|
|
 بكريك صاول الراعي وملى الهدّارة
|
10:18 AM Oct, 22 2015
سودانيز اون لاين
أبوبكر عباس-الإمارات
مكتبتى فى سودانيزاونلاين
بوست تثقيفي:
بكريك صاول الراعي وملى الهدارة
مرّة يسيها لودة ومرّة دق زُمبارة
يخاطب الشاعر البعير الهايج حديثا (بداية موسم التزاوج):
بكريك، أي هياجك البكر، صاول الراعي، أي دخل البعير في تحدي ومُحادرة وترصد مع راعي قطيع النوق وأصبحت هناك منافسة بينهم في قيادة النوق وتحديد وجهتن.
وملى الهدارة، أي نفخ الدلة أو الدلاعة وهي لهاة البعير يخرجها في موسم الهياج (rutting season) وينفخها بالهواء واللعاب.
مرّة يسيها لودة، يقصد مرة يسوي صوت الهياج من اللوزة من غير إخراج للهاة ويكون الصوت مكتوم، ومرة دق زمبارة يخرج فيهو صوت الهدير من خلال اللهاة المنفوخة
|
|
 
|
|
|
|
|
|
|
|
Re: بكريك صاول الراعي وملى الهدّارة (Re: أبوبكر عباس)
|
تحياتي بكري
المعني ما وقع لي كويس
صاول الراعي في ظني جفله وجعله يثب في حركة لا شعورية من فجاءة الصوت وقوته .. الهدارة حلاقيم الجمل حين يهدر وقت التزاوج
وفي المثل
الجمل لامن يكبر بهدر بارك
ارجو ان اكون في صميم البوست
واتمني ان يمر صديقي العبيد هنا
فهو موسوعة في ذلك
| |
|
|
|
|
|
|
|
|
|
Re: بكريك صاول الراعي وملى الهدّارة (Re: أبوبكر عباس)
|
موسم الهياج هو الموسم الذي يكون الفحل في ذروته الجنسية، ويقوم يتلقيح الإناث وحتى بالنسبة للإناث بكون المبايض بتاعتن نشيطات لإنتاج البويضات القابلة للتبويض (موسميات).
موس الهياج يختلف من مكان لآخر، لكن بتفقوا انو بكون في موسم براد. في الخليج يبدأ في شهر سبتمبر وينتهي شهر أبريل
الناقة بتلد في 385 يوم كمتوسط وقد تلد في سنة أو تلتاشر شهر كحد أقصى، لكن الفيل بصل 22 شهروالضرع بتاعو أمامي!
عندي نظرية أنو الآية بتاعة: "إِنَّ عِدَّةَ الشُّهُورِ عِنْدَ اللَّهِ اثْنَا عَشَرَ شَهْرًا فِي كِتَابِ اللَّهِ يَوْمَ خَلَقَ السَّمَاوَاتِ وَالْأَرْضَ مِنْهَا أَرْبَعَةٌ حُرُمٌ ۚ ذَٰلِكَ الدِّينُ الْقَيِّمُ"
خربت التقويم الكان سايد قبل الأسلام والكان فيهو توامة مع الشهور الشمسية؟؟
بمعنى انو الشهر العربي كان بجي في نفس الفصل الشمسي
رمضان كان بجي في الحر
شوال بكون كان شهر عشرة أو تسعة
جمادى في البرد
وربيع في الربيع
وكدا
وقصة إجتماع العرب لتسمية الشهور في الجاهلية أفتكر دجل ساكت!!
كيف والسنة القمرية أصغر من الشمسية؟
وعلاقة الموضوع دا بالهياج والنياق شنو؟
سألتوني؟
| |
|
|
|
|
|
|
|
|
|
Re: بكريك صاول الراعي وملى الهدّارة (Re: أبوبكر عباس)
|
ود بادي قال عن ود الشايقي:
زرعتو ما بتقع واطة
وما بخليلو مرةً بور
البعير الهايج بفرز فيرمونات وهرمون التستيرون في البول ومن غدّة في دومة الراس اسمها: Poll gland
الإفرازات دي بتخلي النياق تحيل وتنتج بويضات قابلة للتخصيب
أها هو (البعير) بشمشمن وبعرف الحائل وبقوم بالواجب وفي معظم الأحيان بتلقح ما لم يكون هناك عائق آخر!
عشان كدا ود بادي قال: زرعتو ما بتقع واطة وود الشايقي خبير
| |
|
|
|
|
|
|
|
|
|
Re: بكريك صاول الراعي وملى الهدّارة (Re: أبوبكر عباس)
|
مرّة كنت قاعد لي مع واحدة في كافتريا الجامعة الأهلية أول ما نقلوها حمد النيل وكنت الأيام ديك خريج وعاطل.
أها في ونستنا ديك وفي نص الليمون، سمعت دكتور الحبر يوسف نور الدائم، من داخل القاعدة الجنب الكافتريا
بقول في الآية الفوق ديك وبشرح ليش نزلت:
قال قبل الإسلام كان في جماعة اسمهم "النسأة" كان بتحكموا في مواقيت الشهور الحرم وبالتالي مواعيد الحج،
مرات يقدموهو ومرات يأخروهو
عشان كدا جات الآية حسمت الموضوع دا.
في خلطتي ديك، السبب دا ما ريحني وظلّ معلق بين الكافتريا وحمد النيل لزمن طويل وأبيت أبدا أدفنو!!
| |
|
|
|
|
|
|
|
|
|
Re: بكريك صاول الراعي وملى الهدّارة (Re: أبوبكر عباس)
|
كااااااااااك. وتاني. كاااااااااااك
قلت لي موسم. شنو
ياخي. موسمك. تسميتو. بيكتبهامنصور. المفتاح. زمن سنة. حفروا. البحر والعالم. تتفاعل. معاها. زي. الترتيب
شكلك. اخر عمرك. طلعت. حنكوش. ساكت. يا عّم
اكتب. السفاد. سفاد. مسافدة. وأضمن. ليك الطيب. شيقوق. منصور. المفتاح. عبيد. الطيب. ماخفي. من الراعاوية. ناس. الخلا. ياخي. حتى. بريمة. ممكن يجيك. طائر. ويقول. ليك ابكر. الطويل. اسلم وبَقى. يتكلم. لغة. الرواعية
في مرة. تانيه نخت. ليك. طمبور. وشوية. حراري. عشان. تشوف. الكرير. بتاع. موسم. الهناي. لمن يبقى. غنا. بنادم. بيصير. كيف
سلامات. يا صديقي. ونحن. ناس الخلا. الحاجات عندنا. هولسيتك. زي مايعادل يقول ليكم. ابكر آدم اسماعيل. وأنتو عاملين طوالي رايحين
كبر
| |
|
|
|
|
|
|
|
|
Re: بكريك صاول الراعي وملى الهدّارة (Re: Kabar)
|
قصة حنكوش دي ما بتغالطوا فيها اتنين!
إحذر الحنكوش العالم
السفاد هو المجامعة نفسها
موسم الهياج
حسب معرفتي الما ساهلة ما في بدو بقولوا ليها موسم سفاد
كان في الخليج ولّ السودان أو ارتريا
| |
|
|
|
|
|
|
|
|
|
Re: بكريك صاول الراعي وملى الهدّارة (Re: عبدالحفيظ ابوسن)
|
سلام يا أبسن
غايتو في الخليج اسمها الدواس كان للناس أو البوش.
وممكن عادي يجيك بدوي في العيادة يشكو من انو عندو قعود بدوس الأرض دوم؟؟
تصدق عندنا ليها علاج؟!
مرّة صادفت داخل أسانسير العمارة راجل إماراتي وزوجتو وكان معاي بتي عمرها أربعة سنوات، جيت أضغط على زر الطابق، الشافعة مسكت يدي وقالت لي: خليني أدوس أنا
الراجل وزوجتو إتفقعوا من الضحك!
| |
|
|
|
|
|
|
|
|
|
Re: بكريك صاول الراعي وملى الهدّارة (Re: أبوبكر عباس)
|
التقويم العبري:
اليهود توقيتم قمري، لكن شهورم القمرية تأتي في نفس وقتها الشمسي، كيف؟
كل تسعة عشر عام بختارو سبعة سنين يكون فيهن تلتاشر شهر والشهر الزيادة دا بسموهو آزار الثاني أو الآخر.
حساب تقريبي:
19 سنة شمسية = 6935 يوم
19 سنة قمرية عربية = 6726 يوم
سبعة شهور قمرية = 210 يوم
19 سنة قمرية يهودية = 6726 + 210 = 6936 يوم
| |
|
|
|
|
|
|
|
|
|
Re: بكريك صاول الراعي وملى الهدّارة (Re: أبوبكر عباس)
|
الشولة وشوال:
الصديق محسن خالد كان شغال في دلالات رمز الشولة في الطبيعة وكنت متابعو وأتشوق لمعرفة ما يدور في رأسه!
ساعدته ببعض الصور وكانت مشاركتي معه بصور لنياق تعقد ذيلها كعلامة على إكتمال عملية التلقيح
معروف لدى مربي الإبل أن الناقة تشول بذيلها كعلامة من علامات "الحمل"
تشول زي شولة العقرب (الصورة):
ويقولوا ليك الناقة شوّلت وتعني أنها لقحت، وتقوم بعملية التشويل حبن يقترب منها الفحل أو تخاف لأي سبب آخر
| |
|
|
|
|
|
|
|
|
|
Re: بكريك صاول الراعي وملى الهدّارة (Re: أبوبكر عباس)
|
السلام و التحابا للخبير الاجنبي المراقب
و الجلابي الحلو ابكر ود عباس و ضيوفه:
" و منكم نستفيد معلومات و علوم"
قلت لي حتى الابل عندها مواسم هياج،
طيب البني ادم المغلوب على امره مالو
هايج السنة كلها يا كافي البلاء !!
| |
|
|
|
|
|
|
|
|
|
Re: بكريك صاول الراعي وملى الهدّارة (Re: Faisal Saad)
|
مثلك لا يحدث ولكن شوف كيف الحيوانات ترغب في الجنس .. يعني الانثي لو لم تكن جاهزة للحمل لا ترغب في الذكر في موسم العشار .. او كانت شايل او دارة .. هدف المعاشرة الحمل . والامر دة حتي في الطيور .
حكي لي واحد عن عمو راعي . عرس جديد والمرة حملت .. فعاملها معاملة البقر من حملت هجر فراشها
قال لي مرة بالليل جاتو .. جية مرة لي راجل
اندهش وقال ليها
وا انت حامل وحايل
| |
|
|
|
|
|
|
|
|
|
Re: بكريك صاول الراعي وملى الهدّارة (Re: عبدالحفيظ ابوسن)
|
أعتقد انو اليهود قبل الاسلام كانوا ماسكين الزمن، وداسين طريقة حسابم دي من العوام، وكانوا هم من يحدد بداية السنة وفق تقريمهم الموروث من البابليين.
ظهرت تسميه الشهور وارتبطت بالمناخ والمناسبات
ذو الحجة
محرم
جمادى
ربيع
رمضان
شوال وهو هدفي من اللفة الطويلة واعتقد انو هذا الاسم مرتبط بلقاح الإبل وتشويل ذيلها وقد يكون هناك ارتباط ايضا بشولة نجوم العقرب.
ثم جاء الاسلام وكانت تلك الآية فاصلة بين المعرفة والاعتقاد وصار التقويم القمري العربي عديم الجدوى المادية؟؟؟
دا اجتهاد مني لتصور ما حدث
| |
|
|
|
|
|
|
|
|
|
Re: بكريك صاول الراعي وملى الهدّارة (Re: Kabar)
|
يا كبر
المستنير صحيحا لغويا
ضمن تنازع الفقهاء في حد الرجم او آية الرجم
واصرار عمر بن الخطاب علي تطبيق الرجم
قال ابي بن كعب ( اليس اتيتني وانا استقرئها رسول الله ، فدفعت في صدري
وقلت : تستقرئه آية الرجم ، وهم يتسافدون تسافد الحمر )
فالكلمة صححية
| |
|
|
|
|
|
|
|
|
|
Re: بكريك صاول الراعي وملى الهدّارة (Re: MAHJOOP ALI)
|
للجمل هدرة وفدرة
والهدرة عندنا في السودان هي فترة المصاع او المصعان ويقول اعراب السودان ان فلان مصع اي صار قليل الادب ومتكبر
الهدرة تبدأ تصاعديا في اول الخريف وهنا يبدأ الخلاف لعرب المشرق والمغرب والصحراء حول المواسم وتسمياتها فمثلا اعراب المحاميد في الصحراء الكبري يعتقدون ان الهدرة تبدأ في موسم المطر (الخريف)وهو شهر اعسطس او يوليو واحيانا عندما يزحفون الي الغرب الاعلي من الصحراء يبدأ موسم الشتاء الحامل للمطر وما يسمي الخريف )نوفمبر وديسمبر)عندهم تبدأ الهدرة وتتصاعد وتبلغ اشدها في منتصف الخريف او الشتاء علي حسب تسمية الموسم في المكان المحدد ويكون الجمل في حالة الهياج الشديد اذ انه لا يال ويكون مكترثا لرجولته فقط وتبدأ دومات الجمل في السيلان لسائل اسود اللون ويشول ويضرب ظهره بذنبة حاملا البول والبراز الي ظهرة في تحد
في هذه الفترة تبدأ عملية ضراب البل (النياق) والمعاشرة وتسمي السفادة والتقريع
هناك جمل عنة ويقول ان الرجل عنون يهدر وهو بارك وده معناهو ان فلان ده قاعد ساكت
ومثال اخر ياخذه الاعراب في بادية المحاميد ان فلان هدر وفدر وده الزول البيحلم بالزواج وبعدين هدأ
وهناك اشعار حول المصاع وا لهدرة فمثلا يقول الشاعر:
ازرق كركر يالنوايحك فاحن
ضراع الماصع المنو المخويل ضاحن
جودو الحلب خلو القلوب يرتاحن
* الحلب المقصود بيهن النصاري من المستعمرين
| |
|
|
|
|
|
|
|
|
|
Re: بكريك صاول الراعي وملى الهدّارة (Re: Elsanosi Badr)
|
دعوت صديقي دكتور البوش الشاب المستنير الأعظم أحمد عبد الرحمن إسماعيل للمشاركة في هذا البوست، فأرسل لي هذه المشاركة والتي هددت مكانتي ومكانة كبر بالحوش.
مشاركة الدكتور أحمد عبد الرحمن أخصائي الإبل بدبي:
"فليحتفل المنبر و ليقدم الاخوة المثقفين بدأً من بكري ابوبكر لاحدث منضم بمناسبة كتابتي لهذه المداخلة- و هي الاولي لي في هذا المنبر- و ذلك كل حسب طريقته في الاحتفال ناس البيبسي و ناس التورتات و ناس الطرب الاصيل و ناس التكيلات ....الخ.... و ليذبح ابابكر ابن عباس بعيره (البكري/الهادر/الهايج/الماصع/القارح) احتفاءا بهذه المناسبة لان الحوار رغم حب المتقدميين من الاعراب و البدو للحمه فهو عند الاقدميين مليخ و حتي الاضحية لا تجزي الا لمن تجاوز مرحلة الطفولة من الحيوانات و اعتقد ان لهذا دلالات كثيرة. و طبعا للاحتفال سبب محتمل و ضرورة موجبة فربما تشهد هذه اللحظة مولد كاتب عظيم في الاسافير فتكونوا قد شاركتم باحتفالكم هذا في ميلاده و قد يكون احتفالا بغرض التشجيع لشحذ همة الكاتب العظيم فتكونوا بذلك اسهمتم في انجازه و قد يكون لاسباب اخري مثل دعوة احتفل انت في المنبر و احتفل و خليك سوداني و لكم الحق في اختيار السبب المناسب.
سأختصر المقدمة حتي نضمن حسن النتائج و ادلف لموضوع البوست و احي الكاتب و المتفاعلين معه علي هذه الاختيارات غير التقليدية لمواضيع يمكن من خلالها الولوج لابواب متعددة و الخروج بافكار متنوعة. بداية بموضوع التكاثر و الذي يعتبر من فطرة الاحياء نبات او حيوان بداية من وحيدة الخلية الي الكائنات الفخيمة كالانسان و الجمل. و لعل الانسان يميز نفسه عن بقية هذه المخلوقات بقدرته التكاثر بمعزل عن معظم الظروف البيئية التي تتحكم في التزاوج و موسمه. فنجد الكلاب و القطط و غيرها لها مواسم حيال و تزاوج محددة و هي غالبا ما تحكم بدرجة الحرارة و طول فترة النهار. و من الشائع ان في معظم الحيوانات أن تتحكم الانثي في موعد التزاوج من خلال الهرمونات و الفرمونات التي تفرزها و التي تتأثر بما يعرف بالتداخل العصبي الهرموني و التي تؤثر علي غدتها النخامية و دورتها التناسلية و تحدث التبويض و الشبق عند الانثي فتصبح مستعدة للدخول في التزاوج و تقول للذكر هيت لك. اما ذكور الحيوانات فتكون عادة علي استعداد للتزاوج متي ما وجدت انثي جاهزة. و لعل العجيب جدا في الابل كمخلوقات و الغريب في شأنها أن تكون العملية شبه معكوسة حيث نجد ان الذكر يلعب دور المتحكم في وقت التزاوج حيث انه لا يستطيع التزاوج الا خلال موسم الهياج في حين يبدوا ان الناقة يمكن ان تكون مستعدة للتزاوج متي ما وجدت بعيرا هايج و اني لها ذلك. حيث البعير الماصع الهايج و المنخرق و الهدار و الذي يقضي الليل و اطراف النهار مساسقة و تزبيدا و هديرا و دواسا و يعوف الاكل و( الطيب) و يضمر و تكبر انثتيه و دومتيه و يصاول الراعي و الفحول الاخري ثم ما يلبس ان تنتهي فحولته بنهاية مراسم الموسم بعد ان يكون في الغالب اكمل مهمته في حصته من النياق ( كما يقال كير كمل كراهُه) فتكبر بطنه و تصغر انثتيه و يصبح ما هاميه شيء. و تأتي اليه المتأخرات من النياق و ما هاميه شيْ و لعل الراعي يمر به و يمسح علي رأسه و يمطرقه و قد لا يقول بِغم. و كما في المثل عووعي ديك و اصبح جدادة يصبح بعيرنا اشبه بالناقة. ما تنسوا أنو في السودان ربنا انعم عليكم بعدد من الجمال و عندها موسمين في السنة و في دول كتيرة موسم واحد فقط عليكم الله ما ايجابية دي.
علما فسيولوجيا التناسل يقسمون الحيوانات الي موسمية و غير موسمية التزاوج متعددة او وحيدة الدورة النزوية و ذلك اعتمادا علي الوقت الذي يكون فيه التزاوج و عدد مرات حدوثه. في الحيوانات تاثير الحرارة و طول فترة النهار مؤكد في تحكمه في التناسل في جميع الحيوانات و بالتالي للشمس القدح المعلي في التكاثر. و تظهر ظاهرة الموسمية في التزاوج بوضوح اكثر كلما ابتعدت كثيرا عن خط الاستواء حتي في الحيوانات الغير موسمية و تكاد لا تظر جليا في المناطق المدارية و قد تكون افريقيا ارض الشمس المشرقة ارض تكاثر لجميع الحيوانات الموسمية و غير الموسمية في حين أن المناطق القريبة من القطبين الشمالي و الجنوبي ربما حتي الانسان يمكن يكون داخل في ورطة و الله اعلم (ربما لذلك يكون الحاميين حاميين و ممكن افادات ناس مجربة زي ناس كندا و النرويج الخ.........للذين جربوا العيش خارج المناطق المدارية).
الاناث و التي تتحكم في التكاثر لحد ما في جميع انواع الحيوانات بما عدا الابل و ابن ادم تبدأ التهيوء للتزاوج مع ارتفاع درجة الحرارة في الابل تبدأ الذكور في التهيوء مع انخفاض الحرارة و عموما ما يشاع ان للحرارة تأثير مهيئ للاناث في حين ان للبرد تأثير محفز للذكور.
كلمة شولت الناقة اعتقد انها من الشيل اي شالت الجنين كما تستخدم عبارات اخري ذات دلالات لوصف حدوث الحمل عند الانثي يقول الفرسة مسكت اي لقحت و شالت المطرة اذا لقح سحابها و الشول الاسم (للمرأة) اعتقد انه بمعني مقدرتها علي حمل الاعباء و لعل من نافلة القول التعبير المنيف المعبر المرة غلبانة للتي تحمل في رحمها (نجاقا).
اعتقد ان شهر شوال غير مرتبط بتشوييل الابل او دراررها لان اذا كان رمضان شهر الرمض و الشهر الذي ياتي بعده حتي اذا لم يكن رميضا كسابقه (الصيف شهور متعددة) لا يكون كافي لكي تهيج الفحول و تشوول النوق.
في السودان طالما كان هناك موسميين للابل يمكن ان يكون هناك شواليين.
من العدالة ان تتساوي الحظوظ بالصوم في البراد و الغيظ (براد و غيظ نسبي) حسب التواجد علي ظهر الكرة الارضية يعني لمن يجينا رمضان صيفا يعوض برمضان في الشتاء و يتساوي الشخص الموجود في خط الاستواء او في القطب الشمالي لكن اذا افترضنا رمضان فقط في الرمض او الصيف (كما في التقويم الشمسي) يكون ناس المناطق المدارية في ظلم شديد.
ربط البعض الدورة الشهرية للمرأة بالمد و الجذر يعني بالقمر و حساب ايام الدورة بالشهر القمري ادق رايك يا ابوبكر.
سنواصل بعد ما نشوف احتفالات بزوغ فجر الاسفيري العظيم
شكرا شكرا شكرا علي التصفيق و الاعجاب و نتمني لكم احتفالا سعيدا"
| |
|
|
|
|
|
|
|
|
|
Re: بكريك صاول الراعي وملى الهدّارة (Re: أبوبكر عباس)
|
Quote: مرّة صادفت داخل أسانسير العمارة راجل إماراتي وزوجتو وكان معاي بتي عمرها أربعة سنوات، جيت أضغط على زر الطابق، الشافعة مسكت يدي وقالت لي: خليني أدوس أنا
الراجل وزوجتو إتفقعوا من الضحك! |
ههههههههههههههههههههههه
والله متعة
متعك الله بالصحة والاستنارة الدايمة
| |
|
|
|
|
|
|
|
|
|
Re: بكريك صاول الراعي وملى الهدّارة (Re: Haytham Ghaly)
|
Quote: يا عبيد ياخ دا ابوبكر عباس (المستنير)
ما تجيب للراجل مشاكل مع اب صلعة يقوم ينقص الكنجالات |
هههههه عجبتني الكنجالات
شكرا ليك ياجميل، في البوست واضح إسم أبو بكر عباس ، ولا أدري لماذا كتبت بكري أبوبكر...!
ودي هدية ليك وهي لا تخرج من مضمون البوست
الدولاب بعد قمد البكار الحيل
امسي الليله درويشن مسك يا جليل
خطم درع البياحة الفيهن الوقيل
جاهن يتاتي رقاصه وصباها جميل
الدولاب إسم بعيره "جملو"
شفت قمد دي علي وزن قبَّل ، والبكار هي البكُر وهي الصبية من الإبل علي وزن "كواعب" من النساء
ودرويش ، شبه هدير الجمل، بطار المدَّاح
| |
|
|
|
|
|
|
|
|
|
Re: بكريك صاول الراعي وملى الهدّارة (Re: muntasir)
|
| Quote: يا سلام صح لسانك يا استاذ عبيد |
الأخ الجميل منتصر
أهديك من هسيس الجراري:
بدوية تصف بعض جمال الإبل، من غنا الجراري
تيراب التققب
اللي الرسن رقب
دي لي جعابهن عقب
ودي بصاول اللنقب
واحد، يرقل ويشد الرّسن، والثاني يقود الإبل، مرة في مقدمتها، ومرة أخري، يكون في مؤخرة المجموعة، "جعابها" أي من ورائها، والثاني يصاول الإنقايب"اللناقيب" اي يحادره، والإنقيب هو الشاب الصغير الذي يرعي الإبل، وكثيرا مانجد الفحل يحرس الإبل من السارق بل يصاوله ويحادره
قالت أُخري، من غنا الجراري:
سِوار اللاَّبْسِي الخَتَم
حَمَا اللِّنْقِيب ماعَتَم
مَسَك البَرْيَة وغَتَم
كيف خَلفاتْ الشَّتَمْ
***********
شبه الجمل في ضموره من الهياج، بسوار الفضَّة، والعتيم هو حليب النوق ليلا، وتحديدا في الهزيع الأخير من الليل
ويسمون وقته بالعتَّام ، لأن يكون فيه حليب النوق بعد فواقها ،ومسك البرية أي يمشي بالقرب من الإبل،
وغتم أي اصدر صوتا من خياشيمه ثم هدر، وصوته يشبه صوت طبل الدلوكة"الشتم"
معزتي
| |
|
|
|
|
|
|
|
|
|
Re: بكريك صاول الراعي وملى الهدّارة (Re: عبيد الطيب)
|
سلام اخي عبيد زمان من زمن سودان دوت نيت وانتقلت لي هنا كانت في خيمة دوبيت نسيتها هل هي خيمة أخونا شنتير ولا زول تاني كان بدوبو فيها سئيلك الله كلمة افهمها وعشرة لا لكن لا تملك الا تهلهل (من هلا هلا ) من الجمال وبلاغة وجزالة البداوة والفروسية التي لا تحدها حدود يمكن سر الطرب يكمن في الدي ان اي وليس في فهم المفردات فحياك الله مرة تانية ونتمنى بوست المستنير دة يكون بشير عودتهم علي الأقل يكون حلل قروشوا البقبضها من بكري دي ولم ينير شمعة لي يومي ويومك ده
| |
|
|
|
|
|
|
|
|
|
Re: بكريك صاول الراعي وملى الهدّارة (Re: muntasir)
|
واحد من أصحابي بدو الإمارات وهو من الشخصيات المهمة في دولة الإمارات قال لي:
أي زول ما عندو إبل أو معرفة بيها أو محبة ليها؛ دا زول تمامة عدد في الدنيا دي ساكت.
دحين اتو يا مساكين، البوست يجي فيهو عظماء زي دكتور أحمد وعبيد ديل ويقولوا فيهو درر زي دي، وإتو من مسكنتكم تخلوا البوست دا يمشي الصفحة التالتة؟!
صحي فعلا تمامة عدد ساكت.
| |
|
|
|
|
|
|
| |
أبوبكر عباس
عبدالحفيظ ابوسن
Kabar
عوض الله نواي
Faisal Saad
MAHJOOP ALI
Elsanosi Badr
عبيد الطيب
فيس بوك
تويتر
انستقرام
يوتيوب
بنتيريست