توجه أمريكي ومشروع قرار بمنع تصدير الذهب السوداني ..

Quote: في لقاء جماهيري حاشد شوهد السيد ودامبعلو يخطب في أهالي قري ام عصيبات وضنب النملة وأم جوعار الذين بلغ عندهم تردي الخدمات مبلغا مزريا بعد أن شبعوا وعودا جوفاء من السيد ودامبعلو الذي كان يردد لهم في كل عام عبارة (سوف يشهد العام القادم كذا وكذا وأن العام القادم هو عام الرخاء) وفيما يلي خطابه : نحنا عارفنكم بتعانو وبتشربو مع الحمير والغنم ، لاكين نحنا لما جينا ومسكنا الحكومة دي كنا عارفين إنو الطريق الماشين فيهو دا هو طريق صعب، هو طريق الإبتلاءات، طريق الأنبياء والصالحين، نحنا جينا بالشريعة، وعشان كدي كنا عارفين حيستهدفونا، وحيقطعوا عنا الدعم وحيحاربونا بشتى الوسائل، ثم تلا الآية ( لن ترضى عنك اليهود...إلخ الآية الكريمة) ثم واصل نحنا لو إتخلينا عن الشريعة دي قالو بدونا القمح مجان وبدونا الدولارات، وبخلونا في بحبوحة من العيش، المطلوب مننا بس نتخلى ليهم من الشريعة الكاوياهم في مصارينم دي ! ثم طفق السيد ودامبعلو يسأل أهل الاهالي: بتتخلو ليهم عن الشريعة يا جماعة؟؟ والجماهير تجيبه :لالا ، لن نزل ولن نهان ولن نطيع الأمريكان... أها يا جماعة دايرين قمحهم ولا الشريعة؟؟ والجماهير تجيب: دايرين الشريعة ... ودامبعلو يسأل: أها ياجماعة دايرين دولاراتم ولا الشريعة؟؟ والجماهير الهادرة تجيب: دايرين الشريعة.. ويواصل السيد ودامبعلو حديثه: نحنا يا جماعة قلنا ليهم لن نتخلى عن الشريعة وقلنا ليهم شريعة شريعة ولا نموت والإسلام قبل القوت... الجماهير تقاطعه بالهتاف: شريعة شريعة ولا نموت والإسلام قبل القوت قلنا ليهم نربط البطون وما بنتخلى عن شريعتنا، أها يا جماعة بتربطو البطون ولا مابتربطوها؟ ..الجماهير تجيب : بنربطا ... وقلنا ليهم حنقعد جعانين وحفايا وعريانين، ومقطعين، وبنقعد من غير كهربة وموية عشان شريعتنا دي ماتنهبش، أها ياجماعة بتقعدو ولا ما بتقعدو... الجماهير تجيبه : بنقعد حفيانين وعريانين.. يواصل: عشان كدي ياجماعة حكومتنا دي حكومة طهر ونزاهة ونقاء وزهد وتعبد لله سبحانه وتعالى لا لدنيا قد عملنا نحن للدين فداء عشان كدي يا جماعة أصبرو واحتسبو، وما تشتكو الضيق والجوع والعري، وتردي الخدمات لأي مخلوق ولا للمعتمد بتاعكم دا لأنو ربنا سبحانه وتعالى اختاركم انتو لهذه المهمة الصعبة... الجماهير تهتف: لا إله إلا الله ودامبعلو حبيب الله... وفي طريق العودة سأل ودامبعلو أحد مرافقيه: الخطاب كان كيف؟ رد عليه صاحبه: خليهم المساكين ديل أنا زاتي والله قربتا أصدق الله إجازيك يا ودامبعلو لكن بس بيني وبينك كدي الشريعة دي وين هسع؟؟؟ ودامبعلو لم يجب بأي كلمة لكنه أشار إلى لسانه..!!!