رسالة الي مدير مطار الخرطوم

مرحبا Guest
اخر زيارك لك: 05-27-2024, 08:06 AM الصفحة الرئيسية

منتديات سودانيزاونلاين

مكتبة الفساد

ابحث

مدخل أرشيف اراء حرة و مقالات

News and Press Releases

اتصل بنا

Articles and Views

English Forum

ناس الزقازيق

مدخل أرشيف للعام 2016-2017م

نسخة قابلة للطباعة من الموضوع ارسل الموضوع لصديق اقرا المشاركات فى صورة مستقيمة

« | »
اقرا احدث مداخلة فى هذا الموضوع »

09-21-2017, 04:51 PM

Elsanosi Badr

Elsanosi Badr
تاريخ التسجيل: 03-29-2008
مجموع المشاركات: 4166

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

رسالة الي مدير مطار الخرطوم
03:51 PM September, 21 2017 سودانيز اون لاين Elsanosi Badr- عدة اماكن ونطمح في الفردوس مكتبتى رابط مختصر السيد المدير العام لادارة مطار الخرطوم تحية طيبة في البداية ترددت كثيرا قبل الشروع في الرسالة دي، وسبب ترددي هو حاجتين، الاولي هل اكتب الرسالة دي بالفصحي واحشوها بالسجع والمحسنات البديعية ام اكتبها بلغتنا (الدارجة) والتانية هو ترددي من كتابة الرسالة من الاساس اصلا. بعد اخذ وعطاء توكلت علي الحي القيوم وبديت الرسالة ولا اخفيك يا سعادة المدير (المقامات محفوظة) هاجس انك تقرأ الرسالة دي هو اقرب للصفر! وحتي لو وصلتك فردة فعلك ايضا ستكون اقرب للصفر. لا اعرف لماذا ؟! ولكن التردي الذي اصاب كل شئ جعل من المشاهد وهو المواطن العادي متفرجا للت والعجن الحاصل في البلد انو يفقد الامل تماما في كل شئ. يا سعادة المدير ممكن الواحد يكتب مجلدات عن الخراب الذي طال مطار الخرطوم، بداية من الجيوش الجرارة التي تعمل في المطار والتي ليست لها وظائف محددة وصولا الي الخدمات المتردية التي تقدم بمقابل وغير مقابل ومدفوعة الاجر مقدما عن طريق الرسوم او ثمن تذكرة الصعود الي الطيارة وذلك غير سرقة امتعة المسافرين. وتجارة الممنوعات جوة المطار. ما انا بصدده في الرسالة دي هو حالة او حكاية او حاجة كده ما عرفت اصنفها شنو! المهم طالعنا في وسائط التواصل الاجتماعي قيام ناس لابسين عراريق وبدل كنغولية ( وسخانة) وبعضهم يرتدي. سترات لامعة بانزال من عربة (بوكس) مهلهلة وبابها مكسور خروفين ما بعرفن عندهن قرون ولا لا! لكن الذي شاهدته وشاهده الالاف من رواد التواصل الاجتماعي هو قيام الناس دي بنحر (وقتل) الخراف دي تحت طيارة عليها شعار سودانير وسط جمهرة من الناس اللابسين بدل وعراريق وسترات وسخانة ولا علم لي بان يكون مدير سودانير او احد مسؤوليها ضمن الجوقة دي وما عندي فكرة برضو اذا كنت (اتا) زاتك ضمن الحضور ام لا!. الشاهدة في الحكاية دي هو صدمة الناس بذبح او (كتل) الخرفان دي في مكان عام وخصوصا المطار وذلك بالقرب من طيارة واقفة ومياة راكضة وبالطبع الشئ ده حصل في مدرج مطار الخرطوم. والذي صدم الناس اكتر هو قيام واحد من الناس دي لابس بدلة كنغولية بخنق الخروف بكيس نايلون ولم يتمكن من ايقاف الدم السائل وبدات الناس تتسائل ده سحر ولا شعوذه ام نوع نادر من الكهانة. الناظر للموضوع ده يا سعادة المدير هو الدهشة من هذا السيناريو، هل تقومون بتصوير فلم يعني بالخزعبلات والاشياء الغريبة حول العالم ام ان هذا الشئ من صنعكم او من صنع من دونكم؟! ام هل تمارسون الشعوذة والسحر في تسيير اموركم في المطار؟! وفي كل الاحوال لا يزال الزول العادي زينا كده مندهش من الشي الحاصل ده، هل ده تم بمعرفتكم وتوجيهاتكم يا سعادة مدير المطار ام تم كده (كيري) ساي وتغلغل العقل الرعوي في مؤسسات الدولة ولا دي شنو؟ حاجة جديدة ومشروع حضاري تاني اظرط من الاول ولا بتعملوا شنو بالظبط كده؟!! غايتو يا سعادة المدير لو السيناريو ده حصل بعلمك او بدون علمك فانت في ورطة حقيقية. يا سعادة المدير ما حدث هو كارثة ولا اعتقد انه سيحدث في اي بقعة في العالم ولا اعتقد انه حدث في اكثر مناطق العالم التي تعتمد علي الكجور والشعوذة والكهانة في تسيير امورها الحياتية ناهيك عن تسيير امور العامة من نقل ومواصلات تقدم لقطاع واسع من الناس مختلف الوانه. قبل نهاية الرسالة دي، هناك قطاع واسع من الطلاب والخريجين في انتظار التوظيف، وبتدريب هؤلاء وتعليمهم اسس خدمة الافراد واستخدامهم تستطيع ان تبني مؤسسة المطار وتحيل من تسبب بانهيار هذا الصرح الي التحقيق او نقلهم الي مؤسسات اخري مثل الثروة الحيوانية وغيرها، لكني لست متاكد من الزول (الكسر) راس الخروف بعد الذبح وخروج الروح ممكن ينفع في اي حته غير المصحة النفسية، لانو فطس الخروف وحشرو في كيس نايلون ليمنع منه الهواء والزول ده ممكن يكون خطر ويرتكب اي حاجة الناس بتتخيلها بعد عمليتو دي والناس الواقفه حولها برضو ما عارف ممكن ينفعوا في اي حته تانيه قبل اخضاعهم لتدريب وتأهيل مطول. وفي النهاية، يا سعادة المدير اذا غلبتك الشغلانية دي وبقت ما بتمشي الا بالشعوذة والضبيحة و(لطيخ) الدم باليد في الاشياء، فاقول ليك انت غلطان وصدقني ح تمشي بسرعة للوراء وانت حتكون في مزبلة التاريخ وسيقترن اسمك باكثر العصور المظلمة التي مرت علي البلد. وفي النهاية خالص بس عندي سؤال وما تزعل منو اتا يا مدير ادارة المطار شغال شنو؟ والسؤال بصيغة تانية يعني لامن تطلع من البيت الصباح بتقول لاولادك ( ربنا يحفظهم ليك) اتا شغال شنو وبتشرح ليهم انك بتسوي شنو، كنت بتقول ليهم شنو؟. والسلام عليكم بدر السنوسي

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]