يا المغتربين البيقرأ الكلام دة ما ظنيتو ينزل السودان

Quote: طبعا الايام دي خلاص موسم عودة المغتربين من دول الخليج للاجازة السنوية ..اها مرحب بيكم في بلدكم الثاني (السودان ) وحبابكم عشرة بلا كشرة بس في حاجات عايزكم تنتبهوا ليها ..اول حاجة الصابون والمعجون والسفنجات والطواقي والسبح وريحة مكة هنا عندنا راقدات ومفروشات في الشارع وارخص من الحتجيبوهم معاكم ..تاني شئ: مافي داعي للدلاقين والخمخمة!!..اصلو الحتة الانتو جيتو منها دي ذوقهم في التياب (هندي) وكمان قديم فاحسن بدل ما تلقطوا ليكم كم شنطة من الدلاقين من ابو عشرة او ابو خمسين كهدايا ..وتجوا فرحانين بيهم وتدوهم هدايا للناس يلوا بوزم ويصروا ليك ..أحسن تديهم حقهم (ناشف) ..وبعدين ياخ الوزن ذاتو اغلى من الحاجة البتشتروها لينا دي ..تعالوا خفاف وجيبوا لينا حاجات هنا ما عندنا ..ياخ التانك واللبن وصابون البودرة هنا رااااقد ..وبصراحة هنا كل شئ رااااااقد بس ما تحيرك إلا قروشك ..! اها من حيث الموبايلات بالله اختونا من الصيني ..دا هنا في السوق الشعبي بتباع بالكوم ..يعني لو عايز تجيب موبايلات هدايا شوف (جلاكسي 6+) ، (وايفون 7 ) ، والحاجات الزي دي..بس حاجة مكتوب فيها made in china خليها في محلها ..النبي فيك كان جبتها ..كدا بتفضحونا مع الاجانب ! كمان اوعاك تقول لينا بلدكم دي ياخ وسخانة والكشرة مالية الشوارع ..ترى عنا بنظفوها من الفجرية!! مافي داعي للمقارنة عشان ما تفرسنا وتعمل لينا مصران عصبي ..براها الدنيا سخانة والناس فلسانة !! كمان لو لاقيت ليك شافع صغيروني ما تقول ليهو ماشاء الله كبرت لما ما عرفتك! ياخ انت يا دوب ليك سنتين إلا تلاتة شهور كبر كيف يعني؟! بعدين اوعاك تقول ليك لاي بت يا حرمة !! تقول لواحدة يا (حُرمة) والله تعرف مليون حاجة ! كمان برضو ما تقعد تحكي لينا قصص وافلام عن الامراء والاميرات والشيوخ والهوامير.!!!.ياخي هنا برضو عندنا انترنت واي حاجة بتحصل في الدنيا بنعرفها قبل الناس الانت جيت منهم ديلاك ! واحذر واوعاك تقول للحلة ‫#‏طنجرة‬! وللجردل (سطل) !! واوعاك تقول لي جيبي الدشاشة ..ياها السفنجة حقتك الخليتها زمان لميناها ليك في المخزن (ذكرى) ونخرتها مقطوعة وداقنها بمسمار! وكل فردة لونها براهو ! بلا دشاشة بلا سحساحة معاك! اها كمان ما تقعد تتفلسف لينا في السياسة وتعمل لينا فيها الامام الصادق المهدي ..وتعمل لينا فيها انك لو كنت قاعد كان عملت ثورة وتغيير وهملجرا..ياهو داك الشارع يلا امشي ورينا الثورة كيف ؟ بعدين اوعاك تقارن لينا الاسعار بالريال او الدرهم او الدينار ..كدا بتفقع مرارتنا عديل كدا ..! ما تسالنا من الريال بي كم ؟ انت عارفو اكتر مننا ولو ما حسبتو من هناك صاح ما كان جيت ! وكان عندك باقي ريالات داير تفكها امشي السوق العربي جنب الجامع الكبير وفكها بي راحتك! يا زول هو كوز الموية بي 50 قرش يعني نص جنيه وما تقول لينا في السعودية البنزين ارخص من الموية ..الحاجات دي كلها عارفنها وقريناها في الانترنت .شيل معاك موية النيل وبيعها هناك شوف تجيب ليك كم ريال وريحنا من التنظير يا ريال ! اها كمان ما تغش ليك واحد وتقول ليهو بجيب ليك اقامة ولما ارجع برسل ليك فيزا .. او تقول ليهو الاقامات للسودان الايام دي موقوفة .. ياخي خليك واضح وما تخلي الناس تعشم فيك ساي وفي النهاية تطلع كضاب..اها وبالنسبة لموبايلك عبد الواحد دا ..صدق عاجبني شديد ، وان قعدت شهرين او قعدت شهر ياهو موباايلك دا بقلعو منك بقلعو منك كان ترضى كان تزعل ..موبايلك شايلنو شايلنو..كان مسفرني بكرة دي برضو موبايلك دا خلاص اقنع منو ..ودي مسالة منتهية.. وبعدين ياخ عندك عطر جميل كدا ..غايتو عاجبني..حتى لو القزازة باقي فيها شوية برضو حنصادرو منك غصبا عنك !! اها ياخ البدلة والكرفتة full suit دي عوارة ياخ..الدنيا سخانة ..اقشر ليك بجلابية او على الله.. وما تخلي الناس يتفرجوا فيك يقولوا دا شغال في بنك ولا محامي خانق رقبتو بالليل دا ؟!!!اهم حاجة اوعاك تعمل فيها (شفت) ومفتح وحويط وتمشي تشتري ليك (بيت) أو واطة من غير ما تكلم ناس البيت ..والله الشفوت بتاعين الاراضين يركبوك التونسية ويخلوا خشمك ملح ملح ..بلا شهادة بحث بلا ورقة مبايعة معاك ..بلا وثقتها عند محامي صاحبي !لو عازم ليك ناس بلا قبال تعزم زول اقعد من ناس البيت وشوف الطلبات والعدد عشان نستعد..ما تعزم ساي وتقول لينا هناك البقالة قريبة في دقيقتين تشتري المقاضي كلها! المقاضي هنا اسمها الحاجات ..والبقالة اسمها الدكان وفي الحلة اسمو كنين وغير الجردقة والعطرون والشاي والبن مافيهو شئ !!! بعدين لمن تكون جاااي خليك عارف البرادو والاسبورتاج والتوسان هنا كرهونا الشوارع ،،،كمان جاري عامل ليها سبت وشغال تكتب فيها لا اله ال الله محمد رسول الله ،،ونعم بالله لكن حركاتكم دي بطلوها سمح ؟ وعليكم الله لمن تجو بصالة القدوم خليكم طبيعيين شنو بتجو رافعين الراس وداخلين بفلهمة حركاتكم دي نحن بنضحك فيها وظاااهرة ،،وبعدين حكاية ملبسين الشفع الهدوم المنفوشة ومشيلين الشفع شنط الدببة دي عوارة ساااي والله جنس كتاحة هنا الدب تغسلوه الاجازة كلها ماينضف ،،،اها لو مشيت شارع النيل بالليل اوعى تتعاور وتكتب رقمك في قصاصات ورقية وترميهو للجكس كلما تشوف مجموعة بنات سمحات ماشات او قاعدات ..والله تعمل الحركة دي هنا حيبقى ليك بنبي ..دا لو ما شلخوك 111 ..واتش وسلم وثعبان ومطارق ونقرابي !!ههههههههههههه غايتو حذرتك !ومرحب بيك في بلدك ورمضان بيكم أحلى..

(عدل بواسطة Adam Youssif on 05-03-2016, 11:39 AM)
(عدل بواسطة Adam Youssif on 05-04-2016, 08:57 AM)