ول ابا براهيم..حبابك يا صديقي جيتا جيت.. وبعد.. قريت القطعة اكثر من مرة ، والحاجات البتتقرى اكتر من مرة بتكون عندها غوايتها الخاصة البتقوم تخليك تزوزي وتحامر وتغامر وتعامر القراية وترجع من تاني..! بعض الحيل ، وسعت شقة الخيال ، لونتها بكم لون من تفتة المرارة والحلاوة والإزدهاء..
قلت ، ادخل من حكاية (تقاسم الأغاني المشتركة) ، فجعت يا صاحب ان بعض من اشغال النور الجيلاني مثل (فيفيان) ، (ميري) ، بقيت اسمعها بطعم تاني ، ومرات لا اجرؤ لمعاودة سماعها..هرووب عديل يا حبيب.. فالقدماء كانوا مرتاحين وحناكيش عدييل ..واقصى ما عندهم من عذابات (حبيبتك ابعدوها ، سكنوها البراري).. ولكم قلت لنفسي: اخير نرجع لتلك المسافات ، مسافات (سكنوها البراري) لأنها قريبة ياااااخ.. لكن تبقى (اجنبية) دي صعبة خلاس..!!
في افق تاني ، الغوايات كانت تمد لسانها..وتخليك في منطقة وسطى بين الشك واليقين ، مع انو الشك طريق اليقين الأوحد..!
عيني وقعت في منفستو (النسيان) ، كما صاغته ليلي المغربي ، وغناه المغني استاذنا محمود تاور..!
والعجيبة ، يا براهيم ، هذا المنفستو بيبدا باقرار قوي خلاص (حياتي حلوة)..وانا مرات..وكت الزنقات..قاعد اردد تلك البداية....!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست