حكي طاعِم ... هل هو مصطلح سودانيزاونلايني .. ام هناك قاموس لغوي جديد ؟

Quote: يتخيل لى يا ود قبانى بعد السلام الحكى كلمة منشرة فى اللهجة السعودية ودول الخليج الاخرى اظن ان المصطلح سعودى برغم الاستعمال المنتشر لى كلمة سالفة و سولف

Quote: غايتو ما حصلنا زمن الاهل بسجلو شرايط كاسيت .. الا انو الكتابة دي طاعمة وحنينة بشكل !!

Quote: سلام يا هندسة هي مصطلح اسفيري لكن اصله ما من هنا جاي من منتديات الترتر و الزهزر و القرنفل و ناس يارايعة و يا شفيف ويا ظريف ويا عسل انت و بسكويت ....إلخ

Quote: سرد ممتع يا ست البنات وكلام طاعم وذكريات تزيل الاكتئاب

Quote: مولانا كيفك و سلامات واشتقنا لي كتاباتك الطاعمة

Quote: هذا الشخص يستعمل هذه الكلمه مجازا للدلاله على انه يتذوق هذا الحكى ..ما سمعت بى علم التذوق ...والذى لا يفهم او يشرح الا عن طريق التذوق

Quote: لكن بالمقابل يا صديقي سمعنا أهلنا بقولوا: "كلام مسيخ" أو "كلام ما عندو طعم".

Quote: وما تنسى: طعِّم السنّارة و طعِّم التيم مع اختلاف الاستخدام هنا

Quote: ههههههههههههههه قلت ارجع لي حبوبة ونسيني والله يا حليل زمان وايام زمان يا حاجة لو تتذكري انت عارف يا وهيط بخصوص النفس الطالع والنازل لا زلنا كذلك و الله ناس الانقاذ ديل كان لاقيين طريقة يعملوا لينا جمرة خبـيثة بتاعة نفس مودتي يا حبيب

Quote: سواقين السكة حديد (الوهيط ) الحسن ابراهيم بله الذى قاد قطار كسر الاضراب الشهير ..من بورسودان

Quote: شوف لي معاك يا وهيط

(عدل بواسطة محمد البشرى الخضر on 02-21-2015, 05:20 AM)

Quote: يا ود الزبير المجتمع المصري برضو بتطور وبجيب تعبيرات تماشي المرحلة تعبيرات مثل "ظرّفني تعرفني" و :طَحط" و"رِوِش" كلها حاجات جديدة على سبيل المثال

Quote: لا يا قباني بنستعملها حكي هي الما حقتنا بنقول كلام بلا طعم ولا نعم

Quote: الكلام دا يا قباني ما تعتبره حرف لموضوع البوست)

Quote: تحياتي ود قباني إذا دلفنا قليلاً إلى ( قاع المدينة ) فكونه نقول إن هذا الرجل ( طاعم ) .. فهذه كلمة ليست جيدة..

Quote: ست الفريق الطاعم كلامها

Quote: قباني سلام ومودة المفردة قديمة ، لكن انتقاالها إلى قاموس المثقفين جاء متأخرا زي كلمة ( جت ) بمعنى كلها أو كله أصبحت الآن مفردة عادية وكانت في السابق موغلة في الريفية وكذلك كلمة نجيض ونجيضة وكلمة بلع ولغف وكثير من الكلمات كلمة مسيخ و مساخة سبقت كلمة طاعم وطعامة إلى قاموس االمثقفين وهي بالطبع ضد كلمة طاعم وقد استعملت كلمات التذوق كثيرا في معاني الجمال ومقاماته

Quote: يا ود قبانى شايفك حكيتا كتير كلمة طاعم كانت تطلق فى التسعينات على الرجل ... استغفر الله العظيم بعد داك مشت وين و لصقوها فى ياتو كلمة برررضو ما فاتت بعيد اكلم طاعم و حكيهم طاعم و ياهم نفس الناس وقع ليك قدر ما قلنا نطرطشا ليك برضك جرجرتنا اها خم و صر مع التحيات و الود

Quote: صديقي يحي..حبابك وحباب ضيوفك هنا.. ياخي الواحد قرب يتغبي فيك العرفة ، لكن اهلنا قالوا..كن الله جاب كتـّالك..اكيد بيجيب حجازك..!! طبعا حجازك هنا..هو استاذنا وصديقنا ود قاسم..القام بقى حجاب بينكم وبين الردم..وفي رواية تقرأ (البل)..!! اليومين ديل يا قريبي..باقي الواحد متحسس شوية..مرة ناس تقول ليك انتا جهوي وعنصري..ومرة تقول ليك عامل فيها ابو العريف..نظام عارف أيتها حاجة..ولسع العالمين دي ما واقع ليها الحاصل..او واقع ليها لكن مستغربة وبتحاول تدفنك..لأن الشغلانة لو وضحت واعترفوا بيها بتخرب الرصة كتير خلاص..!!..المهم.. اها لو اتفقت معاي وقدرت تمرقني من الحساسية من ناس امسودان ، فح اقول ليك.. عندنا في ثقافة البقارة ، قبال نمشى الجامعة بتاعة الخرتوم وكده ، الناس عادي بتقول ليك..(حديثك طاعم) او (فلان حديثو طاعم)..والطعامة عند البقارة معيارها الأبيضين (الملح والسكر)..وعكسها يقول ليك (حديثك ماسخ) أو (فلان حديثو ماسخ)..يعني ناقص الطعامة(راخي ملح أو راخي سكر) ، والتي هي معيارها (الملح والسكر). عشان كده اهلنا البقارة لمن زول يكون حديثو حلو (مالك الحجة تب) بيقولوا ليك ده عنكوليب الحديث..طعامة ما بعدها طعامة..!!!. واستاذنا ود قاسم ممكن يشهد..وانت برضك ممكن تشهد يايحي..كم مرة واحدة من حبوباتك أو خالتك أو عمتك..او امك.. قالت ليك (بطل المساخة)؟..المساخة معناها كلامك مسيخ للغاية..وعكسها ..مفروض يكون كلامك طاعم..!!! شرحوا: الحكاية قديمة زي ما قال استاذنا ود قاسم..والمتكلمين والمتكلمات مرات بيحاولوا يكونوا واقعيين شوية..ويجيبوا حاجات التراث غير الملتفت ليها..!!! ..

Quote: Mutaz Abdelbagi Mohammed · Riyadh, Saudi Arabia في ذات جلسة سكر نادى أبونواس على ساقي الحانة : اسقني خمرا و قل هو الخمر **** ولا تسقني سرا ما أمكن الجهر استغرب الندماء من حوله كيف لأبي نواس ان يطلب إخباره عن الخمر و هو بها عليم كان بعض النقاد حضوراً(زي ود قباني دا كدا ) فأجاب أحدهم أن أبا نواس يعلم جيدا الخمر و لكن أراد لكل حواسه تستمتع بطعمها وأن تذوقها حتى سمعه. أظن هذه من تلك

Quote: إزيك يا دفعة، طاعم ما براها ... هو تطوّر اللغة. لو مشيت السودان في أيامنا دي، أنصحك تسمع أكتر من ما تتكلم، لأنو حيفتكروك جاي من كوكب تاني. المهم، في كلمات دخيلة كتيرة، بعضها مستساغ، أو قول ممكن الواحد يعديهو. لكن بعض الكلمات دخيلة على لغتنا تماماً (طاعم ما منها، باعتبار أهلنا في كردفان بيستعملوها). الدليل على تطور اللغة، حتلاقي كلمات كنت إنت وأبناء جيلك بتستعملوها، إختفت من اللغة في الزمن الحالي. نفس الكلمات دي لو رجعت لي جيل الخمسينات ما حتلقاها، وهكذا. عندي عدد من الأمثلة لمواقف حصلت لي مع الشباب أثناء إجازاتي. يا قبة، محتاجين نتصالح شوية مع الشباب عشان الأمور تمشي

Quote: هى يا أخوانا ...... الأحباب كووولهم هنا.... وقباني الله يكرمو بدأه بتذكرنا وأنا وين ما عارف ..... نجيكم بالرواقة ....... لكن نخت ( بياضنا ) قبل ما نطلع " إنت زااااتك طاعم يا قبة ..... "

Quote: شوف عمك ملهم كردفان قال شنو فى اغنية ( زى العسل )ياقبانى ياود اخوووى أقول ليك شنو ولو قتا مابكفى وجودك فى قلبى زى العسل بشفى .... كلامك فى ذاتو شهد طعمو لذيذ ........هز القلب لمسو تفسيرو ياسمحه زى هبة النسمه .....والرقه فى همسو حبيتو بى نفسى وكل الجواكى عطور والباقى بنقسمو ألخ ألخ حأنزلها لمن القى عود نضيف

Quote: تحلية : والله جادة ما بهظر .

Quote: فعلاً مفردة (طاعم ) لوصف كتابة ما : غير جميل . (رأي شخصي) وأيضاً ظهر في المنبر مثلها مفردة (شحمانة) مداخلة شحمانة ويقصد بها دسمة . وكلاهما (سمج وأراه قبيحاً) تحياتي .

Quote: تحيَّات زاكيات الأخ قباني وضيوفك شوف هني...كيف مفردة "طاعم" عند الشاعر المُجيد عبد الله ود شوراني،في مُجادعة مع الشاعر الرائع رشاد ود الناظر ودكرار دمِّي الغزَّا نفسي وليها رطَّب وريَّح أصبح جرحو يِنزف زاد بعد ماقيَّح مُرناعاً تتلُّو الروبة وين ماميَّح ناعم وطاعِم من غير ريحة جِسمو مريَّح المجادعة كانت في الثمانينات....

Quote: الفايت على الناس كلها انو كلمة طاعم و طاعمة لما تنقال للكلام لا تهضم ... و اذا كانت في كردفان تستخدم عادي ... تأكد ان هناك كلمات من الشمال او الشرق لا تهضم في كردفان او قد تعني شيء مختلف

Quote: يعني مثلا زمن الورق وين كان ممكن تلاقي أنيس منصور ولا الطيب صالح ولا أي من الصحفيين عشان تقول له حكيك طاعم ولا أكلك طاعم ..ثم أن المنابر نفسها تجمع أعضاء هم كتاب وقراء في ذات الوقت . يجاملون بعضهم بعضا .. ويبحثون عن مفردات تعبر عن أعجابهم ببعض . .

Quote: سلام يا طاعمين جابني التذوق ههههههههههههههههههههههههه . والله اطعم جلسة في اطعم بوست مع اطعم صاحب . تحلية : والله جادة ما بهظر

Quote: شفت كيف؟ جابت ليها تحلية كمان :) يا زول قُش خشمك واتخارج(*).]

Quote: غايتو أنا ح اعتبر كلامك دا الخلاصة بتاعت البوست. مع توضيح إنو المصطلح فيهو شئ من طعامة الأنثى. (موت حياة يا زول) البوست لمّا يترفع فوق معناتو فيهو شئ من الآكشن وإذا كان ما فيهو لازم نأكشنو

Quote: سلام قبانى وصحبه الكرام معليش انا داخله توووش فى بوستيكم دا من الصفحة التانية فعفوا ان جا كلامى مكرورا ومسيخ .. شخصيا بفتكر ودون الرجوع للمعاجم والصحاح وكتب الفقه ان الكلمة دخلت السودان مع الدراما السورية اعقبها دخول القنوات اللبنانية من ال ان بى سي و المستقبل وغيرها من برامج الصبايا والسهرات السخنه .. من امثال سيرة وانفتحت .. وتعالوا مع تونى خليفة وكدا ... باختصار اهلنا الشوام عندهم مقوله شائعه يقولوا ليك دا حكى بلا طعمة .. يرادف فى العامية السودانيه فلان دا نضمو لا طعم لا نعم ... حكى بلا طعمة ... وطاعم .. ومهضوم .. والمرور على كل الجهاز الهضمى الى منتهاه ... دا كلام شوام .. لولو لووووب .. انت شب كتيير مهضوم ... وصبيه مهضومة وهكذا دواليك لى كرعيك ...

Quote: انشالله بعد دا ما تخج لى اجابتى دى وتطرطش الكلام بحكى بلا طعمه وما تدينى الجايزة قبل كدا دخلت ليك فى بوست خجيت لى اجابتى ... وش حردان ...

Quote: يا جماعة لينا كم يوم ما قادرينا ندخل المنبر .. اللي عنده Password ما (حردانة)، يتكرم وينزل لينا المداخلة دي في بوست الظريف يحي قباني بتاع " حكي طاعم " مع الشكر ،، ،، المحترم / قباني أولا : نأسف للمداخلة باللفة، لأنو ما عندنا طريقة غير كدا. أنا من المتابعين لبوساتاتك اللطيفة، وهي من البوستات القليلة اللي تدخلها وقلبك قوي، من يجيك برطوش طاير، أو عكاز أو حتى مفراك !! أنا معاك، جماعتك " طاعم " دي سهكوها لامن (مسخوها !!) ذاتو ! لا شك أن اللغة متحركة، وسأورد لك بعض الأمثلة : حاجة باردة أصبحت بارد. محل تصليح اللساتك أصبح بنشر. قبل 20 سنة تقريبا لا أحد يستخدم بارد أو بنشر الرجاء نقل المداخلة للبوست، وحق المواصلات عليك (جواب مغرّم) يعنى ! . .

Quote: Fath-elrahman Abuagla · الأكثر تعليقا يا عمك اختصر الرجة واديني الزيت هههه فهل فهمت الجملة دي يا استاذ قباني ههه فدي واحدة من تعابير الشباب الان

Quote: نحن زمان الواحد بيمشي سوق الخرطوم .... يا ماشي (السوق العربي) يا (السوق الأفرنجي). الزمن ده كل الخرطوم بقى إسمها (عربي) بدون (سوق) حتى. يعني تلقى الكمساري بتاع الحافلة يكورك ((عربي .. عربي .. عربي)) حليل السوق الأفرنجي .. حليل طرمبة جكسا وطرمبة أحمد المصطفى .. حليل سانت جيمس والـ G.M.H. وحليل المحطة الوسطى. خرّمنا ليكم مش كدة؟ .......... حكي بلا طعمة. .