الأحباش يمارسون تجارة البشر بالخرطوم

Quote: Mohammad Ahmad Modawi · يعمل لدى AL-QAHTANI GROUP با حاتم ابراهيم سلام عليكم المحير في أمر كتير من السودانيين يقولوا ليك (الأثيوبيين) بحبونا وبحترمونا (دا تعميم) . عن تجربة شخصية انا لاقيت منهم ناس بكرهونا عديل قال عشان نحن بنتعالى عليهم في السودان وبنعاملهم معاملة ماكويسه ودا حاصل بنسبة كبيرة حسب محيطي الانا عايش فيه ، كان في بوست زمان في المنبر إسمه (جنابة الحبشية) فيه كلام كتير عن تنميط السودانيين (للاحباش) شئ تاني امجد الجميعابي قال ما قالوا ليه ياخال انا شخصياً قالوها لي وسمعت قالوها لي غيري خال معناها عبد للماعارف تاني في كلمه بقولوها (كور) على وزن (كوز) نفس التشكيل انا لاحظت لما تجي سيرة كلمة (خال) في كيتر من البوستات القريتها جماعتنا طوالي الواحد يقول ليك (انا ماحصل قالوها لي) يلا نصدق نسوي شنو !!! . تالت شئ ابوحسين تجربته مع الشركة الشغال فيها (لاتُعمم) القاعدة هنا إنه الشركات والمؤسسات تحتفظ بجوازات عمالها وحتى لو في قانون بمنع الكلام دا أغلب الناس ما بتجري وراء الموضوع دا كتير وجرجرة المحاكم دايره (ضهر) ونفس طويل وأغلب الكفلاء بستغلوا حاجة الناس زي ما السماسرة بستغلوا حاجة البنات الاثيوبيات للشغل .

المكفول رضيان

شوف، مشكلتنا معقدة جداً، فالسوداني يمشي الخليج وفي ذهنه كم متصادم من العواطف المتداخلة ما بين دينية واجتماعية ورغبات اقتصادية، وما بين الضغط المعيشي هنا وصعوبة الحياة المعزولة هناك بتتفرد خصائصه وتظهر. عادة تشغيل الخادمات دي من أساسيات المجتمع الخليجي والسوداني بسلوكه غير المستقر نفسياً أول ما تتغير فيه لهجته ومحاولة تقليد طريقة المعيشة، السوداني للسبب دا يا محمد أحمد ما بيوفر زي البنغالي أو المصري أو السوري، لأنو بيقلد طريقة الكفيل في السكن والفرش وحتى لما يرجع السوداني بينقل معاهو كل الممارسات الشافها هناك والمظاهر. عندنا أعضاء هنا لبسو العقال أو لبسوهوا لأولادهم وعرضو الصور هنا، لذلك فمن المستحيل يجينا واحد ويعترف بعد النقلة المرحلية (والنوعية) دي بمرارة التوصيفات العنصرية بكل سهولة أو ضنك الممارسات الخشنة للكفيل، فهو أصلاً ذاب أو اعتبر نفسه ضمن مكون البلد المضيف، نحن شعب تربيته صوفية، لذلك ميزة الصبر جارية في دمنا وإن اختفى الفاصل بينها وبين صفة الضعة في كتير من المواقف. بالعودة للموضوع، أنا لا أجد صعوبة في فهم طبيعة العقل الذي يستورد كل ذلك النظام والعادات الخليجية ويطبقها بنسخة محلية تأخذ طابع التعالي هنا وطابع الانقياد والولاء الشديد بالاجتهاد في أمور مثل (الأمانة) هناك باعتبار أن السلوك في الحالتين يعزز الشعور بالتميز، وبالتأكيد لا يخلو حتى هذا المنبر من شذرات هنا وهناك تعكس هذه العقلية (أسلوب الفخر بنحنا) وفي رأيي المتواضع أن الأمر هنا لم يكن من سبيل لتطبيقه إلا على نحو سلبي بازدراء جماعات أخرى أضعف في المجتمع (مثل الإثيوبيين) ووضعها في طبقات دنيا محاطة بأسيجة منيعة في أدمغة قطاعات عريضة تكرس لهذا بكل أنواع المعينات المتيسرة اللفظية والفعلية. ضمن الثلاثي القديم (الجهل والفقر والمرض) أميل إلى أن احصر مشكلتنا في الجهل وغالبه مفتعل وفيه الجهل الطوعي الممتاز بإرادة "معتقديه" وهو قديم متجدد، اضمن القضاء على الجهل فتحصل على وعي مناسب، بعدها لن تكون مسألة كراهية الأجانب مثار اهتمام احد إن كانت فردية ولا تؤثر في أوضاعهم داخل الوطن سلباً، هذا ما توصلت إليه أمم أخرى، تستورد البشر على اختلاف ألوانهم دون أن تفاضل بين هذا وذاك (أمريكا، استراليا، كندا)، وأمم أخرى سعت إليه ففارقت تصنيفنا العالمي (ماليزيا، سنغافورة، الهند). بخصوص موضوع البوست، نظرة أخونا ودقاسم وإن كانت ممعنة في الخصوصية لكن الجانب الخفي منها هو تقليد النظرة السائدة هناك للخادمة الإثيوبية، في إمكانك الدخول على منتديات الخليجيين وستجد العجب من التعليقات والتحذيرات من الخادمات الإثيوبيات (والساحرات الأفريقيات). وأنا شخصياً ما بلومه لأنه ببساطة وجد البيئة مجهزة في السودان وفي الخليج، دائماً الانسان بيفتش على عتبة يطاها عشان يشعر بالرقي نسبياً حتى لو بطريقة مواربة كأن يفتعل معركة (تجارة بشر) في غير سبب.