والمكانيزم هو المنطق الداخلي للأشياء ، وهنا ناخذه بمعنى كيف تعمل الديموقراطية ، وكيف يفكر فيها المواطن ويتعامل معها ، كجزء من الحياة اليومية ، الخلاصة تجربة نهديها عسى ولعل ان نستطيع بناء قيم الديموقراطية في بلدنا السودان.
(1)
اليوم كانت انتخابات المقاطعة التي نقيم فيها ، مقاطعة ألبرتا في غرب كندا ، ويمكن نقول عنها انتخابات اقليمية او ولائية بحسب العرف الموجود في امسودان. ذهبت الى مركز الإنتخابات وادليت بصوتي ، ممارسا لحقي الدستوري والديموقراطي..مركز الإنتخابات مدرسة في الحارة التي نقيم فيها ، والمسافة من منزلي لمركز الإنتخابات ، دقيقتين ذهابا ودقيقتين ايابا ، اما عملية التصويت استغرقت (67) ثانية..!! ولكن كيف كان يوم الإنتخابات قبل عملية التصويت ؟ كيف كان المزاج العام؟..كيف يفكر الإنسان هنا في الإنتخابات؟
(2)
في الصباح ، عادة اصحو عند الخامسة ، وبعد قضاء بعض الأمور (صلاة الصبح ، كباية شاي البيت ، الخ) واخرج الحق بالبص (45) وهو البص الوحيد الذي يخصص لحارتنا ، ويأتي كل نصف ساعة في الأوقات العادية ، وكل خمسة عشر دقيقة في اوقات الذروة ، استغل هذا البص الى غاية محطة المترو (قطر المواصلات المحلي) ، والذي استغله الى غاية قلب المدينة (داون تاون) حيث مكان عملي. في محطة القطر ، يتم توزيع صحيفة يومية اسمها (مترو) ، وهي توزع في كل محطات القطارات الداخلية في المدن الكندية ، وهي مجانا ، واذكر من قبل ذكر اخونا النصري امين أنها اكثر صحيفة يومية مقروءة وهو محق ، لأنها مجانية ، وفيها اخبار متنوعة ، طبعا كل مدينة تختص بصحيفة يومية اسمها مترو تنقل الأخبار المحلية ، ومترو كالقري عملت معاي حوار قبل كده حدثني عنه بعض الصحاب السودانيين . تناولت عدد اليوم من مترو كالقري (والذي توزعه هذا الأسبوع في محطتنا سيدة اسيوية ، غالبا صينية ، وهي تناولك العدد مع ابتسامة وقولة صباح الخير ، وبعد ما تشيل الصحيفة تتمنى ليك يوم سعيد..!).. الصحيفة يسيطر عليها موضوع انتخابات المقاطعة ( الإنتخابات الإقليمية) والتي يكون التصويت فيها اليوم (التاسعة صباحا حتى الثامنة مساء ، طبعا الثامنة في الموسم ده بالذات الشمس بتكون في نص السماء زي حكاية رابعة النهار دييك)..في الرصيف ونحن ننتظر القطار (طبعا دي لحظة ذروة والقطر بيجي كل خمس دقايق) ، الناس تتحدث عن الإنتخابات ، حديث مقتضب.. كأن يذكر احدهم ان اليوم هو يوم الإنتخابات ، ثم يعقبه سؤال مقتضب: هل ستدلي بصوتك..!!.. وهنا ينتهي الحديث ، لا احد يسألك لمن سوف تعطي صوتك ولا احد يتحدث مقارنا بين برامج المرشحين والأحزاب. بمعنى أن الفكرة فقط هل ستمارس حقك الدستوري ام لأ؟.. طبعا هنا المقاطعة ايضا حق دستوري..!! في القطر ، جلس بالقرب مني رجل ابيض ، عجوز شوية (اكثر من سبعين سنة) ، ومثل هذا النوع من البشر هو اكثر من يحب الحديث بصراحة ووضوح. فلم ينسى صاحبي ان يسألني هل سأدلي بصوتي ام لأ؟.. قلت نعم سأدلي بصوتي .. ثم تحول الحديث عن الطقس ..طبعا رحلة القطر (خمسة عشر دقيقة لغاية الداون تاون)..!
كبر
05-06-2015, 08:48 AM
Kabar Kabar
تاريخ التسجيل: 11-26-2002
مجموع المشاركات: 18537
حينما وصلت مكان العمل ، طبعا لازم كباية الشاي التانية من استار بكس (والله صحي) ، وتناولت كبايتي (حجم متوسط ، ايرل قري تي).. ولم تنسى النادلة اماندا وهي تسألني: هل ستدلي بصوتك؟ قلت نعم.. طبعا هم يسألون ويتوقعون ان تبادلهم نفس السؤال..! مديرنا في العمل ، وجه لي نفس التنبية: الليلة الإنتخابات يا كبر.. قلت نعم..قال: هل ستدلي بصوتك؟..قلت نعم..و سألته: هل ستدلي بصوتك يا ديفيد؟.. فقال نعم ..واضاف العبارة التالية:
If you don’t do it, you can’t b.i.t.ch.ing
ومفردة (بيتشنق) قد يعتبرها البعض نابية ، ولكن هي جزء من خطاب الثقافة اليومي في كندا ، والناس بتستخدمها (ومعاها واحدة تانية شينة كلوكلو)..ودايما بتعني النقة او النقنقة.. و فكرة صاحبنا ديفيد: اذا ما ادليت بصوتك ، ما بتقدر تنقنق (تنقد/تساءل) في الحكومة..! بقية الزملاء والزميلات ، في نفس الفكرة.. الليلة الإنتخابات ..هل ح تدلي بصوتك..! في الثقافة الكندية ، كل حاجة بي دربها ، يعني الناس نوهائي ما قاعدة تتكلم في السياسة ولا بتناقش امور السياسة في مكان العمل ، لأن الفكرة عندهم ببساطة السياسة عندها مواعينها..و ممكن تقول رأيك السياسي وفق وسائل معينة و متفق عليه.. الصحف ، الفيس بووك.. مراسلة ناس الحكومة بصورة مباشرة (ممكن ترسل جواب وتسب قدر ما تقدر ، وبرضو ده حقك).. برضك لو عندك طاقة عمل سياسي فايضة ، ممكن تنضم كمتطوع للحزب البتتفق معاهو في الأهداف والبرامج والأيدولوجيا.. لكن مكان العمل للعمل وبس..! ونحن على مشارف نهاية الدوام.. ظهر زميلنا شون..ووجه الخطاب لينا كمجموعة..
Today, I’m gonna be i.d.i.o.t to pick my super i.d.i.o.t
والسخرية ، ان شون يقول لنا: الليلة ح اكون غبي ، واختار واحد اغبي مني..!..يعني في النهاية ح يمشي يصوت..! وانتهى الدوام ، وكل زول عارف انو من واجبو ، كمواطن ، لازم يمشي يدلي بصوتو..! (4) في القطر ،وانا راجع ، نفس النقة : الليلة الإنتخابات ، ح تصوت ؟.. في البص ، نفس النقة: الليلة الإنتخابات ، ح تصوت؟.. من غير تفاصيل ، ح تصوت لي منو أو لياتو حزب ، لأنو دي امور بتدخل في حكاية الخصوصية..!! (5).. في البيت ، نفس الفكرة مستمرة ، ولأنو ده البيت ، فممكن تفصح عن مكنونك.. وكنت حاسي اني داير اتكاسل من فكرة التصويت..البنيات(شهد 15 سنة ، شروق 13 سنة) اصرن انو امشي ادلي بصوتي ، طبعا وضحن ياتو اختيار.. وكان الإن دي بي (الديموقراطيين الجدد)..اها قلت ليهم..زولكم ده ما بعرفو ولا عارف هو شنو وداير شنو.. وعينك ما تشوف الإ النور.. كل واحدة فتحت ليك موقع.. سيرة ذاتية ، برنامج ، وشنو يعني تغيير..!
قلت ليهم بتعرفو شنو عن التغيير؟.. شروق قالت لي البي سي ( المحافظين التقدميين) قاعدين في الحكومة 44 سنة ، ودي اطول مدة عملها حزب في كندا و قعد في السلطة كل الوكت ده؟..مفروض يدونا عرض اكتافهم بعد ده.. طبعا عشان افور دمهم ، قلت ليهم: يااااخ مقاطع؟..
شهد قالت لي: Dude, too much boycott is not good for your health طبعا ، لأن طيلة فترة انتخابات امسودان ، كنت قاديهم ليك: انا مقاطع..وهم يشيلوا ويضحكوا.. زول لا مسجل ولا ناخب ولا مقيم في بلد بعينها.. كيف يعني يكون مقاطع للإنتخابات؟.. كنت بقول ليهم: مش ح اتكلم عن الإنتخابات في السودان ،و لا ح اعبر مفوضية الإنتخابات السودانية بتحليلات وشنو كده ما عارف..طبعا هم مستغربين من المنطق ده؟..
في نص النقاش.. تدخلت (الحيكومة) وقالت لي: قوم البس براطيشك وارحكاكا نصوت..! كجيت عين ، ورجعت بضهري لورا في السوفة وقلت ليها: شنو يعني نمشي التصويت؟.. قالت: For the better future of the kids ومرقنا مشينا مركز الإنتخابات ، والبنيات اصرن يمشن معانا.. ولما سألتهم : ليه ماشين معانا ، وانتو دون العمر القانوني؟ ، ضحكوا وقالوا لي: شكلك ح تزوغ..ودي المواطنة الحقة كده لازم تشارك في التصويت..!! وكانت الشغلانة ، دقة سريعة .. اربعة دقايق مسافة السكة (ماشي /جاي) ودقيقة وسبع ثواني عملية التصويت..!
كبر
ــــــــــــــ - تصرفنا في طريقة كتابة بعض العبارات الإنجليزية (وضع النقاط كفواصل) خوفا من تشطيب الرقيب الألكتروني..!
05-06-2015, 08:53 AM
Kabar Kabar
تاريخ التسجيل: 11-26-2002
مجموع المشاركات: 18537
في كندا ، مستويات الحكم ثلاثة: محلي (عمدة المدينة ومجلس المستشارين/كلهم بالإنتخاب) ، اقليمي ، وفيدرالي. الناس اكتر حاجة بتشارك في انتخابات بتهمها ، يعني مستوى المشاركة في الإنتخابات المحلية بيكون مهم وعالي ، ويليه ، المشاركة في الإنتخابات الأقليمية ، ثم الفيدرالية. ليه؟ لأنو الناس هنا واعية انو حكومة المدينة مثلا (عمدة ومجلس مستشارين) هي التي تلامس واقع الناس وقريبه منهم ومن قضاياهم اليومية ، وبتكون الناس عندهم مشاكل كتيرة على المستوى ده عشان كده بتهتم كتير بامر الإنتخابات المحلية . وبنفس المنطق ، الناس بتفتكر انو حكومة المقاطعة أو الإقليم هي اقرب ليهم ولأمورهم ومصالحهم من الحيكومة الفيدرالية..وهكذا..!
عدد سكان مقاطعة ألبرتا (3645257) نسمة..والجمعية التشريعية تتكون من شقين: الملكة (أليزبيث الثانية) والمجلس التشريعي..
وعدد نواب المجلس التشريعي (87) يتم انتخابهم بصورة مباشرة.. اما الملكة فهي الملكة يااااااااااااخ..!!..يتم تعيين ممثلها ، وبتكون مهمتو تشريفية..
ممثل الملكة الحالي اسمو دون اثيل..و صفتو الرسمية هي: Lieutenant Governor of Alberta
طبعا المفارقة في الأمر هنا ، هي مدة فترة بقاء الفرد في هذا المنصب..! غايتو الترجمة نخليها شوية ، لكن نديكم العبارة بالإنجليزية لتوصيف فترة الحاكم العام الإقليمي..فهي.. Term length At the Governor General's pleasure
بصورة اوضح ، قال الشراح انو العبارة دي عبارة ادبية فنية ثقافية جاية من العبارة التالية: At Her Majesty's pleasure
يعني الموضوع مربوط بمزاج الملكة ، بمعني اخر تقعد لمن تزهج منك الملكة (قدس الله سرها) او تموت..ودي الفكرة الشغال بيها اخونا عمر البشير في امسودان..!!..المهم..
زمان صاحبنا واحد ، الله يطراهو بالخير ، كان بيتندر من حكاية قسم الموالاة لنيل الجنسية الكندية ، لأن فيهو بتحلف انك ح تخلص لخدمة الملكة ألزبيث الثانية.. اها صاحبنا قال: حرم جنسية كندية ماني دايرها تب.. اقول شنو لرفات يونس ود الدكيم..!!
ومتل ما قلنا ، انو المجلس التشريعي بيجي بالإنتخاب المباشر..وعدد نواب مجلس البرتا الشريعي (87) نائب/ة..!!
كبر
05-06-2015, 09:10 AM
Kabar Kabar
تاريخ التسجيل: 11-26-2002
مجموع المشاركات: 18537
الأحزاب في مقاطعة ألبرتا على المستوي الأقليمي..هي كالآتي:
الأحزاب العندها ممثلين في مجلس الولاية التشريعي:
الحزب الليبرالي(اتأسسى 1905)..يعتبر يساري نص نص..
حزب الديموقراطيين الجدد (اتأسس 1932)..يعتبر يساري لحد كبير (ده زي ناس حق في امسودان)
حزب المحافظين الديموقراطين (اتأسس 1905).. يعتبر يميني نص نص..وده الحزب الحاكم لمدة 44 سنة ( الأبتها الآنسة شروق كبر) ، واحتمال كبير يفوز بالأغلبية المرة دي ، واخر مجلس اقليمي تشريعي كان عندو (72) ممثل/ة.. الحزب ده زمان كان بييغيب ويجي راجع للحكومة ، لكن من سنة 1971..ما حصل فارق الحكومة تب..!!
حزب الوايلد روز (الوردة البرية) واتأسس 2008 ..يعتبر يميني لحد كبير ..وهو مجموعة حردانيين وحردانات انشقوا عن حزب المحافظين التقدميين.. خذلهم عمك واحد في الإنتخابات السابقة وقام ادلى بتصريحات الناس اعتبرتها عنصرية.. عشان كده حتى في الإنتخابات دي ما ح يكون في دعم كبير ليهو..!!
احزاب مسجلة ، لكن ما عندها ممثلين في المجلس التشريعي الإقليمي (على مستوى المقاطعة);
الحزب الشيوعي – مقاطعة ألبرتا (اتأسس سنة 1930)..
حزب الخـُضر.. اتأسس سنة 2011
حزب ألبرتا الإنفصالي (اتأسس سنة 2004)..وديل الأيدولوجيا بتاعتهم انو ألبرتا مفروض تنفصل من كندا وتصير مقاطعة أمريكية (طبعا الموضوع حنبكة قصاد نقة الإنفصاليين في كويبك الكانوا عشمانين يفصلوا كويبك من كندا..!!)..
كل الأحزاب دي بتعمل على المستوى الأقليمي فقط..وما عندها شغلة بالحاصل في المستوى الفيدرالي..!! لمن تجي انتخابات المستوى الفيدرالي ، بيكون الدعم عن طريق توجيه القواعد للتصويت لحزب بيعنو.. ولا يفوت علينا أن احزاب مثل الليبرالي ، الديموقراطيين الجدد ، المحافظين الديموقراطيين ، الشيوعي الكندي (طبعا ألأحزاب الشيوعية في كندا ، عندها اقسام كتيرة:بعضهم لينيني ، بعضهم تروتسكي ..الخ) ، وحزب الخضر..عنده وجود على المستوى الفيدرالي.. لكنها مستقلة تماما عن الأحزاب الأقليمية..!!
كبر
05-06-2015, 09:16 AM
Kabar Kabar
تاريخ التسجيل: 11-26-2002
مجموع المشاركات: 18537
حزب المحافظيين التقدميين (قاعد اسميهم كيزان ألبرتا) ، طبعا ، زي ما قلنا ماسكين حكومة المقاطعة لمدة (44) سنة.. وقاموا عملوا حاجة عجيبة.. انو جابوا امرأة في موقع حاكم المقاطعة ، وهي المحامية أليسون رد فورد..وبتذكر انها مرة جاتنا في صلاة العيد (طبعا لابسة ليها طرحها فوق راسها ، نظام خمار وكده ، عشان تشوفوا السياسة دي كيف).. وكانت وزيرة العدل في المقاطعة ، قبال ما تبقى الحاكمة..!
الزولة دي كانت شغالة كويس.. لكن قامت دخلت في خلافات مع بعض النقابات..تحديدا نقابات المهن الطبية في المقاطعة..اها قامت فرنبت.. و طلعت ليها قانون بيمنع الإضرابات المطلبية..وقال كده الجماعة لبدوا ليها..!
طبعا ، انتهى امرها باجبارها على الإستقالة عن منصبها كحاكم للمقاطعة..ليه؟.. لأن السياسة وسخة للغاية ..!!..
طلعت عمتك قاعدة تتصرف في المال العام من غير وجه حق..وجابوا ليها حاجات لإثبات ذلك:
الأولانية.. مشت تشيل الفاتحة مع ناس جنوب افريقيا في وفاة الأفريقي العظيم نيلسون مانديلا.. اها مشوار الفاتحة ده كلف (45000) دولار من خزينة المقاطعة (المال العام)..
الثانية..و هي في محل فراش سيدنا مانديلا.. ضربوا ليها وقالوا ليها ترجعي بسراع لأنو في امر مهم مختص بحكومة المقاطعة (كانوا دايرنها تجي تؤدي القسم لولاية جديدة).. اها يا مؤمن يا مصدق ، عمتك قالت الحق بسراع ، وقامت اجرت طيارة خاصة بتكلفة عشرة الف دولار مدفوعة من الخزينة العامة بتاعة المقاطعة..!!
الثالثة.. عندها بتها عمرها (12) سنة ..كانت بتسافر معاها..وده مش مهم.. المهم انو البت دي قامت سافرت ، ذات مرة ، مع صاحباتها في رحلة خاصة بهليوكوبترحكومية..وتكلفتها كانت (3000) دولار..!!
الرابعة ، عمتك طبعا مطلقة وعايشة مع بتها ، قامت امرت ببناء ناطحة سحاب كجزء من مبنى خاص بحكومة المقاطعة/ الأقليم..!!
اها لمن زروها.. قامت عملت ثلاثة حاجات:
اولا: اعتذرت لشعب المقاطعة (نحن القدامكم ديل) عن تبديد المال العام بلا وجه حق..
ثانيا: دفعت ، من جيبها الخاص ، الخمسة واربعين الف دلار (تكلفة رحلتها للعزاء في مانديلا) اضافة لتكاليف رحلات بتها في الهليوكبتر بتاع حكومة المقاطعة..
ثالثا: الإستقالة من منصبها كحاكم لمقاطعة ألبرتا..!!
كبر
05-06-2015, 09:21 AM
Kabar Kabar
تاريخ التسجيل: 11-26-2002
مجموع المشاركات: 18537
السودانيون والسودانيات ، المرة دي عندهم شوية حماس ، وخياراتهم منحصرة بين التصويت للحزب الليبرالي أو حزب الإن دي بي (ودي الغالبية تقريبا) .. بالطبع في ناس برضك ح تصوت (بحساب مصالح سياسية معقدة) لحزب المحافظين التقدميين..!!..و الأهم هو فكرة انهم يمشوا يصوتوا.. ياااخي اهلنا ديل..فيهم جنس كسل اسكت ساكت خليهو..بعضهم عشرات السنين في كندا ولسع فكرة الديموقراطية ما واقعة ليهو.. الأزرط يكون شغال في تيم من اجل تغيير الحكم في امسودان ، عشان شنو؟..يقولك عشان نطبق ديموقراطية في امسودان...!!
من الطرائف ، مرة سألتني صديقة سودانية من اسم حزب الوايلد روز..!!..طبعا استغربت..وشرحت ليها الترجمة الحرفية: الوردة البرية..!! الإستغراب ، راجع على انو نحن السودانيين والسودانيات ما قاعدين نعاين للأمور بدقة... يعني مشي امرك يا قدر..!
هناك حاجة طريفة في بعض من مقاطعات كندا ، والحاجة دي بتظهر في مكان مافي زول/ة قاعد يعاين ليهو بي دقة.. وهو نمر العربات..!!.. أي والله لوحة نمر العربات الواحدة دي..!! اللوحات دي بتكون ، غالبا مكتوبة بطريقة عجيبة.. نصها حروف والنص التاني ارقام..وده مش مهم..!! المهم.. كل مقاطعة بيكون عندها شعار مكتوب في اخر اللوحة (بعد الأرقام والحروف).. مثلا مقاطعة منتوبا ..بتكون مكتوبة عبارة ( منتوبا الصديقة) ، مقاطعة سسكتشوان بتكون مكتوبة عبارة ( ارض السموات الحية) ، مقاطعة ألبرتا بتكون مكتوبة ( ريف الوردة البرية) ، مقاطعة بريتش كولمبيا/كولومبيا البريطانية ، بتكون مكتوب عبارة (بريتش كولمبيا الجميلة)..!!
حزب الوايلد روز في مقاطعة ألبرتا ، ماخد اسمو من طريقة كتابة لوحات العربات ترخيص المقاطعة ( ريف الوردة البرية)..!!
كبر
05-06-2015, 09:24 AM
Kabar Kabar
تاريخ التسجيل: 11-26-2002
مجموع المشاركات: 18537
مشينا شاركنا في انتخابات المقاطعة ، الإنتخابات الأقليمية/الولائية، والجدير بالذكر لازول حدر لينا ولازول ادانا وش كعب (نظام يا تصوت يا تركب الشارع) ، ولا جانا صاروخ كاتيوشا (نظام بالغصب لازم تقاطع الإنتخابات) ، وقطع شك مافي زول ح يعمل انقلاب ولا يدور حرب لأنو مش عاجبو حال الإنتخابات..!!
ومع ذلك ، نظام التصويت فيهو مشكلة ، وهو نظام ان الفائز هو/هي من يحوز على اعلا الأصوات..وده نظام فيهو هنات وهنات.. مثلا..لو عدد الناخبين في الدايرة عشرة الف.. افرض الف ناخب قاطعوا..يبقى الباقي عندك تسعة الف..!! افرض عندك تلاتة مرشحين في الدايرة دي..اها واحد قام نال اربعة الف صوت ، والتاني نال تلاتة الف صوت ، والتالت قام نال الفين صوت.. اها بتاع الأربعة الف يعتبر هو الفايز وح يمشي يمثل الدايرة في البرلمان الأقليمي.. فهل هذا كلام منطقي؟.. لاحظ الخمسة الف القاموا ادوا اصواتهم للمرشحين الأخرين زايد الألف الممتنع.. وجملتهم ست الف ..فدي اغلبية بالباب العديل..!!.. مش الناس مرات بتقول ليك الديموقراطية هي حكم الأغلبية..؟..
الفكرة دي ياها الإعتمد عليها عمر البشير في الإنتخابات الأخيرة.. يعني نسبة الكم وتسعين مش نسبة كل الناخبين ، ناهيك عن نسبة اغلبية شعوب امسودان ، وانما النسبة دي ماخودة من جملة عدد الناس المشت صوتت.. والمفوضية قالت عدد الناخبين المسجلين طلاطاشر مليون ، والناس المشت صوتت ست مليون (يعني اقل من خمسين في المية)..اها نسبة الكم وتسعين في المية بتاعة البشير مارقة من الست مليون ديل.. وبرضك يقول ليك انا فزت..ونفس الحكاية ممكن تحصل عند نائب في دايرتنا..ويقول ليك طالما انا حصلت على على اكبر عدد من الأصوات فانا الفايز..!!
المهم عشان الناس ما تتعقد من فكرة الديموقراطية ، فهي فكرة جيدة لتداول السلطة.. بس تكون بي سلاسة واقتناع..!!
ودمتم..
كبر
05-06-2015, 09:41 AM
جعفر محي الدين جعفر محي الدين
تاريخ التسجيل: 11-12-2008
مجموع المشاركات: 3649
الحيبيب كبر رائع .. محتنا عمق أخر بعد وفهم أعتقد ما وضحته أنك في بلد أصحاب القبعات الكابويات الي مقاطعة تمارس ديمقراطية بمعنى واسع لكن عرفنا رقم كل هذا التحضر وبساطة الحياة أنو عربية الكجر في كل ما نقبل تمنح الأمر يله فرتقوا وفرزعو من هنا
Quote: في نص النقاش.. تدخلت (الحيكومة) وقالت لي: قوم البس براطيشك وارحكاكا نصوت..! كجيت عين ، ورجعت بضهري لورا في السوفة وقلت ليها: شنو يعني نمشي التصويت؟..
عادل..حبابك يا صديقي كتر خيرك على المرور والمطايبة.. عارف يا عادل فلسفة الكجر في كل العالم قايمة على حاجة (انو هو عارف مصلحتك اكتر منك).. لكن الأطرف لمن تقلى روحك قاعد تتأمل تطور الإنسان السوداني.. يعني لمن جينا البلد دي السنوات الأولى..(الحيكومة) كنا بنحنسها تحنيس عشان تمشي تدلي بصوتها.. لكن بعد مرور السنين وعرك التجارب وتفتح البصائر..هي التي صارت تحثنا على ممارسة حقنا في التصويت.. كنا نتمنى ان تعكس كل المجموعات السودانية تجاربها في بقاع العالم..خصوصا تلك البقاع التي فيها تجارب ديموقراطية.. عشان نشف منها ونطبق..! الأمور هنا فيها تسهيل عجيب..سواءا على مستوى المعلومات أو على مستوى الدعم اللوجيستي لكي تكون العملية الإنتخابية سهلة وميسرة.. لجان الإنتخابات دايما بتكون على مستويين: اقليمي وفيدرالي.. وكل واحدة منفصلة عن التانية..واللجنة الأقليمية عندها سلطات واسعة في ادارة العملية الإنتخابية على مستوى الإقليم..
غايتو نحن كل ما نشوف لينا حاجة سمحة .. نقول: هسع دي ممكن نسويها في امسودان..لكان غاب علينا انو الموضوع هو موضوع الإنسان في بت ام روحو..
كتر خيرك على الأمنيات الطيبات..
كبر
05-06-2015, 06:40 PM
Kabar Kabar
تاريخ التسجيل: 11-26-2002
مجموع المشاركات: 18537
جعفر..حبابك يا صديقي كتر خيرك على المرور.. وكتر خيرك على المطايبة.. هي تجربة طريفة.. الأطرف فيها انو زمن دورتها ثابت..وبتحصل بعد كم سنة وباستمرار.. الواحد لمن يعاين لتجربة كندا.. فيها التنوع الثقافي والإثني بصورة كبيرة للغاية..ورغم كل ذلك الأمور مضبوطة تماما.. ناس الدول التأنية الواحد بيكون فعلا حريص على الديموقراطية..عشان كده اول ما يصلوا البلد دي طوالي بينخرطوا في العملية.. في الجانب الآخر السوداني..ممكن يتكلم عن الديموقراطية في امسودان لكن القاعدة قدامو كممارسة عملية ما شغال بيها..!
كتر خيرك يا جعفر..
كبر
05-06-2015, 07:56 PM
عادل البراري عادل البراري
تاريخ التسجيل: 01-07-2013
مجموع المشاركات: 4051
تعرف يا .. الحبيب كبر أجمل ما في هذه التجربة تعكس كيفية ممارسة حق طبيعي .. حق طبيعي يعني هو لك ملك لك تديره بحرية لكن :- أكثر ما شده انتباهي وحفزني له سىردك المسبك جداً هو الكل يمارس حرصه بصمت مطبق هنا تتجلى عظمة إدراك الخيارات وعدم التنازع في الحقوق .. فالحق مع كل من ذهب نحو (الغرب) إلى أعلى الشمال
عادل..حبابك يا صديقي كتر خيرك على المفاكرة.. طبعا اليوم كلو كنا زايغين.. لأنو العالم هنا ما كانت مصدقة انو الحصل ممكن يحصل بالسهولة.. بعد اربع واربعين سنة في حكم الولاية.. سقطت حكومة المحافظين التقدميين..ونالوا فقط 11 مقعد من جملة (87) مقعد..! فاز حزب الإن دي بي (الديموقراطيين الجدد) ، وهو حزب يسار زي ما قلنا سابقا ..فاز بانتخابات المقاطعة محرزا اغلبية مريحة لتشكيل حكومة الولاية..(53) مقعد.. مجرد اعلان النتيجة.. الحاكم بتاع المقاطعة ، وهو في نفس الوكت رئيس حزب المحافظين..طوالي ..نظام دقة سريعة.. اعلن استقالتو من رئاسة الحزب ومنصب الحاكم..ليه؟ لأنو ما حدث في عهده يعتبر فضيحة سياسية .. أي والله ..مجرد خسارة الإنتخابات وبالطريقة دي فهو طوالي احترم نفسو ولملم براطيشو واتخارج من المشهد السياسي..
الديموقراطين الجدد فازوا لأنهم قادوا حملة انتخابات ذكية .. تميزت بالواقعية وقربها لتصورات الناس.. وفي نفس الوكت استغلوا زعل الناس وغضبهم من حكومة المحافظين القاعدة كم و اربعين سنة.. فهي اصبحت عند العامة حكومة عجوز ، مترهلة ، وفوق ذلك اهلها متعجرفين ومغرورين وافتكروا وجودهم الطويل في سدة الحكم كافي يعملوا زي ما عايزين..
اهم نقطة زعلت ناس المقاطعة من حكومة المحافظين هو الميزانية المقترحة.. فيها تضييق على المواطنين وفرض ضرائب جديد تقع على كاهل المواطن . ثم اصرار الحكومة على اجراء انتخابات مبكرة لتمرير هذه الميزانية..!
طبعا حزب الديموقراطيين الجدد على مستوى كندا ، دايما بيقولوا عليهو حصان الرهان الأسود ، ولمن جينا كندا دوبك كان عندهم (19) مقعد في البرلمان الكندي (كانوا في المرتبة الخامسة) ، واستمروا في حالة صعود ، لغاية ما وصلوا المرتبة الثانية (المعارضة الفيدرالية) وقريبا ح تكون في انتخابات فيدرالية ، واحتمال كبير يصلوا المرتبة الأولى ، خصوصا بعد فوز الحزب الأقليمي في مقاطعة ألبرتا..!
غايتو انتخابات امسودان الجاية ، لو ادونا فرقة.. ممكن نعمل نفس الحصل بضبانتو..!
كتر خيرك يا صديقي..
كبر
05-07-2015, 11:45 PM
عادل البراري عادل البراري
تاريخ التسجيل: 01-07-2013
مجموع المشاركات: 4051
الحبيب كبر اسعدت وفتاً حدثتنا عن يوم الإنتخابات كتجربة عكستها من خلال صباح يوم يعج بالنشاط والعمل وممارسة حق لم ينال مجهود كبير ولم يستقطع منك وقت كبير يحسب كهادر غير مستفاد فكأن الأمر سريعاً أسرع من دخول السوبرماركت والخروج منه لكن :- لم تنقل لنا لمتابعنك ما كان يدور قبل هذا اليوم .. ما اقصده شكل الدعاية الإنتخابية وما يصاحبها .في داخل سته مدن تحتل مساحة ما يقارب ( 700 ) كيلو متراً مربعاً , إدمونتون كالغاري لِثبرِدج فورت ماكموري رد دير مدسين هات جراند بريري قد تكون هناك مدن أكثر اهمية لم نتعرف عليها كما لم تسلط الضوء علي الدستور الذي يأسس هذه العملية فأنت أشرت علي أن ممارسة الإنتخاب حق لكن كيف تم تقرير هذا الحق في الدستور أو القانون الإنتخابي سؤال :- لماذا الزملاء الذي يعايشون تجارب مماثله في البلدان الأخرى لما لا يجعلوا من هذا البوست عكس لتجارب تلك البلدان من خلال معايشتهم لها ؟
تحياتي وودي
05-08-2015, 10:04 AM
Kabar Kabar
تاريخ التسجيل: 11-26-2002
مجموع المشاركات: 18537
عادل..حبابك يا صديقي كتر خيرك على المطايبة والإستفسارات.. وكتر خيرك على ذكر مدن مقاطعتنا التي نعيش فيها ، مقاطعة ألبرتا في غرب كندا..لكن..! البلد هنا يا صديقي ، فضاية ساكت ، صقيعة اسكت ساكت خليها..
من المفارقات الطريفة مجموع سكان مدن (ليثربدج ،رد دير ،مديسن هات ،جراند براري) اضافة لمجموع سكان تلاتة مدن اخري ، مجموع سكان السبع مدن اقل من مجموع سكان تلاتة داوير انتخابية في العاصمة السودانية ، يعني مجموع سكان دواير (امدرمان شمال ، ابوسعد ،ابوسعد جنوب وصالحة)..!!
فهنا عندنا مشكلة كبيرة في توزيع الكثافة السكانية ، وعدد سكان مدينة كالقري اكتر من مليون بشوية ، وعدد سكان مدينة ادمنتون اقل من مليون (يعني ثمانمائة الف وشوية) ، تالت مدينة في الكثافة السكانية هي مدينة رد دير ودي عدد سكانها اقل من مأئة الف..!
الدستور هو الدستور الكندي ، وسنة 1982 اضافوا ليهو حاجة اسمها ميثاق الحقوق والحريات الكندي ، وفي المادة (3) حاجة اسمها الحقوق الديموقراطية (كل المادة سطر واحد فقط).. وبتوضح حق أي مواطن/ة كندي في الترشيح والإنتخاب للبرلمان الكندي والمجالس التشريعية الإقليمية..
نص الدستور تم انزالولأرض الواقع ..وعندنا هنا حاجة اسمها (قانون انتخابات مقاطعة ألبرتا) وهو الذي يقوم بتنظيم الإنتخابات لمجلس المقاطعة التشريعي.. الدستور الكندي بيحكم دورة أي برلمان/مجلس بطريقة عجيبة ، حيث انو بيقول الأ تتعدى مدة الدورة خمس سنوات ، عشان كده ناس البرتا متقيدين بالنقطة دي واختاروا مدة تلاتة سنوات لدورة المجلس التشريعي بتاع المقاطعة..
كبر
05-08-2015, 10:07 AM
Kabar Kabar
تاريخ التسجيل: 11-26-2002
مجموع المشاركات: 18537
طبعا مافي طريقة نتكلم ليك عن كل المدن دي ، لكن البيحصل في مدينة واحدة قاعد يحصل بنفس الكيفية في بقية المدن ، والقاعد يحصل في دايرة واحدة في المدينة بيحصل في كل الدواير.. لأنو كل الناس عارفة انها متفقة على قانون واحد عشان كده مافي سيك ميك.. الدعاية الإنتخابية عندها زمن محدد..يعني مثلا دورة البرلمان تلاتة سنين ، في بداية السنة الرابعة ، تحديدا في الفترة ما بين اول مارس لغاية 31 مايو لازم يتم اجراء الإنتخابات..
اها اول ما يتم تحديد موعد الإنتخابات .. الدعاية بتبدأ ، يعني السنة دي بدأت من بداية ابريل..وبيتم فيها كل وسائل التعبير المتاحة (اعلام + لافتات).. طبعا مافي صورة بتاعة مرشح ولا دعاية بتلصق..والناس بتستخدم الكرتون الواحد ده..كرتونة بيكون طولها قدم ونص تقريبا وعرضها قدم.. و بيكون فيها اسم المرشح وحزبوا والجهة المفوضة بالدعاية (نظام امضاء)..اسمها وتلفونها ..يعني معلومات الإتصال بيها..
الكرتونة بتكون مثبتة في حوامل خشبية او بلاستيك مصمت..وبقرزوها في الأرض..يعني حكاية تعمل ليك دعاية في حيطة ولا تلصقها في محل ما ..الكلام ده غير موجود..! ممكن تغز الكرتونة بتاعة دعايتك في أي حتة ، لكن الناس دايما بتخطها قدام البيوت..يعني لو عندك بيتك وجا مرشح داير يخط دعايتو هناك .. لازم يستأذنك اول بالتبادي ، ولو كان وكيل للمرشح لازم يبرز ليك بطاقة رسمية.. يعني انت ذاتك كمواطن بتكون عندك سلطة الفحص والمراقبة.. وبتكون عارف شكل المستندات الرسمية كبطاقة الوكيل الرسمي للمرشح..!
لو كان المنطقة مجمع سكني (شقق مثلا) ، فهنا الشركة مالكة المجمع لازم يتم اخذ الإذن منها لوضع الدعاية ، بشرط ما تضايق السكان.. يعني لو في واحد ساكن وبتاع مشاكل وجا قال والله وجود الدعاية دي بيضايقني..طوالي بيتم سحبها..! الإعلانات في التلفزيون أو الإذاعة (طبعا مسموح ليك تشخط في خصومك زي ما تدور) فدي بتكون مدفوعة الأجر.. يعني الحزب أو المرشح لازم يدفع لمحطة التلفزيون او الأذعة..بشرط يتم توضيح الجهة الرسمية المشرفة على مثل هذا الإعلان..! يمنع تماما ان توضح أي دعاية انتخابية في أي مركز اقتراع..وهنا الناس شوية متسامحة.. يعني مركز الإنتخابات ما بتكون فيهو دعاية انتخابية ولا حتى بالقرب منو..!
كبر
05-08-2015, 10:12 AM
Kabar Kabar
تاريخ التسجيل: 11-26-2002
مجموع المشاركات: 18537
الحوارات التلفزيونية ، بالتساوي ، وبيشترك فيها رؤوساء الأحزاب..وكل واحد بيحاول يستغل الفترة القصيرة لتقديم ملامح البرنامج بتاعو..! مثلا المحافظين (كانوا وكتها في الحيكومة) كان عندهم مشروع ميزانية..فيهو زيادة ضرائب على المواطن ، وتضييق في التعليم.. بالتحديد قالوا ح يسمح باضافة 12 الف تلميذ جديد لكن ما عندهم ميزانية لتعيين مدرسين زيادة..وده الناس فهمتها انو الفصل الدراسي في التعليم العام انو عدد التلاميذ ح يكون كبير في الفصل الواحد.. النقطتين ديل الشعب اتذمر منهم تذمر شديد..وكان منتظر الإنتخابات بفارغ الصبر عملا بالمثل (كراع البقرة جيابة)..!
طبعا المحافظين ، من استطلاعات اولية ، اكتشفوا انو الشغلانة دي ح توديهم التوج ، وحاولوا استبدال مشروع الميزانية بمشروع اخر ..لكن سبق السيف العزل..!
الديموقراطيين الجدد برنامجهم قايم على استيعاب المساءل دي ، فهم عندهم التعليم اولوية ، يعني عندهم استعداد حجم الفصل يكون صغير ، وده بداهة بيعني فتح باب التعيين لمعلمين ومعلمات جدد ، النقطة التانية لعبوا على مسألة رفع الحد الأدني للأجور من عشرة دولار في الساعة الى خمسطاشر دولار في الساعة ، في نفس الوكت ح يعملوا على تخفيض الضرائب عن كاهل المواطن..طيب الفرق يجيبوا من وين ؟ اجابتهم فرض ضرائب اكبر على الشركات الكبيرة ، وحدد الأرقام..يعني دخل الشركة يكون كذا ح تدفع ضرائب كذا في المية..!.. اضافة لذلك عندهم بلاتفورم للدفاع عن البيئة (طبعا المحافظين نوهائي حكاية الدفاع عن البيئة دي ما عندهم ، لأنو الكلام عنها بيضر بمصالح الشركات الكبيرة)..
الحزب الذي احرز المرتبة الثانية في الإنتخابات الحالية (الوايلد روز) وح يشكل المعارضة الرسمية..زي ما قلنا انهم منشقين عن حزب المحافظين ، وفي الإنتخابات السابقة كان ممكن يحرزوا نتيجة كويسة..لكن في زمن الدعاية الإنتخابية ، عندهم واحد صرج شوية ، وقال كلام سلبي عن حقوق المثليين والمثليات (طبعا الناس ديل هنا قويين بصورة ما تتخيلها).. اضافة لبعض التلميحات العنصرية عشان كده سقطوا المرة الفاتت..والحكاية دي لازمتهم لغاية الإنتخابات الحالية ، والناس بتقول ليك ديل عنصريين لو مسكوا المقاطعة ح يجهجهونا..!
طبعا راس المال مكار للغاية ، وبمجرد اعلان فوز الديموقراطيين الجدد ، اسهم الشركات الموجودة في المقاطعة نزلت في البورصة..يعني نظام اتجاه للإنسحاب من الأقليم..!!
اها اول ما زمن الإقتراع انتهي (الثامنة مساء) ، في التاسعة مساء من نفس اليوم ، يعني بعد ساعة واحدة فقط ، كل كراتين الدعاية بتاعة كل المرشحين تم تجميعها.. يعني لمن قمنا الصباح التالي ، المدينة كأنها لم ترى انتخابات في حياتها قط..!!
كل حاجة دقة سريعة ، لأنو الزمن هنا رأسمال في ذات نفسو..عشان كده النص غصبا عنها منظمة ودقيقة..!!!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
جعفر محي الدين
عادل البراري
فيس بوك
تويتر
انستقرام
يوتيوب
بنتيريست