|
Re: فانتازيا: المعارضة عندها نفسيات..!!! (Re: Kabar)
|
تلفت السيد الميرغني نحو اعضاء مكتبه السياسي ، واشار لأحدهم أن يناوله عصاته ، فاخذها وجمع قفطانه ، وتوكأ وخرج الى الطريق.. قابل السيد محمد عثمان الميرغني ، مسطولا من غمار الناس ، وقال الميرغني لنفسه لأحدثه عن خبر سقوط نظام البشير.. السيد الميرغني: السلام عليكم.. المسطول: وعليكم السلام يا فردة..! السيد الميرغني: لقد سقط نظام عمر البشير؟.. المسطول: وهو كان ممتحن في شنو عشان يسقط؟.. السيد الميرغني: قصدي انهيار النظام ..! المسطول: وليه ناسو بنوهو عالي ومن غير حاجات تثبتو..مش كانوا يظبطوا المداميك كويس عشان ما يتعرضوا لكوارث زي دي..! وقتها لحق اثنين من اعضاء المكتب السياسي بالسيد الميرغني ، وظنا أن المسطول يريد به شرا ، وهما بمناداة الحرس الخاص..ولكن السيد الميرغني ابتسم واشار لهما بالا ينشغلا بهذا الأمر..وواصل حديثه مع المسطول.. السيد الميرغني: اقصد أن البلد لن يكون رئيسها عمر البشير ، فهو قد فقد السلطة..! انتبهت حواس المسطول بغتة..وقال: يعني الثورة نجحت.. الإنتفاضة جابت حقها؟.. السيد الميرغني: لم تكن هناك انتفاضة ولا ثورة ، لقد سقط النظام من تلقاء نفسه..! المسطول: يا معلم مافي انظمة ديكتاتورية بتسقط براها ، لازم تكون في حركة كده ولا كده..! السيد الميرغني: لم تكن هناك أي حركة وسقط النظام لوحده..! المسطول: طيب ح تعملوا شنو؟.. السيد الميرغني: قل ماذا سنعمل؟..لأن الأمر لا يخصني وحدي..!
شرد المسطول ببصره قليلا وقال:اوعى تكلموا حسن الترابي.. طمنوا ناس البعثات الدبلوماسية بانهم ما ح تجيهم عوجة ، طمنوا ناس دول الجوار بانو ما ح تجيهم عوجة..ناشدوا ناس الحركات المسلحة انو ما يستغلوا الفراغ الدستوري ويعملوا لينا لخمة..برانا نفسياتنا في التراب..حلوا جهاز الأمن ..و كتروا من حكاية سنضرب بيد من حديد..دي مهمة شديد يا اخينا..ادينو عمك بتاع القنبلة الهيدروجينية ،وقول ليهو اخير تنقرع من البتسوي فيهو ده..والإ سوف نضرب بيد من حديد ، ونضرب بمنجنيق الدليب..على بالطلاق نفك فيك عشرة دليبات تفقش رويسك المفلطح ده..الدليب سلاح قوى ..وقبل كده ود عمتي وقعت فوقو دليبة فقشت راسو..الموضوع مجرب ..كتروا من حكاية سنضرب بيد من حديد..اعملوا سفارة ايرانية لكن ما تكلموا ناس السعودية..اخطونا من الشريعة..لأن زولكم الفات كرهنا البلي ذاتو..!..ما تجيب شركات بترول الأمريكان ، ديل صعبين يا اخينا..اتفاهموا مع الصينين ، صحيح هم شيوعيين لكن فيهم رقشة امانة..رجعوا لينا الجنوب..لأنو الجماعة هناك ساطوهو شديد..مهما يكن هم برضك لحمنا يا اخينا..عمرو الضفر ما بيمرق من اللحم..خلوا ناس الرقشات يسترزقوا في الخرطوم..بس يضربوها بوهية بالوان سياحية..الرقشة سريعة وبتقضي الغرض..والله صحي..!
سيروا ونحن من خلفكم..!
ضحك السيد الميرغني ، وهو نادر الضحك بصورة جلية ، وقال للمسطول: انت احسن زول..!
ابتسم المسطول وقال: يعني ح تسووني وزير..؟..ادوني ديوان الزكاة..ده براهو كفاية..!
عاد السيد الميرغني الى مسكنه ، واخذ يجهز حقائبه..فسأله احد اعضاء المكتب السياسي: علي وين يا مولانا؟.. صمت الميرغني برهة ثم قال: ماشي لاحق العمرة..!!
كبر
|
|
|
|
|
|
|
العنوان |
الكاتب |
Date |
فانتازيا: المعارضة عندها نفسيات..!!! | Kabar | 01-09-16, 06:19 AM |
Re: فانتازيا: المعارضة عندها نفسيات..!!! | Kabar | 01-09-16, 06:21 AM |
Re: فانتازيا: المعارضة عندها نفسيات..!!! | Kabar | 01-09-16, 06:23 AM |
Re: فانتازيا: المعارضة عندها نفسيات..!!! | Kabar | 01-09-16, 06:25 AM |
Re: فانتازيا: المعارضة عندها نفسيات..!!! | Kabar | 01-09-16, 06:26 AM |
Re: فانتازيا: المعارضة عندها نفسيات..!!! | Kabar | 01-09-16, 06:28 AM |
Re: فانتازيا: المعارضة عندها نفسيات..!!! | Kabar | 01-09-16, 06:30 AM |
Re: فانتازيا: المعارضة عندها نفسيات..!!! | Kabar | 01-09-16, 06:36 AM |
Re: فانتازيا: المعارضة عندها نفسيات..!!! | Kabar | 01-09-16, 06:48 AM |
Re: فانتازيا: المعارضة عندها نفسيات..!!! | Kabar | 01-09-16, 06:50 AM |
Re: فانتازيا: المعارضة عندها نفسيات..!!! | بريمة محمد | 01-10-16, 08:01 AM |
Re: فانتازيا: المعارضة عندها نفسيات..!!! | Kabar | 01-20-16, 06:59 AM |
Re: فانتازيا: المعارضة عندها نفسيات..!!! | Kabar | 01-20-16, 07:12 AM |
Re: فانتازيا: المعارضة عندها نفسيات..!!! | Kabar | 01-20-16, 07:12 AM |
Re: فانتازيا: المعارضة عندها نفسيات..!!! | Kabar | 01-20-16, 07:26 AM |
Re: فانتازيا: المعارضة عندها نفسيات..!!! | علي عبدالوهاب عثمان | 01-20-16, 07:38 AM |
Re: فانتازيا: المعارضة عندها نفسيات..!!! | محمد مجيدو | 01-20-16, 07:59 AM |
Re: فانتازيا: المعارضة عندها نفسيات..!!! | Kabar | 01-20-16, 08:11 AM |
Re: فانتازيا: المعارضة عندها نفسيات..!!! | Kabar | 01-20-16, 08:18 AM |
Re: فانتازيا: المعارضة عندها نفسيات..!!! | Kabar | 01-21-16, 08:57 AM |
|
|
|