Post: #1
Title: شاطِئ الجميرا
Author: أبوبكر عباس
Date: 11-28-2015, 06:20 PM
05:20 PM Nov, 28 2015 سودانيز اون لاين
أبوبكر عباس-الإمارات
مكتبتى
رابط مختصر كلن... كلن.... كلندا صوت التلفون الموبايل- آلو مرحبا- إزيك يا بكّة، يا ضنب الحصان؟- عبد الوهاب الشريف؟ جيت البلد دي متين؟ قاعد وين؟ قاعد وين؟- عجمان- أوكي، ساعة بس بجيك، أقفل يا كديسفي داعي يا أخوانا، أشرح ليكم أنو بكّة الراوي تشابه أسماء ساكت معاي؟في داعي أقول ليكم وهبة دا زميل دراسة لسنة واحدة في الإعدادي؟ وهو طبيب أشتغل عشرين سنة بمستشفى المدينة عرب؟في داعي أقول ليكم جاء الامارات بفتش في شغل ونازل في عجمان مع أهل مرتو؟أعتقد ما في داعي أزحمكم بتفاصيل ثقيلة زي دي بتحصل لكل الناس المغتربة بالإمارات، وخاصة بعد تذاكر فلاي دبي الرخيصة دي، وإرتفاع دولار ود الباوقة!!وما في داعي برضو أقول ليكم التلفون دا حصل متين بالظبط.المهم في الموضوع تفاصيل الوشائج البيني وبين وهبةعليكم الله، رايكم شنو في وشائج دي؟كنت داير أكتب تفاصيل الكيمياء، لكن قبل شوية مشيت شارع الرقة لقيت لي بتاع كنافة اسمو الوشائجقلت: بسٍٍٍسسسس
|
Post: #2
Title: Re: شاطِئ الجميرا
Author: أبوبكر عباس
Date: 11-28-2015, 10:05 PM
Parent: #1
أول مرّة أشوف لي بحر واتحرك لي في رمال بيتش كان عمري ستة وعشرين ولّ سبعة وعشرين سنة، والبحر كان بحر الشمال.اليوم داك اندهشت جنس اندهاشة! وحمدت الله انو أنا ما متّ قبل اللحظة دي!قناة الحزيرة قبل نشرة الأخبار عندهم كورة ذهبية كدا بتجي طايرة وتغطس ليها في بحر، وتطلع تاني، وبعدين الكاميرا بتركز على انعكاس اشعة الشمس على المياه الصافية، أقصد انكسار الاشعة في المياه واعتقد ان الملح الذائب في المويه هو البخلي منظر الانكسار دا، أجمل من المذيعات ما عدا إيمان بنورا أو عياش!أعتقد انو أجمل منظر سينمائي تحتفظ به ذاكرتي هو : اللقطة البشوف فيها بطل فيلمcider house rulesللمحيط لأول مرّة وكانت كمان معاهو شارلز ثيرون، لكن كانت عيانة في اللقطةلو ما كدا كنت قلت علي اللقطة دي: زي إبن العميد:في بحور الشوق مسافرمسافر
|
Post: #3
Title: Re: شاطِئ الجميرا
Author: أبوبكر عباس
Date: 11-28-2015, 10:21 PM
Parent: #2
وصلت لوهبة في بيت نسيبو مع فطور الجمعة، واتخيلو فطور جمعة بتاع عرب جزيرة لنسيب؟!عرفت انو الزول دا وصل الخميس، بعد القهوة همست ليهو: لو ما مرقنا طوالي الآن؛ عربك ديل بزرونا بالجمعة!قلت لأبو النسب سيد الفطور المجيّه: معليش يا مولانا، ح ننزل عشرة دقائق وبنرجعقال لي أخدوا راحتكم يا مولانا، بنصلي في جامع الحميدية
|
Post: #4
Title: Re: شاطِئ الجميرا
Author: أبوبكر عباس
Date: 11-28-2015, 10:34 PM
Parent: #3
الأصحاب البتلاقيهم بعد سنين طويلة نوعين:
نوع يقع فيك سلام دائري لحدي ما يملخ ليك يدك، ويسألك عن أهلك، والأصحاب المشتركين واحد واحد، وكل ما تقول ليهو فلان داك مات قبل عشرين سنة، يقوم علي حيلو يخلعك بالفاتحة، وبعد فاتحتك يشيّلك تاني فاتحة لجدو المرادف لحبوبتك!
ونوع يبدا معاك كأنو فارقك أمس ولو سألك عن حبوتك الحكّاية ديك كيفها؟ وقلت ليهو ماتت قبل سبعة سنين، يقول ليك:
والله يا بكّة، ما قصرت، الله يدينا عمرها.
أها وهبة دا من النوع التاني، زايد انو بالرغم من انو عربي غرب جزيرة، لكنو بحب الخصوصية خالص من زمنو الطالب، ما فلهمة دكاترة مكتسبة!
|
Post: #7
Title: Re: شاطِئ الجميرا
Author: علي دفع الله
Date: 11-29-2015, 06:17 AM
Parent: #3
(عربك ديل بزرونا بالجمعة)هههههههههههوالله كتلتني بي ضحكة واتخيلت منظرك وضيقك للمخارجة...بكري انت زول لذيذ والله..
|
Post: #5
Title: Re: شاطِئ الجميرا
Author: سامي سالم
Date: 11-29-2015, 05:40 AM
Parent: #1
تحية وتجلة لك الرائع أبوبكر عباس ... مستمتعين بالمشاهد دي .. ارح كمل مشوارك
|
Post: #6
Title: Re: شاطِئ الجميرا
Author: أبوبكر عباس
Date: 11-29-2015, 05:58 AM
Parent: #5
يا اخوانا، لمان ألقى مداخلات زي بتاعت سامي سالم دي من نوع يا رائع دي وكمان مكتوبة بريشة؛ شيطان الكتابة بتاعي بتعفرت.تسلم يا سالم الأرباب
|
Post: #8
Title: Re: شاطِئ الجميرا
Author: Haytham Ghaly
Date: 11-29-2015, 06:31 AM
Parent: #6
| Quote: وكل ما تقول ليهو فلان داك مات قبل عشرين سنة، يقوم علي حيلو يخلعك بالفاتحة، وبعد فاتحتك يشيّلك تاني فاتحة لجدو المرادف لحبوبتك! |
والله انا اكتر حاجة محيراني في العادات السودانية شيل الفاتحة داما موجود في أي مجتمع غير مجتمعنا السوداني مع انها عادة جميلة جداً ومعبرة الا ان شروطها صعبة جداً وبسبب هذه الشروط تحدث فيها غالباً لخبطات وربكاتمضحكة في مكان لا يحتمل الضحكسلامات يا مستنير يا رااااااااااايع وان شاءالله بعد محاولة الزوغة من الجمعة يكونو زروك
|
Post: #9
Title: Re: شاطِئ الجميرا
Author: معتصم ضرغام
Date: 11-29-2015, 07:34 AM
Parent: #8
ايه الدنيا ايه غير لمة ناس في خير او ساعة حزن تحياتي وتمناتنا لصديقك الدكتور بالتوفيق
|
Post: #10
Title: Re: شاطِئ الجميرا
Author: محمد المرتضى حامد
Date: 11-29-2015, 09:05 AM
Parent: #9
| Quote: ما عدا إيمان بنورا أو عياش |
عياد..عياد.. عيااااااد..ياخ لولا مخافة ربنا كان قلت ليك دي تتطلب سجدة سهو..-كنت عايز أسكت ريثما تكمل لكن مع (عياش) دي ما قدرت ..واصل..حا ننتظر، نعمل شنو..
|
Post: #11
Title: Re: شاطِئ الجميرا
Author: أبوبكر عباس
Date: 11-29-2015, 09:25 AM
Parent: #10
فعلا يا مولانا تستحق اعتذار كبير واعتذار يمتد ليشمل زميلها معاوية الزبير.بالله شوف أنا صديق مقرب من معاوية زميل إيمان عياد!دائما قاعد أقول للناس في السودان:لا تيأسالله فيالبغفر لي يا مولانا، انو أنا في بوست واحد جمعت ليكم فيهو المذيعة الجميلة مع ثيرون وشاطىء الجميراأعمل ليكم شنو أكتر من كدا؟!
|
Post: #12
Title: Re: شاطِئ الجميرا
Author: أبوبكر عباس
Date: 11-29-2015, 09:41 AM
Parent: #11
قلت ليهو داير تصلي الجمعة ولّ قاصر؟رد لي بتردد: دايرمشينا استحمينا ووديدتو مسجد الجميرا الجنب كنتاكي، مسجد عبارة عن تحفة فنيّة خالصة، وإتّا في الخطبة بتكون مبرعم في الزخارف الذهبية الأنيقة والخطبة تمر عليك من غير ملل ولا عذاب القبر!بعد الصلاة كان مندهش، قلت ليهو هل حصل عمرّت؟قال لي سفرتي الأمس دي أول مرّة أطلع فيها من السودانقلت ليهو: بورتسودان شفتها؟- أبدا، أرقى حتات شفتهم مدني والخرطوم، الباقي كلو نوع نيالا، الحصاحيصا والمدينة عرب.قلت في سري: بس الليلة إلا أخلعو ليك بالبحر، وتذكرت الملايين القاعديين بأم بدة ودار السلام، أقصى حدود المتعة عندهم عوضية سمك!!
|
Post: #13
Title: Re: شاطِئ الجميرا
Author: أيمن الطيب
Date: 11-29-2015, 09:57 AM
Parent: #12
سلامات يا أبوبكر عباس,,| Quote: قلت في سري: بس الليلة إلا أخلعو ليك بالبحر، وتذكرت الملايين القاعديين بأم بدة ودار السلام، أقصى حدود المتعة عندهم عوضية سمك!! |
أنت والله سادي,,,إحتمال صاحبك دا لو حام معاك بالليل تعوقو ,,تحياتى ومتابعة,,,
|
Post: #14
Title: Re: شاطِئ الجميرا
Author: احمد التجانى احمد
Date: 11-29-2015, 10:01 AM
Parent: #12
| Quote: قلت في سري: بس الليلة إلا أخلعو ليك بالبحر، وتذكرت الملايين القاعديين بأم بدة ودار السلام، أقصى حدود المتعة عندهم عوضية سمك!! |
ابكر يا اديب يا مبدعوطيب ناس كمبو السدر وناس جاركو وناس الفعج البشير يقولوا شنو , ديل ممكن تكون اقصى امانيهم يشوفوا امبدة , ياخ خليك من ديل مرة المدرسة الاهلية ( أ ) ودتنا رحلة لمعرض الخرطوم , عمر اخوك لو ما انا كنت الدليل بتاعه كان راح ليكم فى الخرطوم , طبعا جزور طيبة الخواض وديم القراى ضاربة عمقها فيكم
|
Post: #15
Title: Re: شاطِئ الجميرا
Author: محمد المرتضى حامد
Date: 11-29-2015, 10:03 AM
Parent: #12
أسماك ياخ .. أسماك.. أسماااااك- | Quote: مسجد عبارة عن تحفة فنيّة خالصة، وإتّا في الخطبة بتكون مبرعم في الزخارف الذهبية الأنيقة والخطبة تمر عليك من غير ملل ولا عذاب القبر! |
أوسكار يا ودعباس..علي الحلال مبالغه..ذكرتني قصة صديقنا بدر الدين محمد دفع الله المشهور في أزقة المنبر ب(بدر الدين شنا)، مريخابي قح،قال يوم مشى لجماعه عزابه وطلب منهم مصلايه ، جابو ليهو جريده ، أقام الصلاة وفي الركوع قرأ بالبونطالعريض ( إعتزاااااال حاااااامد بريمه ) فما كان منه إلا أن قرأ الخبر صفحه كاملة ثم .. الرفع منه.
|
Post: #16
Title: Re: شاطِئ الجميرا
Author: أبوبكر عباس
Date: 11-29-2015, 12:15 PM
Parent: #15
المستنير علي دفع الله والمستنير هيثم غالي، شرفتوناالإجازة الفاتت دي يا هيثم، مشيت لي لواحد نسيبنا شلت معاهو الفاتحة في أبوهو بالشجرة، بعد خلصنا الفاتحة نزل يدو وعمل ليهو حركة زي بتاعة التعشيقة، ورفع معاي فاتحة تانية، نظام الاولي حقتنا والتانيةا للوفاة بتاعتكم الليها تلاتة سنين ديك!!بقيت أسلم عليهو وأضحك
|
Post: #17
Title: Re: شاطِئ الجميرا
Author: MOHAMMED ELSHEIKH
Date: 11-29-2015, 12:46 PM
Parent: #16
| Quote: مسجد عبارة عن تحفة فنيّة خالصة، وإتّا في الخطبة بتكون مبرعم في الزخارف الذهبية الأنيقة والخطبة تمر عليك من غير ملل ولا عذاب القبر! |
ان شاء الله تصلي فيك حبوبة الحرم بعد دا.حبوبة الحرم سألناها:"مالك مابتصلي ياحبوبة ؟"قالت لينا :" والله يا ولادي مكجنة دا الفقيس"
|
Post: #18
Title: Re: شاطِئ الجميرا
Author: معاوية الزبير
Date: 11-29-2015, 03:02 PM
Parent: #17
 اختارت مؤسسة المرأة العربية الإعلامية بقناة الجزيرة إيمان عياد سفيرة للنوايا الحسنة للمرأة والطفل في العالم العربي، تقديرا لمكانتها المتميزة ومسيرتها في الإعلام العربي.وقال رئيس مجلس إدارة مؤسسة المرأة العربية الدكتور كريم فرمان إن مهمة السفيرة تنحصر في حشد الدعم مع المنظمات والصناديق التنموية والإنسانية لمبادرة إنشاء وتجهيز مستشفى لعلاج سرطان الثدي تقيمه المؤسسة في العاصمة السودانية الخرطوم بالتعاون مع مؤسسة سند الخيرية.وتعاني النساء في السودان من ارتفاع نسبة الإصابة بهذا المرض، بسبب نقص التوعية الصحية، وقلة خدمات الكشف المبكر، إضافة إلى الافتقار لمنشأة طبية تختص بهذا النوع من الأمراض.وأضاف فرمان أنه سيتم توشيح السفيرة إيمان عياد بوشاح المهمة ورسالة التكليف في احتفالية كبيرة تقام في الخرطوم نهاية ديسمبر/كانون الأول القادم.وتنتمي إيمان عياد -وهي فلسطينية أميركية- إلى جيل المؤسسين في شبكة الجزيرة الإعلامية التي التحقت بها عام ١٩٩٨.وقد تجاوزت مسيرتها الإعلامية العقدين عملت خلالها صحافية ومذيعة أخبار وبرامج في قنوات عربية منها قناة دبي والشبكة العربية الأميركية من واشنطن، وفي مؤسسات إعلامية خاصّة.وفي العام ٢٠٠٦، حازت عياد على جائزة المهرجان العربي لوسائل الإعلام عن أفضل مذيعات الأخبار على القنوات الفضائية.---بعد اذنك طبعا أقحمنا هذه المداخلة
|
Post: #19
Title: Re: شاطِئ الجميرا
Author: willeim andrea
Date: 11-29-2015, 04:18 PM
Parent: #18
| Quote: قلت في سري: بس الليلة إلا أخلعو ليك بالبحر، وتذكرت الملايين القاعديين بأم بدة ودار السلام، أقصى حدود المتعة عندهم عوضية سمك!! |
|
Post: #20
Title: Re: شاطِئ الجميرا
Author: محمد على طه الملك
Date: 11-29-2015, 07:19 PM
Parent: #19
يا معاوية ..أيوه إتا ما بتاع كندا ..أصلا داك كلما يشوفلو بوست الليلك بلبد للمشاركين ..حكمة الله نيتو بتمشي حتى في الكافر ولازاما واحد يجيب اسمو بدلك..يابكور بتاع كندا ده برضو ضمو لى لستة أبوحجار الزول دا عملو الإسفيري ما بقع واطا ..هسه يا معاوية أيوه إتا يعني فرحان أوي عشان جاب سيرتك مع بت عماد ؟أعمل حسابك الزول دا أكيد مقدم السبت ..أهو قت لييييك..:والله يا ( بابكر ) لو ما خايف من ناس مدني ؤ بالذات ناس( الفعج البشير يقولو شنو ) كان شلتك بالأحضان..الله يسعدكم . .يللا قول.
|
Post: #21
Title: Re: شاطِئ الجميرا
Author: محمد على طه الملك
Date: 11-29-2015, 07:34 PM
Parent: #20
خلاص عيااااااد إلا زعلك يا مولانا ود المرضى.
|
Post: #22
Title: Re: شاطِئ الجميرا
Author: أبوبكر عباس
Date: 11-29-2015, 11:31 PM
Parent: #21
يا أخوانا، صديقي المناضل الشريف دا داير أحكي عن نضال خدمتو الناصع وذكرياتنا مع ضنب الحصان ونحن قاعدين في البيتش، لكن بعد أنزل مقطع فيديو صغير من فيلم السايدر.الحقيقة انو أنا حاسي بورطة فنيّة أدبية سردية في البوست دا!! خايفها تجيب لي مشكلة نقدية بعدين والناس بتجمع في أعمالي الكاملة.مرّة يا أحمد التجاني، سألت صديق الفعج قريبنا بتاع الدكان الفي بيتنا داك، عن الفرق بين مدني والفعج؟ قال لي الفرق بس المقاعد الخاتنها في كورنيش النيل الجنب المديريةقلت ليهو: والله، مدني ثقفتك!
|
Post: #23
Title: Re: شاطِئ الجميرا
Author: معاوية الزبير
Date: 11-30-2015, 00:17 AM
Parent: #22
نقد شنو يا ابوبكري ياخ، أحسن النقد ما صدر عن محبة أو كما قال صاحب (م ه ش)الناس دي (وبيناتم نقاد) بحبوك ومستمتعين بهذا النوع من فرائد الأدبلكن من ناحية ح يتعبوا في تجميعو بعدين، دي ما فيها كلامانت شغال ليهم تشتيت شديد يا فرده: دخلت نملة اخدت حبة مشت زرعتا في حته تانية وعيييكغايتو بدل النقاد، أنا أرشح ليك لُقّاط الدهب بتاعين الشماليةبنجِّضو شغلك دا
|
Post: #24
Title: Re: شاطِئ الجميرا
Author: Haytham Ghaly
Date: 11-30-2015, 04:48 AM
Parent: #23
| Quote: بعد خلصنا الفاتحة نزل يدو وعمل ليهو حركة زي بتاعة التعشيقة، ورفع معاي فاتحة تانية، نظام الاولي حقتنا والتانيةا للوفاة بتاعتكم الليها تلاتة سنين ديك!! |
ههههههههههههتعرف يا بكور انا قبل كدا اتسببت في لخبطة فاتحة فيها حوالي أربعة اشخاص القصة كالاتي:انا ومعاي اتنين من أبناء اهلي ومعانا خالنا الكبير وكنا بنخاف منو موت (له الرحمة والمغفرة) المهم مشينا نشيلالفاتحة مع جماعة بلدياتنا ونعزيهم في وفاة عزيز لهم اتاري في عادة عند اهالينا ديل لمن الناس تكون ليها فترة طويلةما اتلاقت بتشيل الفاتحة مرتين اها انا من اول فاتحة رحت حاضن ليك الزول وبديت اسلم عليهو وجماعتي بهناك رافعين الفاتحة التانيةوهو بقى حاضني بي يد وشايل الفاتحة مع التانين باليد التانية .. من اليوم داك حلفت تاني ما اشيل أي فاتحة
|
Post: #25
Title: Re: شاطِئ الجميرا
Author: عبدالكريم أحمد الامين
Date: 11-30-2015, 06:00 AM
Parent: #24
** ابوبكر..** سلام وصباحك خير..## ياخوى ماكان تبدأ ليهو بالشواطى المُتحجبه وإنت جاى من عجمان ... لكن من البدايه توصلو لمرحلة الإستغراش .. ** وهاك دى :- مكتبى كان على مرمى حجر من شاطئ الجميرا فى مبنى (ذا فليج) ومن شباك المكتب يمكنك أن تشاهد كل الجمالالعارى جزئياً والمُتعرى كليا ,,, وفى يوم حضر صديق لى وحانت منه إلتفاتا على الشاطئ وشاهد إحداهن كما خلقها خالقها وكان حديثعهد بدبى ولا ازلت أذكر تعليقه (البلد دى مافيها نظام عام) ,,, والله متجدعين إنتو هنا وبطاطريكم مليانه **
|
Post: #26
Title: Re: شاطِئ الجميرا
Author: أبوبكر عباس
Date: 11-30-2015, 08:33 AM
Parent: #25
كيف تختار زاوية رؤية مدهشة توصل بيها زول أول مرّة يشوف بحر؟
قد يكون شافوا في السينما والتلفزيون، لكن الدهشة البتصيب الزول أول مرة يشوف بيتش مفتوح مع مياه زرقاء على إمتداد البصر تظل عالقة بذاكرتك لسنين!!
شوفو المصور بتاع الفيلم إختار الزاوية دي عشان يدهش بطل فيلم سايدر هاوس:
واحد ينزل لينا الرابط دا وشوفو اللقطة من الدقيقة 1:38
https://www.youtube.com/watch؟v=Jq0b2Bkind4https://www.youtube.com/watch؟v=Jq0b2Bkind4
شاطىء الجميرا بدبي من أجمل الشواطئ في العالم والعجب من نوفمير لحدي مارس
|
Post: #27
Title: Re: شاطِئ الجميرا
Author: محمد المرتضى حامد
Date: 11-30-2015, 09:07 AM
Parent: #26
أحسن تغيِّر المكتب  -تحياتنا أستاذنا عبدالكريم.
|
Post: #28
Title: Re: شاطِئ الجميرا
Author: Faisal Saad
Date: 12-05-2015, 06:32 PM
Parent: #27
السلام و التحايا للجميع هنا. يا مستنير اخبارك و وين اراضيك..نناشد الحبيب بكري ابوبكر بزيادة مخصصاتك حتى لا تطيلالغياب عن رعاية و سقاية و دردرة هذه البوستات الدرر، انشاء الله صاحبك وديتوا الفنانيين و استاربكس في خضم هذهالجولات البحرية حول الاسماك و كدا..
|
|