|
الشفافية: من الذي أفسد أخلاقنا كشعب سودانى؟
|
03:51 AM Sep, 18 2015 سودانيز اون لاين بريمة محمد-الولايات المتحدة، ولاية فرجينيا مكتبتى فى سودانيزاونلاين
هذا السؤال يحيرنى : أولاً للذين يظنون أن الحكومة هى من أفسدت أخلاق الشعب السودانى .. أقول ليس حجة كافية بدليل أن أخلاق الشعوب هى ضمن تراثها .. وتراث الشعوب لا يتغير فى فترة وجيزة.
نأخذوا مثال: تراث التصوف فى السودان لم يتغير .. تراثنا فى الغناء لم يتغير .. تراثنا فى الرقص لم يتغير .. وغيرها ..
أأقر أن تراثنا فى الكرم .. والضيافة .. تغير نتيجة لتغير العصر .. وهذا التغيير ممكن يحصل فى وجود الحكومة الحالية أو غيرها .. بسبب تسارع عجلة التنكنولوجيا وتغير نمط الصداقات والعلاقة ..
ونسأل سؤال أخر .. هل هناك علاقة بين الأخلاق والشفافية ؟ .. وما بال شعوب مثل الدنمارك التى تأتى فى أول قائمة الشفافة .. هل لهم أخلاق وهم أكثر الشعوب الذين يذهبون عراة فى الشواطئ ؟
نواصل ..
بريمة
|
|
|
|
|
|
|
|
Re: الشفافية: من الذي أفسد أخلاقنا كشعب سودان� (Re: بريمة محمد)
|
تحياتي بريمة اعتقد جازما الحكومة هي من غيرت اخلاقنا لانها تدخلت في عملية تطور القيم والعادات والسلوك تدخل قسري طاردت الناس في الشوارع وادخلتهم الحراسات بتهمة الزني .. ماشة معاك انثي اذا انتما زانيان الا ان يثبت العكس .. تشيل معاك قسيمتك ملامح المواطن السوداني الاغبش .. لابس سكين في ضراعو وشايل ليهو عكاز .. والسكين درجات والجفير درجات .. الجفير فيهو المسلة والمنقاش والابرة .. قلعوهم منهم غصب رغم انهم ما ادوات عنف جاك ضيف ومرقت بالليل قبضوك وزعو ليهم الرغيف بالحليفة علي عدد اولادك .. والناس البتعيشهم وما كنا بنحسب طاردوا اولادنا وسكتنا بل سقناهم للمعسكرات ليهانوا بحجة التعليم وكسرنا عزيمتهم وووو الحكومة المسؤول الاول
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: عبدالحفيظ ابوسن)
|
عبد الحفيظ، سلامات ..
Quote: تحياتي بريمة اعتقد جازما الحكومة هي من غيرت اخلاقنا لانها تدخلت في عملية تطور القيم والعادات والسلوك تدخل قسري طاردت الناس في الشوارع وادخلتهم الحراسات بتهمة الزني .. ماشة معاك انثي اذا انتما زانيان الا ان يثبت العكس .. تشيل معاك قسيمتك ملامح المواطن السوداني الاغبش .. لابس سكين في ضراعو وشايل ليهو عكاز .. والسكين درجات والجفير درجات .. الجفير فيهو المسلة والمنقاش والابرة .. قلعوهم منهم غصب رغم انهم ما ادوات عنف جاك ضيف ومرقت بالليل قبضوك وزعو ليهم الرغيف بالحليفة علي عدد اولادك .. والناس البتعيشهم وما كنا بنحسب طاردوا اولادنا وسكتنا بل سقناهم للمعسكرات ليهانوا بحجة التعليم وكسرنا عزيمتهم وووو الحكومة المسؤول الاول
|
ومن السهل أنا أقول .. المستعمر هو من أفسد أخلاقنا .. ومن السهل أقول أن الشعوب السودانية التى لم تلتزم بمعيار الأسلام كمرجعية أخلاقية هم السبب أيضاً ..
أين الحقيقة يا عبد الحفيظ؟
بريمة
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: عبدالحفيظ ابوسن)
|
الأخ بريمة , هذا السؤال الذى طرحته : " من الذى أفسد أخلاقنا كشعب سودانى ؟؟؟ " سؤال هام , بل شديد الأهمية , ويحتاج الى دراسة وبحث علمى , ونتطلع فى هذا الشأن للباحثين أهل الخبرة , والتخصص كى يضطلعوا بهذا الدور الحيوى والهام , كى يضعوا النقاط على الحروف , ويصلوا بنا الى الحقيقة , وقد سبق كان لى تعليق ربما يشير من بعيد لهذه الناحية فيما يلى نصه : هناك حقيقة يا اخوانى يجب أن ندركها , وهى أن سوداننا الحبيب يعد من أغنى دول العالم من حيث كمية المساحة القابلة للزراعة , (200 ) مليون فدان , ومن حيث المراعى الخصبة , وكمية المعادن الكامنة فى باطن أراضيه , بالاضافة الى ذلك الصفات الحميدة التى يتميز بها قاطنيه من آلاف السنين , فقد عرف عنه اقليميا ودوليا أنه متفرد , وذا ميزة خاصة به عن مجموعة القيم الانسانية النبيلة , فهو معروف بالأمانة , وطيب المعشر , والأخلاق الفاضلة , والترابط الاسرى , ومن هذا المنطلق , ونتيجة لهذه المميزات جميعها صار من أكثر البلاد أستهدافا , وما نعائشه الآن من فتن وصراعات , ودمار لاحدود له يعبر تعبيرا صادقا عن نتائج هذا الاستهداف , وللأسف الشديد أن ذلك كله يتم وينفذ بأيدينا نحن دون أن ندرى أننا لايعدو كوننا دمى تحركها الأيدى الخفية لتحقيق مآربها فينا , فهل بعد ذ لك كله نفكر فى الهرو ب , ونحقق لهم بطوع أمرنا مآربهم فينا ؟؟؟ فهذه والله ليست شيمة الرجال , علينا جميعا من كان مهاجرا , أو لايزال فى طريق الهجرة أو مستقرا , أن نضع هذا البلد العظيم فى حدقات عيوننا , وألاّ نجعل لليأس طريقا الينا , فلا بد من الحرص الشديد , وتوافق , وترابط الجميع على ذلك .
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: عوض سيد أحمد)
|
العبار بريمة بلل
وصفك للمشكلة غير دقيق ولقد خلطت الأوراق ببعضها البعض. نعم كانت هنالك بيوت للرذيلة ، ولكن لم تكن هنالك صفوفا كما تفضلت البارات كانت مفتوحة وكان بعض الناس يشترون حاجاتهم منها من غير مضايقات من الحكومة. ونفس الذين كانوا يذهبون الى تلك البيوت والبارات، كانو موظفين وعمال في الخدمة المدنية والشركات، ولقد كأنو يتصفون بالصدق والامانة والإتقان في العمل، ولم يكونوا متلقين رشاوي او متهربين من عملهم و معظمهم خدموا البلد بالغالي والنفيس.
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: عبدالحفيظ ابوسن)
|
الأخ بريمة ... لك التحية ولضيوفك الكرام .
ما ادهشني اخي بريمة هذا الاقتباس !!!
Quote: وما بال شعوب مثل الدنمارك التى تأتى فى أول قائمة الشفافة .. هل لهم أخلاق وهم أكثر الشعوب الذين يذهبون عراة فى الشواطئ ؟ |
ما علاقة المظهر الاوربي بسلوكهم !!؟ هولاء العراة هم الاصدق والاكتر امنآ وامانآ في هذا العالم . يا بريمة لو سمحت المقارنات لاتكون هكذا اتكلم عن اصحاب الملابس المحتشمة والدقون المزيفة وهم عراة الاخلاق والقيم والانسانية ..
ولك الشكر .
******************* فظيع جهل ما يجري وافظع منه أن تدري !
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: مني عمسيب)
|
الأعزاء أبو سن ومنى عمسيب.
يجب أن نذكر أخونا بريمة بوزارة التخطيط الاجتماعي الذي تم أنشائها في بدايات عهد الإنقاذ الفاشي، وكان على رئاساتها علي عثمان محمد طه.
كانت تلك الوزارة بميزانية كبيرة، ضمت لها عدة وزارت في وزارة واحدة. ولقد كان الهدف الرئيسي من أنشاء تلك الوزارة هو "أعادة هندسة
المجتمع السوداني". وطيعا العبار بريمة مازال عينو في الفيل وبطعن في ضلو
وها هي النتيجة ماثلة أمامنا تماما
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: مني عمسيب)
|
العزيزة منى، سلامات وشكراً علي المرور ..
Quote: ما علاقة المظهر الاوربي بسلوكهم !!؟ هولاء العراة هم الاصدق والاكتر امنآ وامانآ في هذا العالم . يا بريمة لو سمحت المقارنات لاتكون هكذا اتكلم عن اصحاب الملابس المحتشمة والدقون المزيفة وهم عراة الاخلاق والقيم والانسانية .. |
ندعوك يا منى وكل الأخوة الذين يتداخلوا أن نتجرد من الغرض أولاً .. فى بحث هذا السؤال وأجابته .. فأنا لا أعرف الأجابة.
نقول يا منى بخصوص الدنماركيين نعم يجب علينا المقارنة .. نعم يتعرون فى الشواطئ .. وليس لهم غيرة حتى علي محارمهم .. ذات مرة سمعت حكاية أن شخص يقيم علاقة مع زوجة أحدهم .. ولا يدري إن كان زوج المرأة يدري أم لا .. فالرجل كان يقطع حشائش المنزل وينظف "الباك يارد" .. ويجذب الأشجار وغيرها من الأعمال المنزلية وكان يخادن زوجة الرجل .. فى نهاية المطاف وقعت عينه علي أبنتهما وأنشأ معها علاقة وترك الزوجة .. هناك أنتفض الرجل ووصف الشخص "بأنه خنزير حقير .. ومنعه من دخول منزله". ممكن نقف فى مثل المثال ونقار بين و الأخلاق التى يعرفها الشعب السودانى .. فالرجل يبدو علي علم بما يجري وربما زوجته أخبرته برغبتها وهو متصالح مع رغبة زوجته فى إقامة علاقة .. لكن خينما دخل الموضوع علي بنته .. ظهر وازعه الأخلاقي .. بأن علاقة رجل بالمرأة وأمها علاقة لا أخلاقية .. هذا المثال لا يمكن حتى لو في الخيال أن تضربه فى حق زوجة وأبنة إنسان سودانى .. هذا مثال يوضح أخلاقنا وأخلاقهم .. فنحن كثقافة وأسلام أفضل أخلاقاً منهم .. نحن نموت فى شرفنا وأعراضنا .. هم لا يموتون .. !
نأتي للجانب الأخر يا منى، الناس ديل أمناء أمانة الواحدة التى نعرفها .. ما فيهم زول يسرق .. ولم يتصفوا بها .. وما فيهم زول يغش ولم يتصفوا بالغش أو الخداع .. وأياديهم بيضاء ونفوسهم كبيرة تجاه المال العام .. أما نحن رغم ديننا .. وأمانتنا الظاهرة فى الخليج والجزيرة العربية إلا أننا كشعب نكذب ونغش ونخدع .. ونمارس الرذائل ضد مفهومنا الأخلاقي والدينى .. فوق ذلك أيادينا غارقة فى المال العام ونسرق ننطن فى المنازل "تلب" بغرض النهب والنصب ..
فى كل هذا الكوجان الذي قلته لك يا منى تلاحظي أننى لا أملك أجابة: هل الأخلاق والشفافية لهما علاقة متلازمة؟ .. وهل إذا فسدت أخلاقنا بالضرورة نكن فاسدين فى موضوع الشفافية؟
بريمة
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: بريمة محمد)
|
الأخ عبد الحفيظ، سلام
Quote: وهل قام المستعمر بالتدخل السافر في سلوك وعادات الناس ؟ وحتي الاسلام المشهور عنه انه دخل من خلال علاقات التجار وليس بالفتح والغزوات |
الأمر يا عبد الحفيظ .. ليس جدال أو صحة موقفي وخطأ موقفك أو العكس .. أنت قدم رؤيتك .. وأنا مازلت أبحث عن رؤية لغايب الشفافية وفساد أخلاقنا .. أنا ما مقتنع أن الحكومة وحدها ممكن تغير أخلاقنا بهذه الدرجة ..
لو قلت لي أن الفقر .. أو العوز أوالفاقة أوالحاجة هى السبب .. ممكن تجدنى أتعاضف مع موقفك وطرحك ..
بريمة
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: بريمة محمد)
|
Quote: نقول يا منى بخصوص الدنماركيين نعم يجب علينا المقارنة .. نعم يتعرون فى الشواطئ .. وليس لهم غيرة حتى علي محارمهم .. ذات مرة سمعت حكاية أن شخص يقيم علاقة مع زوجة أحدهم .. ولا يدري إن كان زوج المرأة يدري أم لا .. فالرجل كان يقطع حشائش المنزل وينظف "الباك يارد" .. ويجذب الأشجار وغيرها من الأعمال المنزلية وكان يخادن زوجة الرجل .. فى نهاية المطاف وقعت عينه علي أبنتهما وأنشأ معها علاقة وترك الزوجة |
العبار بريمة.
هذه صورة نمطية غير صحيحة عن الغرب، أنت زول عايش في أمريكا، وتعلم جيدا ما هي الخيانة الزوجية. ولذلك نسبة الطلاق قد تكون عالية جدا وسط الغربيين، ومعظمها بسبب الخيانة الزوجية. أما في بلادنا فالمرأة قد تكون على علم بأن زوجها ألعوب، وزير نساء، ولكنها تصمت من أجل الأطفال وبسبب نظرة المجتمع السيئة للزوجة المطلقة.
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: بريمة محمد)
|
لك التحية أخي بريمة ولضيوفك الكرام
Quote: نأتي للجانب الأخر يا منى، الناس ديل أمناء أمانة الواحدة التى نعرفها .. ما فيهم زول يسرق .. ولم يتصفوا بها .. وما فيهم زول يغش ولم يتصفوا بالغش أو الخداع .. وأياديهم بيضاء ونفوسهم كبيرة تجاه المال العام .. أما نحن رغم ديننا .. وأمانتنا الظاهرة فى الخليج والجزيرة العربية إلا أننا كشعب نكذب ونغش ونخدع .. ونمارس الرذائل ضد مفهومنا الأخلاقي والدينى .. فوق ذلك أيادينا غارقة فى المال العام ونسرق ننطن فى المنازل "تلب" بغرض النهب والنصب .. |
من خلال هذه العبارات أجبت على سؤالك أخي بريمة .. الشعب السوداني بطبعه متدين ، ولكنه لم يستغل هذا التدين لتحقيق مصالحه الدنيوية إلا في عهد هذا النظام ، والأدلة على قفا من يشيل .. مع مجئ حكومة الإنقاذ ظهرت كل الممارسات التي ذكرتها باسم الدين ، وإلا قبلها كان الناس ظاهرهم كباطنهم .. والذي يظهر خلاف ما يبطن لن يرحمه المجتمع ، وإلا من أين أتت عبارات مثل : اأبو عمة بلاع الذمة ، والبرقص ما بغطي دقنه ، بالنهار بسبح وبالليل بضبح قايلين القبة فيها فكي .. وغيرها من الأمثال والمقولات التي تثبت بأن الأساس الذي إنبنت عليه ثقافتنا غير التي نراها اليوم !!! الذي أفسد أخلاق الشعب السوداني هو النظام القائم في الخرطوم .. حيث أننا لم نسمع بأشياء ولم نعتاد على أمور إلا في ظله .. أغتصاب الرجال والنساء في زنازين الأمن .. الإبادات الجماعية .. مطاردة الخصوم حتى وخارج البلاد قطع الأرزاق والتشريد من الوظائف .. تمكين الأجانب في البلاد .. بث العنصرية بين أفراد الشعب الذي عرف بتقديره لأخيه السوداني دون النظر لقبيلته .. وغير ذلك الكثير من الأمثلة .
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: حسن إبراهيم حسين)
|
شكراً يا ول أبا حسن، وشكراً دكتور يوسف والاخ عوض وعبد الحفيظ .. سوف أتي لمداخلاتكم ..
أري أن الأخ عادل أمين، أشار إلي الجوع والفقر والجشع .. فى الصورة التالية ..
هل الجوع له علاقة بفساد الأخلاق؟ أم هل الجشع هو الذي أفضي إلي الجوع؟ .. مع أن الأجابات تميل إلي نعم .. إلا أننى لم أقطع بحتمية صحة الأجابة .. أو حصر الأجابة فى الفقر والجوع والجشع ..
أريد أن أذهب إلي جهة أخري .. وهى الحروب التى ضربت السودان .. وقضت علي ثرواته .. والموت المستشري من قبل قطع المتمردين لأرزاق العباد .. والهجرات الجماعية للمدن ومعسكرات اللاجئين .. ربما كلها تدخل فى مسألة فساد أخلاقنا ..
لكن يظل سؤالي ما علاقة كل ذلك بالشفافية؟ فهل لأن الأنسان إذا ما سرق من أجل العيش فإنه بالضرورة يحاول مدارات سوءته بالكذب والغش .. وبالتالي يفقد الشفافية؟
بالجد نحن محتاجين أن نفهم سبب فقدان شعب بأكمله لمسألة الشفافية فى المال العام .. حتى صرنا فى أخر قائمة الفساد الدولية .. وربما إذا ما فهمنا مسألة الشفافية ومتعلقاتها .. ربما نستطع معرفة الكثير عن خلاصنا من المشكلة.
بريمة
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: بريمة محمد)
|
ول ابا بريمة..حبابك يا صديقي والتحية لضيوفك هنا.. فرضيتك الأساسية سليمة ، بتاعة انو الأخلاق ما ممكن تتغير بين ليلة وضحاها وتظل ارث متوارث ويتطور ايجابيا..لحد هنا انا متفق معاك..و لكن ماذا تقول اذا قلت ليك الذات السودانية تتميز بالتناقض والنفاق.. يعني حكاية عندها ارث اخلاقي ، دي في حد ذاتها كضبة كبيرة.. عشان كده الحاصل اليوم هو تطور طبيعي لعدم وجود اخلاق اساسا..خصوصا نقطة تجاه المال العام..ما عندنا ارث اخلاقي متطور ومتراكم تجاه فكرة المال العام..بل عندنا فساد مستمر لعشرات السنين..صحيح الناس مرات بتذكر ليك حالات فردية..خصوصا فكرة الأمانة..على بالحلال يا بريمة الجماهير الحايمة في السعودية مثلا.. لو لا وجود السيوف وقطيع اليدين والرجلين..من زمان كان السعودية دخلت في حيص بيص..وعشان ما ندخل في جدل ..نفس السودانيين البيجوا من السعودية ، بتلقاهم بيدفعوا الرشاوي عشان امورهم تمشي في السودان..و الكلام ده ما بيقدروا يعملوهو في السعودية..يعني قطعة البحر بتغير اخلاق الناس قدر ده؟..!!
زمان كنا بندرس مادة اسمها (فلسفة القانون)..واستاذنا دكتور صديق حسين الله يطراهو بالخير.. ذكر طرفة لغاية الليلة بتذكرها كانما كانت امبارح..و كان الموضوع عن القانون والأخلاق..فقال..السودانيين عندهم غبش في الرؤية تجاه مسألة الأخلاق.. يعني تلقى الناس يوم الخميس (ايام اللوغو بتاع تبيع قميصك ما تفوت خميسك)..مبتهجة سكر وبنات وعيال..و تاني يوم نفس الناس ديل بتلقاهم في الصف الأول في الجامع وبيصلوا صلاة الجمعة زي الترتيب..وعادي الخطبة بتكون عن الفحشاء والمنكر..سواءا خمور ، زنا..الخ..مافي واحد ، من باب التصالح مع الذات بيمرق ويحرد الصلاة..!!
نفس الفكرة يا صديقي.. الناس البتتعدى على المال العام في السودان..ياهم ذاتهم بتلقاهم في الصفوف الأولانية في صلاة الجمعة..في البكيات بيكونوا هميمين.. في الملمات ..كل الشغل الإجتماعي بتلقاهم قاعدين ومواجبين..لكن في المال العام خمش شديد..ليه؟..يعني حكاية الصلاة بتنهي عن الفحشاء والمنكر ما قاعدة تقسم معاهم؟..وليه بيدعوا الإسلام؟..ووكتين زول بياكل المال العام من غير ما يرمش ليهو جفن..بيصلي لي شنو بالضبط؟..بيغش روحو؟ بيغش الله؟ ولا بيغش الجماهير؟..
تجربة الدنمارك..مقارنتك صحيحة.. لكن ارجو ان يتسع صدرك لسماع رأي مغاير.. الجنس والتعامل معاهو هو عبارة عن ثقافة..و الأخلاق هنا نسبية وبتخضع كتير لثقافة الشعب المعين..صحيح ناس الدنمارك بيمشوا عراة (ودي قمة الشفافية والصدق مع الذات كما ذكرت منى عمسيب واتفق معاها)..لكن مافي شفع قاعدين يجدعوهم في الشوارع ويتبروا منهم.. عارف ليه؟..لأن عندهم حرمة النفس في درجة عالية للغاية..ولك ان تسأل نفسك: ليه نحن بنصلي وبنصوم..و بنرتكب الفاحشة وبنكتل النفس البريئة ونجدعها للكلاب؟..ولا الكلام ده ما حاصل في السودان؟
الدنماركي يا ول ابا لمن يعاين لحكاية التعدد في الزواج بيتعبرها خلل اخلاقي وعيب وفضيحة ومسألة غير انسانية البتة..و التعدد عندو يصل لحد الجريمة الآخلاقية والقانونية..يعني ما فيش حد احسن من حد..نحن نشتغلهم بالعري وهم يشتغلون بالتعدد في الزواج..!! وزي ما انت قلت..نفس العراة بتاعين الدنمارك..ما بتلقي بينهم من هو على استعداد على التعدي على المال العام ، ولا اساءة استخدام السلطة ، ولا مؤسسة بوليس مرتشية..ولا دغمسة في الميزانية العامة..ليه؟..وكل الحاجات دي بتلقاها عندنا نحن اللابسين ومغطيين عوراتنا..!! الدنماركي عندو ارث اخلاقي تجاه المال العام ، والإرث ده متطور وماشي بصورة ايجابية..نحن في السودان ما عندنا ارث اخلاقي تجاه المال العام وبقية الحقوق العامة..و الفكرة دي بتلقاها في كتير من الدول الأفريقية.. لأنو ما عندنا فكرة دولة ولا اخلاق دولة ولا اخلاق مواطنة..!!
لو لقيت فرقة ح ارجع بتلخيص لواحد من تقارير منظمة الشفافية الدولية عن الفساد في السودان ، واسبابو..!
ولو الناس حبت تحدد نقطة زمنية.. فاقول النص التاني من العشرة سنوات الأولى لنظام مايو هي التي كانت بداية الإنحدار..الى ان وصل الى الأسوء الآن..والحسنة والوحيدة للإنقاذ انها كشفت عن بشاعة الذات السودانية للأخر..وشايف الناس هنا ، غالبيتها، متبنية نهج الكاتب العظيم الطيب صالح ..بتاع (من اين اتى هؤلاء؟)..يعني جوا من السماء على قول استاذنا وصديقنا بولا؟..ده تطورنا الطبيعي كأمة..كن سمح وكن كعب.. !
ودمتم..
كبر
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: بريمة محمد)
|
التحية لصاحب البوست ولصحبه الكرام ....
ينسب للإمام علي كرم الله وجهه أنه قال " لو كان الفقر رجلاً لقتلته " وذلك لما للفقر من تأثير على العقيدة ، إذا لم يكن الفقير قوي الايمان ، حيث قد يصيبه الشك والريبة في حكمة الخالق ، حينما يرى الغني المترف القاعد المتبطل ، ثم يرى نفسه مع اجتهاده وعمله لا يجد شيئاً لذلك كان رسول الله صلى الله عليه وسلم يستعيذ من الفقر مع الكفر ، فيقول : ( اللهم إني أعوذ بك من الكفر والفقر ) وكان أيضاً يقول : ( إني أعوذ بك من الفقر ، والقلة ، والذلة ، وأعوذ بك من أن أظلم أو أُظلم ) وكذلك لا ينكر للفقر دوره السلبي وخطره على الفكر ، من حيث انه يجعل صاحبه مشغولاً بضرورات الحياة لنفسه وعياله ، فلا يبقى له وقت للتفكير في الابداع ـ في الغالب ـ ولذلك قال الفقهاء لا يقضي القاضي وهو جوعان . وأما خطره على الأخلاق والسلوك فكبير جداً إلاّ إذا بلغ صاحبه مبلغاً كبيرة في الايمان والتقوى ، ولهذا قالوا : ( صوت المعدة أقوى من صوت الضمير ، وشر من هذا أن يؤدي ذلك الحرمان إلى التشكيك في القيم الأخلاقية نفسها ، وعدالة مقاييسها ). وهناك أحاديث كثيرة تدل على العلاقة بين الفقر والدين والمغرم وبين سوء الأخلاق ، فقد روى البخاري وغيره بسندهم عن عائشة رضي الله عنهما أن رسول الله صلى الله عليه وسلم كان يدعو في الصلاة ويقول : ( اللهم إني أعوذ بك من المأثم والمغرم ) فقال له قائل : ما أكثر ما تستعيذ ـ يا رسول الله ـ من المغرم ؟ قال : ( إن الرجل إذا غرم حدّث ، فكذب ، ووعد فأخلف ) قال الحافظ ابن حجر : ( يستفاد من هذا الحديث سدّ الذرائع ، لأنه صلى الله عليه وسلم استعاذ من الدين ، لأنه في الغالب ذريعة إلى الكذب في الحديث ، والخلف في الوعد ، مع صاحب الدين عليه من المقال) . والحديث وإن كان في الدّين ولكن السبب الأساس في ذلك هو الفقر ، وعدم القدرة على الأداء ، بل إن هناك أحاديث تدل على وجود العلاقة بين الفقر ـ إذا لم يصحبه ايمان قوي ـ وبين الرذائل مثل السرقة ، والزنا ، ونحوه من الفواحش والاختلاسات . ونحن هنا لسنا بمعرض الحديث عمن تسبب للشعب السوداني في ما يعانيه من فقر فأنا وأنت وهو وهي وهم يعرفون من تسبب في ذلك نتيجة خطل سياساته الخرقاء .
تحياتي ،
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: Othman Al-Hasan Babikir)
|
طيب يا عثمان، إذا كنت تري الفقر هو السبب .. ما بال الذين فى السلطة والذين هم أمنة المال العام، وهم الذين يمارسون الأختلاس؟ الأختلاسات التى أذكمت الأنوف .. هل تظن أن أصحابها سسبب سرقاتهم هو الفقر والفاقة؟ .. إن قبلنا الفقر كحجة فى رعاع الناس والمساكين والغلابة لكن يصعب أن نقبل بالفقر كمبرر لتعدي الأغنياء علي المال والذي هو حاصل اليوم.
بريمة
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: بريمة محمد)
|
وهذا يحملني أن اطرح سؤال
متى كانت أخلاقنا عالية فتدنت ؟تضرالمبدأ في سمو الأخلاق هو ألا تضرأحد وألا تتعدى على حرية أحد
ولكن هل هذه الوصفة حقن في الصيدلية نحقن بها أنفسنا ؟
المعضلة كيق تقوم ثقافة أمة نحو الفضيلة ؟
هل بالسيف كما استشهد أحد المتداخلين ؟
وبوصفي في السعودية لا أقدر على الشفافية وما بقدر أقول البغلة في الإبريق
وظلمتونا والله
(البليلة هني دايرة مصوصلة خايفين الحجار)
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: حسن إبراهيم حسين)
|
ول أبا حسن، جيداً جيت ..
كون المرء لا يستطع قول ما يريد .. دا فى حد ذاته شفافية ..
ما رأيك يا ول أبا .. نقسموا الموضوع إلي موضوعين: عدم الشفافية بالنسبة للمواطن البسيط .. والأخر عدم الشفافية بالنسبة للمتنفذين ..
كلامي دا بنيته علي أساس طرح ول أبا عبد الرازق الطيب ودكتور يوسف، والأخ عثمان وغيرهم .. الذين يقولون أن الدولة تلعب دور فى أفساد أخلاق الناس ..
ومن هنا نبدأوا بالسؤال:
ماهى الأسباب التى تجعل ناس أغنياء يسرقون؟ .. قبل ما نجيب علي سؤال لماذا يسرق هؤلاء .. أتمنى أن نجيب علي سؤال كيف يسرق هؤلاء؟
بريمة
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: مني عمسيب)
|
Quote: ماهى الأسباب التى تجعل ناس أغنياء يسرقون؟ .. قبل ما نجيب علي سؤال لماذا يسرق هؤلاء .. أتمنى أن نجيب علي سؤال كيف يسرق هؤلاء؟
بريمة |
تحياتي الاخ بريمة وكل المتداخلين ما يحدث ليس سرقة بل هو نهب بمعني اصح .. من هم هؤلاء الاغنياء نرجوا تحديدهم لان لكل منهم تاريخ ...
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: بريمة محمد)
|
ول ابا بريمة..حبابك يا صديقي كل سنة وانت طيب..و عيد الحول ما يغضب زول ، زايدين ماني ناقصين..!
ونعتذر لأخونا حسن ابراهيم..لكن هو مثل..وفيهو كتير من الصحة.. وبنطبق على السودانيين الجايين من اوربا ونورث امريكا ، بره ماشين زي السلك.. يرجعوا السودان ويخشوا المعمعة..!
فعلا يا بريمة القانون ليهو اثر.. لكن القانون براهو ما بيعمل حاجة..والدليل السودان فيهو قوانين كتيرة وبرضك الخطأ حاصل..! المواطن السعودي بيفتكر احترامو لقانون بلدو عبادة ومواطنة..الإنسان في نورث امريكا مثلا.. بيفتكر احترامو لقانون بلدو مواطنة وقيم سامية عليا ما فيها مزايدة..يعني لا في مؤسسة بتظلمك ولا في حكومة بتاكل حقك ولا في موظف بعتدي على المال العام (طبعا الفساد موجود في كل مجتمع بشري ، لكن النسب تتفاوت..)..!
حكاية ما عندنا موروث اخلاقي تجاه المال العام.. اديك مثال.. فينا كم واحد متذكر انو نال تعليم في مؤسسات عامة..وفينا كم واحد متذكر حكاية تعاملنا مع الحاجات.. امسك ابسط مثال..الكنبة والدرج.. دي مفروض تكون ملكية عامة.. تحافظ عليها عشان في زول/ة بعدك محتاج يستخدمها..هل متذكرين شكل الكنب والأدراج؟.. تحطيم .. تدمير.. شخبطة بالسكاكين ونحت..ناهيك عن الحيط..والكتابة فيها..!
هسع كلنا ، بنخش حمامات في البلدان القاعدين فيها.. مافي زول بيشخط ليهو حيطة ولا يكتب بالوان.. ليه؟.. لأنو الناس عندها احساس بالحق العام وضرورة المحافظة عليهو..! نفس الجيل الكان بيكسر الكنب ويشخبط الحيط.. ياهو نفس الجيل اللمن يمسك زمام الأمور.. بيفسد باعتبار انو ده مال عام وما عندو وجيع..!
الموروث الشعبي فيهو حاجات سلبية.. وللأسف هي السايدة..مثلا..عندنا مثل بيقول ليك.. لو سرقت اسرق جمل ولو عشقت اعشق قمر..! يعني انسان وعيو الباطن مسكون بقيم زي دي ..تتوقع منو شنو؟..
نفس موقفك حصل لي في زيارتي الأخيرة للسودان ، واحد من اعمامي بكل بساطة بيقول لي: ليه ما داير تعمل استثمار في السودان؟ ، قلت ليهو ظروف السودان ما بتسمح لأنو البلد الفساد فيها كتير..صاحبنا ولا اشتغل بالعبارة دي وطوالي قعد ينصحني: شوف ليك زول غليد في الحكومة وادفع ليهو عشان امورك تمشي..!.. قلت ليهو عشان حكاية الدفع للناس الغلاد ديل ما ح نجيب استثمار للبلد.. ان شاء الله المرفعين ياكلكم ذاتو..!!!!!
ياخي بلد ، فيها ، الناس بتفتخر بانها بتخالف القانون وبتعتبرها فهلوة ونجاح وشطارة.. بتفتخر بانها بتمارس جنس هبتلي.. بتفتخر بانها بتكتل الزول فراسة ورجالة..وفوق ده بتمشي الجوامع وبتصلي وبتصوم وبتقول ليك نحن ناس متدينين..!
ما عندنا ، كجيل ، قدوة اخلاقية تجاه المال العام ، ، ما عندنا اخلاق مواطنة ودولة ، وما عندنا حاجة نقدمها لمن يجئ بعدنا..اللهم الإ كن نتحدى انفسنا ونحدث قطيعة و نعلم اجيال جديدة..!
ونشوفكم تاني..
كبر
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: أحمد ابن عوف)
|
كل سنة وانت طيب. صديقي بريمة. بوست في منتهي الجمال. النقد البناء. و علاج الجراحات. هو دابك الرفيع يا اخوي بريمة. عايز اقول. قد يكون الفقر. و السوشال ميديا. والهواتف الذكية. الانتر نت ادخل كل البلاوي. بعد الناس عن القرآن الكريم. ترك المساجد خاوية. البعد عن الزواج. وانتشار الخمور والزيني. ترك الصلاة. خلاصة البعد عن الله. من اعرض عن ذكرى فإن له معيشة ضنكة. تحياتي .
*** مداخلة من الايفون.
عزالدين عباس الفحل ابوظبي
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: عزالدين عباس الفحل)
|
ول أبا كبر، كل عام وأنت والأسرة بخير ..
Quote: ول ابا بريمة..حبابك يا صديقي كل سنة وانت طيب..و عيد الحول ما يغضب زول ، زايدين ماني ناقصين..!
ونعتذر لأخونا حسن ابراهيم..لكن هو مثل..وفيهو كتير من الصحة.. وبنطبق على السودانيين الجايين من اوربا ونورث امريكا ، بره ماشين زي السلك.. يرجعوا السودان ويخشوا المعمعة..! |
الحل شنو يا ول أبا كبر ..
نحن كشعب .. واضح نحن أمام معضلة .. ما الحل فى نظرك؟ .. معقولة أبداعات الشعب السودانى فى سلوك حياته ومعاشه وحصيلة تجاربه الحياتيه كلها لا تسعف فى إيجاد مخرج من مسألة الفساد.
بريمة
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: بريمة محمد)
|
ول أبا عز الدين الفحل، كل عام وأنت والأسرة بألف خير ..
Quote: كل سنة وانت طيب. صديقي بريمة. بوست في منتهي الجمال. النقد البناء. و علاج الجراحات. هو دابك الرفيع يا اخوي بريمة. عايز اقول. قد يكون الفقر. و السوشال ميديا. والهواتف الذكية. الانتر نت ادخل كل البلاوي. بعد الناس عن القرآن الكريم. ترك المساجد خاوية. البعد عن الزواج. وانتشار الخمور والزيني. ترك الصلاة. خلاصة البعد عن الله. من اعرض عن ذكرى فإن له معيشة ضنكة. تحياتي . |
تسلم يا حبيب علي الطلة ..
بريمة
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: بريمة محمد)
|
ول أبا حسن، سلامات ..
Quote: هنا أستطيع أن أقول وبمفهومنا نحن للأخلاق أنها تتناسب تناسب طردي مع ظروفنا الإقتصادية . فأنت لا يعقل أن تطالب رجل المرور ألا يرتشي وراتبه لا يغطي حلة اليوم .
لا يمكن أن نتحدث عن الأخلاق بمعزل عن أوضاعنا السياسية في أي زمن من الأزمان . فأنت حينما تتظلم من أحد ولا ينصفك القضاء لأنه غير مستقل أو يفتقر للنزاهة , تضطر حينها أن تأخذ حقك "زندية" وهنا تكمن شرعة الغاب . |
حسب رأيك يا ول أبا حسن، ظروف المعيشة هى التى أضطرتنا للفساد .. نسألك يا ول أبا حتى نتوسع فى النقاش .. ماهى الظروف المعيشية التى تواجه ناس يسكنون القصور أو زراء فى الدولة ..؟ لا توجد .. لا بد أن يكن هناك مبرر أخر لفسادهم ..
بريمة
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: بريمة محمد)
|
سلام أخي بريمه والمتداخلين عساكم طيبين وعيدكم مبارك أولا اعتقد أن هناك مفاهيم متفق عليها: *الأخلاق هي مجموعات صفات أو سمات تميز الفرد ( حسنة أو سيئة ) يكتسبها خلال تنشئته الاجتماعية. *الأخلاقيات : مجموعة قيم تعتبر صواب في مجتمع معين وبالتالي هي تختلف من مجتمع لآخر ؛ وهنا حديثك عن عدم أخلاقية المجتمع الدنمركي غير صحيح. *الشفافية: هي الوضوح في ابسط معانيها سواء كان على المستوي الشخصي أو النظام المجتمعي أو نظام الحكم. وللإجابة على سؤال من افسد أخلاقنا كشعب سوداني يجب علينا أن ننظر إلي المكان الذي يكتسب فيه الفرد مجموعة سماته الأخلاقية؛ الأسرة، الشارع، النظام التعليمي. إذا نظرنا إلي النظام الأسري في السودان الآن فحدث ولا حرج وهذا ينطبق على الشارع ونظام التعليم. نحن شعب فاسد في معظمنا ؟ ...نعم نحن شعب فقد هويته طعمه، لونه ورائحته في ظل نظام الإنقاذ وحكم العسكر .. نعم .
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: Fatima Alhaj)
|
شكراً فاطمة الحاج وكل عام وأنتم بخير ..
Quote: الشفافية هى الوضوح فى أبسط معانيها سواء كان علي المستوي الشخصي أو النظام المجتمعى أو نظام الحكم. |
ما رأيك فى أن الشفافية هى الأمانة فى حفظ الحق العام؟ .. أي أنها أخلاق .. ونحن فسدنا فيها لأسباب عدة منها التى ذكرتيها فى مداخلتك وغيرها.
بريمة
| |
|
|
|
|
|
|
Re: الشفافية: من الذي أفسد أخلاقنا كشعب سودان� (Re: بريمة محمد)
|
أخي بريمة Quote:
ما رأيك فى أن الشفافية هى الأمانة فى حفظ الحق العام؟ |
أن الاخلاق والمبادي لا تتجزأ، فمن لا يتعامل بشفافية في جميع مناحي حياته لا يمكن أن يتعامل بشفافية مع المال العام. والشفافية في نظام الحكم هي اساس نظافة اليد لقناعة الشعب بما تقدمه الحكومة وبما تقوم به، وهذا أس البلاء في نظام الانقاذ. فمن لا تدردعة الاخلاق يجب أن يردعة القانون.
| |
|
|
|
|
|
|
|