11:45 AM Mar, 11 2015 سودانيز اون لاين د.محمد حسن- مكتبتى فى سودانيزاونلاين
انتظرتك برة كانت اصطخابات العواصف والرعود ما خفت شي لكن عليك قلبي انبهم ضجت مسامات السكون وسألت هل يارب تعود وكتبت حرفين في انتظارك.. رجع الصدى اركز مكانك اركز قصاد الريح تجابه للهواجس والظنون اصلو بيناتكم وعود وصدق حسيس قلبي العنيد نقر على باب الرجا حسك دخل قبال نظرتك مرسول يقين عطر وجود وهمست ليك انا في رجاك شاعر مستف بالحنين وهمست لي اصبر واتحمل تعب زولا مدلل اصلو ما عرف السهر لكنه اداك العهود وشم عصب حسه الرهيف بي رنة من ضحكة عيونك وكلمة اتقالت هزيع ليلا ندي والقمرة كانت هي الشهود وعندها مديت صباعي على النجوم ندهت اتبسملت اتحوقلت حصنتك رقيتك وتفلت في عين الصبي وعين وشر الحسود وسدرت اتوجهت نحو النيل صباح لمن مرق نور النهار اتبدى لاح وبقينا اتنين في حدا القيف الموشح بي نفس موجا مشبع بالعشم في اللحظة دي فاضت منابع الشوق علي زي النهر لمن يفيض يكسر سدود هاك مني ليك ميثاق ممهر بي رحيق اندى الازاهر وبي عصير شريان مأكسج بي حضورك اني راجع ليك كاسر للقيود سفرا السنين الحامضة والطعم المسيخ وبقينا زي احلام بترحل كلما غم المسا وعينيك ما ظهرت قمر وسافر مع العشم الكسير حلو السمر واتارجحت حالة الوجود انفصام زولا جسد والروح معلقة بي شوارع الحلة والناس الجدود قاسية بالحيل الخطابات البتمشي مليانة بدفء الدواخل توصل تقالد لي عيون احلا البنات ويفضل قليب العاشق الولهان يمنى النفس بي حلو الردود انا يا ملاذ رائع الخواطر لما تتشعلل جنون وتنتثر بيناتن الوان الفنون اتذكري الريدة زي مجرى النهر اصلو ما فيها ارتداد ولا بتعرف للصدود وبس
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
د.محمد حسن
فيس بوك
تويتر
انستقرام
يوتيوب
بنتيريست