دينا خالد في جولة سياحية بدبي مع تلاتة خواجيات وخواجة

10:53 AM Dec, 19 2015

سودانيز اون لاين
أبوبكر عباس-الإمارات
مكتبتى
رابط مختصر

أحسب* أنني كنت مصاباً بالتوحد في طفولتي.
أكبر عدو لي هو التلفون المتحرك، هذا الجهاز الكارثة أكرهه أكثر من كراهيتي للهلال ويصيبني بالهلع!
سبب كراهيتي له هو أنه ينقلنني من مود لمود بعد أي مكالمة، والمصابين بالتوحد لا يحبون التغيير المفاجئ في المود.

ــــــــــــــــــــــــــ
* أحسب = كلمة كيزانية قفزت لرأسي بسبب حضور المناضلة تراجي للخرطوم

ابوبكر
كب الحنك ياخي

Quote: * أحسب = كلمة كيزانية قفزت لرأسي بسبب حضور المناضلة تراجي للخرطوم

لمن كنا شباب كنا بنسمع الكيزان لمن يكونوا دايرين يشكروا ليهم زول بقولوا بعد ما يعددوا المآثر(نحسبه كذلك ولا نذكى على الله احدا)..الجماعه ديل قصتهم مع الحسبان دى شنو؟!!

واحسبه بوست عكازي
تحياتي بكور وضيوفه
خشيت علي سبيل المحبة والشمار خامسا
اها

Irrelevant

كونك تكون شغال في مجال الهجن، القصة دي ممكن تتيح ليك فرصة تتعامل مع شخصيات مهمة جدا بالدولة، وعادي ممكن تكون قاعد متفن معاهو في قوز رمل، وتشرب في القهوة، وتتونس بأريحية كأنك بتتونس مع منتصر.
يوم إتنين ديسمبر نوع العلاقات المجنونة دي، خلت معاي سيارة (عربية) لكزس 570 LX ألفين ستاشر سلفر(غوغلوها، ما فيها حاجة) معاي، ود أخوي شال ربط الموبايل بسماعات الفارهة، تفكيرك ما يمشي بعيد يا منتصر، ما ممكن يكون ربطو بسلك طبعاً!! شبكو، المهم صوت جرس التلفون بجيك بصورة محببة من كل جنبات السيارة.
والله، يا أخوانا، وما طالبني حليفة، وأنا في الجو الفخيم دا الممزوج بريحة عود السيارة (عود دي ما يكون ناس الخرطوم قايلنها الشاسي)، وأنا خارج من فلل نخلة جميرا؛ يرن التلفون، رقم غريب، كغير عادتي وبفرحتي بالتكنولوجيا وتأثير أريج العود رديت:
يطلع صوت يمتزج مع ريحة السيارة، صوت يتفوق في جمالو صوت المرحومة ليلى المغربي وهي بتلقي في قصيدة البحر القديم لمصطفى سند.
الصوت قال لي من غير تحية أو سلام:
قلبك شحّ موش؟!
أشعر بنفسي قاعد قصاد ليلى المغربي وهي لابسة توب كاكاوي بخطوط فضيّة عريضة والتوب ساقط من الراس بعناية وغنج، رديت:
لو زندها احتمل الندى لكسوت زندك ما يشاء
ثوب من العشب الطري وإبرتين من العبير وخيط ماء

Irrelevant

Quote: قاعد متفن

تعب ابن أبي السرح راح شمار في مرقة..
أها .

Quote: ابوبكر كب الحنك ياخي

حنك ساي؟!
متأكد يا بركة بعد الحنك والونسة دي، ناس المنتدى احترامن لي بزيد وما بعيد الأديب عثمان صالح يحذف من أسمي لقب: المدعو
والعجب لو ست الحسن وافقت أنزل الصور
ما بعيد ناس الإنقاذ يرسلوا لي المفتاح ويحجزوا لي كرسي ذهبي جنب الكنداكة تراجي

Quote: ويحجزوا لي كرسي ذهبي جنب الكنداكة تراجي

إتّوا يا اخوانا، الوشاح الذهبي بتاع تراجي العامل ماتشنق مع كرسي الملوك الذهبي القاعدا فوقو، جاء كدا بالصدفة؟ ولّ ناس المراسم مرتبين للتناسق دا مسبقا؟
يكون منصور اتصل بيهم من الطيارة

Quote: Irrelevant

اطمئن يا مرتضى.
لا شئ ريليفانت (أو غير ريليفانت) في بوستات صاحبي دا
إنها الفنتازيا في أكثر صورها عبثية

كما قال سيد ودالباوقة البشير الله ليك من جوافة المناصير بعد نزلت صورتك لكزس 4XL ما يسوي ترتيب

أوكي، إتّي وين؟
- قالت لي: كدي النقرا ليك اسم الشارع، اسمو الثاني من ديسمبر، لكن أنا معاي تلاتة بنات أسبانيات وولد أسباني، وعندنا مشوار بعد عشرة دقائق
- رديت: دا، يا هو شارع الضيافة سابقا، تقدري تميزي إتجاه الغرب؟
قالت: الشفق واضح
خلاص أقصدي المغيب، ولمان تصلي السارية العالية في نهاية الشارع، لفي يسار، وبعد خمسين متر في كافي فخم وكراسيهو برّة أقعدو فوقو، وبعد أقل من العشرة دقائق بكون معاكم
قفلت السماعة بسرعة وما زال عبق صوتها يعطر المكان

وأنا ماري بشارع الخدمات لمحت الأربعة بنات وولد القاعدين برّة المقهى، وأنا ببركن في السيارة خطرت في بالي طُرفة قديمة عن سهولة تمييز الخواجة من الأفريقي.

الزمن سنة ستة وتمانين كاس العالم، زي أكتر من متين طالب من مجمع شمبات قاعدين في نادي الداخليات وخاتين ليهم تلفزيون فوق مسرح مهجور، وبشاهدوا في مباراة بين هولندا والكاميرون، وفي نفس الوقت بحاحوا في البعوض، من خلف الجموع جاء كوز من عرب الجزيرة راجع الداخليات من مكتبة الكلية، وسأل الجموع: المباراة دي منو ومنو؟
قال ليهو هولندا والكاميرون
- قال ليهم: الكاميرون اللابسين البرتقالي ديل؟
واحد من أولاد الخرطوم القاعدين قدام وقف علي حيلو وقفل التلفزيون ومشى
لمان فتحناهو لقينا ميلا جاب قون!!

ووب علي لو جاء ود البشرى قال لي: الكاميرون ما لعبت مع هولندا في الكاس داك!!

يا مستنير في حضرة دندون مافي محاققة و زرزرة انت عارف كدا
لكن كمان ما تجيبها كبيرة قدر دا, لا هولندا لا الكاميرون ما شاركن في كاس 86 ههههههه

ملحوظة:
دينا خالد الفي النص دا شخصية من بنات خيال الراوي، وأي تشابه لها مع الواقع هو محض صدفة

Quote: ملحوظة: دينا خالد الفي النص دا شخصية من بنات خيال الراوي، وأي تشابه لها مع الواقع هو محض صدفة

احييييييييييييييييييييييييييييييييينا !

السلام و التحايا للمستنير و ضيوفه الاكارم:

غايتوا الله أعلم بعد مداخلة ود البشرى دي تاني تخرم من لب الموضوع لسرد جانبي و كدا،
هسي لو كان دورت في الموضوع الاساسي دون فنتازيات ريلفانت و ارريلفيانت ما كان اخير
ليك يا ابن العم.. المهم نغريك التحايا الاسفيرية بعد ان تقطعت بنا كل السبل للوصول اليك، و
طبعا في خضم هذا الالق و بريق الدهشة عاذرنك تب و بصيرورتها كمان..

ارقد عافية..

Quote: دينا خالد الفي النص دا شخصية من بنات خيال الراوي، وأي تشابه لها مع الواقع هو محض صدفة

يا للخسارة...
هسّي انا من قبيل فاتح القوقل ايرث عشان ازبط المسار من العين لموقع الكافيه الفخم قلت بكرة اغشاه عسى اصادف نفس الطربيزة قلت بتكون فيها باقي بركة !!
لكن وقت ناجرها انا حارس ليك باقي البوست الله يقدّرها عليك اغلط ولا لخبط تاني بين هولندا وكولمبيا :)

هي طبعا شيطانة بتكون قرت أفكاري وقالت المسكين دا قائل روحو بميّزني باللون
وقفت قدامن وبعد قلت هاي، كلهم ألتزمو الصمت، حاولت في اللحظة أعرف زولتي من غير سؤال!!
الأربعة بشبهن Penelope Cruz حالكات سواد الشعر، بالرغم من حيرتي تذكرت بكاء آخر ملوك بني الأحمر بعد ان عبر بالمغرب، امو قالت ليهو:
إبك كالنساء ملكا لم تحافظ عليه كالرجال
وعرفت سبب بكاء الملك المعزول وطاف بخاطري وَلَه إبن زيدون
أعدت الكرّة في وجوه الفاتنات من دون الولد، فوجدت بريقا في عيون إحداهن عرفت أن جذوته من الصحراء؛ فابتسمت بمحبة ولم نتعانق كما فعل المسلمي مع المفتاح.

و انا كنت متأكد انو حيقول و فجأة توروني من احلى نومة ...

الموضوع ما حصل حلِم زاتو ؟ ...

يا بكور ... ذكرتني الحلواني الخلى الجماعة يبيتوا جوة الدكان ...

عليك الله اصحى ... :)

بعد الترحيب والسلام غير الدائري قالت لي: ما كنت متخيلاك كدا
قلت ليها أشنى مما كنتي تتوقعين
ضحكت وقالت: لا، كنت قايلاك كبير!
- من ناحية عجوز، فعجوز، لكن إتّي ما سمعتي أغنية دبي المحببة لمواطنين:
دبي دار الحي تروح شايب ترجع صبي؟!

ول ابا..حبابك يا صديقي

غايتو وكتين جابت ليها ديسكليمر استيتمنت في النص..فمن حق ود البشرى يزرزرك..وانا ما زول كورة عشان اقوقل سنة ست وتمانين..لكن بقول ليك الكلام في الموبايل اثناء السواقة بيشكل مخالفة قانونية..وكتين بتسوقوا العربات السمحة ما بتعرفوا تبركنوا..الإ كن تجيب ليك شيلخات هيئة دبلوماسية..او كما قال..!ا

ما حكاية (الكاكاو ولا لون زينب ولا شنو كده ما عارف) مرتفقة مع (لو احتمل زندها الندى)..تخلي ,ول ابا معاوية الزبير يدندن الليل كلو

:تزيد استنارتك كل يوم ،
وانا في همومي بزيد هموم..!

(مع الإعتذار للغنية)..!!

ربك رب الخير حقن الجمال عن الشعوب هنا ، ياخي الواحد من كحل (اسمها) فوق قلنا خلاص..صبارة وشوية اندياح لمن الشعوب دي تفرح ذاتو..!

فشنو نحتسب..ساكت..

والكركاسات *ما معانا..

كبر
__________________

*الكركاسات ، مفردها كركاسة هي قطع من جلد عجل اللوري الداخلي ، يتميز بمرونة ونعومة ، وكان التلآميذ المشاغبين لمن الواحد يكون حاري ليهو جلدة بيضع الكركاسة ، وكان وقتها بعض المدرسين الحاقدين بيكون ناقشين ، فاول سوط يسمع ليك صوت الكركاسة فيحول الخطة ويجلدك في الضهر لأنو وقتها لم تتفتق عبقرية احدهم لإختراع كركاسة لحماية الضهر..والله اعلم..

Quote: أعدت الكرّة في وجوه الفاتنات من دون الولد، فوجدت بريقا في عيون إحداهن عرفت أن جذوته من الصحراء؛ فابتسمت بمحبة ولم نتعانق كما فعل المسلمي مع المفتاح

اوسكار يا مستنير

(أعدت الكرّة في وجوه الفاتنات من دون الولد، فوجدت بريقا في عيون إحداهن عرفت أن جذوته من الصحراء؛ فابتسمت بمحبة ولم نتعانق كما فعل المسلمي مع المفتاح)

يا سلام عليك أخي أبوبكر عباس !

جملة شالت البوست على الأكتاف !!
وصف من عيون التكمن زاتو !

تحياتي لك وتحية الى دينا ورفقائها .

( ما كنت تمعط لينا صورة عشان نشوف دينا للدنيا والزمان ) بالرغم من اننا شفناها من خلال كتاباتها , تيمنا ب( تحدث كي أراك)!

لكن تقول شنو على حب الاستطلاع والتحشر !!

ست البنات.

Quote: .وكتين بتسوقوا العربات السمحة ما بتعرفوا تبركنوا

يا كبر... العربات السمحات ديل فيهن البلوتوث :)

جبت ليهم بمزاجي أربعة فرابتشينو وشاي سادة دم دكاترة لدندن، ولنفسي قهوة عربية وخليت القهوة العربية محور الونسة، في دقائق أقنعتهم يخلوا مشوارم ويدوني سهرة الليلة عشان أوريهم سحر الصحراء بالليل في الليالي غير المقمرة.
فتحت صندوق السيارة وكما توقعت؛ كل إحتياجات التخييم موجودة ومرصوصة بعناية ونوعية فخمة. غشيت جمعية الإتحاد وطلبت من الجزار السوري صديقي أبعيوم خضر تلاتة كيلو استرالي طيارة مبهرات زي كل مرّة، لكن بدون شطّة، الليلة الشطّة برّة.
إخترت أعلى مكان في رمال الخوانيج الصافية، بعيد من مسار الهبوط لمطار دبي تجنبا للصوت وفي نفس الوقت الإستمتاع بمنظر الهبوط المتوالي للطائرات من بعيد، وقفت السيارة في أعلى القوز، كذئب ينظر لنجوم الثريا بشموخ، نزلنا السامان كلو:
- عدة القهوة
- المويه والعصائر
- حطب السمر والسمر هو الاسم الثاني لحطب السنط (Acacia tortilis)
- عدة المشاوي
رسلت الخواجيات يجيبن حجار نعملن منقد من تحت القوز
دينا طلعت ليها سي دي لمحمد كرم الله وشغلتو في السيارة وفتحت الأبواب، الغريبة ما قالت لي بشغلوهو كيف!
قبل محمد كرم الله ما يخلص أغنية:
هوي أقيفن نورا فيكن،
كنا متفنين في نص الرمل حول لهب السمر الصافي لونو وخالي من الدخان
حطب السمر دا عجيب! غير قلة دخانو، لون لهبو بين الأصفر والأبيض، ممكن نقول عليهو بلغة الحناكيش: off white
إنعكاسو في الظلام يجعل وجوه الناس العاديين جميلة جدا، فما بالك بسليلات الخليفة المستكفي!!
يعني في القعدة دي سرقت النظر الجانبي زي ستين مرّة وكل ما اللهب يخفت؛ أزيد من السمر حبّة وأمشي أرفع صوت الطمبور

تحياتي أخي أبوبكر

ممتع هذا السرد ، ولا يهم إن كانت الشخصيات محض خيال أم تمازج الصدفة

***

ملحوظة:
دينا خالد الفي النص دا شخصية من بنات خيال الراوي، وأي تشابه لها مع الواقع هو محض صدفة

دمتم
واصل

كونك حريف ومستنير هذه ما فيها غلاط
بس ماتزعل علينا الشايقيه
لانو محمد كرم الله مابيغنى نوره
انت قاصد محمد جباره
لكن الكويس هذه لاتهبط باسهمك الاستناريه

Quote: ما كنت تمعط لينا صورة عشان نشوف دينا للدنيا والزمان

هههههها غايتوا انا دينا لا دايره اشوفها لا دايره اسمعها اكثر شي يبهجني كتابتها. بس ما فاهمه هي كيف غايبه عن الحوارالوطني دا__؟؟؟؟؟__!!!

دي رواية شنو الزي حصة الإملاء كلها اعد بوست جاب ليك دومة المستنيرة الأولى في المنبر ده تحمد سيدك زمان لما الزمن زين خالتك دومة دي نزلت صورة الأثيوبية الفيهو ظار كلو نزل لكن انت مدستر هندي

Quote: دي رواية شنو الزي حصة الإملاء كلها اعد بوست جاب ليك دومة المستنيرة الأولى في المنبر ده تحمد سيدك زمان لما الزمن زين خالتك دومة دي نزلت صورة الأثيوبية الفيهو ظار كلو نزل لكن انت مدستر هندي

ها سلام يا منتصر ماشاء الله ذاكرتك بخير الزمن داك الجنا المستنير دا ما كان حضور .لكين بيني وبينك دينا خالد من الشحصيات الني يستحق الزول يسرقها .

ريلفانت لكن مكرر

أيام سارة عيسى متألقة ومسخنة سخانة شديدة داك وكل يوم عندها مقال ...
معانا واحد كان معجب بيها ايما اعجاب ...
ويوميا بيجي يقول لينا عليكم الله شفتوا البت دي الليلة كاتبة كلام عجيب كيف !!!

في الاخر اتحول من الفتنة بكتابتها للفتنة بيها في عضمها وقال لو عرف مكانها بيطرح ليها فكرة العرس ...

بعد فترة عرفنا انه سارة عيسى طلعت راجل ...

واسقط في يد اخونا المتيم ...

_______

ملحوظة ... أي تشابه في الأشخاص في مداخلتي وما جاء في رواية المستنير السياحية هو محض صدفة

الأسباني طلع أستاذ الدراسات الشرقية بإحدى الجامعات الأسبانية، أمتعنا بالونسة عن التاريخ الخفي عن التأثير الشرقي الساحر للحضارة الإسلامية على أسبانيا الحالية.
حدثنا عن مقدمة إبن خلدون، وعبد الرحمن الداخل ودولة المرابطين وختم حسب طلبي بإبن زيدون وولاّدة بنت المستكفي وكيف أصبحت أسطورة، في الختام قال لينا: أقول ليكم سر:
لو لا الأندلس لما ولدت امريكا
مع تباشير الصباح نفضنا بناطلينا من الرمل ورفعنا العدة ونحن ماشين على السيارة الأسبانيات التلاتة شكرني بهق كبير ودندن حاكت الأسباني وإكتفت بالمصافحة
قلت ليها ويديني مدلدلات والأصابح مفتوحة وبحسرة مداعبة إحتجاجا على عدم الهق:
نسوي شنو؟ السواها فينا إبن أبي السرح ما ظنيتها تاني تمرق بالساهل

سمعتها أيضا تردد في بيت شعري المحبوب:
وأفترقنا وبعيني المنى غالهاْ الدمعُ فما أبصرتُ شيّا

إنتهي النص الأدبي وسوف أعود للمتداخلين

Quote: إنتهي النص الأدبي وسوف أعود للمتداخلين

مافي داع بعد دا
الناس دي جابتها سيرة دندون و فكرة شفنا الشافها :)
وقت طلعت جاكة ساي ما تعمل لي روحك قومة وقعدة وردود ومتداخلين وبتاع

وافترقنا وبعيني المنى
قالها الدمع فما أبصرت شيئاً

Quote: سمعتها أيضا تردد في بيت شعري المحبوب: وأفترقنا وبعيني المنى غالهاْ الدمعُ فما أبصرتُ شيّا

بالقاف يا مستنير

Quote: مع تباشير الصباح نفضنا بناطلينا من الرمل

حسي كان في الخرتوم كان لحقوكم لبنى

لكن ما كسير تلج عينة يا ابوبكر..ووين كلام الشعر الوعدتنا بيه ...في بوست اخر...عشاننقع في الدبابيب(وجه ضاحك)...فتانة مش كده؟؟ودمت بخير ومنتظرين الصور

أكيد يا بشرى، الناس جابتها دندن
ودندن وحات سيدي الحسن، ما بتوصّف
لكن بقدر شويّة أديكم منها لمحة يا ست البنات:
تدي للحزنان بسيمة بصوت محمد جبارة
محمد جبارة
أو بتشبه بت بشرى الفاضل في أغنية مصطفى سيد أحمد
لما تطلعي في الشوارع شوفي كيف الناس تصارع
واحدين يدفرو ا
وواحدين يصفروا
موش زمان كان في قصة تلتاشر عامل شغالين ليهم في فرن بريدوا ليهم طفلة بتجي تشيل ليها رغيف كل يوم الصباح
حياتم كلهم تمحورت حول لحظة زيارة البت دي!
المهم أوجز ليكم:
زول لمان يطل ليهو في مكان ما...

يا عريفي، غالها وليس قالها ولو كانت قالها ناس ود البشرى ما كان ادوك فرصة في الشرف دا!
غالها بمعنى حجبها

الليامات دي كترت بوستات سمحة كيف !!
الا انو ده اسمحها على الاطلاق ..


متعة والله يا مستنير .. متعة قربت تحصل متعة قراية عماد عبدالله ودكين !!

يا مشرف جامل في أي زول الا تلاته دكين وعماد وعثمان محمد صالح قال قربت قال ليك في السعودية في واحد حوطي طلعوا مع الأمير القنص صوب علي الحبارى جلاها قاموا الأخويا يعجبوك شبكوه ليك والله طال عمرك كنك صبتها في جناحها وواحد يقول لي في رجلها سأل الحوطي ها وانت قال ليه والله طال عمرك لنت بحولها ولنت بيمها الأمير قال ليهم منعول الجدف رجعوه الرياض في ضهر ونيت

يا بسمات، في شعر اكتر من كدا؟
اتي ما سمعتي بشعر ما بعد بعد بعد الحداثة؟!
هسع بحضر في الأخبار وبكتب ليك في الرد دا
قالوا الصومال لأول مرّة منذ ٢٥ سنة تنقل مباراة كرة قدم حيّة
هسع دا ما برضو شعر؟!
الكويس بعد الخبر دا جابو هدى عربي تغني في الحب اخلاص ووفاء

نحن يا دكتور محمد بابكر، الكيزان ديل حضرناهم ونحن طلاب بنهاية التمانينات وكانوا في نهاية التدريبات للانقضاض على الفريسة، وناس أحمد سليمان بن الخطاب يقولون للرسول الترابي:
لماذا نرضى بالدنيّة في ديننا ونحن الأعلون؟!
ونحن لا نحسبهم كذلك

Quote: لمن كنا شباب كنا بنسمع الكيزان لمن يكونوا دايرين يشكروا ليهم زول بقولوا بعد ما يعددوا المآثر(نحسبه كذلك ولا نزكى على الله احدا)..الجماعه ديل قصتهم مع الحسبان دى شنو؟!!

استهبال يا محمد بابكر
عدة استهبال بس والله. الله لا عادهم، بعد ما يزولوا.
معليش يا ابكر قطعنا عليك سيل التهنئات
غايتو دينا شنو كدا والشكر ليك هههه

وحات الله، يا معاوية، لو ألفين وستاشر ما مشيت خليتكم فيها، إلا أكتب ليكم بوست عن جمال محمد طه الملك لحدي ما قسم الفضيل دا يفهم ان عشقنا للجمال ما مربوط بالجندر في حد ذاتو!
بس أقعد واتوا تشوفوا
بس كيف اقعد؟!

كيف تقعد ولّ كيف تقدر تقول فيهو الكلام الما انكتب

نسيت في لمحة وصف دندن أقول:
كل زول من عند سلافك لا لا قال دايرلو كاس

الكتّاب أبو بكر عباس

كتر خيرك على السياحة العقلية، وما بقول الخيالية، المتكاملة دى بين الشخوص والناس عرب وعجم وسوادنة والتاريخ والطبيعة وسحر البادية والتكنولوجيا وألق المداورة والمحاورة فى شخصية وكنه "ست الإسم".
وقفت فى تعليق أختنا دوما وحكمتها المعهودة:

Quote: هههههها غايتوا انا دينا لا دايره اشوفها لا دايره اسمعها اكثر شي يبهجني كتابتها. بس ما فاهمه هي كيف غايبه عن الحوارالوطني دا__؟؟؟؟؟__!!!

وشفت كلام بتنا بسمات الشيخ

Quote: لكن ما كسير تلج عينة يا ابوبكر..ووين كلام الشعر الوعدتنا بيه ...في بوست اخر...عشان نقع في الدبابيب(وجه ضاحك)...فتانة مش كده؟؟ودمت بخير ومنتظرين الصور

فأتذكرت كلام كنت كتبته عن دينا فى بوست كاتبنا المبدع أحمد الأمين أحمد البرانى بى إنقاذ مداخلاتى فى بوست "الفيتورى يا ياقوت الشعر" فجات دينا وكتبت كلام سمح فى حق أحمد وفى حقى. فرديت عليها بمداخلة قدمتها بأبيات زى كل مداخلة أرد فيها على كل متداخل أوصف فيها شخصية وإسهامات المتداخل. فشخصية دينا جديرة بالتمعن فى إسهاماتها. فقلت ليها

جاءت قانُونيتنا دينا تُزجى الشكر جزيلا وتُقّرظ أحمدْ
وقالت فيما كتبت أنى حقا مُدهش وهى الدهشةُ تتجسدْ
غموضٌ يغشاهُ بريقٌ وسلاسةُ نصٍ أخاذٍ ومعانٍ تتمددْ
أسلوبٌ سهلٌ ممتنعٌ فيه رقىٌ وكل من فى المنبرِيشهدْ
وتزيدُ بلاغة تعبيرٍ بسـاخِر نقدٍ لذّاعٍ وإن طُلى بشهدْ

وأقول بصدق، دون نفاق، ما إنت إلا حقا سر الدهشة يتجسد. فقد ظللت أتابع كتاباتك ومداخلاتك وما دار وما ظل يدور من جدل حول شخصيتك حتى من قبل إلتحاقى بهذا المنبر. فرغما عن ما يشغل كثيرا من الآخرين عن كنه شخصيتك، لم أعره أبدا أى إهتمام؛ لأننى كنت فى ذات المركب مرات وكتبت بأسماء عدة لا يعرفها حتى أقرب الأقربين. ولكننى من خلال المتابعة خلصت إلى قناعات وصورة لشخصيتك الكتابية.

أولا الدقة فى تخير التعابير، وإنتقاء الكلمات بحذر، وصياغتها بتسلسل منطقى، مضافا إلى ذلك آراء قانونية تعتمد على الإستنتاج، مع وضوح رؤيا فى أمور الحياة يشير إلى شخصية مواكبة للأحداث، لا شك فى أن لها خلفية قانونية أو إحتكت كثيرا بمهنة القانون. وفوق هذا فلها أسلوب خفيف الظل برصانة، وإن حمل هموم قضايا كبيرة؛ و فيه من روح الدعابة والسخرية ما يدل على ذكاء وخفة ظل، مما لا ينتقص من قوة الطرح ولا أهمية المحتوى. فيا مرحبا بقلم أقل ما يقال عنه أنه "مدهش".

فأها يا بسمات بتى دا برضو يقولوا عليهو كسير تلج؟
وللا رأيك شنو يا دومه أختى؟

أما أبو بكر فأنا ناقش رأيو مسبقا، وللا شنو يا أبوبكر؟

هنا الرابط
http://sudaneseonline.com/board/490/msg/%D8%A5%D8%B9%D8%A7%D8%AF%D8%A9-%D8%AA%D9%86%D8%B2%D9%8A%D9%84-%D9%85%D8%AF%D8%A7%D8%AE%D9%84%D8%A7%D...B1-.-1449930910.html

ولك الشكر يا أبوبكر.

والله يا أستاذنا عبد الرحمن هذه شهادة عظيمة، وما قلت غير الحق، وربما نقصت قليلا
أقول هذا من عُشرة سنين مع دكتور أبوبكر
وعُشرة سكن في غرفة واحدة ضيقة لا تتيح أي مجال للمراوغة
عرفت فيه عالِماً بعِلمه في مجال البيطرة وحكيماً في شؤون الدنيا والدين
وقبل ذلك إنساناً يهتم بتفاصيل معاناة الإنسانية
فلك وله المحبة الدائمة

خليتنا نفك آخرنا معاهو والله

وقبل ذلك إنساناً يهتم بتفاصيل معاناة الإنسانية
فلك وله المحبة الدائمة

خليتنا نفك آخرنا معاهو والله

انت ذاتك وصاحبك ابوبكر
المايقدر يحبكم شديد فى عشره يوم
عندو مشكله
وماعندو الحبه
حقيقة هذا حكى القلب

Quote: أولا الدقة فى تخير التعابير، وإنتقاء الكلمات بحذر، وصياغتها بتسلسل منطقى، مضافا إلى ذلك آراء قانونية تعتمد على الإستنتاج، مع وضوح رؤيا فى أمور الحياة يشير إلى شخصية مواكبة للأحداث، لا شك فى أن لها خلفية قانونية أو إحتكت كثيرا بمهنة القانون. وفوق هذا فلها أسلوب خفيف الظل برصانة، وإن حمل هموم قضايا كبيرة؛ و فيه من روح الدعابة والسخرية ما يدل على ذكاء وخفة ظل، مما لا ينتقص من قوة الطرح ولا أهمية المحتوى. فيا مرحبا بقلم أقل ما يقال عنه أنه "مدهش".

تحليلك في محله يا بروف ولو سمعوا رائي ناس البشير كان مسكوها الرسن . القومه لبتنا ديناخالد.

Quote: وأفترقنا وبعيني المنى غالهاْ الدمعُ فما أبصرتُ شيّا بالقاف يا مستنير

اظنها صحيحه يا عريفى بالغين (غالها) بمعنى غطاها لكن طبعاً الشافعى قال من قال الله اعلم فقد افتى .. اها رايكم شنو فى الاستناره دى ( وين لابن ابى السرح) يا مستنير؟

لك الشكر يا مستنير
وكذلك الشكر والتقدير لدكتور محمد بابكر

اتوا يا أخوانا، مولانا الملك دا قاصد شنو بتعب ابن ابي السرح؟
هل لانو "متفّن" ما كانت مشددة ولّ الكلمة لا تليق باللكزس وابن ابي السرح ودندن؟

ابوبكر وعبد الرحمن
والله ما كسير تلج ولا حاجة....لكن بس حبيت ادخل شوية فرفشة
وبهجة في البوست الظريف والسمح...
وفي الحقيقة انا متابعة لمواضيع الاستاذة دينا خالد من زمان ..وهي بدون
شك من الارقام الصعبة التي لا يمكن تجاوزها في هذا المنبر...فهي تمتلك
الاسلوب الرائع والسهل والممتنع والاسلوب المنطقي الجزل....ولم نعرف عنها
وعن كتاباتها اي اسلوب مخالف للمنطق والذوق السليم
وهي مختفية منذ فترة ولم نقرا لها شئ ....والتحية لها من هنا
ودمتم بخير..وعافية

Quote: ا مشرف جامل في أي زول الا تلاته دكين وعماد وعثمان محمد صالح قال قربت قال

انا لا اكذب ولكني أُجامِل يا نتصر اخوى ..

Quote: انت ذاتك وصاحبك ابوبكر المايقدر يحبكم شديد فى عشره يوم عندو مشكله وماعندو الحبه حقيقة هذا حكى القلب

انت عارف عمر دهب دا منو يا ابوبكر
ابن عمة أولاد خطيب لزم

شكرا يا عمر ياخ على حسن الظن

في انتظار الصور ..شكرا ..

هههههههههه
قلبى قال شحححححح لما دخلت هنا بالصدفة فجر اليوم
قلت اببكر الهجان دا .. داير يعمل معاى ظريف وينزل صور ؟؟؟😅😅
ياخ انعل ابو شاييك السادة حتى لو كان من كروكس اقصد استاربكس ...
المهم ياحبيب استمتعنا برفقتك جدا والحق يقال
الخواجيات التلاته واحدة خدرة وواحدة بيضاء وواحده حممراء
على وزن رواية ماقبل النوم وقتها ... لوووووووب
بسلمن عليك فيهن واحدة كلللل يوم تصحى الصباح تسالنى
اتتى اببكر ما ضرب !!
وانا ارد بلسان حالك ...يضربك الضريب شقاق اللكزس 2016..
شكرا يا اببكر على كل شىء
شكرا على وقتك السمين ...ههههه وشكرا على اللكزس
وشكرا على دعمك لى وحريشك لى بان الج الحوار من سم الخياط !
شكرا بكوووووووور كمان شكرا لانك كنت قدر الامانة فقد رفضت
الجبال حملها ان الانسان دابما كما ود البشرى جهولا .، ما تعتمد عليهو
فى الكورة ولا فى الحاجات التانية داير تغيير ركب ونضارات ،،
ذو الطلة البهية معاوية
الحبيبة الذكية المسخت علينا بفوتتها البورد ،، دوما
اعترف بانو قلبى قال شححححح للمرة التانية فى البوست دا
لما شفت مداخلتك واسمك ،،
برلومتنا الجميلة بسمات ..، ورقم تحت الصفر منتصر
وكل الشباب الجميل فى هذا البوست مع حفظ الالقاب. والمقامات
التحية لقايدنا وحادينا بروفسير عبد الرحمن ،، الراجل الكنز ،
التحية والحب لكل من تداخل هنا
ومعليش يا ببكر قطعنا حبل غنمك وبقرك ،،، واصل وخليك حريييييص
انت الهجان والرءيس وااااااااصل كفاحك
ات ، ات بتتقدر !!!!

عاد الالق لهذا البورد بعودتك يا دندنه استحلفك بالله ورغم مشاغلك وسفرك الكتير طلي علينا يا شبه القمرا.

Quote: عاد الالق لهذا البورد

الألق ده تطير عيشتو ... :)

دينا وأبوبكر كتابة رائعة وحروف أنيقة.....دمتم

يا ود قباني تعرف لما خلقت الكلمه دي
كانت لاجل دينا خالد
وشبيها ما كحل عيني

Quote: يا ود قباني تعرف لما خلقت الكلمه دي كانت لاجل دينا خالد وشبيها ما كحل عيني

كلامك ده لي أنا ...؟

أنا ؟؟؟

أنا المكتول في حوش العمده !!!

يا دوما ... المشكلة ما في دينا ... المشكلة في ألق دي البستخدوموها الناس للغاشي و الماشي ...

اذا كان ديلاك ألق... امال دينا تبقى شنو ؟

عليك الله خليك من الفنتازيا المركبة تركيب دي ... :)

دينا دي انحنا شفناها قبال ما نسمع بيها ...!!!

دينا يا دوما وصفها شاعر من العصر العباسي زماااااان ...

قبل زي مليون سنة عمك أبوبكر الخالدي قال عن دينا خالد ما يلي :

يا شَبِيهَ البَدْرِ حُسْناً وَضِياءً وَمِثَالاَ
وشَبيهَ الغُصْنِ لِيناً وَقَواماً واعتِدالا
أنْتَ مِثْلُ الوَرْدِ لَوْناً وَنَسيماً ومَلاَلا
زَارَنا حتَّى إِذا ما سَرَّنا بالْقُرْبِ زَالا

و ركزي معاي على البيت الأخير ...

ايش العلاقة بين دينا خالد وسمراويت بتاعة حجي جابر ....
الاولي واقع يتابي ان يغشاك ... والتانية خيال ينام معاك ...
وفي كلا الحالتين يا لها من متعة شوف ... ريتها ما تحققت

يا منتصر بعد ( كتاب ) أستاذنا عبد الرحمن وكلام معاوية الزبير وجات عليهم دينا أحسن نشوف لينا بلد .

ياملك كلام استاذنا عبدالرحمن فوق راسنا تاج ولا بنقدر نقول بغم وكلام دينا خلا اخانا قبة الذي في المنافي يرجحن ما باقي ليه الا الحوار لكن معاوية الزبير قال ليك كان معاه في غرفة وكان الشيطان ثالثهما لكن في دي عتقناه لكن يا بوكو حرام بنتلاقى في الرملة الدقاقة ما تقول مستر بريمةهيمسلف صرح ان الأمريكان الجدد لن يدخلوا أمريكا إلا يأككولك ا

بعد اشادّة البروف، وعودة دومادينا؛ "من أول يناير ح أكون إنسان جديد"
لا بغالط لي زول
لا بشكك لي متدين (أيّ كان دينو أو دينا)
لا بتدخل في السياسة ولا الرياضة

وسوف أركز على الاستنارة من داخل الأدب
شوف النص الأدبي صنع شنو في زمن الهوجة التراجية على المنبر
صدق المثل:
يصنع في زمن الفسيخ شربات

إتي يا دينا، قايلاني حفظت الأمانة وما نزلت الصور من منطلق ديني؟
أبدا، حسادة مني وداير اكون متميز بالشوفة، وداير المساكين ديل أقصى ما يتمنونه يقولوا:
"شفنا الشافا"

ـــــــــــــــــــــــــــــ
هامش أول:
هسع يا ملك، في رأيك، منتصر بكون نقش قوسك الحول (كتاب) دا؟!
رسل ليهو بخرة خليهويراجع مداخلة البروف عليه السلام

التوقيع: الأديب المستنير

Quote: صبارة وشوية اندياح لمن الشعوب دي تفرح ذاتو

عليك الله، يا كبر، شفت الناس دي فرحانة كيف؟المكرفون معاك:عليك الله، واحدة زي ونسة ضحى، لكن بدون بوليس

ونهديها لهاشم أحمد هاشم الحسن بتكساس

Quote: Abdulla m hajar ياخى انت رائع .....متابع من بعيد أعجبني · رد · 20 ديسمبر، 2015 10:52 ص Salah Eldin Ahmed · يعمل لدى Korea Business Center قلت ليها ويديني مدلدلات والأصابح مفتوحة وبحسرة مداعبة إحتجاجا على عدم الهق: نسوي شنو؟ السواها فينا إبن أبي السرح ما ظنيتها تاني تمرق بالساهل ههههههه مبالغه يا مستنير

التحية لحجار وصلاح الدين من الفيسبوك

يا صلاح الدين: يا اخي الخواجات ديل أرقّ مننا؟؟
سلام نساءهم للرجال فيهو ود شديد،
موش زينا، بت خالتك تغيب عنها سنتين، وتجي تصافحها بود شديد، تتفاجأ برفع يدها لصدرها وتقول: لا أصافح الآن الرجال
تسحب ودك ويدك وأنت محرج وتقول ليها بسرك: طوالي كدا، ما في فترة تجريبية؟؟

عليكم الله شوفو قباني دا؟
تستمتع بضيوفي وتهدي ليهم وما تذكرني
عليك الله أهدي لي: ضيعني ساكن الموردة لولدنا عبد العزيز المبارك ويا حبذا لو لابس قميص "تحرمني منك"
لو ما لقيتها برضى بأغنية صديق متولي:
أنا لي حب وطوّل في قسمك الأول

شكرا رسول الاستنارة ابو بكر عباس على هذا الجمال وسط زخم تراجيديا المنبر الملفح بي حجوة ام ضببينا
وتحية للمايسترو قباني لرفعه اغنية يا شبيه البدر يا اخي جميلة والله
والتحية لكل المتداخلين
والتحية لست الجلد والراس دينا خالد
ركز في ادبك واستنارتك وسيبك من السياسة عشان ما يسبق اسمك كلمة المدعو بدل المستنير
--------
مودة اكيدة

Quote: عليكم الله شوفو قباني دا؟ تستمتع بضيوفي وتهدي ليهم وما تذكرني عليك الله أهدي لي: ضيعني ساكن الموردة لولدنا عبد العزيز المبارك ويا حبذا لو لابس قميص "تحرمني منك" لو ما لقيتها برضى بأغنية صديق متولي: أنا لي حب وطوّل في قسمك الأول

ضيوفك ممتعين ما في شك ...

لكن كيف ما ذكرتك يعني ؟

طيب جُملة ( الفنتازيا المركبة تركيب ) دي المقصود بيها منو ؟

و الله يا بكور يا صاحب ود الزبير تستاهل نهدي ليك انا بيك سعادتي مؤكده ...

هي زاتها اظن عبد الرحمن الريح كاتبها في دينا خالد ... سيبك من قصة محمود عبد الكريم فردة عطا كوكو ده ...

ما في زول بغنيها بالجمال ده اكتر من صاحبنا الجميل ياسر مبيوع ...

غيرت رأيي يا بكور ...

داير اهديك دي

كل بوست ما تميتو عندو مناسبة بنتموا فوقها.
ضرب لي واحد تلفون قال لي بعد حق الله: العيد عندك بشبه شنو؟
قلت ليهو بدون تفكير: دينا خالد

صحي يا قبّة، عبد الرحمن الريح قالها فيها، شوف:
يومي الأشوفك يبقى عيد والدنيا تبقى مُعيّدة

"أسأل مُجرّب"

clonotril2

اختشي ي دينق!

Quote: فوجدت بريقا في عيون إحداهن عرفت أن جذوته من الصحراء؛ فابتسمت بمحبة ولم نتعانق كما فعل المسلمي مع المفتاح.

يامستنير بدون تعانق كتبت فاوفيت لوعانقت كما عانقت صديقي المفتاح الذي قابلته اول مرة في حياتي لكنت من كتاب المعلقات أو كنت تهيم في البر حتي الان


-------
عيد مبارك يامستنير

Quote: وما زال عبق صوتها يعطر المكان

اخخخخ ...ياخلبوص وتقول لى ... مابتحت البوستات الورديه

أقصد بالوردية الطريقة المثالية في الكتابة وأختيار المواضيع.
هذا البوست الذي رفعته لتدلل على تناقض كلامي مع تعليقي هناك
هو أبعد ما يكون عن الكتابة الوردية؟؟
البوست دا لا توجد به حقيقة واحدة
الكتابة الوردية لا أقصد بها الكتابة الرومانسية
الكتابة الوردية كتابة لها مقياس دقيق في تتجنب الغلط في الآخرين

وأنا أغلط مع الآخرين ليييه ؟؟؟
وليه أتنمر أو أتحرش بالآخرين ؟؟؟
يامافى ناس غلطت مع الآخرين وفقدوا مصداقية انهم رواد معرفة ورموز قياديه
والواعى لمعنى الحوار ممكن يحاور ويناور ويتجلى فى كتاباتو عشان يصل لى هدفه من غير مايغلط
(طبعاً الواعى مثقف مستنير
و الوطن ده والوطن الكبير محتاجين لى كم مهول من المستنيرين الحقيقيين عشان نطلع من عثرتنا)

...
والغلط من كتر ماهو بشع وسقطاتو موجعه أى إنسان سوى بيحاول يتجنبه
وبالذات لمن يكون بيتعامل مع مجتمع متعدد الأمزجه والمشارب
...
والورديه هى الورديه
ومبروم مع مبروم مايلفش يامان
...
بس النصيحه لى الله البوست ده حلو ووردى كمان

Quote: Nabeel Ali · الخرطوم التجارية فعلا احييييييييييييييييييييييييييييييييينا ! بنات خيال الراوي قال _ لا بالله احسن بنات ابليس ههههههههههههه الاراجوز المتظارف المدعو ابو بكر _ انتا مشيت الزهرة الجديدة حيلك كان صورة بنابر فاضية وتربيزة فيها فناجين قهوة وفشار هههههههه والصورة التانية انتا قاعد برااااااااك في البنبرين هههههههه انتا طبعا زي باقي الوهم مخموم بي صورة الممثلة الهندية ههههههه عالم طير أعجبني · رد · 20 ديسمبر، 2015 10:54 مساءً Nabeel Ali · الخرطوم التجارية بسمات البريئة بعد الاراجوز المتظارف المدعو ابو بكر قال إنتهي النص الأدبي وسوف أعود للمتداخلين _ مسكينة منتظرة الصور ههههههه ود البشري الحريف قفل البوست تماما بي مداخلة وااااحدة ثم اتي القشاشين وفي رواية منتصر المجاملين لياخذو بيد الاراجوز هههههه أعجبني · رد · 23 ديسمبر، 2015 02:15 مساءً Nabeel Ali · الخرطوم التجارية منتصر قال _ يا مشرف جامل في أي زول الا تلاته دكين وعماد وعثمان محمد صالح قال قربت قال المتظارف الاراجوز قال _ مولانا الملك دا قاصد شنو بتعب ابن ابي السرح؟ ملاحظات _ من حسن حظك يا ايها المدعو ابو بكر هؤلاء الادباء دكين وعماد وعثمان ومولاك الملك وكذلك البروف عبد الرحمن واخرين طلعو من احفاد ترهاقا وبااان خي ههههه ولا عزاء لابن ابي صديق سرحان ههههههه فهمت مولاك الملك قاصد شنو ها ها ها ها ها ها خخخخخ أعجبني · رد · 29 ديسمبر، 2015 11:27 ص