النقطة التانية يا عبد الله ، الغرب الحضاري يحتفي كثيرا بالمزيكا الأفريقية (معليش العربية دي موضوعها طويل ولا يعنينا هنا كثيرا)..وقاعد يندهش ويحتفي بالمفارقة والدهشة والأصالة.. فيكفي يا صديقي .. انهم حتى الآن يرجعون اصول البلوز (اجمل مزيكا انتمى ليها مزاجا وتاريخا وعمقا ثقافيا) الى افريقيا ، ويعترفون بفضل التجارب الأفريقية الأصيلة..كيف؟..وهنا نجي لتساؤلاتك التي ختمت بها مقطوعتك المنشورة هنا..ودي مشكلتنا يا صديقي ، واعذرني ، المثقف السوداني في كل المجالات كائن كسول واتكالي ، ودايما ينتظر الدولة تعترف بيهو عشان تقوم تدعم تجربتو ، اقتصاديا وماليا ، عشان توفر ليهو تمثيل في المهرجانات الدولية ، وتوفر ليهو تجربة نشر وتوزيع تجاري ، وبالتالي عائد وربح..ونحن لا نعترض علي حكاية العائد والربح تلك..ولكن..!تجربة الغربة والمنفي ، يا عبد الله ، اهدتني كثير من الأشياء التي قد لا تتيسر للمثقف السوداني القاعد في امسودان ، ومن ضمن التجارب ..اكتشفنا حكاية انو المزيكا ممكن تصل العالمية ولا على كيف الدولة..!!..ككيف الكلام ده..؟..الدولة في امسودان ، يا صديقي ، دايما عندها اجندتها الخاصة ، وبتحاول تفرض حاجاتها ومعتقداتها وايدولوجيتها ، وبتروج ليها من باب انها ستبقى الى الأبد..!هذه اطروحة خاطئة تماما..!فانا مثلا ، احب المقاربات الثقافية بين كل مجتمعات افريقيا ، ومدخلي هو الغناء والمزيكا المبذولة في اليوتوب الواحد ده,, فهو يمنحك فرصة السمع والشوف..ومن عجايب اليوتوب التي اكتشفتها ، ان المزيكا ممكن تنتشر وتصل لحد العالمية بامكانيات بسيطة للغاية دون حاجة لتدخل الدولة..ودون حاجة للدعم..!والكلام ده يا عبد الله ، انا بشوفو في تجارب افريقية كثيرة..خصوصا غرب افريقيا..ياخي الواحد فيهم يكون لا يملك غير موهبة العزف على الجيتار بانغام اصيلة ومفارقة..ويجد حظه من العالمية زي الترتيب.. فالأمر ليس امر امكانيات وانما هو المثابرة وقوة الإرادة على مخاطبة العالم بالمختلف والمفارق والمدهش..!!المغنية ســُنه جبارتية ..من غامبيا ..وغامبيا واحدة من افقر دول افريقيا والعالم..لكن نجحت في تقديم الســُنة ..باعتبارها اعظم امرأة عزفت آلة الكورا (ممكنا مجازا ، نسميهو الهارب الأفريقي )..!..الغنية اسمها (شكرا مالي..!!)..واعفي لينا يا عبدالله ، نحن اصالة عن انفسنا ونيابة عن السنة..الدقسة الما بتفوت على ناس المزيكا..!!ناس من النيجر (وهي دولة فقيرة للغاية ) ، من مالي (وهي دولة فقيرة للغاية ) و من الصحراء الغربية (وديل لغاية هسع لا عارفين روحهم دولة ولا شئ تاني) ومن السنغال ، ومن ساحل العاج ، ومن غامبيا ، ومن جزر الرأس الأخضر ..من الطوارق ناس الصحراء.. كل هذه المجموعات وصلت العالمية وقدمت مزيكا مدهشة اجبرت الغرب الحضاري للتفاعل معها زي الترتيب..فاشمعنا نحن ناس امسودان ، وامسودان دي يا عبد الله ، الغرب الحضاري بيعرفها زي جوع بطنو..و مسكتين لفكرة انو ناس امسودان ما عارفين قيمتهم ولا مستعدين يعرفوا قيمتهم الحقيقية الحضارية..!وليس المشهد في امسودان بمثل القتامة التي يتصورها المثقف ، خصوصا لو كان في حجم دكتور عبد الله شمو ، المشهد فيهو اشراقات..و من عجب يا صاحب.. قبل يومين بقرا في اعاجيب اهالي امسودان ، خيط جابو صديقنا عضو المنبر زهير حمد..و بيقول فيهو انو الجماهير بتقارن بين عربية اسيا مدني (و غنت في خارج امسودان ) وعربية ندى القلعة (وبرضك غنت في خارج امسودان).. دهشتي يا صاحب.. انو المغنية المالية امو سنغراي عندها عربية موديل باسمها.. أي والله..و في نفس الوكت هي المغنية التي اجبرت العالم ان يسمع ليها ، والعالم الرسمي اعترف بيها لدرجة انو الأمم المتحدة خلعت عليها لقب (سفيرة النوايا الحسنة)..!..وحتى اللحظة ، ممكن المستمع العادي مثلي ، يندهش لمزيكا امو سنغراي ، بغض النظر عن عربيتها أو عندها عربية موديل خاص باسمها..ليه؟..لأن المزيكا العميقة الأصيلة ابعد واكبر من القشور..!..وعندي الإتنين ندي واسيا ، مافي واحدة قدمت مزيكا عشان تصل لحد العالمية اياها..!!فيا ترى كم سوداني خلعت عليهو الأمم المتحدة لقب (سفير النوايا الحسنة)؟..غايتو انا عارف ، اخونا فنان الشرق ..سيدي دوشكا ، وهو سفير نوايا حسنة بموجب تقاليد ناس الأمم المتحدة..!هذه هي الإشراقات يا صديقي.. في الشرق سيدي دوشكا ،في الشمال مجموعات مزيكا النوبة في اقصى الشمال ، في النيل الأزرق الجمري حامد.. في جبال النوبة (اسكو لقوري) في كردفان شادن حسين.. في دارفور.. علي الرهيد..ماجد كوربيا ..عمر احساس..حامد شارف..ادم حمودة..!الغياب الوحيد هو مزيكا (هنا امدرمان) فهذا مزاج يا صديقي ، واعفي لي الصراحة ، غير عالمي وغير مؤهل أن يكون عالميا..عارف ليه؟.. لأنو مسخ مشوه..وغير حقيقي ..غير حقيقي البتة..!!ودمت طيبا يا عبد الله..وعبرك التحية عبرك لأستاذنا الهادي جمعة جابر.. ونسات كتيرة كنا نتمناها..ولكن..!لاحقا ، لو قدرنا ، وبعد اذنك واذن الخيط والقراء والقارئات.. نضيف مقاربات اخرى.. بغرض نقاش فرضية دور الدولة في دعم المزيكا عشان تصل للعالمية..!كبر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست