معليش كتبت نقة كتيرة ..وبضربة لازب..اتمسحت.. المهم يا صديقي ..كامل التضامن معاك..و ليك حق تنفعل...!
محنتنا يا صديقي ، زمان كنا بنفتكر انو المثقف بتاع امسودان بيتأفف من واقعو..واليوم ، ممكن بكل اطمئنان ، نقول انو المثقفة بتاعة امسودان ذاتها بتتأفف عن واقعها..!!
زمان يا طلحة ، حبوباتنا كانن بيلبسن الحزامة..فردة حول الخصر ولي تحت..والصدر عاري تماما..هل حصل تحرش وكده؟...بالطبع لأ..
اهلنا الأبالة في شمال كردفان ، البنيات كانن بيرعن بالإبل..والواحدة بيكون عندها سيف عديل..بتقوم تخلي النهد كاشف تماما..والشغلانة دي اسمها (كن راجل اهبشوا)..وهبشت النهد هناك معانتو..لو بتقدر امشي اتقدم وعرس بكتاب الله وسنة رسولو..!!..ومافي زول بيتحرش.. ليه يعني؟..!
هنا فيديو ..يا صاحب..صعب شوية (وعارف ناس كتيرة ما ح تقدر تعاين ليهو مرتين)...وسبب استشهادي بيهو ..ياهو حديث البلاجات ده ..!!
ديل سودانيات يا طلحة..سودانيات خارج حسابات مثقفة امسودان..وهن من شعب الكاو نارو في اقصى جبال النوبة..
عريانات ميطي..متمسحات بدهن..وشايلات سيطان...وبيجلدن بعضهن بعض (وهي ثقافة البطان المعروفة..)..زي ديل يا صاحب..اظرط من ناس البلاجات المفتونيين بيهم بعض مثقفي ومثقفات امسودان..ماشات ميطي زي ما الله خلقهن وطلقهن في الحياة دي..ومافيش تحرش جنسي او سياسي او اجتماعي او اخلاقي ذاتو..!!
اشمعنا ديل يسقطن من استشهاد التثاقف؟...ربك يعلم..
التصاوير لشعب الكاو نارو..قامت بيها الألمانية ليني ريفنستاقل ( إو أي كان اسمها)...ده لمن كان السودان بخيرو..الخواجات يجوا يتعلموا مننا الحاجات..واخر الزمن..انقلبت الآية..بقينا نحن بنتعلم منهم الحاجات..ناس بلاجات استراليا وشنو كده..
طبعا فكرة (الفتنة) دخلت في المناطق ديك..و ناس الكاو نارو..لو شفت ليهم فيديوهات حديثة ح تلقي البنيات..لبسن فساتين وطرح وشنو كده ما عارف.. ! سؤالي ، للناس الوهم بتاعين الحلقة دي..اهو ده ، بعض من ناس امسودان ، الرجال ميطي والعوين ميطي ...وما كان في تحرش جنسي...وشنو كده ما عارف..!!
تفتكروا ليه؟..
وهل مجتمع امسودان ، ياهو فقط مجتمع (هنا امدرمان)؟...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة