اول حب في حياتي

مرحبا Guest
اخر زيارك لك: 05-29-2024, 02:15 AM الصفحة الرئيسية

منتديات سودانيزاونلاين

مكتبة الفساد

ابحث

مدخل أرشيف اراء حرة و مقالات

News and Press Releases

اتصل بنا

Articles and Views

English Forum

ناس الزقازيق

مدخل أرشيف للعام 2016-2017م

نسخة قابلة للطباعة من الموضوع ارسل الموضوع لصديق اقرا المشاركات فى صورة مستقيمة

« | »
اقرا احدث مداخلة فى هذا الموضوع »

05-19-2016, 11:27 AM

عباس الدسيس

عباس الدسيس
تاريخ التسجيل: 10-11-2012
مجموع المشاركات: 3404

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

اول حب في حياتي
11:27 AM May, 19 2016 سودانيز اون لاين عباس الدسيس-Saudia مكتبتى رابط مختصر في سنين بداية النضوج الانسان يود ان يجد نفسه من خلال المغامرات ان كانت عاطفيه أو شقاوه يعرف دائما في اي حي ان هنالك مربي اجيال تلقي بدرس في الابتدائية 12 سنة وقت كانت الابتدائي ستة فصول كان مربينا يدرس معنا بالصف الخامس يكبرنا بعدة سنين وهو في طور النضوج لم نكن معجبين به بل تستهوانا تصرفاته كانت له مغامرات عاطفيه بعد المدرسه مع احدي البنات تنتظره في ناصية احد البيوت يذهب معها قريبا من منزلها وهي ايضا قريبه من سنه تدرس بالصف السادس اتذكر دائما كلمات الوالده لها الرحمة والمغفرة عن البنات البدرسن في الابتدائيه وكبار السن فهي تقول (( اجي يا بنات امي البنات ديل اهلن بقرو فيهن لي شنو كبار الواحده شطورا ماليات حلوقا احسن اعرسوهن)) . حبيبت مربي الاجيال كانت من نوعية الشطورا ماليه حلقها كانت بتجيني غيره من حركات الحب بينهم حاولت اتقرب منو اكثر عسي ولعل احفظ حركاتو واعرف اسرار الحب منو عشان القي لي واحده احبها عشان العبد لله اكون مميز عندو حبيبه . اول تكتيك لشكل التميز كانت عندي شنطة دموريه زي ما الناس كلها شايله شنط دموريه بي لسان لقفلها وتتدرع في الكتف بسير مصنوع من الدموريه طويل عشان اكون مختلف عن الجميع حاولت ادخل تحسينات علي الشنطه مشيت لي صديق خالي شغال في صباغة وطباعة الملايات ورسم اشكال بعد الصباغه اديتو الشنطه الراجل تعاملو مع النسوان الالوان العندو كلها حريميه فيها الوردي والبنفسج كنا زمان ما عندنا اهتمامات او تمييز في الالوان بين الحريمي والرجالي ((تذكرت عندما طلب مني ابني شراء شنطة اسبونش للمدرسه اخترته له واحده متينه فيها جزء بسيط بمبي زعل مني وبادرني بجمله يا بابا انت مابتشوف ولا ما بتعرف دي حقت بنات)) بعد لونت الشنطه والرسومات كدا بقيت جاهز للحب . وانا طالع من المدرسه صادف خروج بنات الابتدائي اتقدل مزهوا بشنطة الدموريه المنقوش جانبها فعلا كان شكلها غريب وخاصة الرسومات افريقيه احنا ماشين في الشارع بت عجبتها الشنطه سألتني من وين اشتريتها .... الله كرعي بردن واضني وقفن وضهري اتملي عرق فتحت خشمي وقعدته اعاين ليها معقوله تتكلم معاي بت ...... صديقنا مربي الاجيال قال لي (( الشرك قبض يا فرده)) قعد ازن لي في راسي لما صدقته ... انا قلته خلاس دي زولتي المعلومة الغايبه عني البت معروفه بخفتها تتكلم مع اي زول في الشارع والحاجة التانية ما جميله ممكن تقول دون الوسط ياهو القسمو لي الله بس نعمل شنو الله اراد لينا ... طيب الخطوه الثانيه شنو الراجل طبعا خبره وبشتغل في الاجازه عندو قروش قال لي تديها فتيل ريحه هديه . قفلت علي كده رحته البيت العصر مشيت افتش في الكوش جمب الدكاكين عشان القي فتيل ريحه فاضي لفيت الدباغه كلها اخيرا وجدت فتيل صغير بتاع ريحة بنت السودان غسلتو شلته الورقه البره جبته لي ورقه رسمته فيها قلب وسهم لصقتها في الفتيل كان عندنا في البيت كلونيا ثلاثة خمسات بتاعت حلاقة دقن مليت منها الفتيل ومشيت المدرسه منتشي لدرجة كان عندنا الصباح جمعيه ادبيه اقترحته للناس اغني وجدته معارضه لصوتي الما مقبول غنائيا مع اصراري وعباطي وشعوري الداخلي المليان حب للبت حلفت لازم اغني وافقو ادوني فرصة الغناء تغنيت بي اغنية الكاشف .... انا ما بقطف زهورك بعاين... في الفسحه مربي الاجيال سألني بعدين جاهز قلته ليهو ايوه بس اديك الفتيل تدي ليها انتا..... زعل حمر عيونو نهرني انتو وقت ما بتقدرو علي الحب بتشبكو مالكم شوف لازم تشيل مع الفتيل زهور تديها ليها أو تاني ما توريني وشك دا وتعمل لي فيها عايز تحب خليك في الدافوري واشتراك الكفر ... خفته الاستراتيجيه بتاعتي تنضرب دفعته قروش اشتراك الكفر في تيم الحي ممكن مربي الاجيال اطلع قرار ما العبوني معاهم ... انا طالع من المدرسه قطعته زهور صباح الخير كان برضو في شجر اسمو العوير بطلع زهرة بنفسجيه في سور المدرسة شلت زهوري مشيت قابلتها مع مربي الاجيال رميت ليها فتيل الريحه وزهور صباح الخير والعوير تحت كرعيها وقمته جاري. بعد لفيت اللفه الخبر جاني شالت الفتيل والزهور ما كان عندي الشجاعه اتلفت عشان اشوفا انتظرته تاني يوم بفارق الصبر عشان تنتهي الحصص وامشي اقنص ليها مع مربي الاجيال في الزاوية جينا الطابور الناظر صديق الوالد اول حاجه طلعوني بره في نص الطابور بعد التفتيش للاضافرين واللباسات والاجراءات الاخري بعد دا جاء موضوع الطابور كنت انا موضوع الطابور تحدث الناظر بصوت عالي .... (( ود الشريف امس بغني انا ما بقطف زهورك بعاين نهاية اليوم الدراسي لقيتو بكبر فيها كبر قطع صباح الخير والعوير بتاع السور دي جريمه لوحدها الجريمه الكبري استاذ فلان شافو مشي جدع لي بت تحت كرعيها الورود ومعاها حاجة تانية الود عامل فيها روميو... شدوني بتاعين سادس عشرة جلدات لي حسي اتحك منها ..... الطامه الكبري واحد صديقنا حاقد علي كلم لي اخوها كان بدرس معانا خلي المدرسه مشي المنطقه الصناعيه شغال صب مكنيكي الشكله دورت المصيبه اخوها دا بشاكلك انت تكون واقف اديك بنيه ولا شلوت ويقوم جاري الف بي المربع الثاني تكون انت نسيت الشكله وواقف طاااااااااخ اجي اضربك واقوم جاري شكلتو بتستمر اكثر من كم شهر بعد القي ليهوا زول تاني اشبك معاهو .... مشكلتي بقت ما فضيحة الناظر ولا دقت الطابور البفكني من اخوها شنو !!

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]