إبراهيم موسي أبا " عيني عليك باردة "

01:13 PM Jan, 23 2016

سودانيز اون لاين
عبدالعظيم عثمان-
مكتبتى
رابط مختصر

الرحمة والمغفرة للفنان الكبير إبراهيم موسي أبا

فنان كبيـر لم يجد حقة من الإحتفاء والتوثيق

له الرحمة والمغفره

الأغنية دي بتذكرني أيام جميلة تكون راجع من المدرسة في نص النهار وبيكون بتاع الدكان
راقد في عنقريبه الهبابي وخاتي الراديو قريب من كراع العنقريب وهو يسمع أبراهيم موسي أبا يغني عيني عليك باردة

رحم الله الفنان إبراهيم موسي أبا

وقلبي كان شفتي حراية القايلة

أبو الزفت

كتب الأستاذ الفنان يوسف الموصلي في بوست سابق للأخ منوت عن الراحل أبراهيم موسي أبا

http://sudaneseonline.com/board/8/msg/%D8%B9%D9%8A%D9%86%D9%8A-%D8%B9%D9%84%D9%8A%D9%83-%D8%A8%D8%A7%D8%B1%D8%AF%D9%87-%D8%8C-%D9%8A%D8%A7-%...%87--1073146650.html

Quote: العملاق الذي رحل في صمت غريب في صوته قوقاي القمري وهديل الحمام رحمة الله عليه

كتب الأستاذ أبوذر بابكر في العام 2007 عن الراحل الأستاذ إبراهيم موسي أبا

Quote: اصوات كتيرة عبرت سماء الأغنية فى السودان، "ما عايز أقول الأغنية السودانية"، بعض منها كانت أصوات عادية كتير منها أصوات عادية وما بتخلو من تطريب برضو، لكين القليل منها كان هو المميز واللافت والمتفرد يعنى أصوات مطربين زى سرور وعوض شمبات مرورا بعبد العزيز بوداود ووصلا الجابرى والخالدى ومحمد البدرى لحدى عاصم البنا واسرار بابكر، دى كلها اصوات غير عادية وفيها تفرد وتميز غير عادى وفى قلب القائمة دى يجلس صوت جميل وشجى فيهو قدر عالى جدا جدا من التطريب وجودة الأداء وعذوبة النبرة، إبراهيم موسى ابا، واحد من أجمل خلق الله صوتا وحسا وإحساسا يمكن كتير جدا من ناس الأجيال الجديدة ما يكون سمع بيهو وحتى لو سمع واحدة من أغنياته حتمر فيهو من غير ما ينتبه وده العيب وين الإذاعة، وين التلفزيون، وين الإعلام بوسائله وطرقه الكتيره الماليه البلد حاصل فارغ بس، وين الملتقيات والمراكز الثقافية زول يورينى بالله متين سمع أغنية لإبراهيم موسى قريب فى الإذاعة أو أغنية لى أحمد فرح أو أم بلينة السنوسى أو ثنائى الجزيرة ناس اثروا دنيا الناس بالجمال والسماحة وما بخلو عليهم بأى شى جميل ومفرح، وبقو منسيين إبراهيم موسى ابا عاش فقير ومات فقير لكن حيظل غنى من أثرى الناس بى جماله وإبداعه وصوته الشجى المتفرد وبرضو وين ناس كردفان كلهم، وين روابطهم ومراكز إعلامهم، أو حتى وين الإعلاميين منهم الممكن يخلو جذوة ذكرى ناس زى إبراهيم موسى حية ومتوهجة وإبراهيم قطع شك ما كان حاجة عابرة ولا إسم إنكتب بقلم الرصاص فى كتاب الغناء عشان يتنسى ويمكن الناس العايشو فترة السبعينات والتمانينات بتذكرو كيف إنه الأغنية الكردفانية بقت على لسان كل أهل السودان، وبقيت تلقى مقاطع من أغنيات أو إسم أغنية منها مكتوب على خدود "البكاسى" وعلى صفحات البصات واللوارى فى بورتسودان ودنقلا وسنجة ونيالا وكوستى والخرطوم ده كله تم على أيدى إبراهيم موسى ورفاقه السمحين المبدعين، عبد القادر سالم وصديق عباس وعبد الرحمن عبد الله، وناس فرقة فنون كردفان فليه ننسى زول زى ده، وياريت الما مصدق كلامى ده، يمشى يفتش ويعيد سماع إبراهيم موسى عشان يسمع صوت يطرب الحجر واهو نحن كده دائما ننسى ونهمل الجمال ونعلى من شأن القباحة

http://sudaneseonline.com/board/100/msg/%D8%A5%D8%A8%D8%B1%D8%A7%D9%87%D9%8A%D9%85-%D9%85%D9%88%D8%B3%D9%89-%D8%A3%D8%A8%D8%A7----%D9%88%D8%...9%87-1180426984.html

كتبت الأستاذة / سلمي الشيخ سلامة في العام 2007 عن الراحل أبراهيم موسي أبا

Quote: ما دوامة هكذا غنى ابراهيم موسى ابا كروان الغناء السودانى كان احد المغنيين فى فرقة فنون كردفان لكنه اختار ان يظل فى مدينة الابيض ( بركب الكركابه بتدلى فى امروابة نهيدا طاعن دابه جننى وجن العزابة ) يا سيدى هلى تريد اذن ان تستمع الى مثل هذا الغناء فى اعلام (الناس ديل ؟) مستحيل بالقطع واليك واحدة اخرى افظع وقعا كنت فى زيارة لنادى الفنانين العام الفائت دخلت مكتب سكرتير النادى تفرست فى صور الاحياء والاموات فلم اجد (ابراهيم موسى ابا ، خليل فرح ، خوجلى عثمان ، مصطفى سيد احمد ، العميرى ، عبد الرحمن عبد الله (العازف)، محجوب عثمان ، الخير عثمان ، رمضان حسن ، صالح الضى ، التجانى مختار ، اسماعيل عبد المعين ، فاطمة الحاج ، منى الخير ، مهلة العبادية ، حسن سليمان ، احمد فرح ، سليمان عبد الرحيم (عازف ) زين العابدين احمد خليفة ( عازف ) والقائمة تطول وسالت عن هؤلاء فقال الذى رد على ان هؤلاء (عميرى ، مصطفى ) لم يكونا اعضاء فى نقابة الفنانين ؟؟؟؟ طيب الاعضاء اين صورهم ومعلومات عنهم ؟ اين تاريخهم ؟ من يعرف ان ابراهيم موسى ابا كان ابدع (ترزى ) فى سوق ود عكيفة فى الابيض ؟ وانه من اكثر الاصوات ندرة لتكوين ربانى لم يماثله احد ؟ لماذا ؟ بل ان الاذاعة ترمى بكل اشرطة الفنانين للمزابل وتحرق حشا الماضى والمستقبل برمى ارثنا الى المزبلة والذى يريد ان يتبين ذلك عليه ان يذهب الى الاذاعة ليشهد ان لا مكتبة لا مكتبه صوتية وحين كتبنا عن ذلك قال لى عوض جادين مدير الاذاعة السابق ( انتى الكلام المتخلف دا بتجيبيهو من وين ؟) لانى بكيت الذى بكيته الان ، لكن يبقى ان ابراهيم موسى ابا احد الذين ظلمهم الاعلام السودانى ايما ظلم لانه اعلام لا يعرف قيمة فنانيه

يا عبد العظيم إزيك
تعليقات ناس الموصلي وأبو ذر وسلمى الشيخ يصعب التداخل معها (صعبتها علينا)
لكن انتظر العزيز كبر يجي يوريك الجن
أنا سعيد أن أسمع هذه الأغنية للمرة الأولى بعد عشرات من السنين ما عارف لها عددا
شكرا لقد أشجيتنا

Quote: كلمات عبدالله الكاظم ألحان وغناء إبراهيم موسي أبا عيني عليك باردة يا السمحة يا الوارده يا فقرا ردولي رويحتي الهناك شارده في مشيتا الخايلة ورادا كيف مايلا البيها بتشتت دمعيات حرير سايلا روحي العطيشانا لشديرتك الشايلة وقلبي كان شفتي حراية القايلة وديعه منضومه كايسالا لي تومه ان قلنا نوصفها خشومنا مختومة دي من برق عينيها عقولنا ملخومة قشيشة الخريف خدرا شايلالا نواره والنوم جفا عيونا سوانا سهاره بيك الفريق نوَّر يا ست بنوت بارا

Quote: يا عبد العظيم إزيك تعليقات ناس الموصلي وأبو ذر وسلمى الشيخ يصعب التداخل معها (صعبتها علينا) لكن انتظر العزيز كبر يجي يوريك الجن أنا سعيد أن أسمع هذه الأغنية للمرة الأولى بعد عشرات من السنين ما عارف لها عددا شكرا لقد أشجيتنا

سلامات معاوية المدير

شكرا علي المرور
هو إحتفاء برائع وعملاق من عمالقة الغناء السوداني لم يأخذ حقه إعلاميا
وأحد ركائز الأغنية السودانية في كردفان
له الرحمة والمغفره

الأخ عبد العظيم
لك التحية والتقدير، لك هنا بوست سابق عن الراحل إبراهيم موسى أبا.
أحمد التجاني

http://sudaneseonline.com/board/470/msg/1402217673.html

http://sudaneseonline.com/board/470/msg/1402217673.html
الغناء في كردفان: إبراهيم موسى أبا نموذجا

شكرا أحمد ماهل لهذه المهلة عن موسى أبّا