اتمنيتك قلت يوم القاك معاى دقيت على باب السما كتبت عشمى مع دعاى واستنيتك جنب الغنيه البيك طربانه فوق المنيه البيك نديانه وكل الدنيا البيك مزدانه جوه الحزن الساكن الروح عمق الوجع المابى يروح وحرقة اساى
اتمنيتك فكره مغروسه فى مسام الخاطر يا زوله مدسوسه جوه خزاين الحلم العاطر يا ريده محروسه بالدعوات يا محجوبة بالآيات يا مكتوبه فى لوح الأرض تيراب فى ماضى المنى الباكر حضور وغياب حضور معناك غياب المطره تالانا وهطولا هناك واظنك عارفه انه الدنيا من غيرك يباب وشذاكى يسافر دربك وين يا فرحا ماطر جيت من وين يا رمشا قاعد بين الحاجب السور وبين الجنة الجوه العين
اتمنيتك وقلت فى سرى يا زول اوعاك ما تخاطر ادفع تمن ايامك حاضر قول لى البت جاييك بعدين كان الله كفانا العوارض ادفع تمن ايامك نقدا كفى ايدينك رهق الدين بين الخوف الكاسى الليل وبين الدغش الشايل النور
اتمنيتك ندهت سماكى ناديت المطره تعالى خلى غيابك وابقى حنينه يسكت حس الفرقة العالى نرفع صوت الريد بيناتنا يا بت يامطره عليكى الشوق ما تبقى ضنينه امرقى وهلى تعالى وطلى امسكى كتابك اقرى حكايتك لينا حكاية الغيم الجابك ريدة الزول الراسم اسمك فى كتاب روحو الحزين يا مطره حبابك ابقى داخله اتوهطى جوه الروح فوق العين ضمى الجناحين اهبطى جوه الروح وفوق العين
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة