الوجبات السودانية ...في مطاعم سودانية...

بس الناس بتخجل لتدني مستوى النظافة....

وقبل كل شئ إستخير ربك...

اؤؤكد لك ان التجربة ستنجح بمعنى الكلمة...

فكرة ان السودانيين يستهدفون المطاعم الارخص وان دخلهم واطي ليست دقيقة ابدا..

وهي فقط نابعة من تصورات مسبقة :

كل القصة لا يوجد من طبق التجربة بي شكل متكامل ..

المكان المناسب

النظافة...

النوعية الممتازة للاستاف

الجودة المطلقة والمستمرة

الاسعار ال reasonable>>>

جدة بها عدد خرافي من السودانيين...

وفي هذا الصدد اود ان اوضح ان كثير جدا من السودانيين غيروا عاداتهم ..ولك ان تنظر لنوعية السيارات التي اصبح يركبها السودانيون..

انا شخصيا لو كنت املك امكانيات لما ترددت في تطبيق الفكرة وسرقتها منك... ههههههه..

صدقني دي منطقة من هذا السوق ثرة وخصبة وفاضاااضية والناس ما اكتشفتا لسة !!!

انصحك لوجه الله دور ليك علي مشروع تاني
جني

.
الإخوة ناس جدة ..... لكم التحية والتقدير

أنا من خارج المملكة ولكنني في الخليج ..واعتدت على زيارة جدة مرتين في
السنة ... يبدو أن أخونا حافظ بخيت مقدم على ( مشروع ) وعليه أرجو أن تنوروه
على أهمية ( الموقع ) وإن كان له دور في نجاح المشروع ... أم أن العمل نفسه
هو الذي يجذب الزبائن من أي مكان ؟..... ( البيك ) مثالاً ..
وما هي أنسب المواقع لإقامة مطعم سوداني ... وهل الكثافة السودانية في أحياء
بعينها لها أثر؟

لكم الشكر ولحافظ التوفيق والنجاح

اعرف مطعم واحد ناجح في جده وهو في شارع الاسكان مطعم السرواتونجح لان صاحبه كان يعمل جرسونا في مطعم السودة في بني مالك. اغلب المطاعم السودانية تحقق أرباح ضئيلة بسبب كلفة التشغيل والرسوم ومشاكل البلديات
جني

تأسيس المطعم امر مكلف
إيجاد موقع مناسب ودفع ايجار عدة أشهر وصيانة الموقع وتهيئته ليناسب عمله كمطعم وتاثيثه ونقل كفالة عمالة وآثار رخص بلدية للموقع وللعمالة هذه مبالغ طائلة فضلا عن توفر سيولة لمقابلة احتياجات المطعم اليومية حتى يتبوأ مركزا مرموق ويحقق ربحية.
وفي حالة عدم نجاحه لا قدر الله المخرج الوحيد هو التقبيل وما ادراك ما التقبيل!
المال تلته ولا كتلته !!
هنا المطاعم يشغلوا فيها عمالة مصرية ويكتبوا عليها المطعم اللبناني والمطعم التركي.
وانت يا حافظ اخوي داير تفتحه مطعم سوداني!!
يا راجل شوف استثمارات مضمونة وما ا أكثرها!
جني

فكر في الموضوع جيدا ..
قبل ان تقدم على الفكرة
ورغم اني لست من سكان جدة
لكنني مرتبط بها كثيرا
وقبل توفر راس المال
فان الموقع والادارة من الاضلاع المهمة جدا في هذا المشروع
كل مداخلات جدا اجعلها من ضمن الدراسة
وبحكم عملي بالبلدية فان 90% من المطاعم السودانية يجب ان يعاد النظر فيها
وذلك لاسباب لاتصلح للنشر
وغالبية السودانيين الذين يمرون على جدة
سواء دخولا او خروجا
فان ظروفهم اقل من الوسط
واذكر انني كنت اقف في البيك في انتظار دوري
فاذا بثلاثة سودانيين
يبدو انهم اتوا عمرة
وقالوا للبايع
عندك بلدي ؟؟؟؟
والوجبات كانت تمر على الشاشة باللغة الانجليزية
ومازحتهم
ياجماعة هنا مافي بامية مفروكة حايمة في المحل دا

معليش هجمة مرتدة
لم ازر دبي
لكن اعتقد ان المستهلكين في دبي
يختلفون عن المستهلكين في جدة
ونتمنى لك التوفيق

لا أنصحك بالأقدام على هكذا خطوة
عشت فى جدة زمن طويل و فى فترة كان شغلى تموين المطاعم
السودانية باللحوم و فى عام 2000 م تقريباً أحد أعضاء هذا المنبر
قام بنفس فكرتك ... مطعم مجهز على مستوى راقي جداً و فى شارع هام
شارع السبعين قريباً من مطعم البيك ... و كان به قسم للعوائل و أصناف
الطعام منها السودانية و غير السودانية ...
للأسف أكبر عدد اللذين أتوا يوم الأفتتاح لأنه كان بوفيه مفتوح مجاني ...
لم يستمر طويلاً و كانت خسائره فادحة ... و أغلق المطعم .

حافظ بخيت سلام ياطيب
انا من زوار جدة مرتين في العام منذ زمن طويل مستوي الخدمات المطاعم
السودانية تعبان جدة المطاعم منوعة حسب سكانها تلقي البخاري ومطاعم
اليمن وخلافه ان كان لابد ممكن يكون مطعم عام ليس مخصص للسودانين
فقط مع التجهيز العالي


-----
خارج النص مطعم تجهيز عالي في السودان ممكن يكسب أضعاف أرباح جدة

تحياتي لكم جميعا اصدقائ واهلي البورداب وانشاالله ماعدمناكم .......
وماخاب من استشار ..خاصة واسرة البورد مشهود لها بالترابط لذا كان لجوئ لكم وما خيبتوا ظني...
انا الان في طور التفكير ومناقشة الفكرة وعمل دراسة الجدوي...
مسافر الي جدة في هذا الشهر لتكملة دراسة الجدوي ولنري الي اين تسير القافلة....لكم الشكر وفي انتظار المزيد من الاراء...

ود المسلمي تحياتي لك ياحبيب
في السودان وفي ظل الظروف الان الاستثمار غير وارد النسبة لي.
وياريت كانت الوضع احسن لكنا استقرينا بخرطومها..

اي مشروع ياحافظ بتوقف على الدراسة المستفيضة
في جدة تحديدا اهم شىء الموقع ... والتركيز على مصاريف التشغيل
والجودة والخدمة السريعة ...
شخصيا انا مقتنع بالفكرة جدا جدا واشجعك عليها وباذن الله حيجي اليوم
وبتلقى نفسك حققت ارباح لا باس بها ... وربنا يوفقك
اي استشارة مالية ... بنكية ... اقتصادية .. فنية نحن تحت الخدمة

شكرا ليك الاخ احمد ياسين ...
اكيد الدراسة المستفيضة والاستفادة من تجارب وتجاوز السالب فيها وده سبب من اسباب زيارتي الي جدة هذا الشهر...

ابو حراز وعلي عبدالله ...
مروركم أسعدني جدا ...
وحقيقة المشورة بتنور الواحد لحاجات كثيرة ..

الأخ جني ...
لك الشكر اجزله علي النصائح الغالية التي اكيد سأضعها في حساباتي

Quote: خارج النص مطعم تجهيز عالي في السودان ممكن يكسب أضعاف أرباح جدة

ناذر الخليفة يا ملك سعدت بطلتك
السودان خارج النص ...
التماسيح العشاري دي ما بنقدر عليها ...

الأخ حافظ
أولاً أنا ما من ناس جدة الآن ، ولكنني كنت من سكانها في السابق
قال رسول الله صلي الله عليه وسلم تسعة أعشار الرزق في التجارة
وعلي الرغم من أن الحديث قد يبدو ضعيفاً إلا أن شواهد الحال تفيد بمعقوليته
جيد إنك تفكر في التجارة لكن للأسف
حسب معلوماتي - دون تفصيل - هذا المشروع نسبة نجاحة لا تتجاوز ال 10% ال 90% عند عثمان (
ابوحراز) أتمني لو تصرف النظر فوراً
و حسناً أنك لم تفكر في موضوع السودان - مع احترامي لناذر والمسلمي
علي اليمين هناك غير التماسيح العشارية
في تمساح أب كبلو الضارب اللية - أكيد أنت عارفو بسوي شنو
الخلاصة
حكمة أهلنا
الدرب الممشي ما بتور قش
____
الحليلة

(ما خاب من استخار ولا ندم من استشار)

بالتوفيق يا الحبيب

الأخ حافظ بشير
كل الأمنيات لك بالتوفيق في استثماراتك القادمة سواء في جدة أو غيرها
وطبعا لا يفتى ومالك في المدينة
الأخ حيدر جني من قدامى أهل جدة وأهل جدة أدرى بشعابها
لكن زيارتك لمدينة جدة قد تمنحك الفرصة الكافية لتقييم مدى نجاح المشروع
عموما أصالة عن نفسي ونيابة عن بورداب جدة نرحب بك في جدة
ونتمنى نقابلك فيها

غايتو يا حافظ كان عملتوا في دبي او الامارات عموما اخير, وبالمناسبة اييوني ما نجح لأنه مطعم سوداني فقط بل للإبتكار في طريقة اختيار الوجبات و المنيو و الخدمة بل لا يصنف كمطعم سوداني انما عالمي - من ناحية طبيعة الوجبات المقدمة

لا يوجد بجدة مطعم سوداني يمكن أن تصحب أسرتك أو ضيوفك له لتدني النظافة والمظهر مع جودة المنتج
ودي ميزة مشجعة لمشروعك المقترح إن توفر الموقع والمستوى المناسب وأقترح حي الصفاء شارع الأربعين أو السبعين للوجود السوداني وتوسط الموقع
ولكن
الاعتماد على الأصناف البسودانية البلدية غير جاذب للأسر فهم يبحثون عن التغيير المتوفر في المطاعم خاصة التركية
والهندية والصينية والفنادق وبوفيهاتها المفتوحة .. والعزابة ممشين حالهم بالقطر قام والحرفنة والمطاعم التقليدية الاعتادوا عليها
ولكن ....
إن أمكنك تقديم أصناف عالمية ممتازة مطعمة ببعض البلدي وبأسعار معقولة قد يكون عندك فرصة للمنافسة مع ارتفاع درجة المخاطرة

تحياتي وأطيب أمنياتي

Quote: المستوي المعيشي للسودانين "عموما"في السعودية واطي جدا ..اي انهم يفضلون المطاعم الرخيصة والسكن الرخيص وكل شئ رخيص ...لان هدفهم الاساسي التوفير ..البوبار في السودان فقط

السوداني الوحيد من كل الجنسيات فى غالبيتهم يغترب بدون هدف.. ويفضل السكن المناسب المريح له
ولعائلته وضيوفه ويعيش بالطول والعرض .. عكس أغلب الجنسيات الـ بتسكن فى شقق ضيقة وعايشين
على السندوتشات والنواشف لو إستثنيناء جنسيتين بالكتير من الدول العربية .. كونهم بيفضلوا المطاعم
السودانية ( الأكلات السودانية) لا يعني إنهم يفضلوا المطاعم الرخيصة.. السوداني يبحث عن الجودة
سواءً فى السكن أو المعيشة.
مشكلة المطاعم السودانية لا تهتم بالنظافة .. مجرد فكرة عمل مطعم معاها حلتين وكمشتين وكم صحن ... إلخ
ويكون مطعم سوداني.. الإهتمام بالنظافة والمطاعم السودانية فى خطين متوازيين.


اما عن مضمون البوست:
الأفضل يكون مطعم للسوداني وغير السوداني.. دراسة جدوي متكاملة.
الموقع .. جودة المطعم بتجيب الزبائن.. بمعني.. لا تهتم بالزبون السوداني براهو.

نصيحة .. الإستثمار فى البامية المفروكة والتقلية وباقي الأكلات الشعبية السودانية
وفر وقتك ومالك .. أبعد منها.. الإجراءات براها بتكلفك الكتير من الوقت.

حافظ سلامات
قلت لي

Quote: التماسيح العشاري دي ما بنقدر عليها ...

اها دا ذااااتو الخايفين منو
و دا ذاتو المِجَفّلنا

السلام عليكم جميعا..........
برجع ليكم برواقة بعد الشغل..........
مشكورين علي الاراء القيمة ...............

العزيز سنجاوي...
مشكور علي مداخلتك الفخيمة
الاخوان الطيب عباس ومحمد فضل المولي والاعزاء الأمين محمد علي ومولانا احمدونا
شرفتم البوست بمداخلاتكم القيمة وعاجز عن الشكر

الحبيب ود البشري
دبي المنافسة فيها صعبة وان كانت سوق مفتوحة للجودة
اخونا الباشمهندس ابوالدهب افتتح مطعم كفرع لمطعم أمريكي يسمي ايزيل
لا اعرف مدي نجاحه ولكن لا أظن بالمستوي المتوقع

الحليلة مرحب بيك....
قلت لي تمساح أب كبلو عديل ...
إخوانا من امريكا بيرجعوا السودان بكل قروشهم عشان يعملوا مشروع
ويستقروا ويعيشوا معيشة مستورة ... بعد كم شهر يجوا راجعين
وخشمهم ملح ملح .. تسألهم الحاصل شنو ... من المغصة ما يقدروا
يحكوا ليك الحاصل بس يوصفوا في التماسيح

Up....

Quote: لا يوجد بجدة مطعم سوداني يمكن أن تصحب أسرتك أو ضيوفك له لتدني النظافة والمظهر مع جودة المنتج ودي ميزة مشجعة لمشروعك المقترح إن توفر الموقع والمستوى المناسب وأقترح حي الصفاء شارع الأربعين أو السبعين للوجود السوداني وتوسط الموقع ولكن الاعتماد على الأصناف البسودانية البلدية غير جاذب للأسر فهم يبحثون عن التغيير المتوفر في المطاعم خاصة التركية والهندية والصينية والفنادق وبوفيهاتها المفتوحة .. والعزابة ممشين حالهم بالقطر قام والحرفنة والمطاعم التقليدية الاعتادوا عليها ولكن .... إن أمكنك تقديم أصناف عالمية ممتازة مطعمة ببعض البلدي وبأسعار معقولة قد يكون عندك فرصة للمنافسة مع ارتفاع درجة المخاطرة

ياحافظ ماقاله سنغاوي مزبوط ... جدة فيها سودانيين قروشهم ماليها حد وقاعدين يصيفوا كل سنة في حته وبتناولو وجباتهم في الفنادق الكبيرة وما قاعدين يمشو تجاه المطاعم السودانيه حتى الشية سابوها لعدم النظافة وطريقة التقديم التقليدية ولا يوجد معطم اجنبي في جدة والا له قسم عوائل الا المطاعم السودانية شغلهم كلو امسك لي اقطع ليك احبطونا شديد حتى الطرابيز والكراسي يفشوا على الارخص ... جدة فيها آلاف السودانيين زي الوضع الاقتصادي في السودان طبقة فوق وطبقة تحت وانت عليك بالطبقة الفوق قروشها رز ولان عشمهم في مطعم راقي انقطع تماما منذ زمن بعيد لذا يتهيأ للناس او ناس جدة بلوتاريا ساكت ... تعال مافي اكل في جدة قاعد يبور وعلى فكرة و اسمعني.. انت لو عملت مطعم على مستوى ما سبق زباينك ما حيكونوا سودانيين وبس لانو الاكل السوداني مرغوب جدا .. نحن ورثناهو من الاتراك كما تعلم وتفوقنا عليهم بالمسبك والشية ياخي السودايين الواحد عايز يطلع مع عائلته في نهاية الاسبوع عشان يقعدوا ويتعشوا مثلا تحت نور خافت وموسيقى مش يجري ويجيب الاكل السوداني في كيس بلاستيك ويفرغوا في الصحانه .. الحكاية مش اكل وبس

الأخ عبد الكريم الأحمر ... تحياتي
يا اخي مداخلتك دي ريحتني في حناني ... ليست لانها جات في هواي
لكن باستطلاعي لبعض الأصدقاء سمعت منهم بعض مذاكرته وهذا ما شجعني علي طرح الفكرة هنا
مكان جميل ورايحة المشويات مع الخدمة الجيدة والنظافة العالية وتوفير جو جميل واسعار معقولة
لكن في نفس الوقت أخذ كلام الأخ جني بصورة حذرة كذلك الاخوان علي وأبو حراز

الأخ جعفر شكرًا علي المرور
اكيد سأضع كلام الأخ جني موضعه ... وحقيقي مع تداول النقاش يمكن وضع صورة عامة
السلبيات والإيجابيات وتقييم عام للفكرة ...
اتمني مقابلتكم بجدة إنشاءالله كان ربنا سهل

Quote: خارج النص مطعم تجهيز عالي في السودان ممكن يكسب أضعاف أرباح جدة

..

الاخ حافظ وضيفه الكرام

في بوست هنا قبل فترة كان يتحدث عن رداءة مستوى الخدمة والنظافة داخل المطاعم السودانية وقد تداخل كثيرون وابدو استعدادهم لدعم اي فكرة مطعم سوداني بمستوى راقي

انا شخصيا ارى ان الفكرة جيدة ونسبة النجاح كبيرة

تعال جدة وشوف زي ما قال ليك جعفر وقيم الامور

يا حافظ اخويالسعودية ابتداءا من ٢٠١٦ سوف تقلل استخدام المياه الجوفية في زراعة المحاصيل والأعلاف وحصر استغلالها في زراعة بعض الخضروات والفاكهة لشح المياه ونقص المخزونونسبة للظروف الإقليمية في الدول المجاورة للسعودية مثل اليمن وسوريا و عدم الاستقرار في لبنان والعراق وصعوبة مرور الخضر والفاكهة من تركيا ايضا فسوف تتعاظم فرص السودان ومصر في سد الفجوة لدول الخليج وذات الوسيط الذي يسهل لك فرصة المطاعم يمكن أنثربولوجيا لك فرص العمل التجاري في الاستيراد او كوسيط نقل للمنتجات السودانية باستخدام البرادات. هذه ستكون فرص ضخمة للسودان والسودانيين ان أحسن استغلالها لقرب المنطقة وقلة التكلفة تخيل سوق لحوم وخضر وفاكهة وأعلاف ونقل و ياله من سوق!
جني

الأخ جمال للباقر ... تحياتي وشكرا علي مرورك
قرأت ذلك البوست ويمكن من الحاجات الاداتني فكرة عن السعودية
زيارتي لجدة والاراء المطروحة هنا خطوة في الاتجاه الصحيح

الأخ جني سعدت جدا بأرائك القيمة وطلتك في هذا البوست
افتقدناك في البورد ... وكانت سعادتي بوجودك
هذة الأفكار بعض منه مطروح علي الطاولة وكلامك صحيح في ناحية استيراد بعض المواد للسعودية من السودان او أماكن اخري
انشاالله بدعمكم وخبراتكم ابداء بداية موفقة وأسير في الاتجاه الصحيح

شوف فى جدة ما بتنجح

لكن بالقطع

فى مكة

والمدينة

فرعين اكيد ناجحين لو لقيت الموقع التمام

وربنا يوفقك

فكرة متينة

الأخ محمد عبدالله التحايا لك
ما أسباب او حيثيات الفشل في جدة ونجاحها في مكة والمدينة
أرجو اذا عندك استفاضة ان تفيدني بها

الاستاذ حافظ تحياتى يوجد فلسطينيين امريكان وصلوا جدة وشغالين استيراد عربات امريكية مستعملة موديلات 5 سنة او 4 سنوات
وتجارة العربات ماشة معاهم حلاة بلى
وكل شهر 7 سيارات من امريكا

الأخ احمد حمودي تسلم كثير ومشكور علي المرور
كل الخيارات علي الطاولة ...
عدا خيار العشاري وأب كبلو بتاع الحليلة ...

عند وصولك الى جدة يسعدنا ونتشرف فى مرورك علينا نحنا فى شارع الميناء لانه من عتبنا البلد دى شغالين فى سوق الله اكبر دة وايضا الاخ جنى
وتحياتى

الأخ احمد ...
انا سيكون لي الشرف بلقائكم واتمني ان تتاح لي الفرصة
وانشاالله سأكون بجدة يوم الخميس القادم وربنا يسهل

سلام ..

الأكل ضرورة يومية، وعادة مافى دراسة جدوى لمشاريع الأكل والشرب والملابس ..

فى دراسة لأفضل البدائل لتقليل (التكاليف)، وتساعد فى الصمود فى السوق خاصة فى بداية المشروع، وهى سبب نجاح مشروع وفشل مشروع أخر مماثل له.

أبدأ (بأرخص) إيجار دكان على مستوى (منطقة العمل)، و(بأقل) عدد ممكن من العمال، و(بأغلى) يافطة، و(أنسب) إسم تجارى مقبول لكل سكان وزوار جدة دون تحديد هوية الزبائن ..

طالما عندك الفكرة لو ما جربتها ما حترتاح ..

يصعب تقديم نصائح مناسبة دون معرفة حجم المشروع والأموال المخصصة له..

الأخ فؤاد ابراهيم ...شكرًا علي طلتك ومرورك ....وجهة نظر برضو

تحيةالمستوي العام للمطاعم السودانية ضعيف للغاية.....انواع الطعام رغم قابليتها للتسويق للغير مثل(الشواءات) الا ان مستوي النظافة وكيفية العرض تظل حائلا دون اقدام الأخرين وهم كثر علي ارتياد المطاعم السودانية... الموقع ليس له محل من الاعراب لدي السودانيين لكنه مهم اذا توسعت نظرتك في تقديم خدمة تاخذ في اعتبارها الجاليات الأخري...تكلفة التشغيل والعمالة المدربة عنصران لهما اهميتهما في الدراسة ... ورغم ذلك فان القطاعات الخدمية تظل جاذبة لرأس المال رغم البروقراطية وجشع اصحاب العقارات وانخفاض سقف الوعي القانوني.. لك التحية والاحترام

الأخ محمد الكامل ...اسعد الله صباحك
شكرًا لمرورك وإضافتك ....
من الأسباب التي دعتني لفتح البوست هي ان استطلع الاّراء
لأكون صورة أستعين بها ....

يا ابن خالتي حافظ بخيت.

فكرة جيدة جدا واتمنى لك التوفيق باذن الله .

وياريت لو حاولت برضو تفكر في فتح مطعم في الدوحة ...واكيد نسبة نجاحه كبيرة جدا

لك الود والاحترام

ازيك يا ابن عمي ...ود الفكي
مازلنا في طور التفكير ....
ما عارفين المراكب ترسي وين

Up

بالتوفيق انشاء الله

في انتظارك انا والباشمهندس عوض

ودا تلفوني احتياطي 0097433346292

تحياتي

تحية وتقدير الاخ حافظ

لم أرى هذا البوست الا الآن , كنت من سكان جدة سنوات طوال , كما ذكر لك الأخوة اعلاه مستويات المطاعم السودانية أقل ما يقال عنها أنها ( شعبية ) كل شي متدني النظافة , المكان , الخدمة , كل شئ , ومع ذلك لهذه المطاعم روادها وزباينها وينتهي الطعام بها قبل منتصف الليل .
ما أعلمه عن جدة أنها تضم مختلف فئات المجتمع السوداني وتتفاوت دخولهم , ومنهم ذوي الامكانيات العالية جدا , وبلا شك تجربة مطعم سوداني على مستوى عال وراق , تجربة رائدة جدا على الرغم مما تحمله من مخاطر , فالسوق يخلو تماما من مطعم سوداني راق وهذا يعتبر جانب مجهول بالنسبة لك لأنه يمكن أن يجلب أرباح عالية جدا أو يجلب خسارة فادحة لأنه لا توجد تجارب سابقة يمكن الرجوع اليها , ولكن كما ذكر بعض الأخوة أعلاه لا بد من اضافة محسنات عالمية وذلك لضمان زبائن من جنسيات غير سودانية , وحتى الزبائن السودانيين يرغبون بلا شك في التنوع العالمي ( الابتعاد عن البلدي قدر الامكان ) اضافه لاختيار المكان المناسب والعمالة الماهرة , وكما تعلم فأكثر ما يعجب الناس المظهر العام والنظافة ومستوى الخدمات , ودعواتنا لك بالتوفيق .

up

السلام عليكم جميعا ولكل من شرفني بالمرور علي البوست

فتحت هذا البوست قبل اكثر من شهر لاستشارة أعضاء البورد بالسعودية وخاصة جدة بخصوص افتتاح مطعم فاخر بجدة وقد تباينت الاّراء

وكان لي شرف زيارة المملكة وابتدأت بجدة ومع الأسف وجدت واقع المطاعم السودانية تحديدا مؤلم جدا من كل النواحي ولا أستطيع وصفه ....

وزعلني احد الأصدقاء عندما ذكر لي ان السودانين يخافون من الأماكن النظيفة وحد في نفسي ان شخصا متعلما يقول لي مثل هذا الكلام

فاعتقد نحن شعب عموما نظيف ونوعا ما مرتب فلماذا نقبل ان نوصف بهكذا وصف الا اذا كان هناك ماوراه .... اترك هذا الباب مفتوح للحديث

تحدث مع البوردابي احمد حمودي تليفونيا ولم تحظ بلقائه لظروف استدعت عودتي سريعا .... سأعود لأكمل انطباعاتي عن رحلة الاسبوعين وما رأيت وسمعت

وكذلك دوحة الخير وسوق واقف والمطعم السوداني فيها

تحية طيبة الاخ حافظ

البوست مفتوح من اكتر من شهر وماشفته إلا اليوم

انا اعمل فى قطاع المطاعم .. مطعم مشهور بالرياض

مسئول من النواحى المالية والتكاليف وغيرها

اولا قطاع المطاعم نسبة ربحه قليلة بالمقارنة مع القطاعات الاخرى

يعنى مابين 15 الى 20% على احسن تقدير

من اهم الاشياء التى تزيد التكلفة هى العمالة فالعامل يكلفك 3150 ريال

سنويا جوازات 1200 تامين طبى وفحص بلدية وملابس وسكن حوالى3000ريال

هذا غير الراتب وراتب الاجازة والتذاكر

ثانبا تكلفة تاسيس مطعم مستوى ممتاز لاتقل عن مليونى ريال

الايجارات فى مكان راقى عالية ولاتقل عن150 الف للفتحة الواحدة

المطاعم عموما كمكان خدمى تعمل اكثر من 18 ساعة يوميا .. لذلك تحتاج الى ايدى عاملة

كبيرة . محضرين تقطيع لحوم وخضار طباخين مجهزين للوجبات ومقدمين طعام

و الاهم هم عمال النظافة .. لذلك يجب ان يكون العدد كبير بالاضافة الى تكلفة الكهرباء والماء

ثالثا والاهم هو التاشيرات فهذه قصة طويلة مع مكتب العمل والجوازات ربنا ما يدخلك فيها

رابعا مشاكل البلدية وناس الصحة ديل كل يوم يزوروك ويعملوا مخالفة ولو ما وجدوا مخالفة

ممكن بعملوا مخالفة لعدم وجود مخالفة.. حقيقة معاناة لايعلم بها إلا من يعايشها

رابعا / تدنى ايراد المطاعم فى الفترة الاخيرة بصفة عامة للاسباب الاقتصادية السائدة حاليا

لذا عزيزى اصرف النظر وامسك عليك قريشاتك او شوف مجال تانى احسن

بالمناسبة من واقع تجربتى السودانيين اقل الجنسيات التى ترتادالمطاعم بالنسبة للعوائل

يبدو انهم بحبوا اكل البيوت واللمة والونسة

مع خالص تحياتى

اى استفسار انا على استعداد للمساعدة

ا