ويغني ليك...... الموصلي ( أو عندما يرتقي الفنان بجمهوره )

Quote: من ناحية اخرى هو يبدو و كأنه يريد محاسبة كل شخص يكيل المدح ...وكأني به يريد من الجميع ان يتطرقوا فقط للسلبيات في عطاء الافراد

Looks like beat around the bush

الأخ زكريا فاضل، عميق احترامي، المدح إذا قدم على نحو معقول وبدون طلب الممدوح كلنا نشارك فيه، أما (الكيل) ففيه نظر، أشرت للأخطاء فقط ونبهت المتداخلين أن لا يتمادوا في الكيل بالمستحق وغير المستحق. طيب المتداخلين، احترامي العميق - أنا ما دخلت هنا لنقد عمل، وكررت الكلام دا مرتين أو تلاتة - ولا دخلت هنا عشان أنفي صفة موسيقي أو فنان من أخونا يوسف، بل أكدت على ذلك وسردت جملة أعمال تخصه. سبب دخولي: ببساطة لأنو في هوجة بتاعة مجاملات وصناعة صنم على أساس خاطيء قائم على الفرضيات وحسن الظن، دا المحرك بتاعها هو أخونا يوسف ذاتو، البوست دا اتنقل من السنة الفاتت للسنة دي بطلب مباشر ومستعجل منو، وكان الواضح إنو أي لقب وأي مأثرة وأي قول مفرح حقيقي أو مختلق لا يجد أي فحص أو تريث من قبل الإخوة المندفعين لتدبيج الأوسمة وهم معذورون. غرضي: تصحيح المعلومات الخاطئة الواردة في مداخلات الإخوة وهي من الوضوح بحيث أنها لا تحتاج لكل هذه اللخمة واللجاج واللف والدوران، سردتها مرقمة واحد اتنين تلاتة، نبهت أخونا يوسف عمل فيها عيان، وجاء واحد إكزوتك قعد يكلمني عن السكرانين والمريسة والبف باف وعن جده البيخوض كالسفينة. رد الفعل: جاء أخونا يوسف ولفترة يومين يراوغ ويناوش في أي حتة إلا النقاط المحددة الأنا سردتها مرقومة، لسبب بسيط أنا اتوقعته من البداية، عاجباهو كدة، صاح ولا خطأ، حقو ولا حق ناس ما مهم، بوضع اليد، الكلام القالوهو عنو يمشي. الناس الجات تعدد في الأعمال أو تلطف من حدة الحصار دا هم على حق من ناحية إنو دا فنانهم، وفناني أنا ذاتي بالمناسبة لبعض الأعمال، وأوصيت بإشراكه في فيلم عالمي وقلت نصاً (مهدوا للموصلي عشان يشارك بأي مجهود في الموسيقى التصويرية أو على الأقل لتقديم المشورة في التوزيع الملائم للفيلم فهو الأدرى بذلك من بين الكل) في البوست دا http://sudaneseonline.com/msg/board/480/msg/1448301158/rn/4.html بس هم على باطل من ناحية الحقائق المعروفة تاريخياً والمصطلحات الموسيقية الأكاديمية، فلا هم طرقوا الموضوع مباشرة بذكر علة الأسئلة أو إجاباتها ولا هم أضافوا شيئاً عن الفنان يوسف لا نعرفه. الحل: زولكم دا يحفظ ماء وجهه ويتواضع، الصاح بدربو والغلط بدربو، مصر يكابر ويتعامل مع الواقع بفرضية (علماء هههه) وطيران العنز ومهارات الخربشة، القصعة دي حيلقاها قدامو محل ما يقبل، بكل أدب (يا يوسف دا غلط) يرضاها ولا يزعل هذا شأن آخر، لكن دا منبر فما ما أي معلومة مغلوطة الناس تدهنها بالشوكولاتة وتبلعها، دي تبقى مهزلة. اكتبوا ليهو في الخاص، ولو رد عليكم نورونا قال شنو، يمكن خجلان: 1- أنت دا يوسف محمد عثمان أدخلت البوليفوني (polyphony) للسودان أول زول؟ 2- أنت دا أعمالك تصنف ضمن الجنرة إنسترومينتال (instrumental)؟ 3- شنو يعني (صوت جبلي) و (صوت صحراوي)؟ ولو ما رد عليكم (ودا الحيحصل) ابحثوا بنفسكم، المسألة ما دايرة ذكاء، وأي زول يراجع كلامو الكتبو ويصلحو ويعمل حسابو لقدام، المبالغات دي نفعها يعود لفرد لكن ضررها يعم الجميع، العندو رغبة يناقش يفتح بوست وياخد راحتو وحأجي أشارك بعيد عن البوست دا. +++ إنتا يا يوسف لو زول صحح خطأك دا بتسميهو "تخريب"؟ ولو منحوك ميزات ومواقع لا تستحقها هل دا في رأيك تكريم؟ شكراً على الصورة بتاعتك الفوق السميتها (Alaweer.jpg) ، جميلة لكن حأقيف هنا قبال تضيف صور زيادة بتوصيفات تانية، ما صاح تظهر قدامنا مهزوز كدا. والله يا أحمد ياسين دخلتنا في ورطة، هسع الراجل دا اتشبك في الكلمتين القلتهن وتاني ما حيفكهن إلا مع الوصية التانية. زمان يا "موصلي" انت أشرت لواحد زميلك قلت أنا وهو أحسن ناس بيطلعوا منك المعلومات، رديت عليك بأني أفضل منو لأني كمان بطلع الدهون والأملاح. ____ معلومات ما شفناها، لكن الزيت طلع