|
Re: أدانة واسعة من كل قطاعات المجتمع السوداني (Re: زهير عثمان حمد)
|
أولا: اللبس سلوك شخصي بحت لا يتعدى تأثيره صاحبه (بعكس التدخين مثلا)، لذلك ليس من حق الدولة أبدا مراقبته
ثانيا: شرطة النظام العام آخر من يتكلمون عن الأخلاق كيف تريد الإنقاذ حفظ أخلاق المجتمع بـ(ناس ما عندهم أخلاق)؟؟!! النظام العام شرطة (مزاجات) و(خيار وفقوس) قوامها قليلو أدب وعديمو رجولة ومرضى نفسيين
ندين بشدة هذا الهوس الإنقاذي...علاج أطفال السرطان أولى من مراقبة ملابس الناس يا هؤلاء! تبا للإخوان المتأسلمين...تبا للتدين الشكلي الذي أدخلوه!
| |
|
|
|
|
|
|
Re: أدانة واسعة من كل قطاعات المجتمع السوداني (Re: زهير عثمان حمد)
|
لتوثيق انتهاكات حثالة النظام العام نقلا عن الراكوبة:
Quote: ابراهيم السر الصافي
حكايتي مع شرطة النظام العام 06-28-2016 10:31 PM
ما عايز أتباهى ليكم بي أصحابي لكن لازم أحكي القصة دي عنهم,, لأنو الظاهر الناس نست انو قوانين النظام العام دي ما جات من امس ولا الليلة! السنة الفاتت كنا مجموعة من الاصحاب قاعدين نتسامر في عوامة صاحبنا فرنساوي جمب كبري المنشية.. العوامة لسه ما كان فتحت رسميا كافيه و كانت الدنيا خميس و دفار النظام العام هااايج و لافي في شارع النيل. أثناء ما نحن قاعدين جو تلاتة بنات استأذنو انو يقعدو فوق الضفة الراسية جمبها العوامة و صاحب المكان رحب بيهم و قعدو فوق في مكانهم.
بعد شوية جا الدفار وقف قصاد العوامة و نزل الضابط و معاهو اربعة عساكر و هبطو بالسلم نزلو لينا و دخلو العوامة و قالو يفتشونا, كأنهم أبهاتنا.. قلنا ما حنك.. أتفتشنا كلنا و غالبا كان نفسهم يلقو معانا حاجة يبرمجو بينا بيها باقي الليل داك.. المهم انتهو مننا وكت طالعين من المركب عاينو لقو البنات,, فتهللت اساريرهم و لسان حالهم يقول "أوووه بق فش".. و كانو البنات لابسات بناطلين و كل واحدة شايلة تلفون غالي و صغيرات في السن.. و بالنسبة لدفار النظام العام دا صيد ثمين. طوالي أتجهو للبنات الضابط كمدخل قاليهم المقعدكم هنا شنو ؟ و قبل ما يردو أشر بي يدو ناحية الظلط و قاليهم قومو اتفضلو معانا.. البنات ما فهمو الحاصل شنو و المشكلة وين بالظبط فأعترضو و قالو ليهو ليه في شنو؟ قاليهم زي فاضح, البناطلين دي ممنوعة. اخر الكلام واحدة من البنات قالت للضابط خلاص ما مشكلة, نحن ناس بيتنا قاعدين هناك في العوامة التانية ديك و نحن مرقنا منهم نتمشى, نضرب لي اخوي الكبير يجينا.. طوالي الضابط مد يدو على التلفون و هي بتضرب و مسكها من كتفها و هاج.. ما بتضربي لي اي زول.. قومي اركبو الدفار دا. في اللحظة ديك العساكر و الضابط لقونا نحن التسعة محاوطنهم.. اول حاجة واحد من شباب بري الكانو معانا نزل يد الضابط من كتف البت, قاليو دقيقة يا جنابو نحن ما عندنا بت هنا بمسكوها كدا,, الزولة دي من بري و نحن أولاد الحلة. و عبد العزيز طلع المحامي الجواهو و شبك ليك الضابط: دقيقة لو سمحت بالله, وين المشكلة بالضبط؟ التهمة شنو الانت بتوجها للانسات ديل؟ هنا الضابط وصل قمة زعلو, و قعد يكورك و يجوط.. يا عسكري.. يا دفار.. امنع التجمهر يا زول.. و داير يمد يدو و حصل الاشتباك.. اثناء الجوطة واحد طلع البنات و اتخارجو.. الملازم زرارتو اتقطعت و اتضح انو الدفار بره فيهو حوالي خمسطاشر عسكري واحد شايل سلاح و الباقين خراطيش. رفعو مننا تلاتة و ودونا قسم بري و فتحو فينا كمية من البلاغات.. و قالو لينا بكره جمعة و بعدو سبت ضمانة الا الاحد.. بعد نص ساعة بري كلها جات القسم.. واحد قال للضابط نحن بكره جايبين لساتكنا و جايين.. قامو الصباح بدري جابو لينا وكيل النيابة من بيتو و طلعونا بالضمان. بعد يومين سواق الدفار ضرب لي عسكري من القسم القام ضرب لي واحد من الشباب, قاليو جنابو دا قال تلاتة ارنب و بكسر الحنك.. ورونا قلنا ليهم محكمة بس يا زول. فعلا بعد اسبوع ضربو للضامن و حددو المحكمة.. مشينا المحكمة و قلنا للقاضي الحصل, قلنا ليو لمن مسك البت من كتفها نحن شالتنا الهاشمية و اتدخلنا لكن ما اضاربنا مع العساكر..و لو ما عملنا كدا ما نبقى اولاد بري.. القاضي قال للعسكري انا ما شايف انو في جريمة وقعت.. و شطب البلاغات.. بعد المشكلة انتهت سألنا عن الضابط القال داير تلاتة مليون دا.. اتضح انو معروف بالحاجة دي.. ابتزاز كل من يقع في طريق دفار النظام العام, و كنا عايزين نتفق مع بتاع شرطة أمنية نشرك ليهو بي قروش مرقمة لكن ما واصلنا في الموضوع.. نعم عملنا لبطة و بيتنا في الحراسة, و اتجرجرنا في المحكمة, لكن اصلو ما كان خسارة, و كان الموضوع بستحق,, و اي فرصة تلقوها ضد دفار النظام العام استغلوها. صديقي عبد العزيز و اصدقائي شفاتة بري.. اكثر الله من امثالكم.
|
| |
|
|
|
|
|
|
Re: أدانة واسعة من كل قطاعات المجتمع السوداني (Re: زهير عثمان حمد)
|
نقلا عن حريات:
Quote: نموذج من إنتهاكات شرطة النظام العام : القبض على مواطن وزوجته بتهمة ممارسة الدعارة !! September 4, 2012
(حريات)
الاخوة /المحترمين بصحيفة حريات
بدءاً أود أن أخبركمl إنني من المطالعين الدائمين لموقع حريات .. وقد وجدت فيكم قدراً كافياً من الشجاعة والطرح البناء المنطقي ، ولعل هذا السبب الأساسي الذي جعلني أطلعكم على هذه المأساة والمصيبة الجارحة في وطن يكاد لا يخلو منه جزء من الجروح والمحن .
المكان : حي الديوم بالخرطوم
الزمان : 28-8-2011 الساعة 11.30 مساء
الوقائع : توقفت عربة دورية شرطة يرأس طاقمها الملازم أول (م) .. أمر الملازم جنوده بتسور منزل الصديق (أسعد ا) .. وإحضار من بداخل المنزل.. وبالفعل كان له ما أراد.. إذ أحضر الجنود سكان المنزل بملابسهم الداخلية.. وهم كما أسلفت الصديق (أسعد ا) وزوجته وسط ذهول الجيران !!! توسل إليهم (أ ا) أن يسمحوا لهم بارتداء ملابسهم .. إلا أنهم زجروه و وهددوه إنه إن لم يلتزم الصمت فلهم طريقتهم التي ستجبره على ذلك.. سألهم ما الأمر.. ردوا بأنه سيعرف في القسم.
وبالفعل عندما وصلوا قسم النظام العام بالديم (وهم شبه عراة) وجدوا أن هنالك بلاغ مدون في حقهم بواسطة الرقيب أول (ا أ) تحت المادة (154) – على ما أعتقد أنها تعني إدارة محل للدعارة-. وعندما أخبرهم أن التي أحضروها معه هي زوجته وأنه يملك قسيمة زواج.. ردوا بأنه كاذب وأن تحرياتهم أثبتت أنه يقيم معها دون رابط شرعي. وما عليه إلا قضاء ليلتهم في الحراسة بحالتهم التي وجدوهم بها ليعرضوا على المحكمة في الصباح . قضى أسعد ليلته وهو في غبن وغضب يزداد كلما نظر إلى زوجته وهي بملابسها الداخلية وسط العساكر والمتشردات والمشبوهات ( هنالك نافذة بين حراسة الرجال وحراسة النساء) وكان يمنى نفسه بأن يغفو أحد الجنود ليأخذ سلاحه و يفتح النار على كل عساكر القسم ( ونحمد الله أنه لم يحقق له أمنيته هذه). أتصل أسعد بأقاربه وأصدقائه وأنا واحد منهم فتم إحضار القسيمة وشهود الزواج..وبعد لحظات حضر عسكري ومعه قميص وبنطلون وأخرج أسعد من الحراسة وطلب منه ارتدائها إلا أنه رفض.. وقال لهم أنتم أحضرتموني هكذا وسأذهب للقاضي هكذا.. أجابه العسكري أنه ليس هناك لا محكمة ولا قاضي وفقط عليه أن ينصرف هو وزوجته (نظر إليها فوجد أنهم قد ألبسوها ملاءة كثوب).. وعندها ذادت ثورة أسعد فأدخلوه لمدير القسم الذي قال له أن ما حدث كان خطأ وأنهم يمكنهم أن يساووا الأمر معه .
حمل اسعد مظلمته وطاف بها على بعض الأجهزة التي من المفترض إنها تقوم بضبط ومحاسبة عمل الشرطة ومن ضمنها وزارة الداخلية .. إلا أنهم كلهم كانوا همهم في الأساس ستر هذه الفضيحة.. وليس إنصاف أسعد ومحاسبة منسوبيهم ولذا كانوا (يأكلون عقله بحلاوة) و يوعدونه بالاستجابة وفي نيتهم غير ذلك..وعندما أخبرته أن يطرح هذه القضية في الصحافة لاسترداد حقه وكرامته التي امتهنت من الذين يفترض أنهم ساهرون على أمنه.. تخاذل كل من طرق بابه من الإعلاميين من إيصال قضيته للرأي العام ( خوفاً من الشرطة أو استخفافا وتشكيكاً بروايته) – نسيت أن أخبرك أن أسعد عامل بسيط وشبه أمي- .. انتهت الوقائع .
الأخ الفاضل أرجو أن يجد الأمر الاهتمام منك لأني أعتقد أنه بالفعل مهم وأنا أنظر له ليس كمشكلة حدثت لصديقي وإنما كقضية تخص وطن بأكمله.. وطن نحبه و نتمنى أن يحبنا وأن نعيش فيه بكامل كرامتنا وإنسانيتنا .
مهندس/ عبدا لرحمن الصادق
ودمتم
خلفية تخص الموضوع :
أسعد يسكن في نفس الحي الذي يسكن في الشرطي الرقيب أول (أ ا) الذي قام بتحرير البلاغ الكاذب .. وهنالك بعض الخلافات النسائية بين زوجة أسعد و والدة الشرطي . |
| |
|
|
|
|
|
|
|