ذات جمعة في أوائل 2004 كنا في رحلة أسرية الى "شلال السبلوقة" ..لا زالت عالقة بصميم الوجدان ورواء الذاكرة .. كنا نملأ حافلة بحمد الله نساءا ورجالا واطفالا.. وصلنا لمنطقة الشلال قادمين من الخرطوم ..فوجدنا أن الراكوبة أو المظلة التي نقصدها قرب الشاطئ تقف قربها عربة هايس .. مفتحة الابواب .. نزلت من الحافلة وانحدرت الى الشاطئ لأرى كمية من الشباب اعمارهم بين العشرين والاربعين .. حوالى 12 .. بعضهم يقطع اللحم من ذبيحة معلقة ..وبعضهم يسبح ..وبعضهم جالسين متآنسين مستمتعين بمناظر الشلال يراقبون حركة اب رفاس ما بين الحقنة والمنطقة الشرقية .. وكانوا بالضبط معسكرين في الراكوبة التي لصقنا تماما .. فجئت الى الشباب الجالسين وبينهم بعض كبارهم .. ودار بيننا الحوار التالي :
- السلام عليكم آ رجالة - وعليكم السلام والرحمة ..اتفضل ..اتفضل .. - زاد الله فضلكم .. أنتو آ اخوانا من وين ؟ - نحنا من ابودليق - حباب أهلي البطاحين ..انا من اهلكم ناس شندي .. - حبابك عشرة حرم .. اتفضل اتفضل .. - شكرا والله .. شوفو يا رجالة .. شايفين الحافلة ديك ؟ - آي بلحيل .. - دي فيها اسرتي كلها ومعانا عروض جايين رحلة للمكان دا .. لو بالامكان تتحولوا بعد الشدرات ديك تكونو ما قصرتو تب ..نحنا معانا عروض.. هنا "قمز" أحدهم وكان اكبرهم سنا كأنه نشط من عقال وقال لي بأريحية وقوة :
- ابشر والله ..عروضكم عروضنا حرم .. ثم صاح بصوت جهوري في الشباب الذين يسبحون :ابقوا مارقين هوي .. اتحولوا لي اهلكم ديل ورا الشدرات ديك .. اسرعوا .. لم تمر دقائق الا وتم تحويل الذبيحة المذبوحة المعلقة الى الجهة الاخرى .. واختفى جميع من كان بالشاطئ .. فشكرتهم جدا ..واكبرت فعلتهم هذه جدا .. اقسم بالله .. أنه طيلة وجودنا من الساعة العاشرة تقريبا او الحادية عشرة صباحا حتى قبيل المغرب .. لم نر اي شاب يقترب من ناحيتنا .. بل قدموا لنا صحنا ماكنا مليئا باللحوم .. كما قدمنا نحن لهم ايضا بعضا من مما احضرنا معنا .. وبعد الغداء ذهبنا اليهم أنا ووالدي ومن كانوا معنا من الاخوة .. شربنا معهم الشاهي وطفنا في ربوع ابودليق وحكى لهم والدي الكثير عن البطاحين وقصصهم واشعارهم .. فانبسطوا ايما انبساط .. بيننا نحن قلنا : بالله شوف ضكارة الشباب ديل ..ديل لو كانوا ما شباب كرماء المحتد كانوا بكل بساطة قالوا ليك : دا مكان عام .. ما عاجبك امش انتا !.. ابي – رحمه الله رحمة واسعة – قال لي بعد هذا الموقف : البطاحين ديل واسطة عقد مكارم اهل السودان .. لله درهم ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عادل ابراهيم احمد
فيس بوك
تويتر
انستقرام
يوتيوب
بنتيريست