|
|
|
 Re: بمناسبة عيد الحب (Re: ابراهيم عبد الوهاب)
|
ايام قليلة وسيفاجأنا عيد الحب كما تعودنا نحن المتزوجين ان تفاجئنا اعياد كثيرة على حين غفلة ابتداءا من عيد ميلاد الزوجة وانتهاءا بعيد زواجنا الميمون ... فنحن رغم اقتناعنا الذكوري السوداني بان عيد الحب "حركات كفار ساكت" الا ان متابعة زوجاتنا للتلفزيون ومشاهدتهن للدنيا تتزين بالدباديب والقلوب الحمراء تجعلهن في ذلك اليوم "قاعدات على الهبشة" يحلمن او ينتظرن ان يتنازل هذا الثور ليعبر عن مشاعره وحبه لها حتى لو كلمة " احبك" تلك الكلمة السحرية التي تسمعها كثيرا في المسلسلات ويضن بها عليها ذلك المخلوق المسمى زوجا .
وبعيدا عن السياسة اليكم بعض النصائح العملية الدارجية حول كيف تختار هدية لزوجتك في عيد الحب وذلك دون الدخول في المقارنة والمفاضلة بين الاحتفال بعيد الحب مع الزوجة والاحتفال به مع الحبيبة .واليكم خلاصة النصائح .
اولا لو مفكر تهديها عطر او ريحة فاول شي مفروض قبل تمشي تشتريهو تعرف في اوضة النوم والتسريحة وضع الارياح حقتها كيف ، عشان ما يكون عندها كمية وتقوم تجيب ليها واحدة اضافية وبالتالي تديها احساس بانك ما قاعد تلاحظ ليها ولحاجاتها واحتياجاتها ، كمان برضو اهم شئ لو قررت تشتريها انو الريحة البتختارها تعجبك انت في الاول وتكون مريحة ليك لانو حتهريك بيها في الايام المقبلة عشان كدا مفروض تبعد عن الارياح الرخيصة والقوية النفاذة البتعمل التهاب الجيوب الانفية و الارياح التركيب عشان ما تبقى ايامك الجاية كلها عطاس وما تقدر تقول ليها ما تتريحي بيها لانك انت الجايبها .
تانيا لو مفكر تقدم ليها زهور وباقة ورود برضو حقو تفكر شوية وتتذكر انو مرتك دي بتحب الورود ولا لا واخر مرة كانت شايلة ليها وردة متين وهل حصل قبل كدا اديتها ورود ولا لا، لانو لو اول مرة وبحكم انو المراة شكاكة بطبعها فعشان كدا طوالي حيدور في بالها انو في واحدة جابتها ليك بمناسبة عيد الحب وانت عشان كدا جبتها ليها او انك مشيت محل الورد اشتريت ورد لواحدة تانية وقلت اهو بالمرة تشتري للغبيانة الفي البيت دا واحدة ، فالورد عموما بتنفع في بدايات اي علاقة وكل ما كانت المراة صغيرونة في عمرها وحياتها الزوجية فبتفتكرها بغباها نوع من الرومانسية ، اما المخضرمات في الزواج والسن فبعرفن بعد العرس انو الورد لو بالغ بقعد اسبوع وانو القروش البتصرفها في العواليق اخير تديها ليها في يدها ان شاء الله تشتري بيها سفنجة .
ثالثا اما لو كنت مقتدر وفكرت تقدم ليها هدية دهب فدي حاجة كبيرة عند النسوان حتى لو كان خاتم او حلق صغيروني فعشان كدا انسب وقت انك تشتري دهب لمرتك خلال السنة بدل ما تشتري ساكت كدا انك تنتهز المناسبات الزي دي عشان ترضيها عليك ، فالمراة بمجرد ما تديها هدية دهب طوالي بتمسح ليك سيئاتك الحافظاها ليك لمدة سنة قادمة وسنة جاية وتعيش في سبات ونبات لحدي عيد الحب الجاي واهم شئ انو حتبسطها تقبض بيهو الجو قدام اهلها وصاحباتها انو راجلي جاب لي دهب في عيد الحب .
رابعا طبعا في بعض الرجال البتغلبو الحيلة ويفتقد لروح الرومانسية بفكر انو هديتو ليها في هذا اليوم المفترج دا انو يفسحها ، فلو فكرت في كدا حقو اول شي تتذكر انو زمان وقت الخطوبة او بداية العلاقة بينكم كانت بتحب تمشي وين ، واوعك تمشي مكان ما متاكد منو ويطلع انو قبل كدا حصل واختلفتو او اتشاكلتو او اتزاعلتو فيهو ، لانو لو انت ناسي القصة دي هي بتكون متذكراها بتفاصيلها واول ما حتقعد حتوريك الجانب المظلم من القمر وتقول ليك الكلام والمساخة الكتمتها زمان ما قالتها ليك وحترجع متنكد لانها حتبقى ليك كائن بايخ ومسيخ ومهما حاولت تخفف دمك حتلاقيها ما بتتفاعل ، ويفضل انو المحل الحتوديها ليهو يكون فيهو اكل وشراب لانو هي حتكون قاعدة وبتفكر ياربي لما نرجع حسي يقول لي سوي لينا العشا وبكون همها ترجع سريع، فاسلم شي تعشيها برا فالمراة بعد تملى كريشتها من اكل برا بتبقى ظريفة ودمها خفيف وطيعة .اما لو فكرت توديها مكان جديد فاول سؤال تتوقعو انو انت عرفت المكان دا كيف وحصل جيتو ولا لا ولو حصل جيت جيتو مع منو ولشنو وحيتم اخضاعك لتحقيق المحقق كونان خاصة لو قلت جيتو فعشان كدا اسلم شي تدعي وتتظاهر انو اول مرة تشوف المكان دا وعيش معاها الاندهاشة ، وبرضو يفضل الحتات الفيها اكل زي ما قلنا.
خامسا لو فكرت تهديها مكياج او ادوات تجميل فما تحاول تجتهد كتير وتشتري حاجة هي ما حصل استعملتها لانو النسوان ولوفات واي واحدة بتكون متعودة على حاجات محددة من المكياج ما بتغيرها فالقلم البخطط العيون البتستعملو المراة مثلا صعب تغيرو لانها بتكون عملت معاه علاقة نفسية وارتاحت للقلم البتستخدمو عشان كدا تلاقيهو القلم الوحيد الفي العالم البقعد لحدي ما يكمل ، وعلى كدا قيس كريم الاساس البقى بالارقام وكل رقم بنفع لبشرة لونها معين ، فهي ما حتغامر تجرب لون افتح من بشرتها او رقم غير البستعملو ، فعشان كدا حتضطر تختار ليها نفس الحاجات العندها وفي الحالة دي ما في جديد لانو اي شي تاني اكيد ما حتستخدمو ويكون خسارة قروش وبعد يومين بتلاقيهو ادتو لصاحبتها او اختها . عشان كدا ننصح انو ما تفكر في كدا .
سادسا في رجال كتيرين بختصرو الموضوع ومن اقرب حلواني بتناول ليهو كيلو باسطة ومعاه قطع جاتوه ويجي بيها البيت ويفكر يشتري راحة بالو بكيلو الباسطة ، عموما هذه الهدية تفيد في عمل حراك منزلي خصوصا اذا في اولاد وشفع صغار وبرضو حتفيدك في شاي الصباح تاني يوم ، وعموما المراة في روحها طفلة تحب الحلاوة والشوكولاتة وحتفرح بيها فكتر ليها من الشوكولاتة بس اهم شي تصرح انو دي هدية بمناسبة عيد الحب والا حتعتبرك جايبها للشفع وتبقى هدية عيد الحب برضو واجبة عليك .
سابعا اذا كنت اتذكرت موضوع عيد الحب دا وانت بس داخل البيت وما عندك الرغبة ولا المزاج في المرقة مرة تانية لشراء هدية او عمل تغيير في حياتكم المملة فيبقى اسهل حل ليك تقنع ليك من مبلغ مالي كدا وتديهو ليها مع التركيز على حنك اني كنت عاوز اجيب ليك هدية بس خفت ما تعجبك فعشان كدا اشتريها براك ، وغايتو لو اول مرة تديها قروش فممكن يكون فيها شي ايجابي انها ما حتنساها ليك وشي سلبي انها حتشك انك عامل ليك عملة .
ثامنا اما لو بس فكرت تقول ليها كل سنة وانتي طيبة بدون ما تقدم شي او حتى بدون ما تقول ليها شي فحقو تركز على حتة انو عيد الحب دا عيد كفار ما بصح اننا نمارسو وانو وجودها في حياتك بالنسبة ليك عيد ما بحتاج لهدية تافهة تعتبر عنو وكتر في الحنك دا على قدر ما تقدر ولو قدرت ضغطت على لسانك وقلت ليها "احبك" زي حقت ناس المسلسلات ديك تكون انجزت انجاز هام وتقدرتنوم نوم قرير العين هانيها انك ما عملت حاجة حقت كفار وتانيا ما صرفت ولا مليم في شئ وثالثا مرتك نامت مبسوطة بكلمتين حلوات ..
ولكم الخيار
منقول
| |
 
|
|
|
|
|
| |
ابراهيم عبد الوهاب
Mohd Ibrahim
فيس بوك
تويتر
انستقرام
يوتيوب
بنتيريست