Post: #1
Title: شهر عسل انقط عسل
Author: عبدالله ود البوش
Date: 01-16-2016, 01:17 PM
12:17 PM Jan, 16 2016 سودانيز اون لاين
عبدالله ود البوش-محل تمسا ترسا
مكتبتى
رابط مختصر في بداية سبعينات القرن الماضي جاء النور ود التاج من الاغتراب بعد عمرة وزوغة امتدت لسنوات
مكنته من جمع كثير من المال وجاب معاهو لوري ب ح تخشيبة اشتراهو من ضهر البابور
فبهرت به صقيعة سلامة وكل القرى المجاورة ويا بهرة ما تمت فاجأهم ود التاج وتمرد على عاداتهم
وجلب لهم العار حسبما يعتقدون وذلك بعد ان طلب من اهل عروسته ان يذهب بها الفندق !!!
فتحولت حالة بيت العرس لبيت عزاء
وتجمع سكان صقيعة سلامة ليثنوهو على طلبه بالحسنة ول بالقوة ان دعى داعي الفداء
والله يا سيادتي آنساتي سادتي الحكاية دي انا كنت واقف على تفاصليها وراقبتها عن كثب شديد
وتابعت كل مآلاتها وعواقبها وبلغ الامر ذروة سنامه حين حلف العريس بالطلاق
بانه ذاهب لا محالة بعروسته للفندق رضوا ام ابوا حتى ولو حاربته كل المنطقة
وحينها كأن القوم على رؤوسهم الطير ركت وبيضت فوق راسن
فزاد الطين بله حين حلف أبو العروس طلاق فوق طلاقو
وقال علي بالطلاق وقولة علي بالطلاق اطلقن علي نسواني الاتنين اسمعوا طلاقي دا
زي ما فضحتنا يا ود التاج علا نفضحكم في بطن بيتكم والليلة قبل باكر اعرس اختك لسليمان ولدي
واسافر بيها للفندق ذاتو بذاتو فاذا بفندق النخيل بالسوق العربي يستقبل اول أربعة عرسان من صقيعة سلامة
وبعدها تتالت فضايحنا الفندقية اربعة نجوم وفي نفس الفندق
وعلي الليمان والرحمن كلما امر بالقرب من هذا الفندق اضحك لمن اقح عندنا أتذكر
بان كل جماعتنا لمن اجوا الخرطوم في ذلك الزمان البعيد لازم امشوا اشوفو الفندق ابو فضيحة
ويأشر لهم خبيرهم المقيم بالخرطوم في زاوية الغرفة المقابلة لشركة باتا التي تمت فيها تفاصيل الفضيحة عاين عاين ديك ليها الغرفة هههههههههههههههههههههههههههههه
علما بانني حين تزوجت نزلت بفندق انتركونتننتال بواد مدني عشان ما تقولوا دا انا الذي جلبت العار لصقيعة سلامة وهذه ايضا كانت لها حكاية ولكنها اخف وطئة من سابقتها .
|
Post: #2
Title: Re: شهر عسل انقط عسل
Author: aydaroos
Date: 01-16-2016, 01:33 PM
Parent: #1
ههههههههه الله يضحكك يا ود البوش
ويا فضيحة الله يجازيك ويوريك القصص الممتعة دي وتحكيها بطريقتك اللذيذة
خليتني زي المجنون اضحك براي 
|
Post: #3
Title: Re: شهر عسل انقط عسل
Author: عبدالله ود البوش
Date: 01-16-2016, 01:56 PM
Parent: #2
يا عايدالروس يا حبيب وين اراضيك ياخ
عاين لي جاي
اقوليك حاجة واوعك تقراها وتكون بتشرب في شاهي سمح ؟
قبل سنتين تلاتة
كنت في بوفيه جهاز المغتربين بعدما خلصت اجراءاتي قلت اشرب لي شاهي وامشي
قابض كباتي واكتح فيها
جاني واحد سلم علي بعرفة زيك يا عمي عبدالله حق الله بق الله سالتو طوالي اتا منو ؟
قال انا جحفر ود سليمان
سليمان ود منو ؟ دا انا ليهو اريتني ما سالتو
قال لي سليمان ود جار النبي
قلت ليهو اتا ولدو الكبير قال لي أي ( اها دا ولد اخت النور ود التاج العرسوها في صمة خشوما عشان اجيبوا تار الفندق )
انقر تاني شربت جغمة من الشاهي
دشرتو كلو لمن شرتابو ملا الناس الفي الطربيزة كلهم
ودخلت في اضافري الكانت مواسية اسع انا أقول شنو للجنا دا ؟
ولكني فذلكت له قصة ولم يقتنع بها ولكن ماشاها لي بعد ان حلفت له بالطلاق الغليظ بان يتغدى معي
|
Post: #4
Title: Re: شهر عسل انقط عسل
Author: ملهم كردفان
Date: 01-16-2016, 02:29 PM
Parent: #3
حبيب الفرح وصديق النخوه والشهامه
ود البوش
انتركونتننتال ...الفيك اتعرفت 
|
Post: #5
Title: Re: شهر عسل انقط عسل
Author: بله محمد الفاضل
Date: 01-16-2016, 02:40 PM
Parent: #4
برضك بتشق الصف يا ود البوش
شفت كيف يا ملهم
الناس مشت في اتجاه واحد
هو شتر الموضوع عشان يتذكروه براهو
بركة الكتبتها صاح (انتركونتنتال) أها النطق كيفنهو
هههههههههههههههههههههههه
|
Post: #6
Title: Re: شهر عسل انقط عسل
Author: ملهم كردفان
Date: 01-16-2016, 04:06 PM
Parent: #5
اغرب مافي الام.ر يابله انا لمن اخش فندق الفيهو بجيهم احساس اني
العارف عزو مستريح داك
وخشيت فنادق كتير بسبب بعض الاصدقاء الاسفيريين القادمين الي القاهره
وكان فندق سميراميس كوننتننتال هو اخرهم
لكن وبالقطع كنت احفظ الاسماء العالميه منذ الثمانيات اما النطق
بتاعها فهو
إنتا
كون
تي
نن
تل
|
Post: #7
Title: Re: شهر عسل انقط عسل
Author: Salah Habib
Date: 01-16-2016, 04:44 PM
Parent: #6
ود البوش ازيك
اصرار عمك النور ود التاج على الفندق غريب وامكن وراهو سبب !!
اتوقغ انو سمع بقصة مركوب العريس !!
|
Post: #9
Title: Re: شهر عسل انقط عسل
Author: عبدالله ود البوش
Date: 01-17-2016, 10:16 AM
Parent: #7
صلاح حبيب أيها الحبيب الغالي
سلام واحترام
Quote: اصرار عمك النور ود التاج على الفندق غريب وامكن وراهو سبب !!
اتوقغ انو سمع بقصة مركوب العريس !!
|
الحكاية دي حقيقية وزي ما حكتيها بحزافيرها
اكيد النور ود التاج عندي سبب قوي على الإصرار الغريب دا ولكني لا اعرفه
.
.
ياخي احكي لينا قصة مركوب العريس دي
|
Post: #8
Title: Re: شهر عسل انقط عسل
Author: عبدالله ود البوش
Date: 01-17-2016, 08:52 AM
Parent: #6
ملهم كردفان وبله
سلام وتحايا وشوق
شايفكم خليتو الحكاية بعيد وركزتو على أ ن ت ر ك و ن ت ن ن ت ا ل
الظاهر كانت تواجهكم صعوبة في نطقها كما كنا صغارا
درست الثانوي في حنتوب وعندما نمر بهذا الفندق وراكبين البرينسات بحاول الطلبة قراءتها
ولم يتمكنوا من نطقها حتى البرينسة تعدي
وفي يوم من الأيام وقفت البرينسة جنب الفندق
فقلت لهم البادي انتركونتننتا دي اليتمها
فاذا بالكل انفجر ضاحكا
.
.
وسبحان الله كان شهر العسل حقي فيهو ذاتو بذاتو
ما مشيت فندق النخيل دعما لفنادق منطقتنا
.
.
شكرا يا فنانين يا مبدعين على المرور العليل
|
Post: #10
Title: Re: شهر عسل انقط عسل
Author: محمد حيدر المشرف
Date: 01-17-2016, 10:45 AM
Parent: #8
ههههههههه ..
هسع لوري ب ح تخشيبة انا فكيت شفرتها الاولى .. لوري يحمل لوحة ب ح اي بحر أحمر .. زمااان كانوا يقولوا ليك عربية 5 ب ح .. تخشيبة دي شنو ؟!!
|
Post: #11
Title: Re: شهر عسل انقط عسل
Author: معاوية المدير
Date: 01-17-2016, 11:21 AM
Parent: #10
Quote: الولد البخاف القبيلة تلومو
يخلف ساقو فوق تيسا رقيق قدومو
اما جاب رضوة البهم المزرقن فومو
اما اتكاتحن بي قدح الرماد حرومو |
يا محمود أخُوي من القُعاد دا كفانا
أمشاك الحبش بلداً كلآما رُطانة
إما نجيّب نِقُوّد ؤُ تفرح الراجيانا
إما اتكندكن ؤُ فرشن بِرِش لبُكاننا
هههههههه،
ود البوش المطموص إنتركونتننتال !، فضيحة السوآد .
عندنا وآحد في البلد عرّس،
أها، الصباح حبوبتو جات تسعل مِنّو،
قالت العريس ويّنو ؟،
قالولآ مشي شهر العسل،
قالت، ؤُ ساق عروسو معاهو ؟.
عاين جاي،
اوعك توري ود المشرف التخشيبة ...
|
Post: #12
Title: Re: شهر عسل انقط عسل
Author: عبدالله ود البوش
Date: 01-17-2016, 11:24 AM
Parent: #11
| Quote: قالت، ؤُ ساق عروسو معاهو ؟ |
هههههههههههههههههههههه
وحاتك اتا دا يا المسخوت كلتوم بت الضواها سايقنها شهر العسل قالت علا امش معاي حسب الله اخوي
|
Post: #13
Title: Re: شهر عسل انقط عسل
Author: Haytham Ghaly
Date: 01-17-2016, 11:29 AM
Parent: #12
| Quote: وحاتك اتا دا يا المسخوت كلتوم بت الضواها سايقنها شهر العسل قالت علا امش معاي حسب الله اخوي |
ههههههههههههههههههههههوالله انتو كلكم مطاميسلكن والله صدق القال رب ضارة نافعةموضوع الفندق اتسبب في عرس اخ العروس من اخت العريسالله يديكم العافية
|
Post: #14
Title: Re: شهر عسل انقط عسل
Author: Salah Habib
Date: 01-17-2016, 12:13 PM
Parent: #13
Quote: الحكاية دي حقيقية وزي ما حكتيها بحزافيرها
اكيد النور ود التاج عندي سبب قوي على الإصرار الغريب دا ولكني لا اعرفه
.
.
ياخي احكي لينا قصة مركوب العريس دي |
...............................................
سلام تانى ياود البوش
فى القرى والارياف زمان فيه شباب مسلطين يمشوا يلبدو تحت الشباك حق العريس ليلة دخلته
واحد ملقوف مشى يعمل الحركة دى . ولما مد راسه بالشباك . لقى العريس فى انتظاره بالمركوب !!
|
Post: #15
Title: Re: شهر عسل انقط عسل
Author: إدريس البدري
Date: 01-17-2016, 01:25 PM
Parent: #14
فضيحة بجلاجل
هاهاهاهاها
بصراحة يا ودالبوش ..في الزمن الغابر داك ... وكتين اختك يكون سايقنها الخرطوم للفندق ...بصراحة بتلبد ليك كم يوم كدة وبتعمل رايح
وعيييينك في الهمز واللمز
هسي حكاية الفنكة الذكرك ليها شنو؟
هاهاهاهاهاهاهاهاهاهاهاه
|
Post: #16
Title: Re: شهر عسل انقط عسل
Author: إدريس البدري
Date: 01-17-2016, 01:29 PM
Parent: #14
Quote:
فى القرى والارياف زمان فيه شباب مسلطين يمشوا يلبدو تحت الشباك حق العريس ليلة دخلته
واحد ملقوف مشى يعمل الحركة دى . ولما مد راسه بالشباك . لقى العريس فى انتظاره بالمركوب !! |
ياخ المركوب هين
عندنا عمك مسخوووت زي ناس ود البوش ده
الجماعة طبعا بلبدوا بالشباك ..قال للمرة انتي كوركي .. وطلع جاهم بي وراء بي صوت العنج
وقع فيهم بتب لمان عرفوا حاجة
اظن دي كانت بداية نهاية التلبد عندنا
هاهاهاهاهاها
|
Post: #21
Title: Re: شهر عسل انقط عسل
Author: عبدالله ود البوش
Date: 01-18-2016, 10:28 AM
Parent: #16
Quote: الجماعة طبعا بلبدوا بالشباك ..قال للمرة انتي كوركي .. وطلع جاهم بي وراء بي صوت العنج
وقع فيهم بتب لمان عرفوا حاجة
|
كنت ناوي اكتب عن القيلة ولكني خشيت ما خشيت من عوك عوك
السختا يا ادريس اتلحقك سختة عجبت بت مساعد يوم دخلتا على بخيت العولاق
.
.
وبرضو مشتاقين يا إدريس البدري يا حبيب
|
Post: #19
Title: Re: شهر عسل انقط عسل
Author: عبدالله ود البوش
Date: 01-17-2016, 02:50 PM
Parent: #13
| Quote: الله يديكم العافية |
والعافية تبقى ليك غتا وفراش وتباريك بركة من جعل محمد نبي
.
.
| Quote: موضوع الفندق اتسبب في عرس اخ العروس من اخت العريس |
وصارت حكاية كانها اساطير الاولين
.
.
زمن يا الحبيب زمن
تحياتي هيثم غالي
|
Post: #18
Title: Re: شهر عسل انقط عسل
Author: عبدالله ود البوش
Date: 01-17-2016, 02:45 PM
Parent: #10
ب ح
وبعدها جات أ ب ح
هي لوحات للواري زمن عزها ولا اعتقد انها تشير للبحر الأحمر
.
.
التخشيبة يا دكتور المشرف دلالة على ان اللوري جديد لنج
اللوري من بلادو بجي بدون صندوق علي الشاسي فقط
وفي بورسودان بدقو ليهو خشبة على الشاسي اقوليك جاي تخشيبة بورسودان
حتى بعداك تدخلو ورشة اعملو ليهو الصندوق والسيخ وباب السواق وباب الشبك بعملوهو محلي
هذا الشرح المطول كيتا علي ود المدير
ود المشرف استاهل
والتحية مرفق طيها وكذلك الاحترام الشديد
|
Post: #17
Title: Re: شهر عسل انقط عسل
Author: محمد مجيدو
Date: 01-17-2016, 01:47 PM
Parent: #1
Quote:
علما بانني حين تزوجت نزلت بفندق انتركونتننتال بواد مدني |
ود البوش ...
تصدق انا في عرسي برضو نزلت في نفس الفندق ...
وقعدت اسبوع واتخارجت ....
كانت ايام بطاااله ....
|
Post: #20
Title: Re: شهر عسل انقط عسل
Author: Abdullah Idrees
Date: 01-17-2016, 06:07 PM
Parent: #17
ود البوش الجميل .. انتركونتننتال وين ياخ انت تلقاك من ناس القطية .. زماااااااااااااااان
دايما بتذكرني حلتنا زماااان قبل التلفزيونات والبلاوي دي ما تصل ..
|
Post: #22
Title: Re: شهر عسل انقط عسل
Author: على احمد النعيم
Date: 01-18-2016, 12:38 PM
Parent: #20
الليلة بوديهو ليك الخور طالما جبتو خبر القيلة
قالو واحدة عميكة يا ود البوش زمان زمن العروس عندها وزيرات من الحروم الكبار بقعدن
يننتظرن لامن الرجل ينقطع وبعد داك يدخلن العروس لى راجلا. اها الفجة كانت ضلمة واحدة من
الوزيرات قالت احسن نتسنى القمرا لامن تطلع وبعد داك نوديها، اتفقن على كدا وقعدن منتظرات طلوع القمرا
اها آزول الحروم فترانات وضربن الهمبريب وجاتن غمده . لامن القمرة جات فوق والعروس صاحية واتاريها نيتا فى المشى
قامت صحتن وقالتلهن (آحروم هوى القمرا دى طلعت لكن انا مانى ماشا)
والله الحق اتعامك علا اوديهو الخور قبال شمشو تغيب
|
Post: #23
Title: Re: شهر عسل انقط عسل
Author: د.محمد حسن
Date: 01-18-2016, 12:47 PM
Parent: #1
Quote: اطلقن علي نسواني الاتنين اسمعوا طلاقي دا
زي ما فضحتنا يا ود التاج علا نفضحكم في بطن بيتكم والليلة قبل باكر اعرس اختك لسليمان ولدي
واسافر بيها للفندق ذاتو بذاتو فاذا بفندق النخيل بالسوق العربي يستقبل اول أربعة عرسان |
ات يا ود البوش عايز تدقسنا؟
الرواية دي ناقصة
ابو العروس مشى ياتة فندق؟
|
Post: #24
Title: Re: شهر عسل انقط عسل
Author: عبدالله ود البوش
Date: 01-18-2016, 12:53 PM
Parent: #23
عووووووووووووووووووك مجيدو وعبدالله ادريس سلام عليكم من بعيد لبعدين
البوست دا دخلوا ود النعيم ودكتور محمد حسن انا قنعت منو
سبتلووووووووووووو
|
Post: #25
Title: Re: شهر عسل انقط عسل
Author: د.محمد حسن
Date: 01-18-2016, 12:58 PM
Parent: #24
| Quote: البوست دا دخلوا ود النعيم ودكتور محمد حسن انا قنعت منو |
ليه
انت خايفني احكي قصة قريبك اب شنبات العرس البت العمرها 14 سنة
ومشى بيها الفندق
والصباح جا مارق بالغراقي ؟
هههههه
|
Post: #26
Title: Re: شهر عسل انقط عسل
Author: اسامه العريفي
Date: 01-18-2016, 01:02 PM
Parent: #25
ربنا يعوضك في البوست
|
Post: #27
Title: Re: شهر عسل انقط عسل
Author: عبدالله ود البوش
Date: 01-18-2016, 01:09 PM
Parent: #25
Quote: انت خايفني احكي قصة قريبك اب شنبات العرس البت العمرها 14 سنة
ومشى بيها الفندق
والصباح جا مارق بالغراقي ؟
|
تنفست الصعداء مما شفتك قلبي في يدي خفت تحكي قصة عكاشة ههههههههههههههههههه
ان شا ء الله انطحك تور بركة من جعل محمد نبي
.
.
اتا مرات بتساعدنا بالالفاظ لكن شوف زولك الفوق داك قال شنو ؟
.
.
قال يوم طلعت القمرا قال هههههههههههههه اخخخخخخخخخخخ يا مصارين كرعي
.
.
ود الأسد حبابك يابا ..... الجنيات ديل ممسايخ ما تتشوط بيهم شكيتم على الله شكية لا تتعطل لا تتبطل
فضحوني معاك
|
Post: #28
Title: Re: شهر عسل انقط عسل
Author: muntasir
Date: 01-18-2016, 01:46 PM
Parent: #27
ودالبوش الجماعة سألوا العريس قالوا ليه حاجز كم يوم في الفندق قال ليهم اسبوع عِلا كان قضيت بعد بكرة دي عندكم
|
Post: #29
Title: Re: شهر عسل انقط عسل
Author: أحمد الشايقي
Date: 01-18-2016, 01:49 PM
Parent: #28
ود البوش على العنافي
حيا الله النضم الطاعـــم
|
|